Utshovঅধ্যায় 82
82.1
পুলস্ত্য উবাচ
ততো গচ্ছেত ধর্মজ্ঞ ধর্মতীর্থং পুরাতনম্
তত্র স্নাত্বা নরো রাজন্ধর্মশীলঃ সমাহিতঃ
আসপ্তমং কুলং রাজন্পুনীতে নাত্র সংশয়ঃ
82.2
ততো গচ্ছেত ধর্মজ্ঞ কারাপতনমুত্তমম্
অগ্নিষ্টোমমবাপ্নোতি মুনিলোকং চ গচ্ছতি
82.3
সৌগন্ধিকং বনং রাজংস্ততো গচ্ছেত মানবঃ
যত্র ব্রহ্মাদয়ো দেবা ঋষয়শ্চ তপোধনাঃ
82.4
সিদ্ধচারণগন্ধর্বাঃ কিংনরাঃ সমহোরগাঃ
তদ্বনং প্রবিশন্নেব সর্বপাপৈঃ প্রমুচ্যতে
82.5
ততো হি সা সরিচ্ছ্রেষ্ঠা নদীনামুত্তমা নদী
প্লক্ষাদ্দেবী স্রুতা রাজন্মহাপুণ্যা সরস্বতী
82.6
তত্রাভিষেকং কুর্বীত বল্মীকান্নিঃসৃতে জলে
অর্চয়িত্বা পিতৄন্দেবানশ্বমেধফলং লভেৎ
82.7
ঈশানাধ্যুষিতং নাম তত্র তীর্থং সুদুর্লভম্
ষট্সু শম্যানিপাতেষু বল্মীকাদিতি নিশ্চয়ঃ
82.8
কপিলানাং সহস্রং চ বাজিমেধং চ বিন্দতি
তত্র স্নাত্বা নরব্যাঘ্র দৃষ্টমেতত্পুরাতনে
82.9
সুগন্ধাং শতকুম্ভাং চ পঞ্চয়জ্ঞাং চ ভারত
অভিগম্য নরশ্রেষ্ঠ স্বর্গলোকে মহীয়তে
82.10
ত্রিশূলখাতং তত্রৈব তীর্থমাসাদ্য ভারত
তত্রাভিষেকং কুর্বীত পিতৃদেবার্চনে রতঃ
গাণপত্যং স লভতে দেহং ত্যক্ত্বা ন সংশয়ঃ
82.11
ততো গচ্ছেত রাজেন্দ্র দেব্যাঃ স্থানং সুদুর্লভম্
শাকংভরীতি বিখ্যাতা ত্রিষু লোকেষু বিশ্রুতা
82.12
দিব্যং বর্ষসহস্রং হি শাকেন কিল সুব্রত
আহারং সা কৃতবতী মাসি মাসি নরাধিপ
82.13
ঋষয়োঽভ্যাগতাস্তত্র দেব্যা ভক্ত্যা তপোধনাঃ
আতিথ্যং চ কৃতং তেষাং শাকেন কিল ভারত
ততঃ শাকম্ভরীত্যেব নাম তস্যাঃ প্রতিষ্ঠিতম্
82.14
শাকংভরীং সমাসাদ্য ব্রহ্মচারী সমাহিতঃ
ত্রিরাত্রমুষিতঃ শাকং ভক্ষয়েন্নিয়তঃ শুচিঃ
82.15
শাকাহারস্য যত্সম্যগ্বর্ষৈর্দ্বাদশভিঃ ফলম্
তত্ফলং তস্য ভবতি দেব্যাশ্ছন্দেন ভারত
82.16
ততো গচ্ছেত্সুবর্ণাক্ষং ত্রিষু লোকেষু বিশ্রুতম্
যত্র বিষ্ণুঃ প্রসাদার্থং রুদ্রমারাধয়ত্পুরা
82.17
বরাংশ্চ সুবহূঁল্লেভে দৈবতেষু সুদুর্লভান্
উক্তশ্চ ত্রিপুরঘ্নেন পরিতুষ্টেন ভারত
82.18
অপি চাস্মত্প্রিয়তরো লোকে কৃষ্ণ ভবিষ্যসি
