অধ্যায় 87

87.1

ধৌম্য উবাচ
অবন্তিষু প্রতীচ্যাং বৈ কীর্তয়িষ্যামি তে দিশি
যানি তত্র পবিত্রাণি পুণ্যান্যায়তনানি চ

প্রিয়ঙ্গ্বাম্রবনোপেতা বানীরবনমালিনী
প্রত্যক্স্রোতা নদী পুণ্যা নর্মদা তত্র ভারত

নিকেতঃ খ্যায়তে পুণ্যো যত্র বিশ্রবসো মুনেঃ
জজ্ঞে ধনপতির্যত্র কুবেরো নরবাহনঃ

বৈডূর্যশিখরো নাম পুণ্যো গিরিবরঃ শুভঃ
দিব্যপুষ্পফলাস্তত্র পাদপা হরিতচ্ছদাঃ

তস্য শৈলস্য শিখরে সরস্তত্র চ ধীমতঃ
প্রফুল্লনলিনং রাজন্দেবগন্ধর্বসেবিতম্

বহ্বাশ্চর্যং মহারাজ দৃশ্যতে তত্র পর্বতে
পুণ্যে স্বর্গোপমে দিব্যে নিত্যং দেবর্ষিসেবিতে

হ্রদিনী পুণ্যতীর্থা চ রাজর্ষেস্তত্র বৈ সরিৎ
বিশ্বামিত্রনদী পারা পুণ্যা পরপুরংজয়

যস্যাস্তীরে সতাং মধ্যে যয়াতির্নহুষাত্মজঃ
পপাত স পুনর্লোকাঁল্লেভে ধর্মান্সনাতনান্

তত্র পুণ্যহ্রদস্তাত মৈনাকশ্চৈব পর্বতঃ
বহুমূলফলো বীর অসিতো নাম পর্বতঃ

আশ্রমঃ কক্ষসেনস্য পুণ্যস্তত্র যুধিষ্ঠির
চ্যবনস্যাশ্রমশ্চৈব খ্যাতঃ সর্বত্র পাণ্ডব
তত্রাল্পেনৈব সিধ্যন্তি মানবাস্তপসা বিভো

জম্বূমার্গো মহারাজ ঋষীণাং ভাবিতাত্মনাম্
আশ্রমঃ শাম্যতাং শ্রেষ্ঠ মৃগদ্বিজগণায়ুতঃ

ততঃ পুণ্যতমা রাজন্সততং তাপসায়ুতা
কেতুমালা চ মেধ্যা চ গঙ্গারণ্যং চ ভূমিপ
খ্যাতং চ সৈন্ধবারণ্যং পুণ্যং দ্বিজনিষেবিতম্

পিতামহসরঃ পুণ্যং পুষ্করং নাম ভারত
বৈখানসানাং সিদ্ধানামৃষীণামাশ্রমঃ প্রিয়ঃ

অপ্যত্র সংস্তবার্থায় প্রজাপতিরথো জগৌ
পুষ্করেষু কুরুশ্রেষ্ঠ গাথাং সুকৃতিনাং বর

মনসাপ্যভিকামস্য পুষ্করাণি মনস্বিনঃ
পাপাণি বিপ্রণশ্যন্তি নাকপৃষ্ঠে চ মোদতে