অধ্যায় 85

85.1

বৈশংপায়ন উবাচ
তান্সর্বানুত্সুকান্দৃষ্ট্বা পাণ্ডবান্দীনচেতসঃ
আশ্বাসয়ংস্তদা ধৌম্যো বৃহস্পতিসমোঽব্রবীৎ

ব্রাহ্মণানুমতান্পুণ্যানাশ্রমান্ভরতর্ষভ
দিশস্তীর্থানি শৈলাংশ্চ শৃণু মে গদতো নৃপ

পূর্বং প্রাচীং দিশং রাজন্রাজর্ষিগণসেবিতাম্
রম্যাং তে কীর্তয়িষ্যামি যুধিষ্ঠির যথাস্মৃতি

তস্যাং দেবর্ষিজুষ্টায়াং নৈমিষং নাম ভারত
যত্র তীর্থানি দেবানাং সুপুণ্যানি পৃথক্পৃথক্

যত্র সা গোমতী পুণ্যা রম্যা দেবর্ষিসেবিতা
যজ্ঞভূমিশ্চ দেবানাং শামিত্রং চ বিবস্বতঃ

তস্যাং গিরিবরঃ পুণ্যো গয়ো রাজর্ষিসত্কৃতঃ
শিবং ব্রহ্মসরো যত্র সেবিতং ত্রিদশর্ষিভিঃ

যদর্থং পুরুষব্যাঘ্র কীর্তয়ন্তি পুরাতনাঃ
এষ্টব্যা বহবঃ পুত্রা যদ্যেকোঽপি গয়াং ব্রজেৎ

মহানদী চ তত্রৈব তথা গয়শিরোঽনঘ
যত্রাসৌ কীর্ত্যতে বিপ্রৈরক্ষয্যকরণো বটঃ
যত্র দত্তং পিতৃভ্যোঽন্নমক্ষয্যং ভবতি প্রভো

সা চ পুণ্যজলা যত্র ফল্গুনামা মহানদী
বহুমূলফলা চাপি কৌশিকী ভরতর্ষভ
বিশ্বামিত্রোঽভ্যগাদ্যত্র ব্রাহ্মণত্বং তপোধনঃ

গঙ্গা যত্র নদী পুণ্যা যস্যাস্তীরে ভগীরথঃ
অয়জত্তাত বহুভিঃ ক্রতুভির্ভূরিদক্ষিণৈঃ

পাঞ্চালেষু চ কৌরব্য কথয়ন্ত্যুত্পলাবতম্
বিশ্বামিত্রোঽয়জদ্যত্র শক্রেণ সহ কৌশিকঃ
যত্রানুবংশং ভগবাঞ্জামদগ্ন্যস্তথা জগৌ

বিশ্বামিত্রস্য তাং দৃষ্ট্বা বিভূতিমতিমানুষীম্
কন্যকুব্জেঽপিবত্সোমমিন্দ্রেণ সহ কৌশিকঃ
ততঃ ক্ষত্রাদপাক্রামদ্ব্রাহ্মণোঽস্মীতি চাব্রবীৎ

পবিত্রমৃষিভির্জুষ্টং পুণ্যং পাবনমুত্তমম্
গঙ্গায়মুনয়োর্বীর সংগমং লোকবিশ্রুতম্

যত্রায়জত ভূতাত্মা পূর্বমেব পিতামহঃ
প্রয়াগমিতি বিখ্যাতং তস্মাদ্ভরতসত্তম

অগস্ত্যস্য চ রাজেন্দ্র তত্রাশ্রমবরো মহান্
হিরণ্যবিন্দুঃ কথিতো গিরৌ কালংজরে নৃপ

অত্যন্যান্পর্বতান্রাজন্পুণ্যো গিরিবরঃ শিবঃ
মহেন্দ্রো নাম কৌরব্য ভার্গবস্য মহাত্মনঃ

অয়জদ্যত্র কৌন্তেয় পূর্বমেব পিতামহঃ
যত্র ভাগীরথী পুণ্যা সদস্যাসীদ্যুধিষ্ঠির

যত্রাসৌ ব্রহ্মশালেতি পুণ্যা খ্যাতা বিশাং পতে
ধূতপাপ্মভিরাকীর্ণা পুণ্যং তস্যাশ্চ দর্শনম্

পবিত্রো মঙ্গলীয়শ্চ খ্যাতো লোকে সনাতনঃ
কেদারশ্চ মতঙ্গস্য মহানাশ্রম উত্তমঃ

কুণ্ডোদঃ পর্বতো রম্যো বহুমূলফলোদকঃ
নৈষধস্তৃষিতো যত্র জলং শর্ম চ লব্ধবান্

যত্র দেববনং রম্যং তাপসৈরুপশোভিতম্
বাহুদা চ নদী যত্র নন্দা চ গিরিমূর্ধনি

তীর্থানি সরিতঃ শৈলাঃ পুণ্যান্যায়তনানি চ
প্রাচ্যাং দিশি মহারাজ কীর্তিতানি ময়া তব

তিসৃষ্বন্যাসু পুণ্যানি দিক্ষু তীর্থানি মে শৃণু
সরিতঃ পর্বতাংশ্চৈব পুণ্যান্যায়তনানি চ