Utshovঅধ্যায় 81
81.1
পুলস্ত্য উবাচ
ততো গচ্ছেত রাজেন্দ্র কুরুক্ষেত্রমভিষ্টুতম্
পাপেভ্যো বিপ্রমুচ্যন্তে তদ্গতাঃ সর্বজন্তবঃ
81.2
কুরুক্ষেত্রং গমিষ্যামি কুরুক্ষেত্রে বসাম্যহম্
য এবং সততং ব্রূয়াত্সোঽপি পাপৈঃ প্রমুচ্যতে
81.3
তত্র মাসং বসেদ্বীর সরস্বত্যাং যুধিষ্ঠির
যত্র ব্রহ্মাদয়ো দেবা ঋষয়ঃ সিদ্ধচারণাঃ
81.4
গন্ধর্বাপ্সরসো যক্ষাঃ পন্নগাশ্চ মহীপতে
ব্রহ্মক্ষেত্রং মহাপুণ্যমভিগচ্ছন্তি ভারত
81.5
মনসাপ্যভিকামস্য কুরুক্ষেত্রং যুধিষ্ঠির
পাপানি বিপ্রণশ্যন্তি ব্রহ্মলোকং চ গচ্ছতি
81.6
গত্বা হি শ্রদ্ধয়া যুক্তঃ কুরুক্ষেত্রং কুরূদ্বহ
রাজসূয়াশ্বমেধাভ্যাং ফলং প্রাপ্নোতি মানবঃ
81.7
ততো মচক্রুকং রাজন্দ্বারপালং মহাবলম্
যক্ষং সমভিবাদ্যৈব গোসহস্রফলং লভেৎ
81.8
ততো গচ্ছেত ধর্মজ্ঞ বিষ্ণোঃ স্থানমনুত্তমম্
সততং নাম রাজেন্দ্র যত্র সংনিহিতো হরিঃ
81.9
তত্র স্নাত্বার্চয়িত্বা চ ত্রিলোকপ্রভবং হরিম্
অশ্বমেধমবাপ্নোতি বিষ্ণুলোকং চ গচ্ছতি
81.10
ততঃ পারিপ্লবং গচ্ছেত্তীর্থং ত্রৈলোক্যবিশ্রুতম্
অগ্নিষ্টোমাতিরাত্রাভ্যাং ফলং প্রাপ্নোতি মানবঃ
81.11
পৃথিব্যাস্তীর্থমাসাদ্য গোসহস্রফলং লভেৎ
ততঃ শালূকিনীং গত্বা তীর্থসেবী নরাধিপ
দশাশ্বমেধিকে স্নাত্বা তদেব লভতে ফলম্
81.12
সর্পদর্বীং সমাসাদ্য নাগানাং তীর্থমুত্তমম্
অগ্নিষ্টোমমবাপ্নোতি নাগলোকং চ বিন্দতি
81.13
ততো গচ্ছেত ধর্মজ্ঞ দ্বারপালং তরন্তুকম্
তত্রোষ্য রজনীমেকাং গোসহস্রফলং লভেৎ
81.14
ততঃ পঞ্চনদং গত্বা নিয়তো নিয়তাশনঃ
কোটিতীর্থমুপস্পৃশ্য হয়মেধফলং লভেৎ
অশ্বিনোস্তীর্থমাসাদ্য রূপবানভিজায়তে
81.15
ততো গচ্ছেত ধর্মজ্ঞ বারাহং তীর্থমুত্তমম্
বিষ্ণুর্বারাহরূপেণ পূর্বং যত্র স্থিতোঽভবৎ
তত্র স্নাত্বা নরব্যাঘ্র অগ্নিষ্টোমফলং লভেৎ
81.16
ততো জয়ন্ত্যা রাজেন্দ্র সোমতীর্থং সমাবিশেৎ
স্নাত্বা ফলমবাপ্নোতি রাজসূয়স্য মানবঃ
81.17
একহংসে নরঃ স্নাত্বা গোসহস্রফলং লভেৎ
