Utshovঅধ্যায় 83
83.1
পুলস্ত্য উবাচ
অথ সংধ্যাং সমাসাদ্য সংবেদ্যং তীর্থমুত্তমম্
উপস্পৃশ্য নরো বিদ্বান্ভবেন্নাস্ত্যত্র সংশয়ঃ
83.2
রামস্য চ প্রসাদেন তীর্থং রাজন্কৃতং পুরা
তল্লোহিত্যং সমাসাদ্য বিন্দ্যাদ্বহু সুবর্ণকম্
83.3
করতোয়াং সমাসাদ্য ত্রিরাত্রোপোষিতো নরঃ
অশ্বমেধমবাপ্নোতি কৃতে পৈতামহে বিধৌ
83.4
গঙ্গায়াস্ত্বথ রাজেন্দ্র সাগরস্য চ সংগমে
অশ্বমেধং দশগুণং প্রবদন্তি মনীষিণঃ
83.5
গঙ্গায়াস্ত্বপরং দ্বীপং প্রাপ্য যঃ স্নাতি ভারত
ত্রিরাত্রোপোষিতো রাজন্সর্বকামানবাপ্নুয়াৎ
83.6
ততো বৈতরণীং গত্বা নদীং পাপপ্রমোচনীম্
বিরজং তীর্থমাসাদ্য বিরাজতি যথা শশী
83.7
প্রভবেচ্চ কুলে পুণ্যে সর্বপাপং ব্যপোহতি
গোসহস্রফলং লব্ধ্বা পুনাতি চ কুলং নরঃ
83.8
শোণস্য জ্যোতিরথ্যাশ্চ সংগমে নিবসঞ্শুচিঃ
তর্পয়িত্বা পিতৄন্দেবানগ্নিষ্টোমফলং লভেৎ
83.9
শোণস্য নর্মদায়াশ্চ প্রভবে কুরুনন্দন
বংশগুল্ম উপস্পৃশ্য বাজিমেধফলং লভেৎ
83.10
ঋষভং তীর্থমাসাদ্য কোশলায়াং নরাধিপ
বাজপেয়মবাপ্নোতি ত্রিরাত্রোপোষিতো নরঃ
83.11
কোশলায়াং সমাসাদ্য কালতীর্থ উপস্পৃশেৎ
বৃষভৈকাদশফলং লভতে নাত্র সংশয়ঃ
83.12
পুষ্পবত্যামুপস্পৃশ্য ত্রিরাত্রোপোষিতো নরঃ
গোসহস্রফলং বিন্দ্যাত্কুলং চৈব সমুদ্ধরেৎ
83.13
ততো বদরিকাতীর্থে স্নাত্বা প্রয়তমানসঃ
দীর্ঘমায়ুরবাপ্নোতি স্বর্গলোকং চ গচ্ছতি
83.14
ততো মহেন্দ্রমাসাদ্য জামদগ্ন্যনিষেবিতম্
রামতীর্থে নরঃ স্নাত্বা বাজিমেধফলং লভেৎ
83.15
মতঙ্গস্য তু কেদারস্তত্রৈব কুরুনন্দন
তত্র স্নাত্বা নরো রাজন্গোসহস্রফলং লভেৎ
83.16
শ্রীপর্বতং সমাসাদ্য নদীতীর উপস্পৃশেৎ
অশ্বমেধমবাপ্নোতি স্বর্গলোকং চ গচ্ছতি
83.17
শ্রীপর্বতে মহাদেবো দেব্যা সহ মহাদ্যুতিঃ
ন্যবসত্পরমপ্রীতো ব্রহ্মা চ ত্রিদশৈর্বৃতঃ
83.18
তত্র দেবহ্রদে স্নাত্বা শুচিঃ প্রয়তমানসঃ
অশ্বমেধমবাপ্নোতি পরাং সিদ্ধিং চ গচ্ছতি
83.19
ঋষভং পর্বতং গত্বা পাণ্ড্যেষু সুরপূজিতম্
বাজপেয়মবাপ্নোতি নাকপৃষ্ঠে চ মোদতে
83.20
ততো গচ্ছেত কাবেরীং বৃতামপ্সরসাং গণৈঃ