ত্বন্মুখং চ জগত্কৃত্স্নং ভবিষ্যতি ন সংশয়ঃ
82.19
তত্রাভিগম্য রাজেন্দ্র পূজয়িত্বা বৃষধ্বজম্
অশ্বমেধমবাপ্নোতি গাণপত্যং চ বিন্দতি
82.20
ধূমাবতীং ততো গচ্ছেত্ত্রিরত্রোপোষিতো নরঃ
মনসা প্রার্থিতান্কামাঁল্লভতে নাত্র সংশয়ঃ
82.21
দেব্যাস্তু দক্ষিণার্ধেন রথাবর্তো নরাধিপ
তত্রারোহেত ধর্মজ্ঞ শ্রদ্দধানো জিতেন্দ্রিয়ঃ
মহাদেবপ্রসাদাদ্ধি গচ্ছেত পরমাং গতিম্
82.22
প্রদক্ষিণমুপাবৃত্য গচ্ছেত ভরতর্ষভ
ধারাং নাম মহাপ্রাজ্ঞ সর্বপাপপ্রণাশিনীম্
তত্র স্নাত্বা নরব্যাঘ্র ন শোচতি নরাধিপ
82.23
ততো গচ্ছেত ধর্মজ্ঞ নমস্কৃত্য মহাগিরিম্
স্বর্গদ্বারেণ যত্তুল্যং গঙ্গাদ্বারং ন সংশয়ঃ
82.24
তত্রাভিষেকং কুর্বীত কোটিতীর্থে সমাহিতঃ
পুণ্ডরীকমবাপ্নোতি কুলং চৈব সমুদ্ধরেৎ
82.25
সপ্তগঙ্গে ত্রিগঙ্গে চ শক্রাবর্তে চ তর্পয়ন্
দেবান্পিতৄংশ্চ বিধিবত্পুণ্যলোকে মহীয়তে
82.26
ততঃ কনখলে স্নাত্বা ত্রিরাত্রোপোষিতো নরঃ
অশ্বমেধমবাপ্নোতি স্বর্গলোকং চ গচ্ছতি
82.27
কপিলাবটং চ গচ্ছেত তীর্থসেবী নরাধিপ
উষ্যৈকাং রজনীং তত্র গোসহস্রফলং লভেৎ
82.28
নাগরাজস্য রাজেন্দ্র কপিলস্য মহাত্মনাঃ
তীর্থং কুরুবরশ্রেষ্ঠ সর্বলোকেষু বিশ্রুতম্
82.29
তত্রাভিষেকং কুর্বীত নাগতীর্থে নরাধিপ
কপিলানাং সহস্রস্য ফলং প্রাপ্নোতি মানবঃ
82.30
ততো ললিতিকাং গচ্ছেচ্ছংতনোস্তীর্থমুত্তমম্
তত্র স্নাত্বা নরো রাজন্ন দুর্গতিমবাপ্নুয়াৎ
82.31
গঙ্গাসংগময়োশ্চৈব স্নাতি যঃ সংগমে নরঃ
দশাশ্বমেধানাপ্নোতি কুলং চৈব সমুদ্ধরেৎ
82.32
ততো গচ্ছেত রাজেন্দ্র সুগন্ধাং লোকবিশ্রুতাম্
সর্বপাপবিশুদ্ধাত্মা ব্রহ্মলোকে মহীয়তে
82.33
রুদ্রাবর্তং ততো গচ্ছেত্তীর্থসেবী নরাধিপ
তত্র স্নাত্বা নরো রাজন্স্বর্গলোকে মহীয়তে
82.34
গঙ্গায়াশ্চ নরশ্রেষ্ঠ সরস্বত্যাশ্চ সংগমে
স্নাতোঽশ্বমেধমাপ্নোতি স্বর্গলোকং চ গচ্ছতি
82.35
ভদ্রকর্ণেশ্বরং গত্বা দেবমর্চ্য যথাবিধি
ন দুর্গতিমবাপ্নোতি স্বর্গলোকং চ গচ্ছতি
82.36
ততঃ কুব্জাম্রকং গচ্ছেত্তীর্থসেবী যথাক্রমম্