কৃতশৌচং সমাসাদ্য তীর্থসেবী কুরূদ্বহ
পুণ্ডরীকমবাপ্নোতি কৃতশৌচো ভবেন্নরঃ
81.18
ততো মুঞ্জবটং নাম মহাদেবস্য ধীমতঃ
তত্রোষ্য রজনীমেকাং গাণপত্যমবাপ্নুয়াৎ
81.19
তত্রৈব চ মহারাজ যক্ষী লোকপরিশ্রুতা
তাং চাভিগম্য রাজেন্দ্র পুণ্যাঁল্লোকানবাপ্নুয়াৎ
81.20
কুরুক্ষেত্রস্য তদ্দ্বারং বিশ্রুতং ভরতর্ষভ
প্রদক্ষিণমুপাবৃত্য তীর্থসেবী সমাহিতঃ
81.21
সংমিতে পুষ্করাণাং চ স্নাত্বার্চ্য পিতৃদেবতাঃ
জামদগ্ন্যেন রামেণ আহৃতে বৈ মহাত্মনা
কৃতকৃত্যো ভবেদ্রাজন্নশ্বমেধং চ বিন্দতি
81.22
ততো রামহ্রদান্গচ্ছেত্তীর্থসেবী নরাধিপ
যত্র রামেণ রাজেন্দ্র তরসা দীপ্ততেজসা
ক্ষত্রমুত্সাদ্য বীর্যেণ হ্রদাঃ পঞ্চ নিবেশিতাঃ
81.23
পূরয়িত্বা নরব্যাঘ্র রুধিরেণেতি নঃ শ্রুতম্
পিতরস্তর্পিতাঃ সর্বে তথৈব চ পিতামহাঃ
ততস্তে পিতরঃ প্রীতা রামমূচুর্মহীপতে
81.24
রাম রাম মহাভাগ প্রীতাঃ স্ম তব ভার্গব
অনয়া পিতৃভক্ত্যা চ বিক্রমেণ চ তে বিভো
বরং বৃণীষ্ব ভদ্রং তে কিমিচ্ছসি মহাদ্যুতে
81.25
এবমুক্তঃ স রাজেন্দ্র রামঃ প্রহরতাং বরঃ
অব্রবীত্প্রাঞ্জলির্বাক্যং পিতৄন্স গগনে স্থিতান্
81.26
ভবন্তো যদি মে প্রীতা যদ্যনুগ্রাহ্যতা ময়ি
পিতৃপ্রসাদাদিচ্ছেয়ং তপসাপ্যায়নং পুনঃ
81.27
যচ্চ রোষাভিভূতেন ক্ষত্রমুত্সাদিতং ময়া
ততশ্চ পাপান্মুচ্যেয়ং যুষ্মাকং তেজসা হ্যহম্
হ্রদাশ্চ তীর্থভূতা মে ভবেয়ুর্ভুবি বিশ্রুতাঃ
81.28
এতচ্ছ্রুত্বা শুভং বাক্যং রামস্য পিতরস্তদা
প্রত্যূচুঃ পরমপ্রীতা রামং হর্ষসমন্বিতাঃ
81.29
তপস্তে বর্ধতাং ভূয়ঃ পিতৃভক্ত্যা বিশেষতঃ
যচ্চ রোষাভিভূতেন ক্ষত্রমুত্সাদিতং ত্বয়া
81.30
ততশ্চ পাপান্মুক্তস্ত্বং কর্মভিস্তে চ পাতিতাঃ
হ্রদাশ্চ তব তীর্থত্বং গমিষ্যন্তি ন সংশয়ঃ
81.31
হ্রদেষ্বেতেষু যঃ স্নাত্বা পিতৄন্সংতর্পয়িষ্যতি
পিতরস্তস্য বৈ প্রীতা দাস্যন্তি ভুবি দুর্লভম্
ঈপ্সিতং মনসঃ কামং স্বর্গলোকং চ শাশ্বতম্
81.32