তত্র স্নাত্বা নরো রাজন্গোসহস্রফলং লভেৎ
83.21
ততস্তীরে সমুদ্রস্য কন্যাতীর্থ উপস্পৃশেৎ
তত্রোপস্পৃশ্য রাজেন্দ্র সর্বপাপৈঃ প্রমুচ্যতে
83.22
অথ গোকর্ণমাসাদ্য ত্রিষু লোকেষু বিশ্রুতম্
সমুদ্রমধ্যে রাজেন্দ্র সর্বলোকনমস্কৃতম্
83.23
যত্র ব্রহ্মাদয়ো দেবা ঋষয়শ্চ তপোধনাঃ
ভূতয়ক্ষপিশাচাশ্চ কিংনরাঃ সমহোরগাঃ
83.24
সিদ্ধচারণগন্ধর্বা মানুষাঃ পন্নগাস্তথা
সরিতঃ সাগরাঃ শৈলা উপাসন্ত উমাপতিম্
83.25
তত্রেশানং সমভ্যর্চ্য ত্রিরাত্রোপোষিতো নরঃ
দশাশ্বমেধমাপ্নোতি গাণপত্যং চ বিন্দতি
উষ্য দ্বাদশরাত্রং তু কৃতাত্মা ভবতে নরঃ
83.26
তত এব তু গায়ত্র্যাঃ স্থানং ত্রৈলোক্যবিশ্রুতম্
ত্রিরাত্রমুষিতস্তত্র গোসহস্রফলং লভেৎ
83.27
নিদর্শনং চ প্রত্যক্ষং ব্রাহ্মণানাং নরাধিপ
গায়ত্রীং পঠতে যস্তু যোনিসংকরজস্তথা
গাথা বা গীতিকা বাপি তস্য সংপদ্যতে নৃপ
83.28
সংবর্তস্য তু বিপ্রর্ষের্বাপীমাসাদ্য দুর্লভাম্
রূপস্য ভাগী ভবতি সুভগশ্চৈব জায়তে
83.29
ততো বেণ্ণাং সমাসাদ্য তর্পয়েত্পিতৃদেবতাঃ
ময়ূরহংসসংয়ুক্তং বিমানং লভতে নরঃ
83.30
ততো গোদাবরীং প্রাপ্য নিত্যং সিদ্ধনিষেবিতাম্
গবাময়মবাপ্নোতি বাসুকের্লোকমাপ্নুয়াৎ
83.31
বেণ্ণায়াঃ সংগমে স্নাত্বা বাজপেয়ফলং লভেৎ
বরদাসংগমে স্নাত্বা গোসহস্রফলং লভেৎ
83.32
ব্রহ্মস্থানং সমাসাদ্য ত্রিরাত্রমুষিতো নরঃ
গোসহস্রফলং বিন্দেত্স্বর্গলোকং চ গচ্ছতি
83.33
কুশপ্লবনমাসাদ্য ব্রহ্মচারী সমাহিতঃ
ত্রিরাত্রমুষিতঃ স্নাত্বা অশ্বমেধফলং লভেৎ
83.34
ততো দেবহ্রদে রম্যে কৃষ্ণবেণ্ণাজলোদ্ভবে
জাতিমাত্রহ্রদে চৈব তথা কন্যাশ্রমে নৃপ
83.35
যত্র ক্রতুশতৈরিষ্ট্বা দেবরাজো দিবং গতঃ
অগ্নিষ্টোমশতং বিন্দেদ্গমনাদেব ভারত
83.36
সর্বদেবহ্রদে স্নাত্বা গোসহস্রফলং লভেৎ
জাতিমাত্রহ্রদে স্নাত্বা ভবেজ্জাতিস্মরো নরঃ
83.37
ততোঽবাপ্য মহাপুণ্যাং পয়োষ্ণীং সরিতাং বরাম্
পিতৃদেবার্চনরতো গোসহস্রফলং লভেৎ
83.38
দণ্ডকারণ্যমাসাদ্য মহারাজ উপস্পৃশেৎ
গোসহস্রফলং তত্র স্নাতমাত্রস্য ভারত
