Utshovঅধ্যায় 91
91.1
বৈশংপায়ন উবাচ
ততঃ প্রয়ান্তং কৌন্তেয়ং ব্রাহ্মণা বনবাসিনঃ
অভিগম্য তদা রাজন্নিদং বচনমব্রুবন্
91.2
রাজংস্তীর্থানি গন্তাসি পুণ্যানি ভ্রাতৃভিঃ সহ
দেবর্ষিণা চ সহিতো লোমশেন মহাত্মনা
91.3
অস্মানপি মহারাজ নেতুমর্হসি পাণ্ডব
অস্মাভির্হি ন শক্যানি ত্বদৃতে তানি কৌরব
91.4
শ্বাপদৈরুপসৃষ্টানি দুর্গাণি বিষমাণি চ
অগম্যানি নরৈরল্পৈস্তীর্থানি মনুজেশ্বর
91.5
ভবন্তো ভ্রাতরঃ শূরা ধনুর্ধরবরাঃ সদা
ভবদ্ভিঃ পালিতাঃ শূরৈর্গচ্ছেম বয়মপ্যুত
91.6
ভবত্প্রসাদাদ্ধি বয়ং প্রাপ্নুয়াম ফলং শুভম্
তীর্থানাং পৃথিবীপাল ব্রতানাং চ বিশাং পতে
91.7
তব বীর্যপরিত্রাতাঃ শুদ্ধাস্তীর্থপরিপ্লুতাঃ
ভবেম ধূতপাপ্মানস্তীর্থসংদর্শনান্নৃপ
91.8
ভবানপি নরেন্দ্রস্য কার্তবীর্যস্য ভারত
অষ্টকস্য চ রাজর্ষের্লোমপাদস্য চৈব হ
91.9
ভরতস্য চ বীরস্য সার্বভৌমস্য পার্থিব
ধ্রুবং প্রাপ্স্যসি দুষ্প্রাপাঁল্লোকাংস্তীর্থপরিপ্লুতঃ
91.10
প্রভাসাদীনি তীর্থানি মহেন্দ্রাদীংশ্চ পর্বতান্
গঙ্গাদ্যাঃ সরিতশ্চৈব প্লক্ষাদীংশ্চ বনস্পতীন্
ত্বয়া সহ মহীপাল দ্রষ্টুমিচ্ছামহে বয়ম্
91.11
যদি তে ব্রাহ্মণেষ্বস্তি কাচিত্প্রীতির্জনাধিপ
কুরু ক্ষিপ্রং বচোঽস্মাকং ততঃ শ্রেয়োঽভিপত্স্যসে
91.12
তীর্থানি হি মহাবাহো তপোবিঘ্নকরৈঃ সদা
অনুকীর্ণানি রক্ষোভিস্তেভ্যো নস্ত্রাতুমর্হসি
91.13
তীর্থান্যুক্তানি ধৌম্যেন নারদেন চ ধীমতা
যান্যুবাচ চ দেবর্ষির্লোমশঃ সুমহাতপাঃ
91.14
বিধিবত্তানি সর্বাণি পর্যটস্ব নরাধিপ
ধূতপাপ্মা সহাস্মাভির্লোমশেন চ পালিতঃ
91.15
স তথা পূজ্যমানস্তৈর্হর্ষাদশ্রুপরিপ্লুতঃ
ভীমসেনাদিভির্বীরৈর্ভ্রাতৃভিঃ পরিবারিতঃ
বাঢমিত্যব্রবীত্সর্বাংস্তানৃষীন্পাণ্ডবর্ষভঃ
91.16
লোমশং সমনুজ্ঞাপ্য ধৌম্যং চৈব পুরোহিতম্
ততঃ স পাণ্ডবশ্রেষ্ঠো ভ্রাতৃভিঃ সহিতো বশী
দ্রৌপদ্যা চানবদ্যাঙ্গ্যা গমনায় মনো দধে
91.17
অথ ব্যাসো মহাভাগস্তথা নারদপর্বতৌ
কাম্যকে পাণ্ডবং দ্রষ্টুং সমাজগ্মুর্মনীষিণঃ
91.18
তেষাং যুধিষ্ঠিরো রাজা পূজাং চক্রে যথাবিধি
সত্কৃতাস্তে মহাভাগা যুধিষ্ঠিরমথাব্রুবন্
91.19
যুধিষ্ঠির যমৌ ভীম মনসা কুরুতার্জবম্
মনসা কৃতশৌচা বৈ শুদ্ধাস্তীর্থানি গচ্ছত
91.20
শরীরনিয়মং হ্যাহুর্ব্রাহ্মণা মানুষং ব্রতম্
মনোবিশুদ্ধাং বুদ্ধিং চ দৈবমাহুর্ব্রতং দ্বিজাঃ
91.21
মনো হ্যদুষ্টং শূরাণাং পর্যাপ্তং বৈ নরাধিপ
মৈত্রীং বুদ্ধিং সমাস্থায় শুদ্ধাস্তীর্থানি গচ্ছত
91.22
তে যূয়ং মানসৈঃ শুদ্ধাঃ শরীরনিয়মব্রতৈঃ
দৈবং ব্রতং সমাস্থায় যথোক্তং ফলমাপ্স্যথ
91.23
তে তথেতি প্রতিজ্ঞায় কৃষ্ণয়া সহ পাণ্ডবাঃ
কৃতস্বস্ত্যয়নাঃ সর্বে মুনিভির্দিব্যমানুষৈঃ
91.24
লোমশস্যোপসংগৃহ্য পাদৌ দ্বৈপায়নস্য চ
নারদস্য চ রাজেন্দ্র দেবর্ষেঃ পর্বতস্য চ
91.25
ধৌম্যেন সহিতা বীরাস্তথান্যৈর্বনবাসিভিঃ
মার্গশীর্ষ্যামতীতায়াং পুষ্যেণ প্রয়য়ুস্ততঃ
91.26
কঠিনানি সমাদায় চীরাজিনজটাধরাঃ
অভেদ্যৈঃ কবচৈর্যুক্তাস্তীর্থান্যন্বচরংস্তদা
91.27
ইন্দ্রসেনাদিভির্ভৃত্যৈ রথৈঃ পরিচতুর্দশৈঃ
মহানসব্যাপৃতৈশ্চ তথান্যৈঃ পরিচারকৈঃ
91.28
সায়ুধা বদ্ধনিস্ত্রিংশাস্তূণবন্তঃ সমার্গণাঃ
প্রাঙ্মুখাঃ প্রয়য়ুর্বীরাঃ পাণ্ডবা জনমেজয়