গোসহস্রমবাপ্নোতি স্বর্গলোকং চ গচ্ছতি
82.37
অরুন্ধতীবটং গচ্ছেত্তীর্থসেবী নরাধিপ
সামুদ্রকমুপস্পৃশ্য ত্রিরাত্রোপোষিতো নরঃ
গোসহস্রফলং বিন্দেত্কুলং চৈব সমুদ্ধরেৎ
82.38
ব্রহ্মাবর্তং ততো গচ্ছেদ্ব্রহ্মচারী সমাহিতঃ
অশ্বমেধমবাপ্নোতি স্বর্গলোকং চ গচ্ছতি
82.39
যমুনাপ্রভবং গত্বা উপস্পৃশ্য চ যামুনে
অশ্বমেধফলং লব্ধ্বা স্বর্গলোকে মহীয়তে
82.40
দর্বীসংক্রমণং প্রাপ্য তীর্থং ত্রৈলোক্যবিশ্রুতম্
অশ্বমেধমবাপ্নোতি স্বর্গলোকং চ গচ্ছতি
82.41
সিন্ধোশ্চ প্রভবং গত্বা সিদ্ধগন্ধর্বসেবিতম্
তত্রোষ্য রজনীঃ পঞ্চ বিন্দ্যাদ্বহু সুবর্ণকম্
82.42
অথ বেদীং সমাসাদ্য নরঃ পরমদুর্গমাম্
অশ্বমেধমবাপ্নোতি গচ্ছেচ্চৌশনসীং গতিম্
82.43
ঋষিকুল্যাং সমাসাদ্য বাসিষ্ঠং চৈব ভারত
বাসিষ্ঠং সমতিক্রম্য সর্বে বর্ণা দ্বিজাতয়ঃ
82.44
ঋষিকুল্যাং নরঃ স্নাত্বা ঋষিলোকং প্রপদ্যতে
যদি তত্র বসেন্মাসং শাকাহারো নরাধিপ
82.45
ভৃগুতুঙ্গং সমাসাদ্য বাজিমেধফলং লভেৎ
গত্বা বীরপ্রমোক্ষং চ সর্বপাপৈঃ প্রমুচ্যতে
82.46
কৃত্তিকামঘয়োশ্চৈব তীর্থমাসাদ্য ভারত
অগ্নিষ্টোমাতিরাত্রাভ্যাং ফলং প্রাপ্নোতি পুণ্যকৃৎ
82.47
ততঃ সংধ্যাং সমাসাদ্য বিদ্যাতীর্থমনুত্তমম্
উপস্পৃশ্য চ বিদ্যানাং সর্বাসাং পারগো ভবেৎ
82.48
মহাশ্রমে বসেদ্রাত্রিং সর্বপাপপ্রমোচনে
এককালং নিরাহারো লোকানাবসতে শুভান্
82.49
ষষ্ঠকালোপবাসেন মাসমুষ্য মহালয়ে
সর্বপাপবিশুদ্ধাত্মা বিন্দ্যাদ্বহু সুবর্ণকম্
82.50
অথ বেতসিকাং গত্বা পিতামহনিষেবিতাম্
অশ্বমেধমবাপ্নোতি গচ্ছেচ্চৌশনসীং গতিম্
82.51
অথ সুন্দরিকাতীর্থং প্রাপ্য সিদ্ধনিষেবিতম্
রূপস্য ভাগী ভবতি দৃষ্টমেতত্পুরাতনে
82.52
ততো বৈ ব্রাহ্মণীং গত্বা ব্রহ্মচারী জিতেন্দ্রিয়ঃ
পদ্মবর্ণেন যানেন ব্রহ্মলোকং প্রপদ্যতে
82.53
ততশ্চ নৈমিষং গচ্ছেত্পুণ্যং সিদ্ধনিষেবিতম্
তত্র নিত্যং নিবসতি ব্রহ্মা দেবগণৈর্বৃতঃ
82.54
নৈমিষং প্রার্থয়ানস্য পাপস্যার্ধং প্রণশ্যতি
প্রবিষ্টমাত্রস্তু নরঃ সর্বপাপৈঃ প্রমুচ্যতে
82.55
