Utshovঅধ্যায় 100
100.1
লোমশ উবাচ
সমুদ্রং তে সমাশ্রিত্য বারুণং নিধিমম্ভসাম্
কালেয়াঃ সংপ্রবর্তন্ত ত্রৈলোক্যস্য বিনাশনে
100.2
তে রাত্রৌ সমভিক্রুদ্ধা ভক্ষয়ন্তি সদা মুনীন্
আশ্রমেষু চ যে সন্তি পুন্যেষ্বায়তনেষু চ
100.3
বসিষ্ঠস্যাশ্রমে বিপ্রা ভক্ষিতাস্তৈর্দুরাত্মভিঃ
অশীতিশতমষ্টৌ চ নব চান্যে তপস্বিনঃ
100.4
চ্যবনস্যাশ্রমং গত্বা পুণ্যং দ্বিজনিষেবিতম্
ফলমূলাশনানাং হি মুনীনাং ভক্ষিতং শতম্
100.5
এবং রাত্রৌ স্ম কুর্বন্তি বিবিশুশ্চার্ণবং দিবা
ভরদ্বাজাশ্রমে চৈব নিয়তা ব্রহ্মচারিণঃ
বায্বাহারাম্বুভক্ষাশ্চ বিংশতিঃ সংনিপাতিতাঃ
100.6
এবং ক্রমেণ সর্বাংস্তানাশ্রমান্দানবাস্তদা
নিশায়াং পরিধাবন্তি মত্তা ভুজবলাশ্রয়াৎ
কালোপসৃষ্টাঃ কালেয়া ঘ্নন্তো দ্বিজগণান্বহূন্
100.7
ন চৈনানন্ববুধ্যন্ত মনুজা মনুজোত্তম
এবং প্রবৃত্তান্দৈত্যাংস্তাংস্তাপসেষু তপস্বিষু
100.8
প্রভাতে সমদৃশ্যন্ত নিয়তাহারকর্শিতাঃ
মহীতলস্থা মুনয়ঃ শরীরৈর্গতজীবিতৈঃ
100.9
ক্ষীণমাংসৈর্বিরুধিরৈর্বিমজ্জান্ত্রৈর্বিসংধিভিঃ
আকীর্ণৈরাচিতা ভূমিঃ শঙ্খানামিব রাশিভিঃ
100.10
কলশৈর্বিপ্রবিদ্ধৈশ্চ স্রুবৈর্ভগ্নৈস্তথৈব চ
বিকীর্ণৈরগ্নিহোত্রৈশ্চ ভূর্বভূব সমাবৃতা
100.11
নিঃস্বাধ্যায়বষট্কারং নষ্টয়জ্ঞোত্সবক্রিয়ম্
জগদাসীন্নিরুত্সাহং কালেয়ভয়পীডিতম্
100.12
এবং প্রক্ষীয়মাণাশ্চ মানবা মনুজেশ্বর
আত্মত্রাণপরা ভীতাঃ প্রাদ্রবন্ত দিশো ভয়াৎ
100.13
কেচিদ্গুহাঃ প্রবিবিশুর্নির্ঝরাংশ্চাপরে শ্রিতাঃ
অপরে মরণোদ্বিগ্না ভয়াত্প্রানান্সমুত্সৃজন্
100.14
কেচিদত্র মহেষ্বাসাঃ শূরাঃ পরমদর্পিতাঃ
মার্গমাণাঃ পরং যত্নং দানবানাং প্রচক্রিরে
100.15
ন চৈতানধিজগ্মুস্তে সমুদ্রং সমুপাশ্রিতান্
শ্রমং জগ্মুশ্চ পরমমাজগ্মুঃ ক্ষয়মেব চ
100.16
জগত্যুপশমং যাতে নষ্টয়জ্ঞোত্সবক্রিয়ে
আজগ্মুঃ পরমামার্তিং ত্রিদশা মনুজেশ্বর
100.17
সমেত্য সমহেন্দ্রাশ্চ ভয়ান্মন্ত্রং প্রচক্রিরে
নারায়ণং পুরস্কৃত্য বৈকুণ্ঠমপরাজিতম্
100.18
ততো দেবাঃ সমেতাস্তে তদোচুর্মধুসূদনম্
ত্বং নঃ স্রষ্টা চ পাতা চ ভর্তা চ জগতঃ প্রভো
ত্বয়া সৃষ্টমিদং সর্বং যচ্চেঙ্গং যচ্চ নেঙ্গতি
100.19
ত্বয়া ভূমিঃ পুরা নষ্টা সমুদ্রাত্পুষ্করেক্ষণ
বারাহং রূপমাস্থায় জগদর্থে সমুদ্ধৃতা
100.20
আদিদৈত্যো মহাবীর্যো হিরণ্যকশিপুস্ত্বয়া
নারসিংহং বপুঃ কৃত্বা সূদিতঃ পুরুষোত্তম
100.21
অবধ্যঃ সর্বভূতানাং বলিশ্চাপি মহাসুরঃ
বামনং বপুরাশ্রিত্য ত্রৈলোক্যাদ্ভ্রংশিতস্ত্বয়া
100.22
অসুরশ্চ মহেষ্বাসো জম্ভ ইত্যভিবিশ্রুতঃ
যজ্ঞক্ষোভকরঃ ক্রূরস্ত্বয়ৈব বিনিপাতিতঃ
100.23
এবমাদীনি কর্মাণি যেষাং সংখ্যা ন বিদ্যতে
অস্মাকং ভয়ভীতানাং ত্বং গতির্মধুসূদন
100.24
তস্মাত্ত্বাং দেব দেবেশ লোকার্থং জ্ঞাপয়ামহে
রক্ষ লোকাংশ্চ দেবাংশ্চ শক্রং চ মহতো ভয়াৎ