UtshovChapter 96
96.1
लोमश उवाच
ततो जगाम कौरव्य सोऽगस्त्यो भिक्षितुं वसु
श्रुतर्वाणं महीपालं यं वेदाभ्यधिकं नृपैः
Lomasha uvacha
Tato jagama kauravya sogastyo bhikshitum vasu
Shrutarvanam mahipalam yam vedabhyadhikam nripaih
96.2
स विदित्वा तु नृपतिः कुम्भयोनिमुपागमत्
विषयान्ते सहामात्यः प्रत्यगृह्णात्सुसत्कृतम्
Sa viditva tu nripatih kumbhayonimupagamat
Vishayante sahamatyah pratyagrihnatsusatkritam
96.3
तस्मै चार्घ्यं यथान्यायमानीय पृथिवीपतिः
प्राञ्जलिः प्रयतो भूत्वा पप्रच्छागमनेऽर्थिताम्
Tasmai charghyam yathanyayamaniya prithivipatih
Pranjalih prayato bhutva paprachchhagamanerthitam
96.4
अगस्त्य उवाच
वित्तार्थिनमनुप्राप्तं विद्धि मां पृथिवीपते
यथाशक्त्यविहिंस्यान्यान्संविभागं प्रयच्छ मे
Agastya uvacha
Vittarthinamanupraptam viddhi mam prithivipate
Yathashaktyavihinsyanyansanvibhagam prayachchha me
96.5
लोमश उवाच
तत आयव्ययौ पूर्णौ तस्मै राजा न्यवेदयत्
अतो विद्वन्नुपादत्स्व यदत्र वसु मन्यसे
Lomasha uvacha
Tata ayavyayau purnau tasmai raja nyavedayat
Ato vidvannupadatsva yadatra vasu manyase
96.6
तत आयव्ययौ दृष्ट्वा समौ सममतिर्द्विजः
सर्वथा प्राणिनां पीडामुपादानादमन्यत
Tata ayavyayau drishtva samau samamatirdvijah
Sarvatha praninam pidamupadanadamanyata
96.7
स श्रुतर्वाणमादाय वध्र्यश्वमगमत्ततः
स च तौ विषयस्यान्ते प्रत्यगृह्णाद्यथाविधि
Sa shrutarvanamadaya vadhryashvamagamattatah
Sa cha tau vishayasyante pratyagrihnadyathavidhi
96.8
तयोरर्घ्यं च पाद्यं च वध्र्यश्वः प्रत्यवेदयत्
अनुज्ञाप्य च पप्रच्छ प्रयोजनमुपक्रमे
Tayorarghyam cha padyam cha vadhryashvah pratyavedayat
Anugyapya cha paprachchha prayojanamupakrame
96.9
अगस्त्य उवाच
वित्तकामाविह प्राप्तौ विद्ध्यावां पृथिवीपते
यथाशक्त्यविहिंस्यान्यान्संविभागं प्रयच्छ नौ
Agastya uvacha
Vittakamaviha praptau viddhyavam prithivipate
Yathashaktyavihinsyanyansanvibhagam prayachchha nau
96.10
लोमश उवाच
तत आयव्ययौ पूर्णौ ताभ्यां राजा न्यवेदयत्
ततो ज्ञात्वा समादत्तां यदत्र व्यतिरिच्यते
Lomasha uvacha
Tata ayavyayau purnau tabhyam raja nyavedayat
Tato gyatva samadattam yadatra vyatirichyate
96.11
तत आयव्ययौ दृष्ट्वा समौ सममतिर्द्विजः
सर्वथा प्राणिनां पीडामुपादानादमन्यत
Tata ayavyayau drishtva samau samamatirdvijah
Sarvatha praninam pidamupadanadamanyata
96.12
पौरुकुत्सं ततो जग्मुस्त्रसदस्युं महाधनम्
अगस्त्यश्च श्रुतर्वा च वध्र्यश्वश्च महीपतिः
Paurukutsam tato jagmustrasadasyum mahadhanam
Agastyashcha shrutarva cha vadhryashvashcha mahipatih
96.13
त्रसदस्युश्च तान्सर्वान्प्रत्यगृह्णाद्यथाविधि
अभिगम्य महाराज विषयान्ते सवाहनः
Trasadasyushcha tansarvanpratyagrihnadyathavidhi
Abhigamya maharaja vishayante savahanah
96.14
अर्चयित्वा यथान्यायमिक्ष्वाकू राजसत्तमः
समाश्वस्तांस्ततोऽपृच्छत्प्रयोजनमुपक्रमे
Archayitva yathanyayamikshvaku rajasattamah
Samashvastanstatoprichchhatprayojanamupakrame
96.15
अगस्त्य उवाच
वित्तकामानिह प्राप्तान्विद्धि नः पृथिवीपते
यथाशक्त्यविहिंस्यान्यान्संविभागं प्रयच्छ नः
Agastya uvacha
Vittakamaniha praptanviddhi nah prithivipate
Yathashaktyavihinsyanyansanvibhagam prayachchha nah
96.16
लोमश उवाच
तत आयव्ययौ पूर्णौ तेषां राजा न्यवेदयत्
अतो ज्ञात्वा समादद्ध्वं यदत्र व्यतिरिच्यते
Lomasha uvacha
Tata ayavyayau purnau tesham raja nyavedayat
Ato gyatva samadaddhvam yadatra vyatirichyate
96.17
तत आयव्ययौ दृष्ट्वा समौ सममतिर्द्विजः
सर्वथा प्राणिनां पीडामुपादानादमन्यत
Tata ayavyayau drishtva samau samamatirdvijah
Sarvatha praninam pidamupadanadamanyata
96.18
ततः सर्वे समेत्याथ ते नृपास्तं महामुनिम्
इदमूचुर्महाराज समवेक्ष्य परस्परम्
Tatah sarve sametyatha te nripastam mahamunim
Idamuchurmaharaja samavekshya parasparam
96.19
अयं वै दानवो ब्रह्मन्निल्वलो वसुमान्भुवि
तमभिक्रम्य सर्वेऽद्य वयं याचामहे वसु
Ayam vai danavo brahmannilvalo vasumanbhuvi
Tamabhikramya sarvedya vayam yachamahe vasu
96.20
तेषां तदासीद्रुचितमिल्वलस्योपभिक्षणम्
ततस्ते सहिता राजन्निल्वलं समुपाद्रवन्
Tesham tadasidruchitamilvalasyopabhikshanam
Tataste sahita rajannilvalam samupadravan