Utshovঅধ্যায় 95
95.1
লোমশ উবাচ
যদা ত্বমন্যতাগস্ত্যো গার্হস্থ্যে তাং ক্ষমামিতি
তদাভিগম্য প্রোবাচ বৈদর্ভং পৃথিবীপতিম্
95.2
রাজন্নিবেশে বুদ্ধির্মে বর্ততে পুত্রকারণাৎ
বরয়ে ত্বাং মহীপাল লোপামুদ্রাং প্রয়চ্ছ মে
95.3
এবমুক্তঃ স মুনিনা মহীপালো বিচেতনঃ
প্রত্যাখ্যানায় চাশক্তঃ প্রদাতুমপি নৈচ্ছত
95.4
ততঃ স ভার্যামভ্যেত্য প্রোবাচ পৃথিবীপতিঃ
মহর্ষির্বীর্যবানেষ ক্রুদ্ধঃ শাপাগ্নিনা দহেৎ
95.5
তং তথা দুঃখিতং দৃষ্ট্বা সভার্যং পৃথিবীপতিম্
লোপামুদ্রাভিগম্যেদং কালে বচনমব্রবীৎ
95.6
ন মত্কৃতে মহীপাল পীডামভ্যেতুমর্হসি
প্রয়চ্ছ মামগস্ত্যায় ত্রাহ্যাত্মানং ময়া পিতঃ
95.7
দুহিতুর্বচনাদ্রাজা সোঽগস্ত্যায় মহাত্মনে
লোপামুদ্রাং ততঃ প্রাদাদ্বিধিপূর্বং বিশাং পতে
95.8
প্রাপ্য ভার্যামগস্ত্যস্তু লোপামুদ্রামভাষত
মহার্হাণ্যুত্সৃজৈতানি বাসাংস্যাভরণানি চ
95.9
ততঃ সা দর্শনীয়ানি মহার্হাণি তনূনি চ
সমুত্সসর্জ রম্ভোরূর্বসনান্যায়তেক্ষণা
95.10
ততশ্চীরাণি জগ্রাহ বল্কলান্যজিনানি চ
সমানব্রতচর্যা চ বভূবায়তলোচনা
95.11
গঙ্গাদ্বারমথাগম্য ভগবানৃষিসত্তমঃ
উগ্রমাতিষ্ঠত তপঃ সহ পত্ন্যানুকূলয়া
95.12
সা প্রীত্যা বহুমানাচ্চ পতিং পর্যচরত্তদা
অগস্ত্যশ্চ পরাং প্রীতিং ভার্যায়ামকরোত্প্রভুঃ
95.13
ততো বহুতিথে কালে লোপামুদ্রাং বিশাং পতে
তপসা দ্যোতিতাং স্নাতাং দদর্শ ভগবানৃষিঃ
95.14
স তস্যাঃ পরিচারেণ শৌচেন চ দমেন চ
শ্রিয়া রূপেণ চ প্রীতো মৈথুনায়াজুহাব তাম্
95.15
ততঃ সা প্রাঞ্জলির্ভূত্বা লজ্জমানেব ভামিনী
তদা সপ্রণয়ং বাক্যং ভগবন্তমথাব্রবীৎ
95.16
অসংশয়ং প্রজাহেতোর্ভার্যাং পতিরবিন্দত
যা তু ত্বয়ি মম প্রীতিস্তামৃষে কর্তুমর্হসি
95.17
যথা পিতুর্গৃহে বিপ্র প্রাসাদে শয়নং মম
তথাবিধে ত্বং শয়নে মামুপৈতুমিহার্হসি
95.18
ইচ্ছামি ত্বাং স্রগ্বিণং চ ভূষণৈশ্চ বিভূষিতম্
উপসর্তুং যথাকামং দিব্যাভরণভূষিতা
95.19
অগস্ত্য উবাচ
ন বৈ ধনানি বিদ্যন্তে লোপামুদ্রে তথা মম
যথাবিধানি কল্যাণি পিতুস্তব সুমধ্যমে
95.20
লোপামুদ্রোবাচ
ঈশোঽসি তপসা সর্বং সমাহর্তুমিহেশ্বর
ক্ষণেন জীবলোকে যদ্বসু কিংচন বিদ্যতে
95.21
অগস্ত্য উবাচ
এবমেতদ্যথাত্থ ত্বং তপোব্যয়করং তু মে
যথা তু মে ন নশ্যেত তপস্তন্মাং প্রচোদয়
95.22
লোপামুদ্রোবাচ
অল্পাবশিষ্টঃ কালোঽয়মৃতৌ মম তপোধন
ন চান্যথাহমিচ্ছামি ত্বামুপৈতুং কথংচন
95.23
ন চাপি ধর্মমিচ্ছামি বিলোপ্তুং তে তপোধন
এতত্তু মে যথাকামং সংপাদয়িতুমর্হসি
95.24
অগস্ত্য উবাচ
যদ্যেষ কামঃ সুভগে তব বুদ্ধ্যা বিনিশ্চিতঃ
হন্ত গচ্ছাম্যহং ভদ্রে চর কামমিহ স্থিতা