Utshovঅধ্যায় 90
90.1
লোমশ উবাচ
ধনংজয়েন চাপ্যুক্তং যত্তচ্ছৃণু যুধিষ্ঠির
যুধিষ্ঠিরং ভ্রাতরং মে যোজয়ের্ধর্ম্যয়া শ্রিয়া
90.2
ত্বং হি ধর্মান্পরান্বেত্থ তপাংসি চ তপোধন
শ্রীমতাং চাপি জানাসি রাজ্ঞাং ধর্মং সনাতনম্
90.3
স ভবান্যত্পরং বেদ পাবনং পুরুষান্প্রতি
তেন সংয়োজয়েথাস্ত্বং তীর্থপুণ্যেন পাণ্ডবম্
90.4
যথা তীর্থানি গচ্ছেত গাশ্চ দদ্যাত্স পার্থিবঃ
তথা সর্বাত্মনা কার্যমিতি মাং বিজয়োঽব্রবীৎ
90.5
ভবতা চানুগুপ্তোঽসৌ চরেত্তীর্থানি সর্বশঃ
রক্ষোভ্যো রক্ষিতব্যশ্চ দুর্গেষু বিষমেষু চ
90.6
দধীচ ইব দেবেন্দ্রং যথা চাপ্যঙ্গিরা রবিম্
তথা রক্ষস্ব কৌন্তেয়ং রাক্ষসেভ্যো দ্বিজোত্তম
90.7
যাতুধানা হি বহবো রাক্ষসাঃ পর্বতোপমাঃ
ত্বয়াভিগুপ্তান্কৌন্তেয়ান্নাতিবর্তেয়ুরন্তিকাৎ
90.8
সোঽহমিন্দ্রস্য বচনান্নিয়োগাদর্জুনস্য চ
রক্ষমাণো ভয়েভ্যস্ত্বাং চরিষ্যামি ত্বয়া সহ
90.9
দ্বিস্তীর্থানি ময়া পূর্বং দৃষ্টানি কুরুনন্দন
ইদং তৃতীয়ং দ্রক্ষ্যামি তান্যেব ভবতা সহ
90.10
ইয়ং রাজর্ষিভির্যাতা পুণ্যকৃদ্ভির্যুধিষ্ঠির
মন্বাদিভির্মহারাজ তীর্থয়াত্রা ভয়াপহা
90.11
নানৃজুর্নাকৃতাত্মা চ নাবৈদ্যো ন চ পাপকৃৎ
স্নাতি তীর্থেষু কৌরব্য ন চ বক্রমতির্নরঃ
90.12
ত্বং তু ধর্মমতির্নিত্যং ধর্মজ্ঞঃ সত্যসংগরঃ
বিমুক্তঃ সর্বপাপেভ্যো ভূয় এব ভবিষ্যসি
90.13
যথা ভগীরথো রাজা রাজানশ্চ গয়াদয়ঃ
যথা যয়াতিঃ কৌন্তেয় তথা ত্বমপি পাণ্ডব
90.14
যুধিষ্ঠির উবাচ
ন হর্ষাত্সংপ্রপশ্যামি বাক্যস্যাস্যোত্তরং ক্বচিৎ
স্মরেদ্ধি দেবরাজো যং কিং নামাভ্যধিকং ততঃ
90.15
ভবতা সংগমো যস্য ভ্রাতা যস্য ধনংজয়ঃ
বাসবঃ স্মরতে যস্য কো নামাভ্যধিকস্ততঃ
90.16
যচ্চ মাং ভগবানাহ তীর্থানাং দর্শনং প্রতি
ধৌম্যস্য বচনাদেষা বুদ্ধিঃ পূর্বং কৃতৈব মে
90.17
তদ্যদা মন্যসে ব্রহ্মন্গমনং তীর্থদর্শনে
তদৈব গন্তাস্মি দৃঢমেষ মে নিশ্চয়ঃ পরঃ
90.18
বৈশংপায়ন উবাচ
গমনে কৃতবুদ্ধিং তং পাণ্ডবং লোমশোঽব্রবীৎ
লঘুর্ভব মহারাজ লঘুঃ স্বৈরং গমিষ্যসি
90.19
যুধিষ্ঠির উবাচ
বিক্ষাভুজো নিবর্তন্তাং ব্রাহ্মণা যতয়শ্চ যে
যে চাপ্যনুগতাঃ পৌরা রাজভক্তিপুরস্কৃতাঃ
90.20
ধৃতরাষ্ট্রং মহারাজমভিগচ্ছন্তু চৈব তে
স দাস্যতি যথাকালমুচিতা যস্য যা ভৃতিঃ
90.21
স চেদ্যথোচিতাং বৃত্তিং ন দদ্যান্মনুজেশ্বরঃ
অস্মত্প্রিয়হিতার্থায় পাঞ্চাল্যো বঃ প্রদাস্যতি
90.22
বৈশংপায়ন উবাচ
ততো ভূয়িষ্ঠশঃ পৌরা গুরুভারসমাহিতাঃ
বিপ্রাশ্চ যতয়ো যুক্তা জগ্মুর্নাগপুরং প্রতি
90.23
তান্সর্বান্ধর্মরাজস্য প্রেম্ণা রাজাম্বিকাসুতঃ
প্রতিজগ্রাহ বিধিবদ্ধনৈশ্চ সমতর্পয়ৎ
90.24
ততঃ কুন্তীসুতো রাজা লঘুভির্ব্রাহ্মণৈঃ সহ
লোমশেন চ সুপ্রীতস্ত্রিরাত্রং কাম্যকেঽবসৎ