Utshovঅধ্যায় 97
97.1
লোমশ উবাচ
ইল্বলস্তান্বিদিত্বা তু মহর্ষিসহিতান্নৃপান্
উপস্থিতান্সহামাত্যো বিষয়ান্তেঽভ্যপূজয়ৎ
97.2
তেষাং ততোঽসুরশ্রেষ্ঠ আতিথ্যমকরোত্তদা
স সংস্কৃতেন কৌরব্য ভ্রাত্রা বাতাপিনা কিল
97.3
ততো রাজর্ষয়ঃ সর্বে বিষণ্ণা গতচেতসঃ
বাতাপিং সংস্কৃতং দৃষ্ট্বা মেষভূতং মহাসুরম্
97.4
অথাব্রবীদগস্ত্যস্তান্রাজর্ষীনৃষিসত্তমঃ
বিষাদো বো ন কর্তব্যো অহং ভোক্ষ্যে মহাসুরম্
97.5
ধুর্যাসনমথাসাদ্য নিষসাদ মহামুনিঃ
তং পর্যবেষদ্দৈত্যেন্দ্র ইল্বলঃ প্রহসন্নিব
97.6
অগস্ত্য এব কৃত্স্নং তু বাতাপিং বুভুজে ততঃ
ভুক্তবত্যসুরোঽঽহ্বানমকরোত্তস্য ইল্বলঃ
97.7
ততো বায়ুঃ প্রাদুরভূদগস্ত্যস্য মহাত্মনঃ
ইল্বলশ্চ বিষণ্ণোঽভূদ্দৃষ্ট্বা জীর্ণং মহাসুরম্
97.8
প্রাঞ্জলিশ্চ সহামাত্যৈরিদং বচনমব্রবীৎ
কিমর্থমুপয়াতাঃ স্থ ব্রূত কিং করবাণি বঃ
97.9
প্রত্যুবাচ ততোঽগস্ত্যঃ প্রহসন্নিল্বলং তদা
ঈশং হ্যসুর বিদ্মস্ত্বাং বয়ং সর্বে ধনেশ্বরম্
97.10
ইমে চ নাতিধনিনো ধনার্থশ্চ মহান্মম
যথাশক্ত্যবিহিংস্যান্যান্সংবিভাগং প্রয়চ্ছ নঃ
97.11
ততোঽভিবাদ্য তমৃষিমিল্বলো বাক্যমব্রবীৎ
দিত্সিতং যদি বেত্সি ত্বং ততো দাস্যামি তে বসু
97.12
অগস্ত্য উবাচ
গবাং দশ সহস্রাণি রাজ্ঞামেকৈকশোঽসুর
তাবদেব সুবর্ণস্য দিত্সিতং তে মহাসুর
97.13
মহ্যং ততো বৈ দ্বিগুণং রথশ্চৈব হিরণ্ময়ঃ
মনোজবৌ বাজিনৌ চ দিত্সিতং তে মহাসুর
জিজ্ঞাস্যতাং রথঃ সদ্যো ব্যক্তমেষ হিরণ্ময়ঃ
97.14
লোমশ উবাচ
জিজ্ঞাস্যমানঃ স রথঃ কৌন্তেয়াসীদ্ধিরণ্ময়ঃ
ততঃ প্রব্যথিতো দৈত্যো দদাবভ্যধিকং বসু
97.15
বিবাজশ্চ সুবাজশ্চ তস্মিন্যুক্তৌ রথে হয়ৌ
ঊহতুস্তৌ বসূন্যাশু তান্যগস্ত্যাশ্রমং প্রতি
সর্বান্রাজ্ঞঃ সহাগস্ত্যান্নিমেষাদিব ভারত
97.16
অগস্ত্যেনাভ্যনুজ্ঞাতা জগ্মূ রাজর্ষয়স্তদা
কৃতবাংশ্চ মুনিঃ সর্বং লোপামুদ্রাচিকীর্ষিতম্
97.17
লোপামুদ্রোবাচ
কৃতবানসি তত্সর্বং ভগবন্মম কাঙ্ক্ষিতম্
উত্পাদয় সকৃন্মহ্যমপত্যং বীর্যবত্তরম্
97.18
অগস্ত্য উবাচ
তুষ্টোঽহমস্মি কল্যাণি তব বৃত্তেন শোভনে
বিচারণামপত্যে তু তব বক্ষ্যামি তাং শৃণু
97.19
সহস্রং তেঽস্তু পুত্রাণাং শতং বা দশসংমিতম্
দশ বা শততুল্যাঃ স্যুরেকো বাপি সহস্রবৎ
97.20
লোপামুদ্রোবাচ
সহস্রসংমিতঃ পুত্র একো মেঽস্তু তপোধন
একো হি বহুভিঃ শ্রেয়ান্বিদ্বান্সাধুরসাধুভিঃ
97.21
লোমশ উবাচ
স তথেতি প্রতিজ্ঞায় তয়া সমভবন্মুনিঃ
সময়ে সমশীলিন্যা শ্রদ্ধাবাঞ্শ্রদ্দধানয়া
97.22
তত আধায় গর্ভং তমগমদ্বনমেব সঃ
তস্মিন্বনগতে গর্ভো ববৃধে সপ্ত শারদান্
97.23
সপ্তমেঽব্দে গতে চাপি প্রাচ্যবত্স মহাকবিঃ
জ্বলন্নিব প্রভাবেন দৃঢস্যুর্নাম ভারত
সাঙ্গোপনিষদান্বেদাঞ্জপন্নেব মহায়শাঃ
97.24
তস্য পুত্রোঽভবদৃষেঃ স তেজস্বী মহানৃষিঃ
স বাল এব তেজস্বী পিতুস্তস্য নিবেশনে
ইধ্মানাং ভারমাজহ্রে ইধ্মবাহস্ততোঽভবৎ
97.25
তথায়ুক্তং চ তং দৃষ্ট্বা মুমুদে স মুনিস্তদা
লেভিরে পিতরশ্চাস্য লোকান্রাজন্যথেপ্সিতান্
97.26
অগস্ত্যস্যাশ্রমঃ খ্যাতঃ সর্বর্তুকুসুমান্বিতঃ
প্রাহ্রাদিরেবং বাতাপিরগস্ত্যেন বিনাশিতঃ
97.27
তস্যায়মাশ্রমো রাজন্রমণীয়ো গুণৈর্যুতঃ
এষা ভাগীরথী পুণ্যা যথেষ্টমবগাহ্যতাম্