অধ্যায় 92

92.1

যুধিষ্ঠির উবাচ
ন বৈ নির্গুণমাত্মানং মন্যে দেবর্ষিসত্তম
তথাস্মি দুঃখসংতপ্তো যথা নান্যো মহীপতিঃ

পরাংশ্চ নির্গুণান্মন্যে ন চ ধর্মরতানপি
তে চ লোমশ লোকেঽস্মিন্নৃধ্যন্তে কেন কেতুনা

লোমশ উবাচ
নাত্র দুঃখং ত্বয়া রাজন্কার্যং পার্থ কথংচন
যদধর্মেণ বর্ধেরন্নধর্মরুচয়ো জনাঃ

বর্ধত্যধর্মেণ নরস্ততো ভদ্রাণি পশ্যতি
ততঃ সপত্নাঞ্জয়তি সমূলস্তু বিনশ্যতি

ময়া হি দৃষ্টা দৈতেয়া দানবাশ্চ মহীপতে
বর্ধমানা হ্যধর্মেণ ক্ষয়ং চোপগতাঃ পুনঃ

পুরা দেবয়ুগে চৈব দৃষ্টং সর্বং ময়া বিভো
অরোচয়ন্সুরা ধর্মং ধর্মং তত্যজিরেঽসুরাঃ

তীর্থানি দেবা বিবিশুর্নাবিশন্ভারতাসুরাঃ
তানধর্মকৃতো দর্পঃ পূর্বমেব সমাবিশৎ

দর্পান্মানঃ সমভবন্মানাত্ক্রোধো ব্যজায়ত
ক্রোধাদহ্রীস্ততোঽলজ্জা বৃত্তং তেষাং ততোঽনশৎ

তানলজ্জান্গতহ্রীকান্হীনবৃত্তান্বৃথাব্রতান্
ক্ষমা লক্ষ্মীশ্চ ধর্মশ্চ নচিরাত্প্রজহুস্ততঃ
লক্ষ্মীস্তু দেবানগমদলক্ষ্মীরসুরান্নৃপ

তানলক্ষ্মীসমাবিষ্টান্দর্পোপহতচেতসঃ
দৈতেয়ান্দানবাংশ্চৈব কলিরপ্যাবিশত্ততঃ

তানলক্ষ্মীসমাবিষ্টান্দানবান্কলিনা তথা
দর্পাভিভূতান্কৌন্তেয় ক্রিয়াহীনানচেতসঃ

মানাভিভূতানচিরাদ্বিনাশঃ প্রত্যপদ্যত
নির্যশস্যাস্ততো দৈত্যাঃ কৃত্স্নশো বিলয়ং গতাঃ

দেবাস্তু সাগরাংশ্চৈব সরিতশ্চ সরাংসি চ
অভ্যগচ্ছন্ধর্মশীলাঃ পুণ্যান্যায়তনানি চ

তপোভিঃ ক্রতুভির্দানৈরাশীর্বাদৈশ্চ পাণ্ডব
প্রজহুঃ সর্বপাপানি শ্রেয়শ্চ প্রতিপেদিরে

এবং হি দানবন্তশ্চ ক্রিয়াবন্তশ্চ সর্বশঃ
তীর্থান্যগচ্ছন্বিবুধাস্তেনাপুর্ভূতিমুত্তমাম্

তথা ত্বমপি রাজেন্দ্র স্নাত্বা তীর্থেষু সানুজঃ
পুনর্বেত্স্যসি তাং লক্ষ্মীমেষ পন্থাঃ সনাতনঃ

যথৈব হি নৃগো রাজা শিবিরৌশীনরো যথা
ভগীরথো বসুমনা গয়ঃ পূরুঃ পুরূরবাঃ

চরমাণাস্তপো নিত্যং স্পর্শনাদম্ভসশ্চ তে
তীর্থাভিগমনাত্পূতা দর্শনাচ্চ মহাত্মনাম্

অলভন্ত যশঃ পুণ্যং ধনানি চ বিশাং পতে
তথা ত্বমপি রাজেন্দ্র লব্ধাসি বিপুলাং শ্রিয়ম্

যথা চেক্ষ্বাকুরচরত্সপুত্রজনবান্ধবঃ
মুচুকুন্দোঽথ মান্ধাতা মরুত্তশ্চ মহীপতিঃ

কীর্তিং পুণ্যামবিন্দন্ত যথা দেবাস্তপোবলাৎ
দেবর্ষয়শ্চ কার্ত্স্ন্যেন তথা ত্বমপি বেত্স্যসে

ধার্তরাষ্ট্রাস্তু দর্পেণ মোহেন চ বশীকৃতাঃ
নচিরাদ্বিনশিষ্যন্তি দৈত্যা ইব ন সংশয়ঃ