অধ্যায় 104

104.1

লোমশ উবাচ
তানুবাচ সমেতাংস্তু ব্রহ্মা লোকপিতামহঃ
গচ্ছধ্বং বিবুধাঃ সর্বে যথাকামং যথেপ্সিতম্

মহতা কালয়োগেন প্রকৃতিং যাস্যতেঽর্ণবঃ
জ্ঞাতীন্বৈ কারণং কৃত্বা মহারাজ্ঞো ভগীরথাৎ

যুধিষ্ঠির উবাচ
কথং বৈ জ্ঞাতয়ো ব্রহ্মন্কারণং চাত্র কিং মুনে
কথং সমুদ্রঃ পূর্ণশ্চ ভগীরথপরিশ্রমাৎ

এতদিচ্ছাম্যহং শ্রোতুং বিস্তরেণ তপোধন
কথ্যমানং ত্বয়া বিপ্র রাজ্ঞাং চরিতমুত্তমম্

বৈশংপায়ন উবাচ
এবমুক্তস্তু বিপ্রেন্দ্রো ধর্মরাজ্ঞা মহাত্মনা
কথয়ামাস মাহাত্ম্যং সগরস্য মহাত্মনঃ

লোমশ উবাচ
ইক্ষ্বাকূণাং কুলে জাতঃ সগরো নাম পার্থিবঃ
রূপসত্ত্ববলোপেতঃ স চাপুত্রঃ প্রতাপবান্

স হৈহয়ান্সমুত্সাদ্য তালজঙ্ঘাংশ্চ ভারত
বশে চ কৃত্বা রাজ্ঞোঽন্যান্স্বরাজ্যমন্বশাসত

তস্য ভার্যে ত্বভবতাং রূপয়ৌবনদর্পিতে
বৈদর্ভী ভরতশ্রেষ্ঠ শৈব্যা চ ভরতর্ষভ

স পুত্রকামো নৃপতিস্ততাপ সুমহত্তপঃ
পত্নীভ্যাং সহ রাজেন্দ্র কৈলাসং গিরিমাশ্রিতঃ

স তপ্যমানঃ সুমহত্তপো যোগসমন্বিতঃ
আসসাদ মহাত্মানং ত্র্যক্ষং ত্রিপুরমর্দনম্

শংকরং ভবমীশানং শূলপানিং পিনাকিনম্
ত্র্যম্বকং শিবমুগ্রেশং বহুরূপমুমাপতিম্

স তং দৃষ্ট্বৈব বরদং পত্নীভ্যাং সহিতো নৃপঃ
প্রণিপত্য মহাবাহুঃ পুত্রার্থং সময়াচত

তং প্রীতিমান্হরঃ প্রাহ সভার্যং নৃপসত্তমম্
যস্মিন্বৃতো মুহূর্তেঽহং ত্বয়েহ নৃপতে বরম্

ষষ্টিঃ পুত্রসহস্রাণি শূরাঃ সমরদর্পিতাঃ
একস্যাং সংভবিষ্যন্তি পত্ন্যাং তব নরোত্তম

তে চৈব সর্বে সহিতাঃ ক্ষয়ং যাস্যন্তি পার্থিব
একো বংশধরঃ শূর একস্যাং সংভবিষ্যতি
এবমুক্ত্বা তু তং রুদ্রস্তত্রৈবান্তরধীয়ত

স চাপি সগরো রাজা জগাম স্বং নিবেশনম্
পত্নীভ্যাং সহিতস্তাত সোঽতিহৃষ্টমনাস্তদা

তস্যাথ মনুজশ্রেষ্ঠ তে ভার্যে কমলেক্ষণে
বৈদর্ভী চৈব শৈব্যা চ গর্ভিণ্যৌ সংবভূবতুঃ

ততঃ কালেন বৈদর্ভী গর্ভালাবুং ব্যজায়ত
শৈব্যা চ সুষুবে পুত্রং কুমারং দেবরূপিণম্

তদালাবুং সমুত্স্রষ্টুং মনশ্চক্রে স পার্থিবঃ
অথান্তরিক্ষাচ্ছুশ্রাব বাচং গম্ভীরনিস্বনাম্

রাজন্মা সাহসং কার্ষীঃ পুত্রান্ন ত্যক্তুমর্হসি
অলাবুমধ্যান্নিষ্কৃষ্য বীজং যত্নেন গোপ্যতাম্

সোপস্বেদেষু পাত্রেষু ঘৃতপূর্ণেষু ভাগশঃ
ততঃ পুত্রসহস্রাণি ষষ্টিং প্রাপ্স্যসি পার্থিব

মহাদেবেন দিষ্টং তে পুত্রজন্ম নরাধিপ
অনেন ক্রময়োগেন মা তে বুদ্ধিরতোঽন্যথা