Utshovঅধ্যায় 94
94.1
বৈশংপায়ন উবাচ
ততঃ সংপ্রস্থিতো রাজা কৌন্তেয়ো ভূরিদক্ষিণঃ
অগস্ত্যাশ্রমমাসাদ্য দুর্জয়ায়ামুবাস হ
94.2
তত্র বৈ লোমশং রাজা পপ্রচ্ছ বদতাং বরঃ
অগস্ত্যেনেহ বাতাপিঃ কিমর্থমুপশামিতঃ
94.3
আসীদ্বা কিংপ্রভাবশ্চ স দৈত্যো মানবান্তকঃ
কিমর্থং চোদ্গতো মন্যুরগস্ত্যস্য মহাত্মনঃ
94.4
লোমশ উবাচ
ইল্বলো নাম দৈতেয় আসীত্কৌরবনন্দন
মণিমত্যাং পুরি পুরা বাতাপিস্তস্য চানুজঃ
94.5
স ব্রাহ্মণং তপোয়ুক্তমুবাচ দিতিনন্দনঃ
পুত্রং মে ভগবানেকমিন্দ্রতুল্যং প্রয়চ্ছতু
94.6
তস্মৈ স ব্রাহ্মণো নাদাত্পুত্রং বাসবসংমিতম্
চুক্রোধ সোঽসুরস্তস্য ব্রাহ্মণস্য ততো ভৃশম্
94.7
সমাহ্বয়তি যং বাচা গতং বৈবস্বতক্ষয়ম্
স পুনর্দেহমাস্থায় জীবন্স্ম প্রতিদৃশ্যতে
94.8
ততো বাতাপিমসুরং ছাগং কৃত্বা সুসংস্কৃতম্
তং ব্রাহ্মণং ভোজয়িত্বা পুনরেব সমাহ্বয়ৎ
94.9
তস্য পার্শ্বং বিনির্ভিদ্য ব্রাহ্মণস্য মহাসুরঃ
বাতাপিঃ প্রহসন্রাজন্নিশ্চক্রাম বিশাং পতে
94.10
এবং স ব্রাহ্মণান্রাজন্ভোজয়িত্বা পুনঃ পুনঃ
হিংসয়ামাস দৈতেয় ইল্বলো দুষ্টচেতনঃ
94.11
অগস্ত্যশ্চাপি ভগবানেতস্মিন্কাল এব তু
পিতৄন্দদর্শ গর্তে বৈ লম্বমানানধোমুখান্
94.12
সোঽপৃচ্ছল্লম্বমানাংস্তান্ভবন্ত ইহ কিংপরাঃ
সংতানহেতোরিতি তে তমূচুর্ব্রহ্মবাদিনঃ
94.13
তে তস্মৈ কথয়ামাসুর্বয়ং তে পিতরঃ স্বকাঃ
গর্তমেতমনুপ্রাপ্তা লম্বামঃ প্রসবার্থিনঃ
94.14
যদি নো জনয়েথাস্ত্বমগস্ত্যাপত্যমুত্তমম্
স্যান্নোঽস্মান্নিরয়ান্মোক্ষস্ত্বং চ পুত্রাপ্নুয়া গতিম্
94.15
স তানুবাচ তেজস্বী সত্যধর্মপরায়ণঃ
করিষ্যে পিতরঃ কামং ব্যেতু বো মানসো জ্বরঃ
94.16
ততঃ প্রসবসংতানং চিন্তয়ন্ভগবানৃষিঃ
আত্মনঃ প্রসবস্যার্থে নাপশ্যত্সদৃশীং স্ত্রিয়ম্
94.17
স তস্য তস্য সত্ত্বস্য তত্তদঙ্গমনুত্তমম্
সংভৃত্য তত্সমৈরঙ্গৈর্নির্মমে স্ত্রিয়মুত্তমাম্
94.18
স তাং বিদর্ভরাজায় পুত্রকামায় তাম্যতে
নির্মিতামাত্মনোঽর্থায় মুনিঃ প্রাদান্মহাতপাঃ
94.19
সা তত্র জজ্ঞে সুভগা বিদ্যুত্সৌদামিনী যথা
বিভ্রাজমানা বপুসা ব্যবর্ধত শুভাননা
94.20
জাতমাত্রাং চ তাং দৃষ্ট্বা বৈদর্ভঃ পৃথিবীপতিঃ
প্রহর্ষেণ দ্বিজাতিভ্যো ন্যবেদয়ত ভারত
94.21
অভ্যনন্দন্ত তাং সর্বে ব্রাহ্মণা বসুধাধিপ
লোপামুদ্রেতি তস্যাশ্চ চক্রিরে নাম তে দ্বিজাঃ
94.22
ববৃধে সা মহারাজ বিভ্রতী রূপমুত্তমম্
অপ্স্বিবোত্পলিনী শীঘ্রমগ্নেরিব শিখা শুভা
94.23
তাং যৌবনস্থাং রাজেন্দ্র শতং কন্যাঃ স্বলংকৃতাঃ
দাশীশতং চ কল্যাণীমুপতস্থুর্বশানুগাঃ
94.24
সা স্ম দাসীশতবৃতা মধ্যে কন্যাশতস্য চ
আস্তে তেজস্বিনী কন্যা রোহিণীব দিবি প্রভো
94.25
যৌবনস্থামপি চ তাং শীলাচারসমন্বিতাম্
ন বব্রে পুরুষঃ কশ্চিদ্ভয়াত্তস্য মহাত্মনঃ
94.26
সা তু সত্যবতী কন্যা রূপেণাপ্সরসোঽপ্যতি
তোষয়ামাস পিতরং শীলেন স্বজনং তথা
94.27
বৈদর্ভীং তু তথায়ুক্তাং যুবতীং প্রেক্ষ্য বৈ পিতা
মনসা চিন্তয়ামাস কস্মৈ দদ্যাং সুতামিতি