Utshovঅধ্যায় 88
88.1
ধৌম্য উবাচ
উদীচ্যাং রাজশার্দূল দিশি পুণ্যানি যানি বৈ
তানি তে কীর্তয়িষ্যামি পুণ্যান্যায়তনানি চ
88.2
সরস্বতী পুণ্যবহা হ্রদিনী বনমালিনী
সমুদ্রগা মহাবেগা যমুনা যত্র পাণ্ডব
88.3
তত্র পুণ্যতমং তীর্থং প্লক্ষাবতরণং শিবম্
যত্র সারস্বতৈরিষ্ট্বা গচ্ছন্ত্যবভৃথং দ্বিজাঃ
88.4
পুণ্যং চাখ্যায়তে দিব্যং শিবমগ্নিশিরোঽনঘ
সহদেবোঽয়জদ্যত্র শম্যাক্ষেপেণ ভারত
88.5
এতস্মিন্নেব চার্থেয়মিন্দ্রগীতা যুধিষ্ঠির
গাথা চরতি লোকেঽস্মিন্গীয়মানা দ্বিজাতিভিঃ
88.6
অগ্নয়ঃ সহদেবেন যে চিতা যমুনামনু
শতং শতসহস্রাণি সহস্রশতদক্ষিণাঃ
88.7
তত্রৈব ভরতো রাজা চক্রবর্তী মহায়শাঃ
বিংশতিং সপ্ত চাষ্টৌ চ হয়মেধানুপাহরৎ
88.8
কামকৃদ্যো দ্বিজাতীনাং শ্রুতস্তাত ময়া পুরা
অত্যন্তমাশ্রমঃ পুণ্যঃ সরকস্তস্য বিশ্রুতঃ
88.9
সরস্বতী নদী সদ্ভিঃ সততং পার্থ পূজিতা
বালখিল্যৈর্মহারাজ যত্রেষ্টমৃষিভিঃ পুরা
88.10
দৃষদ্বতী পুণ্যতমা তত্র খ্যাতা যুধিষ্ঠির
তত্র বৈবর্ণ্যবর্ণৌ চ সুপুণ্যৌ মনুজাধিপ
88.11
বেদজ্ঞৌ বেদবিদিতৌ বিদ্যাবেদবিদাবুভৌ
যজন্তৌ ক্রতুভির্নিত্যং পুণ্যৈর্ভরতসত্তম
88.12
সমেত্য বহুশো দেবাঃ সেন্দ্রাঃ সবরুণাঃ পুরা
বিশাখয়ূপেঽতপ্যন্ত তস্মাত্পুণ্যতমঃ স বৈ
88.13
ঋষির্মহান্মহাভাগো জমদগ্নির্মহায়শাঃ
পলাশকেষু পুণ্যেষু রম্যেষ্বয়জতাভিভূঃ
88.14
যত্র সর্বাঃ সরিচ্ছ্রেষ্ঠাঃ সাক্ষাত্তমৃষিসত্তমম্
স্বং স্বং তোয়মুপাদায় পরিবার্যোপতস্থিরে
88.15
অপি চাত্র মহারাজ স্বয়ং বিশ্বাবসুর্জগৌ
ইমং শ্লোকং তদা বীর প্রেক্ষ্য বীর্যং মহাত্মনঃ
88.16
যজমানস্য বৈ দেবাঞ্জমদগ্নের্মহাত্মনঃ
আগম্য সরিতঃ সর্বা মধুনা সমতর্পয়ন্
88.17
গন্ধর্বয়ক্ষরক্ষোভিরপ্সরোভিশ্চ শোভিতম্
কিরাতকিংনরাবাসং শৈলং শিখরিণাং বরম্
88.18
বিভেদ তরসা গঙ্গা গঙ্গাদ্বারে যুধিষ্ঠির
পুণ্যং তত্খ্যায়তে রাজন্ব্রহ্মর্ষিগণসেবিতম্
88.19
সনত্কুমারঃ কৌরব্য পুণ্যং কনখলং তথা
পর্বতশ্চ পুরুর্নাম যত্র জাতঃ পুরূরবাঃ
88.20
ভৃগুর্যত্র তপস্তেপে মহর্ষিগণসেবিতঃ
স রাজন্নাশ্রমঃ খ্যাতো ভৃগুতুঙ্গো মহাগিরিঃ
88.21
যচ্চ ভূতং ভবিষ্যচ্চ ভবচ্চ পুরুষর্ষভ
নারায়ণঃ প্রভুর্বিষ্ণুঃ শাশ্বতঃ পুরুষোত্তমঃ
88.22
তস্যাতিয়শসঃ পুণ্যাং বিশালাং বদরীমনু
আশ্রমঃ খ্যায়তে পুণ্যস্ত্রিষু লোকেষু বিশ্রুতঃ
88.23
উষ্ণতোয়বহা গঙ্গা শীততোয়বহাপরা
সুবর্ণসিকতা রাজন্বিশালাং বদরীমনু
88.24
ঋষয়ো যত্র দেবাশ্চ মহাভাগা মহৌজসঃ
প্রাপ্য নিত্যং নমস্যন্তি দেবং নারায়ণং বিভুম্
88.25
যত্র নারায়ণো দেবঃ পরমাত্মা সনাতনঃ
তত্র কৃত্স্নং জগত্পার্থ তীর্থান্যায়তনানি চ
88.26
তত্পুণ্যং তত্পরং ব্রহ্ম তত্তীর্থং তত্তপোবনম্
তত্র দেবর্ষয়ঃ সিদ্ধাঃ সর্বে চৈব তপোধনাঃ
88.27
আদিদেবো মহায়োগী যত্রাস্তে মধুসূদনঃ
পুণ্যানামপি তত্পুণ্যং তত্র তে সংশয়োঽস্তু মা
88.28
এতানি রাজন্পুণ্যানি পৃথিব্যাং পৃথিবীপতে
কীর্তিতানি নরশ্রেষ্ঠ তীর্থান্যায়তনানি চ
88.29
এতানি বসুভিঃ সাধ্যৈরাদিত্যৈর্মরুদশ্বিভিঃ
ঋষিভির্ব্রহ্মকল্পৈশ্চ সেবিতানি মহাত্মভিঃ
88.30
চরনেতানি কৌন্তেয় সহিতো ব্রাহ্মণর্ষভৈঃ
ভ্রাতৃভিশ্চ মহাভাগৈরুত্কণ্ঠাং বিজহিষ্যসি