এবং দত্ত্বা বরান্রাজন্রামস্য পিতরস্তদা
আমন্ত্র্য ভার্গবং প্রীতাস্তত্রৈবান্তর্দধুস্তদা
81.33
এবং রামহ্রদাঃ পুণ্যা ভার্গবস্য মহাত্মনঃ
স্নাত্বা হ্রদেষু রামস্য ব্রহ্মচারী শুভব্রতঃ
রামমভ্যর্চ্য রাজেন্দ্র লভেদ্বহু সুবর্ণকম্
81.34
বংশমূলকমাসাদ্য তীর্থসেবী কুরূদ্বহ
স্ববংশমুদ্ধরেদ্রাজন্স্নাত্বা বৈ বংশমূলকে
81.35
কায়শোধনমাসাদ্য তীর্থং ভরতসত্তম
শরীরশুদ্ধিঃ স্নাতস্য তস্মিংস্তীর্থে ন সংশয়ঃ
শুদ্ধদেহশ্চ সংয়াতি শুভাঁল্লোকাননুত্তমান্
81.36
ততো গচ্ছেত রাজেন্দ্র তীর্থং ত্রৈলোক্যবিশ্রুতম্
লোকা যত্রোদ্ধৃতাঃ পূর্বং বিষ্ণুনা প্রভবিষ্ণুনা
81.37
লোকোদ্ধারং সমাসাদ্য তীর্থং ত্রৈলোক্যবিশ্রুতম্
স্নাত্বা তীর্থবরে রাজঁল্লোকানুদ্ধরতে স্বকান্
শ্রীতীর্থং চ সমাসাদ্য বিন্দতে শ্রিয়মুত্তমাম্
81.38
কপিলাতীর্থমাসাদ্য ব্রহ্মচারী সমাহিতঃ
তত্র স্নাত্বার্চয়িত্বা চ দৈবতানি পিতৄংস্তথা
কপিলানাং সহস্রস্য ফলং বিন্দতি মানবঃ
81.39
সূর্যতীর্থং সমাসাদ্য স্নাত্বা নিয়তমানসঃ
অর্চয়িত্বা পিতৄন্দেবানুপবাসপরায়ণঃ
অগ্নিষ্টোমমবাপ্নোতি সূর্যলোকং চ গচ্ছতি
81.40
গবাংভবনমাসাদ্য তীর্থসেবী যথাক্রমম্
তত্রাভিষেকং কুর্বাণো গোসহস্রফলং লভেৎ
81.41
শঙ্খিনীং তত্র আসাদ্য তীর্থসেবী কুরূদ্বহ
দেব্যাস্তীর্থে নরঃ স্নাত্বা লভতে রূপমুত্তমম্
81.42
ততো গচ্ছেত রাজেন্দ্র দ্বারপালমরন্তুকম্
তস্য তীর্থং সরস্বত্যাং যক্ষেন্দ্রস্য মহাত্মনঃ
তত্র স্নাত্বা নরো রাজন্নগ্নিষ্টোমফলং লভেৎ
81.43
ততো গচ্ছেত ধর্মজ্ঞ ব্রহ্মাবর্তং নরাধিপ
ব্রহ্মাবর্তে নরঃ স্নাত্বা ব্রহ্মলোকমবাপ্নুয়াৎ
81.44
ততো গচ্ছেত ধর্মজ্ঞ সুতীর্থকমনুত্তমম্
যত্র সংনিহিতা নিত্যং পিতরো দৈবতৈঃ সহ
81.45
তত্রাভিষেকং কুর্বীত পিতৃদেবার্চনে রতঃ
অশ্বমেধমবাপ্নোতি পিতৃলোকং চ গচ্ছতি
81.46
ততোঽম্বুবশ্যং ধর্মজ্ঞ সমাসাদ্য যথাক্রমম্
কোশেশ্বরস্য তীর্থেষু স্নাত্বা ভরতসত্তম
