অধ্যায় 98

98.1

যুধিষ্ঠির উবাচ
ভূয় এবাহমিচ্ছামি মহর্ষেস্তস্য ধীমতঃ
কর্মণাং বিস্তরং শ্রোতুমগস্ত্যস্য দ্বিজোত্তম

98.2

লোমশ উবাচ
শৃণু রাজন্কথাং দিব্যামদ্ভুতামতিমানুষীম্
অগস্ত্যস্য মহারাজ প্রভাবমমিতাত্মনঃ

98.3

আসন্কৃতয়ুগে ঘোরা দানবা যুদ্ধদুর্মদাঃ
কালেয়া ইতি বিখ্যাতা গণাঃ পরমদারুণাঃ

98.4

তে তু বৃত্রং সমাশ্রিত্য নানাপ্রহরণোদ্যতাঃ
সমন্তাত্পর্যধাবন্ত মহেন্দ্রপ্রমুখান্সুরান্

98.5

ততো বৃত্রবধে যত্নমকুর্বংস্ত্রিদশাঃ পুরা
পুরংদরং পুরস্কৃত্য ব্রহ্মাণমুপতস্থিরে

98.6

কৃতাঞ্জলীংস্তু তান্সর্বান্পরমেষ্ঠী উবাচ হ
বিদিতং মে সুরাঃ সর্বং যদ্বঃ কার্যং চিকীর্ষিতম্

98.7

তমুপায়ং প্রবক্ষ্যামি যথা বৃত্রং বধিষ্যথ
দধীচ ইতি বিখ্যাতো মহানৃষিরুদারধীঃ

98.8

তং গত্বা সহিতাঃ সর্বে বরং বৈ সংপ্রয়াচত
স বো দাস্যতি ধর্মাত্মা সুপ্রীতেনান্তরাত্মনা

98.9

স বাচ্যঃ সহিতৈঃ সর্বৈর্ভবদ্ভির্জয়কাঙ্ক্ষিভিঃ
স্বান্যস্থীনি প্রয়চ্ছেতি ত্রৈলোক্যস্য হিতায় বৈ
স শরীরং সমুত্সৃজ্য স্বান্যস্থীনি প্রদাস্যতি

98.10

তস্যাস্থিভির্মহাঘোরং বজ্রং সংভ্রিয়তাং দৃঢম্
মহচ্ছত্রুহণং তীক্ষ্ণং ষডশ্রং ভীমনিস্বনম্

98.11

তেন বজ্রেণ বৈ বৃত্রং বধিষ্যতি শতক্রতুঃ
এতদ্বঃ সর্বমাখ্যাতং তস্মাচ্ছীঘ্রং বিধীয়তাম্

98.12

এবমুক্তাস্ততো দেবা অনুজ্ঞাপ্য পিতামহম্
নারায়ণং পুরস্কৃত্য দধীচস্যাশ্রমং যয়ুঃ

98.13

সরস্বত্যাঃ পরে পারে নানাদ্রুমলতাবৃতম্
ষট্পদোদ্গীতনিনদৈর্বিঘুষ্টং সামগৈরিব
পুংস্কোকিলরবোন্মিশ্রং জীবংজীবকনাদিতম্

98.14

মহিষৈশ্চ বরাহৈশ্চ সৃমরৈশ্চমরৈরপি
তত্র তত্রানুচরিতং শার্দূলভয়বর্জিতৈঃ

98.15

করেণুভির্বারণৈশ্চ প্রভিন্নকরটামুখৈঃ
সরোঽবগাঢৈঃ ক্রীডদ্ভিঃ সমন্তাদনুনাদিতম্

98.16

সিংহব্যাঘ্রৈর্মহানাদান্নদদ্ভিরনুনাদিতম্
অপরৈশ্চাপি সংলীনৈর্গুহাকন্দরবাসিভিঃ

98.17

তেষু তেষ্ববকাশেষু শোভিতং সুমনোরমম্
ত্রিবিষ্টপসমপ্রখ্যং দধীচাশ্রমমাগমন্

98.18

তত্রাপশ্যন্দধীচং তে দিবাকরসমদ্যুতিম্
জাজ্বল্যমানং বপুষা যথা লক্ষ্ম্যা পিতামহম্

98.19

তস্য পাদৌ সুরা রাজন্নভিবাদ্য প্রণম্য চ
অয়াচন্ত বরং সর্বে যথোক্তং পরমেষ্ঠিনা

98.20

ততো দধীচঃ পরমপ্রতীতঃ; সুরোত্তমাংস্তানিদমভ্যুবাচ
করোমি যদ্বো হিতমদ্য দেবাঃ; স্বং চাপি দেহং ত্বহমুত্সৃজামি

98.21

স এবমুক্ত্বা দ্বিপদাং বরিষ্ঠঃ; প্রাণান্বশী স্বান্সহসোত্সসর্জ
ততঃ সুরাস্তে জগৃহুঃ পরাসো;রস্থীনি তস্যাথ যথোপদেশম্

98.22

প্রহৃষ্টরূপাশ্চ জয়ায় দেবা;স্ত্বষ্টারমাগম্য তমর্থমূচুঃ
ত্বষ্টা তু তেষাং বচনং নিশম্য; প্রহৃষ্টরূপঃ প্রয়তঃ প্রয়ত্নাৎ

98.23

চকার বজ্রং ভৃশমুগ্ররূপং; কৃত্বা চ শক্রং স উবাচ হৃষ্টঃ
অনেন বজ্রপ্রবরেণ দেব; ভস্মীকুরুষ্বাদ্য সুরারিমুগ্রম্

98.24

ততো হতারিঃ সগণঃ সুখং বৈ; প্রশাধি কৃত্স্নং ত্রিদিবং দিবিষ্ঠঃ
ত্বষ্ট্রা তথোক্তঃ স পুরংদরস্তু; বজ্রং প্রহৃষ্টঃ প্রয়তোঽভ্যগৃহ্ণাৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.