অধ্যায় 86

86.1

ধৌম্য উবাচ
দক্ষিণস্যাং তু পুণ্যানি শৃণু তীর্থানি ভারত
বিস্তরেণ যথাবুদ্ধি কীর্ত্যমানানি ভারত

86.2

যস্যামাখ্যায়তে পুণ্যা দিশি গোদাবরী নদী
বহ্বারামা বহুজলা তাপসাচরিতা শুভা

86.3

বেণ্ণা ভীমরথী চোভে নদ্যৌ পাপভয়াপহে
মৃগদ্বিজসমাকীর্ণে তাপসালয়ভূষিতে

86.4

রাজর্ষেস্তত্র চ সরিন্নৃগস্য ভরতর্ষভ
রম্যতীর্থা বহুজলা পয়োষ্ণী দ্বিজসেবিতা

86.5

অপি চাত্র মহায়োগী মার্কণ্ডেয়ো মহাতপাঃ
অনুবংশ্যাং জগৌ গাথাং নৃগস্য ধরণীপতেঃ

86.6

নৃগস্য যজমানস্য প্রত্যক্ষমিতি নঃ শ্রুতম্
অমাদ্যদিন্দ্রঃ সোমেন দক্ষিণাভির্দ্বিজাতয়ঃ

86.7

মাঠরস্য বনং পুণ্যং বহুমূলফলং শিবম্
যূপশ্চ ভরতশ্রেষ্ঠ বরুণস্রোতসে গিরৌ

86.8

প্রবেণ্যুত্তরপার্শ্বে তু পুণ্যে কণ্বাশ্রমে তথা
তাপসানামরণ্যানি কীর্তিতানি যথাশ্রুতি

86.9

বেদী শূর্পারকে তাত জমদগ্নের্মহাত্মনঃ
রম্যা পাষাণতীর্থা চ পুরশ্চন্দ্রা চ ভারত

86.10

অশোকতীর্থং মর্ত্যেষু কৌন্তেয় বহুলাশ্রমম্
অগস্ত্যতীর্থং পাণ্ড্যেষু বারুণং চ যুধিষ্ঠির

86.11

কুমার্যঃ কথিতাঃ পুণ্যাঃ পাণ্ড্যেষ্বেব নরর্ষভ
তাম্রপর্ণীং তু কৌন্তেয় কীর্তয়িষ্যামি তাং শৃণু

86.12

যত্র দেবৈস্তপস্তপ্তং মহদিচ্ছদ্ভিরাশ্রমে
গোকর্ণমিতি বিখ্যাতং ত্রিষু লোকেষু ভারত

86.13

শীততোয়ো বহুজলঃ পুণ্যস্তাত শিবশ্চ সঃ
হ্রদঃ পরমদুষ্প্রাপো মানুষৈরকৃতাত্মভিঃ

86.14

তত্রৈব তৃণসোমাগ্নেঃ সংপন্নফলমূলবান্
আশ্রমোঽগস্ত্যশিষ্যস্য পুণ্যো দেবসভে গিরৌ

86.15

বৈডূর্যপর্বতস্তত্র শ্রীমান্মণিময়ঃ শিবঃ
অগস্ত্যস্যাশ্রমশ্চৈব বহুমূলফলোদকঃ

86.16

সুরাষ্ট্রেষ্বপি বক্ষ্যামি পুণ্যান্যায়তনানি চ
আশ্রমান্সরিতঃ শৈলান্সরাংসি চ নরাধিপ

86.17

চমসোন্মজ্জনং বিপ্রাস্তত্রাপি কথয়ন্ত্যুত
প্রভাসং চোদধৌ তীর্থং ত্রিদশানাং যুধিষ্ঠির

86.18

তত্র পিণ্ডারকং নাম তাপসাচরিতং শুভম্
উজ্জয়ন্তশ্চ শিখরী ক্ষিপ্রং সিদ্ধিকরো মহান্

86.19

তত্র দেবর্ষিবর্যেণ নারদেনানুকীর্তিতঃ
পুরাণঃ শ্রূয়তে শ্লোকস্তং নিবোধ যুধিষ্ঠির

86.20

পুণ্যে গিরৌ সুরাষ্ট্রেষু মৃগপক্ষিনিষেবিতে
উজ্জয়ন্তে স্ম তপ্তাঙ্গো নাকপৃষ্ঠে মহীয়তে

86.21

পুণ্যা দ্বারবতী তত্র যত্রাস্তে মধুসূদনঃ
সাক্ষাদ্দেবঃ পুরাণোঽসৌ স হি ধর্মঃ সনাতনঃ

86.22

যে চ বেদবিদো বিপ্রা যে চাধ্যাত্মবিদো জনাঃ
তে বদন্তি মহাত্মানং কৃষ্ণং ধর্মং সনাতনম্

86.23

পবিত্রাণাং হি গোবিন্দঃ পবিত্রং পরমুচ্যতে
পুণ্যানামপি পুণ্যোঽসৌ মঙ্গলানাং চ মঙ্গলম্

86.24

ত্রৈলোক্যং পুণ্ডরীকাক্ষো দেবদেবঃ সনাতনঃ
আস্তে হরিরচিন্ত্যাত্মা তত্রৈব মধুসূদনঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.