Utshovঅধ্যায় 93
93.1
বৈশংপায়ন উবাচ
তে তথা সহিতা বীরা বসন্তস্তত্র তত্র হ
ক্রমেণ পৃথিবীপাল নৈমিষারণ্যমাগতাঃ
93.2
ততস্তীর্থেষু পুণ্যেষু গোমত্যাঃ পাণ্ডবা নৃপ
কৃতাভিষেকাঃ প্রদদুর্গাশ্চ বিত্তং চ ভারত
93.3
তত্র দেবান্পিতৄন্বিপ্রাংস্তর্পয়িত্বা পুনঃ পুনঃ
কন্যাতীর্থেঽশ্বতীর্থে চ গবাং তীর্থে চ কৌরবাঃ
93.4
বালকোট্যাং বৃষপ্রস্থে গিরাবুষ্য চ পাণ্ডবাঃ
বাহুদায়াং মহীপাল চক্রুঃ সর্বেঽভিষেচনম্
93.5
প্রয়াগে দেবয়জনে দেবানাং পৃথিবীপতে
ঊষুরাপ্লুত্য গাত্রাণি তপশ্চাতস্থুরুত্তমম্
93.6
গঙ্গায়মুনয়োশ্চৈব সংগমে সত্যসংগরাঃ
বিপাপ্মানো মহাত্মানো বিপ্রেভ্যঃ প্রদদুর্বসু
93.7
তপস্বিজনজুষ্টাং চ ততো বেদীং প্রজাপতেঃ
জগ্মুঃ পাণ্ডুসুতা রাজন্ব্রাহ্মণৈঃ সহ ভারত
93.8
তত্র তে ন্যবসন্বীরাস্তপশ্চাতস্থুরুত্তমম্
সংতর্পয়ন্তঃ সততং বন্যেন হবিষা দ্বিজান্
93.9
ততো মহীধরং জগ্মুর্ধর্মজ্ঞেনাভিসত্কৃতম্
রাজর্ষিণা পুণ্যকৃতা গয়েনানুপমদ্যুতে
93.10
সরো গয়শিরো যত্র পুণ্যা চৈব মহানদী
ঋষিজুষ্টং সুপুণ্যং তত্তীর্থং ব্রহ্মসরোত্তমম্
93.11
অগস্ত্যো ভগবান্যত্র গতো বৈবস্বতং প্রতি
উবাস চ স্বয়ং যত্র ধর্মো রাজন্সনাতনঃ
93.12
সর্বাসাং সরিতাং চৈব সমুদ্ভেদো বিশাং পতে
যত্র সংনিহিতো নিত্যং মহাদেবঃ পিনাকধৃক্
93.13
তত্র তে পাণ্ডবা বীরাশ্চাতুর্মাস্যৈস্তদেজিরে
ঋষিয়জ্ঞেন মহতা যত্রাক্ষয়বটো মহান্
93.14
ব্রাহ্মণাস্তত্র শতশঃ সমাজগ্মুস্তপোধনাঃ
চাতুর্মাস্যেনায়জন্ত আর্ষেণ বিধিনা তদা
93.15
তত্র বিদ্যাতপোনিত্যা ব্রাহ্মণা বেদপারগাঃ
কথাঃ প্রচক্রিরে পুণ্যাঃ সদসিস্থা মহাত্মনাম্
93.16
তত্র বিদ্যাব্রতস্নাতঃ কৌমারং ব্রতমাস্থিতঃ
শমঠোঽকথয়দ্রাজন্নামূর্তরয়সং গয়ম্
93.17
অমূর্তরয়সঃ পুত্রো গয়ো রাজর্ষিসত্তমঃ
পুণ্যানি যস্য কর্মাণি তানি মে শৃণু ভারত
93.18
যস্য যজ্ঞো বভূবেহ বহ্বন্নো বহুদক্ষিণঃ
যত্রান্নপর্বতা রাজঞ্শতশোঽথ সহস্রশঃ
93.19
ঘৃতকুল্যাশ্চ দধ্নশ্চ নদ্যো বহুশতাস্তথা
ব্যঞ্জনানাং প্রবাহাশ্চ মহার্হাণাং সহস্রশঃ
93.20
অহন্যহনি চাপ্যেতদ্যাচতাং সংপ্রদীয়তে
অন্যত্তু ব্রাহ্মণা রাজন্ভুঞ্জতেঽন্নং সুসংস্কৃতম্
93.21
তত্র বৈ দক্ষিণাকালে ব্রহ্মঘোষো দিবং গতঃ
ন স্ম প্রজ্ঞায়তে কিংচিদ্ব্রহ্মশব্দেন ভারত
93.22
পুণ্যেন চরতা রাজন্ভূর্দিশঃ খং নভস্তথা
আপূর্ণমাসীচ্ছব্দেন তদপ্যাসীন্মহাদ্ভুতম্
93.23
তত্র স্ম গাথা গায়ন্তি মনুষ্যা ভরতর্ষভ
অন্নপানৈঃ শুভৈস্তৃপ্তা দেশে দেশে সুবর্চসঃ
93.24
গয়স্য যজ্ঞে কে ত্বদ্য প্রাণিনো ভোক্তুমীপ্সবঃ
যত্র ভোজনশিষ্টস্য পর্বতাঃ পঞ্চবিংশতিঃ
93.25
ন স্ম পূর্বে জনাশ্চক্রুর্ন করিষ্যন্তি চাপরে
গয়ো যদকরোদ্যজ্ঞে রাজর্ষিরমিতদ্যুতিঃ
93.26
কথং নু দেবা হবিষা গয়েন পরিতর্পিতাঃ
পুনঃ শক্ষ্যন্ত্যুপাদাতুমন্যৈর্দত্তানি কানিচিৎ
93.27
এবংবিধাঃ সুবহবস্তস্য যজ্ঞে মহাত্মনঃ
বভূবুরস্য সরসঃ সমীপে কুরুনন্দন