অধ্যায় 102

102.1

যুধিষ্ঠির উবাচ
কিমর্থং সহসা বিন্ধ্যঃ প্রবৃদ্ধঃ ক্রোধমূর্ছিতঃ
এতদিচ্ছাম্যহং শ্রোতুং বিস্তরেণ মহামুনে

লোমশ উবাচ
অদ্রিরাজং মহাশৈলং মরুং কনকপর্বতম্
উদয়াস্তময়ে ভানুঃ প্রদক্ষিণমবর্তত

তং তু দৃষ্ট্বা তথা বিন্ধ্যঃ শৈলঃ সূর্যমথাব্রবীৎ
যথা হি মেরুর্ভবতা নিত্যশঃ পরিগম্যতে
প্রদক্ষিণং চ ক্রিয়তে মামেবং কুরু ভাস্কর

এবমুক্তস্ততঃ সূর্যঃ শৈলেন্দ্রং প্রত্যভাষত
নাহমাত্মেচ্ছয়া শৈল করোম্যেনং প্রদক্ষিণম্
এষ মার্গঃ প্রদিষ্টো মে যেনেদং নির্মিতং জগৎ

এবমুক্তস্ততঃ ক্রোধাত্প্রবৃদ্ধঃ সহসাচলঃ
সূর্যাচন্দ্রমসোর্মার্গং রোদ্ধুমিচ্ছন্পরংতপ

ততো দেবাঃ সহিতাঃ সর্ব এব; সেন্দ্রাঃ সমাগম্য মহাদ্রিরাজম্
নিবারয়ামাসুরুপায়তস্তং; ন চ স্ম তেষাং বচনং চকার

অথাভিজগ্মুর্মুনিমাশ্রমস্থং; তপস্বিনং ধর্মভৃতাং বরিষ্ঠম্
অগস্ত্যমত্যদ্ভুতবীর্যদীপ্তং; তং চার্থমূচুঃ সহিতাঃ সুরাস্তে

দেবা ঊচুঃ
সূর্যাচন্দ্রমসোর্মার্গং নক্ষত্রাণাং গতিং তথা
শৈলরাজো বৃণোত্যেষ বিন্ধ্যঃ ক্রোধবশানুগঃ

তং নিবারয়িতুং শক্তো নান্যঃ কশ্চিদ্দ্বিজোত্তম
ঋতে ত্বাং হি মহাভাগ তস্মাদেনং নিবারয়

লোমশ উবাচ
তচ্ছ্রুত্বা বচনং বিপ্রঃ সুরাণাং শৈলমভ্যগাৎ
সোঽভিগম্যাব্রবীদ্বিন্ধ্যং সদারঃ সমুপস্থিতঃ

মার্গমিচ্ছাম্যহং দত্তং ভবতা পর্বতোত্তম
দক্ষিণামভিগন্তাস্মি দিশং কার্যেণ কেনচিৎ

যাবদাগমনং মহ্যং তাবত্ত্বং প্রতিপালয়
নিবৃত্তে ময়ি শৈলেন্দ্র ততো বর্ধস্ব কামতঃ

এবং স সময়ং কৃত্বা বিন্ধ্যেনামিত্রকর্শন
অদ্যাপি দক্ষিণাদ্দেশাদ্বারুণির্ন নিবর্ততে

এতত্তে সর্বমাখ্যাতং যথা বিন্ধ্যো ন বর্ধতে
অগস্ত্যস্য প্রভাবেন যন্মাং ত্বং পরিপৃচ্ছসি

কালেয়াস্তু যথা রাজন্সুরৈঃ সর্বৈর্নিষূদিতাঃ
অগস্ত্যাদ্বরমাসাদ্য তন্মে নিগদতঃ শৃণু

ত্রিদশানাং বচঃ শ্রুত্বা মৈত্রাবরুণিরব্রবীৎ
কিমর্থমভিয়াতাঃ স্থ বরং মত্তঃ কিমিচ্ছথ
এবমুক্তাস্ততস্তেন দেবাস্তং মুনিমব্রুবন্

এবং ত্বয়েচ্ছাম কৃতং মহর্ষে; মহার্ণবং পীয়মানং মহাত্মন্
ততো বধিষ্যাম সহানুবন্ধা;ন্কালেয়সংজ্ঞান্সুরবিদ্বিষস্তান্

ত্রিদশানাং বচঃ শ্রুত্বা তথেতি মুনিরব্রবীৎ
করিষ্যে ভবতাং কামং লোকানাং চ মহত্সুখম্

এবমুক্ত্বা ততোঽগচ্ছত্সমুদ্রং সরিতাং পতিম্
ঋষিভিশ্চ তপঃসিদ্ধৈঃ সার্ধং দেবৈশ্চ সুব্রতঃ

মনুষ্যোরগগন্ধর্বয়ক্ষকিংপুরুষাস্তথা
অনুজগ্মুর্মহাত্মানং দ্রষ্টুকামাস্তদদ্ভুতম্

ততোঽভ্যগচ্ছন্সহিতাঃ সমুদ্রং ভীমনিস্বনম্
নৃত্যন্তমিব চোর্মীভির্বল্গন্তমিব বায়ুনা

হসন্তমিব ফেনৌঘৈঃ স্খলন্তং কন্দরেষু চ
নানাগ্রাহসমাকীর্ণং নানাদ্বিজগণায়ুতম্

অগস্ত্যসহিতা দেবাঃ সগন্ধর্বমহোরগাঃ
ঋষয়শ্চ মহাভাগাঃ সমাসেদুর্মহোদধিম্