অধ্যায় 101

101.1

দেবা ঊচুঃ
ইতঃ প্রদানাদ্বর্তন্তে প্রজাঃ সর্বাশ্চতুর্বিধাঃ
তা ভাবিতা ভাবয়ন্তি হব্যকব্যৈর্দিবৌকসঃ

লোকা হ্যেবং বর্তয়ন্তি অন্যোন্যং সমুপাশ্রিতাঃ
ত্বত্প্রসাদান্নিরুদ্বিগ্নাস্ত্বয়ৈব পরিরক্ষিতাঃ

ইদং চ সমনুপ্রাপ্তং লোকানাং ভয়মুত্তমম্
ন চ জানীম কেনেমে রাত্রৌ বধ্যন্তি ব্রাহ্মণাঃ

ক্ষীণেষু চ ব্রাহ্মণেষু পৃথিবী ক্ষয়মেষ্যতি
ততঃ পৃথিব্যাং ক্ষীণায়াং ত্রিদিবং ক্ষয়মেষ্যতি

ত্বত্প্রসাদান্মহাবাহো লোকাঃ সর্বে জগত্পতে
বিনাশং নাধিগচ্ছেয়ুস্ত্বয়া বৈ পরিরক্ষিতাঃ

বিষ্ণুরুবাচ
বিদিতং মে সুরাঃ সর্বং প্রজানাং ক্ষয়কারণম্
ভবতাং চাপি বক্ষ্যামি শৃণুধ্বং বিগতজ্বরাঃ

কালেয় ইতি বিখ্যাতো গণঃ পরমদারুণঃ
তৈশ্চ বৃত্রং সমাশ্রিত্য জগত্সর্বং প্রবাধিতম্

তে বৃত্রং নিহতং দৃষ্ট্বা সহস্রাক্ষেণ ধীমতা
জীবিতং পরিরক্ষন্তঃ প্রবিষ্টা বরুণালয়ম্

তে প্রবিশ্যোদধিং ঘোরং নক্রগ্রাহসমাকুলম্
উত্সাদনার্থং লোকানাং রাত্রৌ ঘ্নন্তি মুনীনিহ

ন তু শক্যাঃ ক্ষয়ং নেতুং সমুদ্রাশ্রয়গা হি তে
সমুদ্রস্য ক্ষয়ে বুদ্ধির্ভবদ্ভিঃ সংপ্রধার্যতাম্
অগস্ত্যেন বিনা কো হি শক্তোঽন্যোঽর্ণবশোষণে

এতচ্ছ্রুত্বা বচো দেবা বিষ্ণুনা সমুদাহৃতম্
পরমেষ্ঠিনমাজ্ঞাপ্য অগস্ত্যস্যাশ্রমং যয়ুঃ

তত্রাপশ্যন্মহাত্মানং বারুণিং দীপ্ততেজসম্
উপাস্যমানমৃষিভির্দেবৈরিব পিতামহম্

তেঽভিগম্য মহাত্মানং মৈত্রাবরুণিমচ্যুতম্
আশ্রমস্থং তপোরাশিং কর্মভিঃ স্বৈরভিষ্টুবন্

দেবা ঊচুঃ
নহুষেণাভিতপ্তানাং ত্বং লোকানাং গতিঃ পুরা
ভ্রংশিতশ্চ সুরৈশ্বর্যাল্লোকার্থং লোককণ্টকঃ

ক্রোধাত্প্রবৃদ্ধঃ সহসা ভাস্করস্য নগোত্তমঃ
বচস্তবানতিক্রামন্বিন্ধ্যঃ শৈলো ন বর্ধতে

তমসা চাবৃতে লোকে মৃত্যুনাভ্যর্দিতাঃ প্রজাঃ
ত্বামেব নাথমাসাদ্য নির্বৃতিং পরমাং গতাঃ

অস্মাকং ভয়ভীতানাং নিত্যশো ভগবান্গতিঃ
ততস্ত্বার্তাঃ প্রয়াচামস্ত্বাং বরং বরদো হ্যসি