83.39
শরভঙ্গাশ্রমং গত্বা শুকস্য চ মহাত্মনঃ
ন দুর্গতিমবাপ্নোতি পুনাতি চ কুলং নরঃ
83.40
ততঃ শূর্পারকং গচ্ছেজ্জামদগ্ন্যনিষেবিতম্
রামতীর্থে নরঃ স্নাত্বা বিন্দ্যাদ্বহু সুবর্ণকম্
83.41
সপ্তগোদাবরে স্নাত্বা নিয়তো নিয়তাশনঃ
মহত্পুণ্যমবাপ্নোতি দেবলোকং চ গচ্ছতি
83.42
ততো দেবপথং গচ্ছেন্নিয়তো নিয়তাশনঃ
দেবসত্রস্য যত্পুণ্যং তদবাপ্নোতি মানবঃ
83.43
তুঙ্গকারণ্যমাসাদ্য ব্রহ্মচারী জিতেন্দ্রিয়ঃ
বেদানধ্যাপয়ত্তত্র ঋষিঃ সারস্বতঃ পুরা
83.44
তত্র বেদান্প্রনষ্টাংস্তু মুনেরঙ্গিরসঃ সুতঃ
উপবিষ্টো মহর্ষীণামুত্তরীয়েষু ভারত
83.45
ওংকারেণ যথান্যায়ং সম্যগুচ্চারিতেন চ
যেন যত্পূর্বমভ্যস্তং তত্তস্য সমুপস্থিতম্
83.46
ঋষয়স্তত্র দেবাশ্চ বরুণোঽগ্নিঃ প্রজাপতিঃ
হরির্নারায়ণো দেবো মহাদেবস্তথৈব চ
83.47
পিতামহশ্চ ভগবান্দেবৈঃ সহ মহাদ্যুতিঃ
ভৃগুং নিয়োজয়ামাস যাজনার্থে মহাদ্যুতিম্
83.48
ততঃ স চক্রে ভগবানৃষীণাং বিধিবত্তদা
সর্বেষাং পুনরাধানং বিধিদৃষ্টেন কর্মণা
83.49
আজ্যভাগেন বৈ তত্র তর্পিতাস্তু যথাবিধি
দেবাস্ত্রিভুবণং যাতা ঋষয়শ্চ যথাসুখম্
83.50
তদরণ্যং প্রবিষ্টস্য তুঙ্গকং রাজসত্তম
পাপং প্রণশ্যতে সর্বং স্ত্রিয়ো বা পুরুষস্য বা
83.51
তত্র মাসং বসেদ্ধীরো নিয়তো নিয়তাশনঃ
ব্রহ্মলোকং ব্রজেদ্রাজন্পুনীতে চ কুলং নরঃ
83.52
মেধাবিকং সমাসাদ্য পিতৄন্দেবাংশ্চ তর্পয়েৎ
অগ্নিষ্টোমমবাপ্নোতি স্মৃতিং মেধাং চ বিন্দতি
83.53
ততঃ কালংজরং গত্বা পর্বতং লোকবিশ্রুতম্
তত্র দেবহ্রদে স্নাত্বা গোসহস্রফলং লভেৎ
83.54
আত্মানং সাধয়েত্তত্র গিরৌ কালংজরে নৃপ
স্বর্গলোকে মহীয়েত নরো নাস্ত্যত্র সংশয়ঃ
83.55
ততো গিরিবরশ্রেষ্ঠে চিত্রকূটে বিশাং পতে
মন্দাকিনীং সমাসাদ্য নদীং পাপপ্রমোচনীম্
83.56
তত্রাভিষেকং কুর্বাণঃ পিতৃদেবার্চনে রতঃ
অশ্বমেধমবাপ্নোতি গতিং চ পরমাং ব্রজেৎ
83.57
ততো গচ্ছেত রাজেন্দ্র ভর্তৃস্থানমনুত্তমম্
যত্র দেবো মহাসেনো নিত্যং সংনিহিতো নৃপঃ
83.58
পুমাংস্তত্র নরশ্রেষ্ঠ গমনাদেব সিধ্যতি