সর্বব্যাধিবিনির্মুক্তো ব্রহ্মলোকে মহীয়তে
81.47
মাতৃতীর্থং চ তত্রৈব যত্র স্নাতস্য ভারত
প্রজা বিবর্ধতে রাজন্ননন্তাং চাশ্নুতে শ্রিয়ম্
81.48
ততঃ শীতবনং গচ্ছেন্নিয়তো নিয়তাশনঃ
তীর্থং তত্র মহারাজ মহদন্যত্র দুর্লভম্
81.49
পুনাতি দর্শনাদেব দণ্ডেনৈকং নরাধিপ
কেশানভ্যুক্ষ্য বৈ তস্মিন্পূতো ভবতি ভারত
81.50
তীর্থং তত্র মহারাজ শ্বানলোমাপহং স্মৃতম্
যত্র বিপ্রা নরব্যাঘ্র বিদ্বাংসস্তীর্থতত্পরাঃ
81.51
শ্বানলোমাপনয়নে তীর্থে ভরতসত্তম
প্রাণায়ামৈর্নির্হরন্তি শ্বলোমানি দ্বিজোত্তমাঃ
81.52
পূতাত্মানশ্চ রাজেন্দ্র প্রয়ান্তি পরমাং গতিম্
দশাশ্বমেধিকং চৈব তস্মিংস্তীর্থে মহীপতে
তত্র স্নাত্বা নরব্যাঘ্র গচ্ছেত পরমাং গতিম্
81.53
ততো গচ্ছেত রাজেন্দ্র মানুষং লোকবিশ্রুতম্
যত্র কৃষ্ণমৃগা রাজন্ব্যাধেন পরিপীডিতাঃ
অবগাহ্য তস্মিন্সরসি মানুষত্বমুপাগতাঃ
81.54
তস্মিংস্তীর্থে নরঃ স্নাত্বা ব্রহ্মচারী জিতেন্দ্রিয়ঃ
সর্বপাপবিশুদ্ধাত্মা স্বর্গলোকে মহীয়তে
81.55
মানুষস্য তু পূর্বেণ ক্রোশমাত্রে মহীপতে
আপগা নাম বিখ্যাতা নদী সিদ্ধনিষেবিতা
81.56
শ্যামাকভোজনং তত্র যঃ প্রয়চ্ছতি মানবঃ
দেবান্পিতৄংশ্চ উদ্দিশ্য তস্য ধর্মফলং মহৎ
একস্মিন্ভোজিতে বিপ্রে কোটির্ভবতি ভোজিতা
81.57
তত্র স্নাত্বার্চয়িত্বা চ দৈবতানি পিতৄংস্তথা
উষিত্বা রজনীমেকামগ্নিষ্টোমফলং লভেৎ
81.58
ততো গচ্ছেত রাজেন্দ্র ব্রহ্মণঃ স্থানমুত্তমম্
ব্রহ্মোদুম্বরমিত্যেব প্রকাশং ভুবি ভারত
81.59
তত্র সপ্তর্ষিকুণ্ডেষু স্নাতস্য কুরুপুংগব
কেদারে চৈব রাজেন্দ্র কপিষ্ঠলমহাত্মনঃ
81.60
ব্রহ্মাণমভিগম্যাথ শুচিঃ প্রয়তমানসঃ
সর্বপাপবিশুদ্ধাত্মা ব্রহ্মলোকং প্রপদ্যতে
81.61
কপিষ্ঠলস্য কেদারং সমাসাদ্য সুদুর্লভম্
অন্তর্ধানমবাপ্নোতি তপসা দগ্ধকিল্বিষঃ
81.62
ততো গচ্ছেত রাজেন্দ্র সরকং লোকবিশ্রুতম্
কৃষ্ণপক্ষে চতুর্দশ্যামভিগম্য বৃষধ্বজম্
লভতে সর্বকামান্হি স্বর্গলোকং চ গচ্ছতি