তত্র মাসং বসেদ্ধীরো নৈমিষে তীর্থতত্পরঃ
পৃথিব্যাং যানি তীর্থানি নৈমিষে তানি ভারত
82.56
অভিষেককৃতস্তত্র নিয়তো নিয়তাশনঃ
গবাময়স্য যজ্ঞস্য ফলং প্রাপ্নোতি ভারত
পুনাত্যাসপ্তমং চৈব কুলং ভরতসত্তম
82.57
যস্ত্যজেন্নৈমিষে প্রাণানুপবাসপরায়ণঃ
স মোদেত্স্বর্গলোকস্থ এবমাহুর্মনীষিণঃ
নিত্যং পুণ্যং চ মেধ্যং চ নৈমিষং নৃপসত্তম
82.58
গঙ্গোদ্ভেদং সমাসাদ্য ত্রিরাত্রোপোষিতো নরঃ
বাজপেয়মবাপ্নোতি ব্রহ্মভূতশ্চ জায়তে
82.59
সরস্বতীং সমাসাদ্য তর্পয়েত্পিতৃদেবতাঃ
সারস্বতেষু লোকেষু মোদতে নাত্র সংশয়ঃ
82.60
ততশ্চ বাহুদাং গচ্ছেদ্ব্রহ্মচারী সমাহিতঃ
দেবসত্রস্য যজ্ঞস্য ফলং প্রাপ্নোতি মানবঃ
82.61
ততশ্চীরবতীং গচ্ছেত্পুণ্যাং পুণ্যতমৈর্বৃতাম্
পিতৃদেবার্চনরতো বাজপেয়মবাপ্নুয়াৎ
82.62
বিমলাশোকমাসাদ্য বিরাজতি যথা শশী
তত্রোষ্য রজনীমেকাং স্বর্গলোকে মহীয়তে
82.63
গোপ্রতারং ততো গচ্ছেত্সরয্বাস্তীর্থমুত্তমম্
যত্র রামো গতঃ স্বর্গং সভৃত্যবলবাহনঃ
82.64
দেহং ত্যক্ত্বা দিবং যাতস্তস্য তীর্থস্য তেজসা
রামস্য চ প্রসাদেন ব্যবসায়াচ্চ ভারত
82.65
তস্মিংস্তীর্থে নরঃ স্নাত্বা গোপ্রতারে নরাধিপ
সর্বপাপবিশুদ্ধাত্মা স্বর্গলোকে মহীয়তে
82.66
রামতীর্থে নরঃ স্নাত্বা গোমত্যাং কুরুনন্দন
অশ্বমেধমবাপ্নোতি পুনাতি চ কুলং নরঃ
82.67
শতসাহস্রিকং তত্র তীর্থং ভরতসত্তম
তত্রোপস্পর্শনং কৃত্বা নিয়তো নিয়তাশনঃ
গোসহস্রফলং পুণ্যং প্রাপ্নোতি ভরতর্ষভ
82.68
ততো গচ্ছেত রাজেন্দ্র ভর্তৃস্থানমনুত্তমম্
কোটিতীর্থে নরঃ স্নাত্বা অর্চয়িত্বা গুহং নৃপ
গোসহস্রফলং বিন্দেত্তেজস্বী চ ভবেন্নরঃ
82.69
ততো বারাণসীং গত্বা অর্চয়িত্বা বৃষধ্বজম্
কপিলাহ্রদে নরঃ স্নাত্বা রাজসূয়ফলং লভেৎ
82.70
মার্কণ্ডেয়স্য রাজেন্দ্র তীর্থমাসাদ্য দুর্লভম্
গোমতীগঙ্গয়োশ্চৈব সংগমে লোকবিশ্রুতে
অগ্নিষ্টোমমবাপ্নোতি কুলং চৈব সমুদ্ধরেৎ
82.71
ততো গয়াং সমাসাদ্য ব্রহ্মচারী জিতেন্দ্রিয়ঃ
অশ্বমেধমবাপ্নোতি গমনাদেব ভারত
82.72
