অধ্যায় 96

96.1

লোমশ উবাচ
ততো জগাম কৌরব্য সোঽগস্ত্যো ভিক্ষিতুং বসু
শ্রুতর্বাণং মহীপালং যং বেদাভ্যধিকং নৃপৈঃ

স বিদিত্বা তু নৃপতিঃ কুম্ভয়োনিমুপাগমৎ
বিষয়ান্তে সহামাত্যঃ প্রত্যগৃহ্ণাত্সুসত্কৃতম্

তস্মৈ চার্ঘ্যং যথান্যায়মানীয় পৃথিবীপতিঃ
প্রাঞ্জলিঃ প্রয়তো ভূত্বা পপ্রচ্ছাগমনেঽর্থিতাম্

অগস্ত্য উবাচ
বিত্তার্থিনমনুপ্রাপ্তং বিদ্ধি মাং পৃথিবীপতে
যথাশক্ত্যবিহিংস্যান্যান্সংবিভাগং প্রয়চ্ছ মে

লোমশ উবাচ
তত আয়ব্যয়ৌ পূর্ণৌ তস্মৈ রাজা ন্যবেদয়ৎ
অতো বিদ্বন্নুপাদত্স্ব যদত্র বসু মন্যসে

তত আয়ব্যয়ৌ দৃষ্ট্বা সমৌ সমমতির্দ্বিজঃ
সর্বথা প্রাণিনাং পীডামুপাদানাদমন্যত

স শ্রুতর্বাণমাদায় বধ্র্যশ্বমগমত্ততঃ
স চ তৌ বিষয়স্যান্তে প্রত্যগৃহ্ণাদ্যথাবিধি

তয়োরর্ঘ্যং চ পাদ্যং চ বধ্র্যশ্বঃ প্রত্যবেদয়ৎ
অনুজ্ঞাপ্য চ পপ্রচ্ছ প্রয়োজনমুপক্রমে

অগস্ত্য উবাচ
বিত্তকামাবিহ প্রাপ্তৌ বিদ্ধ্যাবাং পৃথিবীপতে
যথাশক্ত্যবিহিংস্যান্যান্সংবিভাগং প্রয়চ্ছ নৌ

লোমশ উবাচ
তত আয়ব্যয়ৌ পূর্ণৌ তাভ্যাং রাজা ন্যবেদয়ৎ
ততো জ্ঞাত্বা সমাদত্তাং যদত্র ব্যতিরিচ্যতে

পৌরুকুত্সং ততো জগ্মুস্ত্রসদস্যুং মহাধনম্
অগস্ত্যশ্চ শ্রুতর্বা চ বধ্র্যশ্বশ্চ মহীপতিঃ

ত্রসদস্যুশ্চ তান্সর্বান্প্রত্যগৃহ্ণাদ্যথাবিধি
অভিগম্য মহারাজ বিষয়ান্তে সবাহনঃ

অর্চয়িত্বা যথান্যায়মিক্ষ্বাকূ রাজসত্তমঃ
সমাশ্বস্তাংস্ততোঽপৃচ্ছত্প্রয়োজনমুপক্রমে

অগস্ত্য উবাচ
বিত্তকামানিহ প্রাপ্তান্বিদ্ধি নঃ পৃথিবীপতে
যথাশক্ত্যবিহিংস্যান্যান্সংবিভাগং প্রয়চ্ছ নঃ

লোমশ উবাচ
তত আয়ব্যয়ৌ পূর্ণৌ তেষাং রাজা ন্যবেদয়ৎ
অতো জ্ঞাত্বা সমাদদ্ধ্বং যদত্র ব্যতিরিচ্যতে

ততঃ সর্বে সমেত্যাথ তে নৃপাস্তং মহামুনিম্
ইদমূচুর্মহারাজ সমবেক্ষ্য পরস্পরম্

অয়ং বৈ দানবো ব্রহ্মন্নিল্বলো বসুমান্ভুবি
তমভিক্রম্য সর্বেঽদ্য বয়ং যাচামহে বসু

তেষাং তদাসীদ্রুচিতমিল্বলস্যোপভিক্ষণম্
ততস্তে সহিতা রাজন্নিল্বলং সমুপাদ্রবন্