অধ্যায় 103

103.1

লোমশ উবাচ
সমুদ্রং স সমাসাদ্য বারুণির্ভগবানৃষিঃ
উবাচ সহিতান্দেবানৃষীংশ্চৈব সমাগতান্

এষ লোকহিতার্থং বৈ পিবামি বরুণালয়ম্
ভবদ্ভির্যদনুষ্ঠেয়ং তচ্ছীঘ্রং সংবিধীয়তাম্

এতাবদুক্ত্বা বচনং মৈত্রাবরুণিরচ্যুতঃ
সমুদ্রমপিবত্ক্রুদ্ধঃ সর্বলোকস্য পশ্যতঃ

পীয়মানং সমুদ্রং তু দৃষ্ট্বা দেবাঃ সবাসবাঃ
বিস্ময়ং পরমং জগ্মুঃ স্তুতিভিশ্চাপ্যপূজয়ন্

ত্বং নস্ত্রাতা বিধাতা চ লোকানাং লোকভাবনঃ
ত্বত্প্রসাদাত্সমুচ্ছেদং ন গচ্ছেত্সামরং জগৎ

সংপূজ্যমানস্ত্রিদশৈর্মহাত্মা; গন্ধর্বতূর্যেষু নদত্সু সর্বশঃ
দিব্যৈশ্চ পুষ্পৈরবকীর্যমাণো; মহার্ণবং নিঃসলিলং চকার

দৃষ্ট্বা কৃতং নিঃসলিলং মহার্ণবং; সুরাঃ সমস্তাঃ পরমপ্রহৃষ্টাঃ
প্রগৃহ্য দিব্যানি বরায়ুধানি; তান্দানবাঞ্জঘ্নুরদীনসত্ত্বাঃ

তে বধ্যমানাস্ত্রিদশৈর্মহাত্মভি;র্মহাবলৈর্বেগিভিরুন্নদদ্ভিঃ
ন সেহিরে বেগবতাং মহাত্মনাং; বেগং তদা ধারয়িতুং দিবৌকসাম্

তে বধ্যমানাস্ত্রিদশৈর্দানবা ভীমনিস্বনাঃ
চক্রুঃ সুতুমুলং যুদ্ধং মুহূর্তমিব ভারত

তে পূর্বং তপসা দগ্ধা মুনিভির্ভাবিতাত্মভিঃ
যতমানাঃ পরং শক্ত্যা ত্রিদশৈর্বিনিষূদিতাঃ

তে হেমনিষ্কাভরণাঃ কুণ্ডলাঙ্গদধারিণঃ
নিহত্য বহ্বশোভন্ত পুষ্পিতা ইব কিংশুকাঃ

হতশেষাস্ততঃ কেচিত্কালেয়া মনুজোত্তম
বিদার্য বসুধাং দেবীং পাতালতলমাশ্রিতাঃ

নিহতান্দানবান্দৃষ্ট্বা ত্রিদশা মুনিপুংগবম্
তুষ্টুবুর্বিবিধৈর্বাক্যৈরিদং চৈবাব্রুবন্বচঃ

ত্বত্প্রসাদান্মহাভাগ লোকৈঃ প্রাপ্তং মহত্সুখম্
ত্বত্তেজসা চ নিহতাঃ কালেয়াঃ ক্রূরবিক্রমাঃ

পূরয়স্ব মহাবাহো সমুদ্রং লোকভাবন
যত্ত্বয়া সলিলং পীতং তদস্মিন্পুনরুত্সৃজ

এবমুক্তঃ প্রত্যুবাচ ভগবান্মুনিপুংগবঃ
জীর্ণং তদ্ধি ময়া তোয়মুপায়োঽন্যঃ প্রচিন্ত্যতাম্
পূরণার্থং সমুদ্রস্য ভবদ্ভির্যত্নমাস্থিতৈঃ

এতচ্ছ্রুত্বা তু বচনং মহর্ষের্ভাবিতাত্মনঃ
বিস্মিতাশ্চ বিষণ্ণাশ্চ বভূবুঃ সহিতাঃ সুরাঃ

পরস্পরমনুজ্ঞাপ্য প্রণম্য মুনিপুংগবম্
প্রজাঃ সর্বা মহারাজ বিপ্রজগ্মুর্যথাগতম্

ত্রিদশা বিষ্ণুনা সার্ধমুপজগ্মুঃ পিতামহম্
পূরণার্থং সমুদ্রস্য মন্ত্রয়িত্বা পুনঃ পুনঃ
ঊচুঃ প্রাঞ্জলয়ঃ সর্বে সাগরস্যাভিপূরণম্