Utshovঅধ্যায় 89
89.1
বৈশংপায়ন উবাচ
এবং সংভাষমাণে তু ধৌম্যে কৌরবনন্দন
লোমশঃ সুমহাতেজা ঋষিস্তত্রাজগাম হ
89.2
তং পাণ্ডবাগ্রজো রাজা সগণো ব্রাহ্মণাশ্চ তে
উদতিষ্ঠন্মহাভাগং দিবি শক্রমিবামরাঃ
89.3
তমভ্যর্চ্য যথান্যায়ং ধর্মরাজো যুধিষ্ঠিরঃ
পপ্রচ্ছাগমনে হেতুমটনে চ প্রয়োজনম্
89.4
স পৃষ্টঃ পাণ্ডুপুত্রেণ প্রীয়মাণো মহামনাঃ
উবাচ শ্লক্ষ্ণয়া বাচা হর্ষয়ন্নিব পাণ্ডবান্
89.5
সংচরন্নস্মি কৌন্তেয় সর্বলোকান্যদৃচ্ছয়া
গতঃ শক্রস্য সদনং তত্রাপশ্যং সুরেশ্বরম্
89.6
তব চ ভ্রাতরং বীরমপশ্যং সব্যসাচিনম্
শক্রস্যার্ধাসনগতং তত্র মে বিস্ময়ো মহান্
আসীত্পুরুষশার্দূল দৃষ্ট্বা পার্থং তথাগতম্
89.7
আহ মাং তত্র দেবেশো গচ্ছ পাণ্ডুসুতানিতি
সোঽহমভ্যাগতঃ ক্ষিপ্রং দিদৃক্ষুস্ত্বাং সহানুজম্
89.8
বচনাত্পুরুহূতস্য পার্থস্য চ মহাত্মনঃ
আখ্যাস্যে তে প্রিয়ং তাত মহত্পাণ্ডবনন্দন
89.9
ভ্রাতৃভিঃ সহিতো রাজন্কৃষ্ণয়া চৈব তচ্ছৃণু
যত্ত্বয়োক্তো মহাবাহুরস্ত্রার্থং পাণ্ডবর্ষভ
89.10
তদস্ত্রমাপ্তং পার্থেন রুদ্রাদপ্রতিমং মহৎ
যত্তদ্ব্রহ্মশিরো নাম তপসা রুদ্রমাগতম্
89.11
অমৃতাদুত্থিতং রৌদ্রং তল্লব্ধং সব্যসাচিনা
তত্সমন্ত্রং সসংহারং সপ্রায়শ্চিত্তমঙ্গলম্
89.12
বজ্রং চান্যানি চাস্ত্রাণি দণ্ডাদীনি যুধিষ্ঠির
যমাত্কুবেরাদ্বরুণাদিন্দ্রাচ্চ কুরুনন্দন
অস্ত্রাণ্যধীতবান্পার্থো দিব্যান্যমিতবিক্রমঃ
89.13
বিশ্বাবসোশ্চ তনয়াদ্গীতং নৃত্তং চ সাম চ
বাদিত্রং চ যথান্যায়ং প্রত্যবিন্দদ্যথাবিধি
89.14
এবং কৃতাস্ত্রঃ কৌন্তেয়ো গান্ধর্বং বেদমাপ্তবান্
সুখং বসতি বীভত্সুরনুজস্যানুজস্তব
89.15
যদর্থং মাং সুরশ্রেষ্ঠ ইদং বচনমব্রবীৎ
তচ্চ তে কথয়িষ্যামি যুধিষ্ঠির নিবোধ মে
89.16
ভবান্মনুষ্যলোকায় গমিষ্যতি ন সংশয়ঃ
ব্রূয়াদ্যুধিষ্ঠিরং তত্র বচনান্মে দ্বিজোত্তম
89.17
আগমিষ্যতি তে ভ্রাতা কৃতাস্ত্রঃ ক্ষিপ্রমর্জুনঃ
সুরকার্যং মহত্কৃত্বা যদাশক্যং দিবৌকসৈঃ
89.18
তপসা তু ত্বমাত্মানং ভ্রাতৃভিঃ সহ যোজয়
তপসো হি পরং নাস্তি তপসা বিন্দতে মহৎ
89.19
অহং চ কর্ণং জানামি যথাবদ্ভরতর্ষভ
ন স পার্থস্য সংগ্রামে কলামর্হতি ষোডশীম্
89.20
যচ্চাপি তে ভয়ং তস্মান্মনসিস্থমরিংদম
তচ্চাপ্যপহরিষ্যামি সব্যসাচাবিহাগতে
89.21
যচ্চ তে মানসং বীর তীর্থয়াত্রামিমাং প্রতি
তচ্চ তে লোমশঃ সর্বং কথয়িষ্যত্যসংশয়ম্
89.22
যচ্চ কিংচিত্তপোয়ুক্তং ফলং তীর্থেষু ভারত
মহর্ষিরেষ যদ্ব্রূয়াত্তচ্ছ্রদ্ধেয়মনন্যথা