Utshovঅধ্যায় 99
99.1
লোমশ উবাচ
ততঃ স বজ্রী বলিভির্দৈবতৈরভিরক্ষিতঃ
আসসাদ ততো বৃত্রং স্থিতমাবৃত্য রোদসী
99.2
কালকেয়ৈর্মহাকায়ৈঃ সমন্তাদভিরক্ষিতম্
সমুদ্যতপ্রহরণৈঃ সশৃঙ্গৈরিব পর্বতৈঃ
99.3
ততো যুদ্ধং সমভবদ্দেবানাং সহ দানবৈঃ
মুহূর্তং ভরতশ্রেষ্ঠ লোকত্রাসকরং মহৎ
99.4
উদ্যতপ্রতিপিষ্টানাং খড্গানাং বীরবাহুভিঃ
আসীত্সুতুমুলঃ শব্দঃ শরীরেষ্বভিপাত্যতাম্
99.5
শিরোভিঃ প্রপতদ্ভিশ্চ অন্তরিক্ষান্মহীতলম্
তালৈরিব মহীপাল বৃন্তাদ্ভ্রষ্টৈরদৃশ্যত
99.6
তে হেমকবচা ভূত্বা কালেয়াঃ পরিঘায়ুধাঃ
ত্রিদশানভ্যবর্তন্ত দাবদগ্ধা ইবাদ্রয়ঃ
99.7
তেষাং বেগবতাং বেগং সহিতানাং প্রধাবতাম্
ন শেকুস্ত্রিদশাঃ সোঢুং তে ভগ্নাঃ প্রাদ্রবন্ভয়াৎ
99.8
তান্দৃষ্ট্বা দ্রবতো ভীতান্সহস্রাক্ষঃ পুরংদরঃ
বৃত্রে বিবর্ধমানে চ কশ্মলং মহদাবিশৎ
99.9
তং শক্রং কশ্মলাবিষ্টং দৃষ্ট্বা বিষ্ণুঃ সনাতনঃ
স্বতেজো ব্যদধাচ্ছক্রে বলমস্য বিবর্ধয়ন্
99.10
বিষ্ণুনাপ্যায়িতং শক্রং দৃষ্ট্বা দেবগণাস্ততঃ
স্বং স্বং তেজঃ সমাদধ্যুস্তথা ব্রহ্মর্ষয়োঽমলাঃ
99.11
স সমাপ্যায়িতঃ শক্রো বিষ্ণুনা দৈবতৈঃ সহ
ঋষিভিশ্চ মহাভাগৈর্বলবান্সমপদ্যত
99.12
জ্ঞাত্বা বলস্থং ত্রিদশাধিপং তু; ননাদ বৃত্রো মহতো নিনাদান্
তস্য প্রণাদেন ধরা দিশশ্চ; খং দ্যৌর্নগাশ্চাপি চচাল সর্বম্
99.13
ততো মহেন্দ্রঃ পরমাভিতপ্তঃ; শ্রুত্বা রবং ঘোররূপং মহান্তম্
ভয়ে নিমগ্নস্ত্বরিতং মুমোচ; বজ্রং মহত্তস্য বধায় রাজন্
99.14
স শক্রবজ্রাভিহতঃ পপাত; মহাসুরঃ কাঞ্চনমাল্যধারী
যথা মহাঞ্শৈলবরঃ পুরস্তা;ত্স মন্দরো বিষ্ণুকরাত্প্রমুক্তঃ
99.15
তস্মিন্হতে দৈত্যবরে ভয়ার্তঃ; শক্রঃ প্রদুদ্রাব সরঃ প্রবেষ্টুম্
বজ্রং ন মেনে স্বকরাত্প্রমুক্তং; বৃত্রং হতং চাপি ভয়ান্ন মেনে
99.16
সর্বে চ দেবা মুদিতাঃ প্রহৃষ্টা; মহর্ষয়শ্চেন্দ্রমভিষ্টুবন্তঃ
সর্বাংশ্চ দৈত্যাংস্ত্বরিতাঃ সমেত্য; জঘ্নুঃ সুরা বৃত্রবধাভিতপ্তান্
99.17
তে বধ্যমানাস্ত্রিদশৈস্তদানীং; সমুদ্রমেবাবিবিশুর্ভয়ার্তাঃ
প্রবিশ্য চৈবোদধিমপ্রমেয়ং; ঝষাকুলং রত্নসমাকুলং চ
99.18
তদা স্ম মন্ত্রং সহিতাঃ প্রচক্রু;স্ত্রৈলোক্যনাশার্থমভিস্ময়ন্তঃ
তত্র স্ম কেচিন্মতিনিশ্চয়জ্ঞা;স্তাংস্তানুপায়াননুবর্ণয়ন্তি
99.19
তেষাং তু তত্র ক্রমকালয়োগা;দ্ঘোরা মতিশ্চিন্তয়তাং বভূব
যে সন্তি বিদ্যাতপসোপপন্না;স্তেষাং বিনাশঃ প্রথমং তু কার্যঃ
99.20
লোকা হি সর্বে তপসা ধ্রিয়ন্তে; তস্মাত্ত্বরধ্বং তপসঃ ক্ষয়ায়
যে সন্তি কেচিদ্ধি বসুংধরায়াং; তপস্বিনো ধর্মবিদশ্চ তজ্জ্ঞাঃ
তেষাং বধঃ ক্রিয়তাং ক্ষিপ্রমেব; তেষু প্রনষ্টেষু জগত্প্রনষ্টম্
99.21
এবং হি সর্বে গতবুদ্ধিভাবা; জগদ্বিনাশে পরমপ্রহৃষ্টাঃ
দুর্গং সমাশ্রিত্য মহোর্মিমন্তং; রত্নাকরং বরুণস্যালয়ং স্ম