তত্রাক্ষয়বটো নাম ত্রিষু লোকেষু বিশ্রুতঃ
পিতৄণাং তত্র বৈ দত্তমক্ষয়ং ভবতি প্রভো
82.73
মহানদ্যামুপস্পৃশ্য তর্পয়েত্পিতৃদেবতাঃ
অক্ষয়ান্প্রাপ্নুয়াল্লোকান্কুলং চৈব সমুদ্ধরেৎ
82.74
ততো ব্রহ্মসরো গচ্ছেদ্ধর্মারণ্যোপশোভিতম্
পৌণ্ডরীকমবাপ্নোতি প্রভাতামেব শর্বরীম্
82.75
তস্মিন্সরসি রাজেন্দ্র ব্রহ্মণো যূপ উচ্ছ্রিতঃ
যূপং প্রদক্ষিণং কৃত্বা বাজপেয়ফলং লভেৎ
82.76
ততো গচ্ছেত রাজেন্দ্র ধেনুকাং লোকবিশ্রুতাম্
একরাত্রোষিতো রাজন্প্রয়চ্ছেত্তিলধেনুকাম্
সর্বপাপবিশুদ্ধাত্মা সোমলোকং ব্রজেদ্ধ্রুবম্
82.77
তত্র চিহ্নং মহারাজ অদ্যাপি হি ন সংশয়ঃ
কপিলা সহ বত্সেন পর্বতে বিচরত্যুত
সবত্সায়াঃ পদানি স্ম দৃশ্যন্তেঽদ্যাপি ভারত
82.78
তেষূপস্পৃশ্য রাজেন্দ্র পদেষু নৃপসত্তম
যত্কিংচিদশুভং কর্ম তত্প্রণশ্যতি ভারত
82.79
ততো গৃধ্রবটং গচ্ছেত্স্থানং দেবস্য ধীমতঃ
স্নায়ীত ভস্মনা তত্র অভিগম্য বৃষধ্বজম্
82.80
ব্রাহ্মণেন ভবেচ্চীর্ণং ব্রতং দ্বাদশবার্ষিকম্
ইতরেষাং তু বর্ণানাং সর্বপাপং প্রণশ্যতি
82.81
গচ্ছেত তত উদ্যন্তং পর্বতং গীতনাদিতম্
সাবিত্রং তু পদং তত্র দৃশ্যতে ভরতর্ষভ
82.82
তত্র সংধ্যামুপাসীত ব্রাহ্মণঃ সংশিতব্রতঃ
উপাস্তা চ ভবেত্সংধ্যা তেন দ্বাদশবার্ষিকী
82.83
যোনিদ্বারং চ তত্রৈব বিশ্রুতং ভরতর্ষভ
তত্রাভিগম্য মুচ্যেত পুরুষো যোনিসংকরাৎ
82.84
কৃষ্ণশুক্লাবুভৌ পক্ষৌ গয়ায়াং যো বসেন্নরঃ
পুনাত্যাসপ্তমং রাজন্কুলং নাস্ত্যত্র সংশয়ঃ
82.85
এষ্টব্যা বহবঃ পুত্রা যদ্যেকোঽপি গয়াং ব্রজেৎ
যজেত বাশ্বমেধেন নীলং বা বৃষমুত্সৃজেৎ
82.86
ততঃ ফল্গুং ব্রজেদ্রাজংস্তীর্থসেবী নরাধিপ
অশ্বমেধমবাপ্নোতি সিদ্ধিং চ মহতীং ব্রজেৎ
82.87
ততো গচ্ছেত রাজেন্দ্র ধর্মপৃষ্ঠং সমাহিতঃ
যত্র ধর্মো মহারাজ নিত্যমাস্তে যুধিষ্ঠির
অভিগম্য ততস্তত্র বাজিমেধফলং লভেৎ
82.88
ততো গচ্ছেত রাজেন্দ্র ব্রহ্মণস্তীর্থমুত্তমম্
তত্রার্চয়িত্বা রাজেন্দ্র ব্রহ্মাণমমিতৌজসম্
রাজসূয়াশ্বমেধাভ্যাং ফলং প্রাপ্নোতি মানবঃ
82.89