81.63
তিস্রঃ কোট্যস্তু তীর্থানাং সরকে কুরুনন্দন
রুদ্রকোটিস্তথা কূপে হ্রদেষু চ মহীপতে
ইলাস্পদং চ তত্রৈব তীর্থং ভরতসত্তম
81.64
তত্র স্নাত্বার্চয়িত্বা চ পিতৄন্দেবাংশ্চ ভারত
ন দুর্গতিমবাপ্নোতি বাজপেয়ং চ বিন্দতি
81.65
কিংদানে চ নরঃ স্নাত্বা কিংজপ্যে চ মহীপতে
অপ্রমেয়মবাপ্নোতি দানং জপ্যং চ ভারত
81.66
কলশ্যাং চাপ্যুপস্পৃশ্য শ্রদ্দধানো জিতেন্দ্রিয়ঃ
অগ্নিষ্টোমস্য যজ্ঞস্য ফলং প্রাপ্নোতি মানবঃ
81.67
সরকস্য তু পূর্বেণ নারদস্য মহাত্মনঃ
তীর্থং কুরুবরশ্রেষ্ঠ অনাজন্মেতি বিশ্রুতম্
81.68
তত্র তীর্থে নরঃ স্নাত্বা প্রাণাংশ্চোত্সৃজ্য ভারত
নারদেনাভ্যনুজ্ঞাতো লোকান্প্রাপ্নোতি দুর্লভান্
81.69
শুক্লপক্ষে দশম্যাং তু পুণ্ডরীকং সমাবিশেৎ
তত্র স্নাত্বা নরো রাজন্পুণ্ডরীকফলং লভেৎ
81.70
ততস্ত্রিবিষ্টপং গচ্ছেত্ত্রিষু লোকেষু বিশ্রুতম্
তত্র বৈতরণী পুণ্যা নদী পাপপ্রমোচনী
81.71
তত্র স্নাত্বার্চয়িত্বা চ শূলপাণিং বৃষধ্বজম্
সর্বপাপবিশুদ্ধাত্মা গচ্ছেত পরমাং গতিম্
81.72
ততো গচ্ছেত রাজেন্দ্র ফলকীবনমুত্তমম্
যত্র দেবাঃ সদা রাজন্ফলকীবনমাশ্রিতাঃ
তপশ্চরন্তি বিপুলং বহুবর্ষসহস্রকম্
81.73
দৃষদ্বত্যাং নরঃ স্নাত্বা তর্পয়িত্বা চ দেবতাঃ
অগ্নিষ্টোমাতিরাত্রাভ্যাং ফলং বিন্দতি ভারত
81.74
তীর্থে চ সর্বদেবানাং স্নাত্বা ভরতসত্তম
গোসহস্রস্য রাজেন্দ্র ফলং প্রাপ্নোতি মানবঃ
81.75
পাণিখাতে নরঃ স্নাত্বা তর্পয়িত্বা চ দেবতাঃ
রাজসূয়মবাপ্নোতি ঋষিলোকং চ গচ্ছতি
81.76
ততো গচ্ছেত রাজেন্দ্র মিশ্রকং তীর্থমুত্তমম্
তত্র তীর্থানি রাজেন্দ্র মিশ্রিতানি মহাত্মনা
81.77
ব্যাসেন নৃপশার্দূল দ্বিজার্থমিতি নঃ শ্রুতম্
সর্বতীর্থেষু স স্নাতি মিশ্রকে স্নাতি যো নরঃ
81.78
ততো ব্যাসবনং গচ্ছেন্নিয়তো নিয়তাশনঃ
মনোজবে নরঃ স্নাত্বা গোসহস্রফলং লভেৎ
81.79
গত্বা মধুবটীং চাপি দেব্যাস্তীর্থং নরঃ শুচিঃ
