অধ্যায় 84

84.1

বৈশংপায়ন উবাচ
ভ্রাতৄণাং মতমাজ্ঞায় নারদস্য চ ধীমতঃ
পিতামহসমং ধৌম্যং প্রাহ রাজা যুধিষ্ঠিরঃ

ময়া স পুরুষব্যাঘ্রো জিষ্ণুঃ সত্যপরাক্রমঃ
অস্ত্রহেতোর্মহাবাহুরমিতাত্মা বিবাসিতঃ

স হি বীরোঽনুরক্তশ্চ সমর্থশ্চ তপোধন
কৃতী চ ভৃশমপ্যস্ত্রে বাসুদেব ইব প্রভুঃ

অহং হ্যেতাবুভৌ ব্রহ্মন্কৃষ্ণাবরিনিঘাতিনৌ
অভিজানামি বিক্রান্তৌ তথা ব্যাসঃ প্রতাপবান্
ত্রিয়ুগৌ পুণ্ডরীকাক্ষৌ বাসুদেবধনংজয়ৌ

নারদোঽপি তথা বেদ সোঽপ্যশংসত্সদা মম
তথাহমপি জানামি নরনারায়ণাবৃষী

শক্তোঽয়মিত্যতো মত্বা ময়া সংপ্রেষিতোঽর্জুনঃ
ইন্দ্রাদনবরঃ শক্তঃ সুরসূনুঃ সুরাধিপম্
দ্রষ্টুমস্ত্রাণি চাদাতুমিন্দ্রাদিতি বিবাসিতঃ

ভীষ্মদ্রোণাবতিরথৌ কৃপো দ্রৌণিশ্চ দুর্জয়ঃ
ধৃতরাষ্ট্রস্য পুত্রেণ বৃতা যুধি মহাবলাঃ
সর্বে বেদবিদঃ শূরাঃ সর্বেঽস্ত্রকুশলাস্তথা

যোদ্ধুকামশ্চ পার্থেন সততং যো মহাবলঃ
স চ দিব্যাস্ত্রবিত্কর্ণঃ সূতপুত্রো মহারথঃ

সোঽশ্ববেগানিলবলঃ শরার্চিস্তলনিস্বনঃ
রজোধূমোঽস্ত্রসংতাপো ধার্তরাষ্ট্রানিলোদ্ধতঃ

নিসৃষ্ট ইব কালেন যুগান্তজ্বলনো যথা
মম সৈন্যময়ং কক্ষং প্রধক্ষ্যতি ন সংশয়ঃ

তং স কৃষ্ণানিলোদ্ধূতো দিব্যাস্ত্রজলদো মহান্
শ্বেতবাজিবলাকাভৃদ্গাণ্ডীবেন্দ্রায়ুধোজ্জ্বলঃ

সততং শরধারাভিঃ প্রদীপ্তং কর্ণপাবকম্
উদীর্ণোঽর্জুনমেঘোঽয়ং শময়িষ্যতি সংয়ুগে

স সাক্ষাদেব সর্বাণি শক্রাত্পরপুরংজয়ঃ
দিব্যান্যস্ত্রাণি বীভত্সুস্তত্ত্বতঃ প্রতিপত্স্যতে

অলং স তেষাং সর্বেষামিতি মে ধীয়তে মতিঃ
নাস্তি ত্বতিক্রিয়া তস্য রণেঽরীণাং প্রতিক্রিয়া

তং বয়ং পাণ্ডবং সর্বে গৃহীতাস্ত্রং ধনংজয়ম্
দ্রষ্টারো ন হি বীভত্সুর্ভারমুদ্যম্য সীদতি

বয়ং তু তমৃতে বীরং বনেঽস্মিন্দ্বিপদাং বর
অবধানং ন গচ্ছামঃ কাম্যকে সহ কৃষ্ণয়া

ভবানন্যদ্বনং সাধু বহ্বন্নং ফলবচ্ছুচি
আখ্যাতু রমণীয়ং চ সেবিতং পুণ্যকর্মভিঃ

যত্র কংচিদ্বয়ং কালং বসন্তঃ সত্যবিক্রমম্
প্রতীক্ষামোঽর্জুনং বীরং বর্ষকামা ইবাম্বুদম্

বিবিধানাশ্রমান্কাংশ্চিদ্দ্বিজাতিভ্যঃ পরিশ্রুতান্
সরাংসি সরিতশ্চৈব রমণীয়াংশ্চ পর্বতান্

আচক্ষ্ব ন হি নো ব্রহ্মন্রোচতে তমৃতেঽর্জুনম্
বনেঽস্মিন্কাম্যকে বাসো গচ্ছামোঽন্যাং দিশং প্রতি