ততো রাজগৃহং গচ্ছেত্তীর্থসেবী নরাধিপ
উপস্পৃশ্য তপোদেষু কাক্ষীবানিব মোদতে
82.90
যক্ষিণ্যা নৈত্যকং তত্র প্রাশ্নীত পুরুষঃ শুচিঃ
যক্ষিণ্যাস্তু প্রসাদেন মুচ্যতে ভ্রূণহত্যয়া
82.91
মণিনাগং ততো গত্বা গোসহস্রফলং লভেৎ
নৈত্যকং ভুঞ্জতে যস্তু মণিনাগস্য মানবঃ
82.92
দষ্টস্যাশীবিষেণাপি ন তস্য ক্রমতে বিষম্
তত্রোষ্য রজনীমেকাং সর্বপাপৈঃ প্রমুচ্যতে
82.93
ততো গচ্ছেত ব্রহ্মর্ষের্গৌতমস্য বনং নৃপ
অহল্যায়া হ্রদে স্নাত্বা ব্রজেত পরমাং গতিম্
অভিগম্য শ্রিয়ং রাজন্বিন্দতে শ্রিয়মুত্তমাম্
82.94
তত্রোদপানো ধর্মজ্ঞ ত্রিষু লোকেষু বিশ্রুতঃ
তত্রাভিষেকং কৃত্বা তু বাজিমেধমবাপ্নুয়াৎ
82.95
জনকস্য তু রাজর্ষেঃ কূপস্ত্রিদশপূজিতঃ
তত্রাভিষেকং কৃত্বা তু বিষ্ণুলোকমবাপ্নুয়াৎ
82.96
ততো বিনশনং গচ্ছেত্সর্বপাপপ্রমোচনম্
বাজপেয়মবাপ্নোতি সোমলোকং চ গচ্ছতি
82.97
গণ্ডকীং তু সমাসাদ্য সর্বতীর্থজলোদ্ভবাম্
বাজপেয়মবাপ্নোতি সূর্যলোকং চ গচ্ছতি
82.98
ততোঽধিবংশ্যং ধর্মজ্ঞ সমাবিশ্য তপোবনম্
গুহ্যকেষু মহারাজ মোদতে নাত্র সংশয়ঃ
82.99
কম্পনাং তু সমাসাদ্য নদীং সিদ্ধনিষেবিতাম্
পুণ্ডরীকমবাপ্নোতি সূর্যলোকং চ গচ্ছতি
82.100
ততো বিশালামাসাদ্য নদীং ত্রৈলোক্যবিশ্রুতাম্
অগ্নিষ্টোমমবাপ্নোতি স্বর্গলোকং চ গচ্ছতি
82.101
অথ মাহেশ্বরীং ধারাং সমাসাদ্য নরাধিপ
অশ্বমেধমবাপ্নোতি কুলং চৈব সমুদ্ধরেৎ
82.102
দিবৌকসাং পুষ্করিণীং সমাসাদ্য নরঃ শুচিঃ
ন দুর্গতিমবাপ্নোতি বাজপেয়ং চ বিন্দতি
82.103
মহেশ্বরপদং গচ্ছেদ্ব্রহ্মচারী সমাহিতঃ
মহেশ্বরপদে স্নাত্বা বাজিমেধফলং লভেৎ
82.104
তত্র কোটিস্তু তীর্থানাং বিশ্রুতা ভরতর্ষভ
কূর্মরূপেণ রাজেন্দ্র অসুরেণ দুরাত্মনা
হ্রিয়মাণাহৃতা রাজন্বিষ্ণুনা প্রভবিষ্ণুনা
82.105
তত্রাভিষেকং কুর্বাণস্তীর্থকোট্যাং যুধিষ্ঠির
পুণ্ডরীকমবাপ্নোতি বিষ্ণুলোকং চ গচ্ছতি
82.106
ততো গচ্ছেত রাজেন্দ্র স্থানং নারায়ণস্য তু
সদা সংনিহিতো যত্র হরির্বসতি ভারত
শালগ্রাম ইতি খ্যাতো বিষ্ণোরদ্ভুতকর্মণঃ
82.107