কোটিতীর্থে নরঃ স্নাত্বা গোসহস্রফলং লভেৎ
83.59
প্রদক্ষিণমুপাবৃত্য জ্যেষ্ঠস্থানং ব্রজেন্নরঃ
অভিগম্য মহাদেবং বিরাজতি যথা শশী
83.60
তত্র কূপো মহারাজ বিশ্রুতো ভরতর্ষভ
সমুদ্রাস্তত্র চত্বারো নিবসন্তি যুধিষ্ঠির
83.61
তত্রোপস্পৃশ্য রাজেন্দ্র কৃত্বা চাপি প্রদক্ষিণম্
নিয়তাত্মা নরঃ পূতো গচ্ছেত পরমাং গতিম্
83.62
ততো গচ্ছেত্কুরুশ্রেষ্ঠ শৃঙ্গবেরপুরং মহৎ
যত্র তীর্ণো মহারাজ রামো দাশরথিঃ পুরা
83.63
গঙ্গায়াং তু নরঃ স্নাত্বা ব্রহ্মচারী সমাহিতঃ
বিধূতপাপ্মা ভবতি বাজপেয়ং চ বিন্দতি
83.64
অভিগম্য মহাদেবমভ্যর্চ্য চ নরাধিপ
প্রদক্ষিণমুপাবৃত্য গাণপত্যমবাপ্নুয়াৎ
83.65
ততো গচ্ছেত রাজেন্দ্র প্রয়াগমৃষিসংস্তুতম্
যত্র ব্রহ্মাদয়ো দেবা দিশশ্চ সদিগীশ্বরাঃ
83.66
লোকপালাশ্চ সাধ্যাশ্চ নৈরৃতাঃ পিতরস্তথা
সনত্কুমারপ্রমুখাস্তথৈব পরমর্ষয়ঃ
83.67
অঙ্গিরঃপ্রমুখাশ্চৈব তথা ব্রহ্মর্ষয়োঽপরে
তথা নাগাঃ সুপর্ণাশ্চ সিদ্ধাশ্চক্রচরাস্তথা
83.68
সরিতঃ সাগরাশ্চৈব গন্ধর্বাপ্সরসস্তথা
হরিশ্চ ভগবানাস্তে প্রজাপতিপুরস্কৃতঃ
83.69
তত্র ত্রীণ্যগ্নিকুণ্ডানি যেষাং মধ্যে চ জাহ্নবী
প্রয়াগাদভিনিষ্ক্রান্তা সর্বতীর্থপুরস্কৃতা
83.70
তপনস্য সুতা তত্র ত্রিষু লোকেষু বিশ্রুতা
যমুনা গঙ্গয়া সার্ধং সংগতা লোকপাবনী
83.71
গঙ্গায়মুনয়োর্মধ্যং পৃথিব্যা জঘনং স্মৃতম্
প্রয়াগং জঘনস্যান্তমুপস্থমৃষয়ো বিদুঃ
83.72
প্রয়াগং সপ্রতিষ্ঠানং কম্বলাশ্বতরৌ তথা
তীর্থং ভোগবতী চৈব বেদী প্রোক্তা প্রজাপতেঃ
83.73
তত্র বেদাশ্চ যজ্ঞাশ্চ মূর্তিমন্তো যুধিষ্ঠির
প্রজাপতিমুপাসন্তে ঋষয়শ্চ মহাব্রতাঃ
যজন্তে ক্রতুভির্দেবাস্তথা চক্রচরা নৃপ
83.74
ততঃ পুণ্যতমং নাস্তি ত্রিষু লোকেষু ভারত
প্রয়াগঃ সর্বতীর্থেভ্যঃ প্রভবত্যধিকং বিভো
83.75
শ্রবণাত্তস্য তীর্থস্য নামসংকীর্তনাদপি
মৃত্তিকালম্ভনাদ্বাপি নরঃ পাপাত্প্রমুচ্যতে
83.76
তত্রাভিষেকং যঃ কুর্যাত্সংগমে সংশিতব্রতঃ
পুণ্যং স ফলমাপ্নোতি রাজসূয়াশ্বমেধয়োঃ
83.77
এষা যজনভূমির্হি দেবানামপি সত্কৃতা
