Utshovঅধ্যায় 105
105.1
লোমশ উবাচ
এতচ্ছ্রুত্বান্তরিক্ষাচ্চ স রাজা রাজসত্তম
যথোক্তং তচ্চকারাথ শ্রদ্দধদ্ভরতর্ষভ
105.2
ষষ্টিঃ পুত্রসহস্রাণি তস্যাপ্রতিমতেজসঃ
রুদ্রপ্রসাদাদ্রাজর্ষেঃ সমজায়ন্ত পার্থিব
105.3
তে ঘোরাঃ ক্রূরকর্মাণ আকাশপরিসর্পিণঃ
বহুত্বাচ্চাবজানন্তঃ সর্বাঁল্লোকান্সহামরান্
105.4
ত্রিদশাংশ্চাপ্যবাধন্ত তথা গন্ধর্বরাক্ষসান্
সর্বাণি চৈব ভূতানি শূরাঃ সমরশালিনঃ
105.5
বধ্যমানাস্ততো লোকাঃ সাগরৈর্মন্দবুদ্ধিভিঃ
ব্রহ্মাণং শরণং জগ্মুঃ সহিতাঃ সর্বদৈবতৈঃ
105.6
তানুবাচ মহাভাগঃ সর্বলোকপিতামহঃ
গচ্ছধ্বং ত্রিদশাঃ সর্বে লোকৈঃ সার্ধং যথাগতম্
105.7
নাতিদীর্ঘেণ কালেন সাগরাণাং ক্ষয়ো মহান্
ভবিষ্যতি মহাঘোরঃ স্বকৃতৈঃ কর্মভিঃ সুরাঃ
105.8
এবমুক্তাস্ততো দেবা লোকাশ্চ মনুজেশ্বর
পিতামহমনুজ্ঞাপ্য বিপ্রজগ্মুর্যথাগতম্
105.9
ততঃ কালে বহুতিথে ব্যতীতে ভরতর্ষভ
দীক্ষিতঃ সগরো রাজা হয়মেধেন বীর্যবান্
তস্যাশ্বো ব্যচরদ্ভূমিং পুত্রৈঃ সুপরিরক্ষিতঃ
105.10
সমুদ্রং স সমাসাদ্য নিস্তোয়ং ভীমদর্শনম্
রক্ষ্যমাণঃ প্রয়ত্নেন তত্রৈবান্তরধীয়ত
105.11
ততস্তে সাগরাস্তাত হৃতং মত্বা হয়োত্তমম্
আগম্য পিতুরাচখ্যুরদৃশ্যং তুরগং হৃতম্
তেনোক্তা দিক্ষু সর্বাসু সর্বে মার্গত বাজিনম্
105.12
ততস্তে পিতুরাজ্ঞায় দিক্ষু সর্বাসু তং হয়ম্
অমার্গন্ত মহারাজ সর্বং চ পৃথিবীতলম্
105.13
ততস্তে সাগরাঃ সর্বে সমুপেত্য পরস্পরম্
নাধ্যগচ্ছন্ত তুরগমশ্বহর্তারমেব চ
105.14
আগম্য পিতরং চোচুস্ততঃ প্রাঞ্জলয়োঽগ্রতঃ
সসমুদ্রবনদ্বীপা সনদীনদকন্দরা
সপর্বতবনোদ্দেশা নিখিলেন মহী নৃপ
105.15
অস্মাভির্বিচিতা রাজঞ্শাসনাত্তব পার্থিব
ন চাশ্বমধিগচ্ছামো নাশ্বহর্তারমেব চ
105.16
শ্রুত্বা তু বচনং তেষাং স রাজা ক্রোধমূর্ছিতঃ
উবাচ বচনং সর্বাংস্তদা দৈববশান্নৃপ
105.17
অনাগমায় গচ্ছধ্বং ভূয়ো মার্গত বাজিনম্
যজ্ঞিয়ং তং বিনা হ্যশ্বং নাগন্তব্যং হি পুত্রকাঃ
105.18
প্রতিগৃহ্য তু সংদেশং ততস্তে সগরাত্মজাঃ
ভূয় এব মহীং কৃত্স্নাং বিচেতুমুপচক্রমুঃ
105.19
অথাপশ্যন্ত তে বীরাঃ পৃথিবীমবদারিতাম্
সমাসাদ্য বিলং তচ্চ খনন্তঃ সগরাত্মজাঃ
কুদ্দালৈর্হ্রেষুকৈশ্চৈব সমুদ্রমখনংস্তদা
105.20
স খন্যমানঃ সহিতৈঃ সাগরৈর্বরুণালয়ঃ
অগচ্ছত্পরমামার্তিং দার্যমাণঃ সমন্ততঃ
105.21
অসুরোরগরক্ষাংসি সত্ত্বানি বিবিধানি চ
আর্তনাদমকুর্বন্ত বধ্যমানানি সাগরৈঃ
105.22
ছিন্নশীর্ষা বিদেহাশ্চ ভিন্নজান্বস্থিমস্তকাঃ
প্রাণিনঃ সমদৃশ্যন্ত শতশোঽথ সহস্রশঃ
105.23
এবং হি খনতাং তেষাং সমুদ্রং মকরালয়ম্
ব্যতীতঃ সুমহান্কালো ন চাশ্বঃ সমদৃশ্যত
105.24
ততঃ পূর্বোত্তরে দেশে সমুদ্রস্য মহীপতে
বিদার্য পাতালমথ সংক্রুদ্ধাঃ সগরাত্মজাঃ
অপশ্যন্ত হয়ং তত্র বিচরন্তং মহীতলে
105.25
কপিলং চ মহাত্মানং তেজোরাশিমনুত্তমম্
তপসা দীপ্যমানং তং জ্বালাভিরিব পাবকম্