অভিগম্য ত্রিলোকেশং বরদং বিষ্ণুমব্যয়ম্
অশ্বমেধমবাপ্নোতি বিষ্ণুলোকং চ গচ্ছতি
82.108
তত্রোদপানো ধর্মজ্ঞ সর্বপাপপ্রমোচনঃ
সমুদ্রাস্তত্র চত্বারঃ কূপে সংনিহিতাঃ সদা
তত্রোপস্পৃশ্য রাজেন্দ্র ন দুর্গতিমবাপ্নুয়াৎ
82.109
অভিগম্য মহাদেবং বরদং বিষ্ণুমব্যয়ম্
বিরাজতি যথা সোম ঋণৈর্মুক্তো যুধিষ্ঠির
82.110
জাতিস্মর উপস্পৃশ্য শুচিঃ প্রয়তমানসঃ
জাতিস্মরত্বং প্রাপ্নোতি স্নাত্বা তত্র ন সংশয়ঃ
82.111
বটেশ্বরপুরং গত্বা অর্চয়িত্বা তু কেশবম্
ঈপ্সিতাঁল্লভতে কামানুপবাসান্ন সংশয়ঃ
82.112
ততস্তু বামনং গত্বা সর্বপাপপ্রমোচনম্
অভিবাদ্য হরিং দেবং ন দুর্গতিমবাপ্নুয়াৎ
82.113
ভরতস্যাশ্রমং গত্বা সর্বপাপপ্রমোচনম্
কৌশিকীং তত্র সেবেত মহাপাতকনাশিনীম্
রাজসূয়স্য যজ্ঞস্য ফলং প্রাপ্নোতি মানবঃ
82.114
ততো গচ্ছেত ধর্মজ্ঞ চম্পকারণ্যমুত্তমম্
তত্রোষ্য রজনীমেকাং গোসহস্রফলং লভেৎ
82.115
অথ জ্যেষ্ঠিলমাসাদ্য তীর্থং পরমসংমতম্
উপোষ্য রজনীমেকামগ্নিষ্টোমফলং লভেৎ
82.116
তত্র বিশ্বেশ্বরং দৃষ্ট্বা দেব্যা সহ মহাদ্যুতিম্
মিত্রাবরুণয়োর্লোকানাপ্নোতি পুরুষর্ষভ
82.117
কন্যাসংবেদ্যমাসাদ্য নিয়তো নিয়তাশনঃ
মনোঃ প্রজাপতের্লোকানাপ্নোতি ভরতর্ষভ
82.118
কন্যায়াং যে প্রয়চ্ছন্তি পানমন্নং চ ভারত
তদক্ষয়মিতি প্রাহুরৃষয়ঃ সংশিতব্রতাঃ
82.119
নিশ্চীরাং চ সমাসাদ্য ত্রিষু লোকেষু বিশ্রুতাম্
অশ্বমেধমবাপ্নোতি বিষ্ণুলোকং চ গচ্ছতি
82.120
যে তু দানং প্রয়চ্ছন্তি নিশ্চীরাসংগমে নরাঃ
তে যান্তি নরশার্দূল ব্রহ্মলোকং ন সংশয়ঃ
82.121
তত্রাশ্রমো বসিষ্ঠস্য ত্রিষু লোকেষু বিশ্রুতঃ
তত্রাভিষেকং কুর্বাণো বাজপেয়মবাপ্নুয়াৎ
82.122
দেবকূটং সমাসাদ্য ব্রহ্মর্ষিগণসেবিতম্
অশ্বমেধমবাপ্নোতি কুলং চৈব সমুদ্ধরেৎ
82.123
ততো গচ্ছেত রাজেন্দ্র কৌশিকস্য মুনের্হ্রদম্
যত্র সিদ্ধিং পরাং প্রাপ্তো বিশ্বামিত্রোঽথ কৌশিকঃ
82.124
তত্র মাসং বসেদ্বীর কৌশিক্যাং ভরতর্ষভ
অশ্বমেধস্য যত্পুণ্যং তন্মাসেনাধিগচ্ছতি
82.125