তত্র দত্তং সূক্ষ্মমপি মহদ্ভবতি ভারত
83.78
ন বেদবচনাত্তাত ন লোকবচনাদপি
মতিরুত্ক্রমণীয়া তে প্রয়াগমরণং প্রতি
83.79
দশ তীর্থসহস্রাণি ষষ্টিকোট্যস্তথাপরাঃ
যেষাং সাংনিধ্যমত্রৈব কীর্তিতং কুরুনন্দন
83.80
চাতুর্বেদে চ যত্পুণ্যং সত্যবাদিষু চৈব যৎ
স্নাত এব তদাপ্নোতি গঙ্গায়মুনসংগমে
83.81
তত্র ভোগবতী নাম বাসুকেস্তীর্থমুত্তমম্
তত্রাভিষেকং যঃ কুর্যাত্সোঽশ্বমেধমবাপ্নুয়াৎ
83.82
তত্র হংসপ্রপতনং তীর্থং ত্রৈলোক্যবিশ্রুতম্
দশাশ্বমেধিকং চৈব গঙ্গায়াং কুরুনন্দন
83.83
যত্র গঙ্গা মহারাজ স দেশস্তত্তপোবনম্
সিদ্ধক্ষেত্রং তু তজ্জ্ঞেয়ং গঙ্গাতীরসমাশ্রিতম্
83.84
ইদং সত্যং দ্বিজাতীনাং সাধূনামাত্মজস্য চ
সুহৃদাং চ জপেত্কর্ণে শিষ্যস্যানুগতস্য চ
83.85
ইদং ধর্ম্যমিদং পুণ্যমিদং মেধ্যমিদং সুখম্
ইদং স্বর্গ্যমিদং রম্যমিদং পাবনমুত্তমম্
83.86
মহর্ষীণামিদং গুহ্যং সর্বপাপপ্রমোচনম্
অধীত্য দ্বিজমধ্যে চ নির্মলত্বমবাপ্নুয়াৎ
83.87
যশ্চেদং শৃণুয়ান্নিত্যং তীর্থপুণ্যং সদা শুচিঃ
জাতীঃ স স্মরতে বহ্বীর্নাকপৃষ্ঠে চ মোদতে
83.88
গম্যান্যপি চ তীর্থানি কীর্তিতান্যগমানি চ
মনসা তানি গচ্ছেত সর্বতীর্থসমীক্ষয়া
83.89
এতানি বসুভিঃ সাধ্যৈরাদিত্যৈর্মরুদশ্বিভিঃ
ঋষিভির্দেবকল্পৈশ্চ শ্রিতানি সুকৃতৈষিভিঃ
83.90
এবং ত্বমপি কৌরব্য বিধিনানেন সুব্রত
ব্রজ তীর্থানি নিয়তঃ পুণ্যং পুণ্যেন বর্ধতে
83.91
ভাবিতৈঃ কারণৈঃ পূর্বমাস্তিক্যাচ্ছ্রুতিদর্শনাৎ
প্রাপ্যন্তে তানি তীর্থানি সদ্ভিঃ শিষ্টানুদর্শিভিঃ
83.92
নাব্রতো নাকৃতাত্মা চ নাশুচির্ন চ তস্করঃ
স্নাতি তীর্থেষু কৌরব্য ন চ বক্রমতির্নরঃ
83.93
ত্বয়া তু সম্যগ্বৃত্তেন নিত্যং ধর্মার্থদর্শিনা
পিতরস্তারিতাস্তাত সর্বে চ প্রপিতামহাঃ
83.94
পিতামহপুরোগাশ্চ দেবাঃ সর্ষিগণা নৃপ
তব ধর্মেণ ধর্মজ্ঞ নিত্যমেবাভিতোষিতাঃ
83.95
অবাপ্স্যসি চ লোকান্বৈ বসূনাং বাসবোপম
কীর্তিং চ মহতীং ভীষ্ম প্রাপ্স্যসে ভুবি শাশ্বতীম্
83.96
নারদ উবাচ
এবমুক্ত্বাভ্যনুজ্ঞাপ্য পুলস্ত্যো ভগবানৃষিঃ