সর্বতীর্থবরে চৈব যো বসেত মহাহ্রদে
ন দুর্গতিমবাপ্নোতি বিন্দেদ্বহু সুবর্ণকম্
82.126
কুমারমভিগত্বা চ বীরাশ্রমনিবাসিনম্
অশ্বমেধমবাপ্নোতি নরো নাস্ত্যত্র সংশয়ঃ
82.127
অগ্নিধারাং সমাসাদ্য ত্রিষু লোকেষু বিশ্রুতাম্
অগ্নিষ্টোমমবাপ্নোতি ন চ স্বর্গান্নিবর্ততে
82.128
পিতামহসরো গত্বা শৈলরাজপ্রতিষ্ঠিতম্
তত্রাভিষেকং কুর্বাণো অগ্নিষ্টোমফলং লভেৎ
82.129
পিতামহস্য সরসঃ প্রস্রুতা লোকপাবনী
কুমারধারা তত্রৈব ত্রিষু লোকেষু বিশ্রুতা
82.130
যত্র স্নাত্বা কৃতার্থোঽস্মীত্যাত্মানমবগচ্ছতি
ষষ্ঠকালোপবাসেন মুচ্যতে ব্রহ্মহত্যয়া
82.131
শিখরং বৈ মহাদেব্যা গৌর্যাস্ত্রৈলোক্যবিশ্রুতম্
সমারুহ্য নরঃ শ্রাদ্ধঃ স্তনকুণ্ডেষু সংবিশেৎ
82.132
তত্রাভিষেকং কুর্বাণঃ পিতৃদেবার্চনে রতঃ
হয়মেধমবাপ্নোতি শক্রলোকং চ গচ্ছতি
82.133
তাম্রারুণং সমাসাদ্য ব্রহ্মচারী সমাহিতঃ
অশ্বমেধমবাপ্নোতি শক্রলোকং চ গচ্ছতি
82.134
নন্দিন্যাং চ সমাসাদ্য কূপং ত্রিদশসেবিতম্
নরমেধস্য যত্পুণ্যং তত্প্রাপ্নোতি কুরূদ্বহ
82.135
কালিকাসংগমে স্নাত্বা কৌশিক্যারুণয়োর্যতঃ
ত্রিরাত্রোপোষিতো বিদ্বান্সর্বপাপৈঃ প্রমুচ্যতে
82.136
উর্বশীতীর্থমাসাদ্য ততঃ সোমাশ্রমং বুধঃ
কুম্ভকর্ণাশ্রমে স্নাত্বা পূজ্যতে ভুবি মানবঃ
82.137
স্নাত্বা কোকামুখে পুণ্যে ব্রহ্মচারী যতব্রতঃ
জাতিস্মরত্বং প্রাপ্নোতি দৃষ্টমেতত্পুরাতনে
82.138
সকৃন্নন্দাং সমাসাদ্য কৃতাত্মা ভবতি দ্বিজঃ
সর্বপাপবিশুদ্ধাত্মা শক্রলোকং চ গচ্ছতি
82.139
ঋষভদ্বীপমাসাদ্য সেব্যং ক্রৌঞ্চনিষূদনম্
সরস্বত্যামুপস্পৃশ্য বিমানস্থো বিরাজতে
82.140
ঔদ্দালকং মহারাজ তীর্থং মুনিনিষেবিতম্
তত্রাভিষেকং কুর্বীত সর্বপাপৈঃ প্রমুচ্যতে
82.141
ধর্মতীর্থং সমাসাদ্য পুণ্যং ব্রহ্মর্ষিসেবিতম্
বাজপেয়মবাপ্নোতি নরো নাস্ত্যত্র সংশয়ঃ
82.142
তথা চম্পাং সমাসাদ্য ভাগীরথ্যাং কৃতোদকঃ
দণ্ডার্কমভিগম্যৈব গোসহস্রফলং লভেৎ
82.143
লবেডিকাং ততো গচ্ছেত্পুণ্যাং পুণ্যোপসেবিতাম্
বাজপেয়মবাপ্নোতি বিমানস্থশ্চ পূজ্যতে