প্রীতঃ প্রীতেন মনসা তত্রৈবান্তরধীয়ত
83.97
ভীষ্মশ্চ কুরুশার্দূল শাস্ত্রতত্ত্বার্থদর্শিবান্
পুলস্ত্যবচনাচ্চৈব পৃথিবীমনুচক্রমে
83.98
অনেন বিধিনা যস্তু পৃথিবীং সংচরিষ্যতি
অশ্বমেধশতস্যাগ্র্যং ফলং প্রেত্য স ভোক্ষ্যতে
83.99
অতশ্চাষ্টগুণং পার্থ প্রাপ্স্যসে ধর্মমুত্তমম্
নেতা চ ত্বমৃষীন্যস্মাত্তেন তেঽষ্টগুণং ফলম্
83.100
রক্ষোগণাবকীর্ণানি তীর্থান্যেতানি ভারত
ন গতির্বিদ্যতেঽন্যস্য ত্বামৃতে কুরুনন্দন
83.101
ইদং দেবর্ষিচরিতং সর্বতীর্থার্থসংশ্রিতম্
যঃ পঠেত্কল্যমুত্থায় সর্বপাপৈঃ প্রমুচ্যতে
83.102
ঋষিমুখ্যাঃ সদা যত্র বাল্মীকিস্ত্বথ কাশ্যপঃ
আত্রেয়স্ত্বথ কৌণ্ডিন্যো বিশ্বামিত্রোঽথ গৌতমঃ
83.103
অসিতো দেবলশ্চৈব মার্কণ্ডেয়োঽথ গালবঃ
ভরদ্বাজো বসিষ্ঠশ্চ মুনিরুদ্দালকস্তথা
83.104
শৌনকঃ সহ পুত্রেণ ব্যাসশ্চ জপতাং বরঃ
দুর্বাসাশ্চ মুনিশ্রেষ্ঠো গালবশ্চ মহাতপাঃ
83.105
এতে ঋষিবরাঃ সর্বে ত্বত্প্রতীক্ষাস্তপোধনাঃ
এভিঃ সহ মহারাজ তীর্থান্যেতান্যনুব্রজ
83.106
এষ বৈ লোমশো নাম দেবর্ষিরমিতদ্যুতিঃ
সমেষ্যতি ত্বয়া চৈব তেন সার্ধমনুব্রজ
83.107
ময়া চ সহ ধর্মজ্ঞ তীর্থান্যেতান্যনুব্রজ
প্রাপ্স্যসে মহতীং কীর্তিং যথা রাজা মহাভিষঃ
83.108
যথা যয়াতির্ধর্মাত্মা যথা রাজা পুরূরবাঃ
তথা ত্বং কুরুশার্দূল স্বেন ধর্মেণ শোভসে
83.109
যথা ভগীরথো রাজা যথা রামশ্চ বিশ্রুতঃ
তথা ত্বং সর্বরাজভ্যো ভ্রাজসে রশ্মিবানিব
83.110
যথা মনুর্যথেক্ষ্বাকুর্যথা পূরুর্মহায়শাঃ
যথা বৈন্যো মহাতেজাস্তথা ত্বমপি বিশ্রুতঃ
83.111
যথা চ বৃত্রহা সর্বান্সপত্নান্নির্দহত্পুরা
তথা শত্রুক্ষয়ং কৃত্বা প্রজাস্ত্বং পালয়িষ্যসি
83.112
স্বধর্মবিজিতামুর্বীং প্রাপ্য রাজীবলোচন
খ্যাতিং যাস্যসি ধর্মেণ কার্তবীর্যার্জুনো যথা
83.113
বৈশংপায়ন উবাচ
এবমাশ্বাস্য রাজানং নারদো ভগবানৃষিঃ
অনুজ্ঞাপ্য মহাত্মানং তত্রৈবান্তরধীয়ত
83.114
যুধিষ্ঠিরোঽপি ধর্মাত্মা তমেবার্থং বিচিন্তয়ন্
তীর্থয়াত্রাশ্রয়ং পুণ্যমৃষীণাং প্রত্যবেদয়ৎ