তত্র স্নাত্বার্চয়েদ্দেবান্পিতৄংশ্চ প্রয়তঃ শুচিঃ
স দেব্যা সমনুজ্ঞাতো গোসহস্রফলং লভেৎ
81.80
কৌশিক্যাঃ সংগমে যস্তু দৃষদ্বত্যাশ্চ ভারত
স্নাতি বৈ নিয়তাহারঃ সর্বপাপৈঃ প্রমুচ্যতে
81.81
ততো ব্যাসস্থলী নাম যত্র ব্যাসেন ধীমতা
পুত্রশোকাভিতপ্তেন দেহত্যাগার্থনিশ্চয়ঃ
81.82
কৃতো দেবৈশ্চ রাজেন্দ্র পুনরুত্থাপিতস্তদা
অভিগম্য স্থলীং তস্য গোসহস্রফলং লভেৎ
81.83
কিংদত্তং কূপমাসাদ্য তিলপ্রস্থং প্রদায় চ
গচ্ছেত পরমাং সিদ্ধিমৃণৈর্মুক্তঃ কুরূদ্বহ
81.84
অহশ্চ সুদিনং চৈব দ্বে তীর্থে চ সুদুর্লভে
তয়োঃ স্নাত্বা নরব্যাঘ্র সূর্যলোকমবাপ্নুয়াৎ
81.85
মৃগধূমং ততো গচ্ছেত্ত্রিষু লোকেষু বিশ্রুতম্
তত্র গঙ্গাহ্রদে স্নাত্বা সমভ্যর্চ্য চ মানবঃ
শূলপাণিং মহাদেবমশ্বমেধফলং লভেৎ
81.86
দেবতীর্থে নরঃ স্নাত্বা গোসহস্রফলং লভেৎ
অথ বামনকং গচ্ছেত্ত্রিষু লোকেষু বিশ্রুতম্
81.87
তত্র বিষ্ণুপদে স্নাত্বা অর্চয়িত্বা চ বামনম্
সর্বপাপবিশুদ্ধাত্মা বিষ্ণুলোকমবাপ্নুয়াৎ
81.88
কুলংপুনে নরঃ স্নাত্বা পুনাতি স্বকুলং নরঃ
পবনস্য হ্রদং গত্বা মরুতাং তীর্থমুত্তমম্
তত্র স্নাত্বা নরব্যাঘ্র বায়ুলোকে মহীয়তে
81.89
অমরাণাং হ্রদে স্নাত্বা অমরেষু নরাধিপ
অমরাণাং প্রভাবেন স্বর্গলোকে মহীয়তে
81.90
শালিহোত্রস্য রাজেন্দ্র শালিশূর্পে যথাবিধি
স্নাত্বা নরবরশ্রেষ্ঠ গোসহস্রফলং লভেৎ
81.91
শ্রীকুঞ্জং চ সরস্বত্যাং তীর্থং ভরতসত্তম
তত্র স্নাত্বা নরো রাজন্নগ্নিষ্টোমফলং লভেৎ
81.92
ততো নৈমিষকুঞ্জং চ সমাসাদ্য কুরূদ্বহ
ঋষয়ঃ কিল রাজেন্দ্র নৈমিষেয়াস্তপোধনাঃ
তীর্থয়াত্রাং পুরস্কৃত্য কুরুক্ষেত্রং গতাঃ পুরা
81.93
ততঃ কুঞ্জঃ সরস্বত্যাং কৃতো ভরতসত্তম
ঋষীণামবকাশঃ স্যাদ্যথা তুষ্টিকরো মহান্
81.94
তস্মিন্কুঞ্জে নরঃ স্নাত্বা গোসহস্রফলং লভেৎ
কন্যাতীর্থে নরঃ স্নাত্বা অগ্নিষ্টোমফলং লভেৎ
81.95
ততো গচ্ছেন্নরব্যাঘ্র ব্রহ্মণঃ স্থানমুত্তমম্
তত্র বর্ণাবরঃ স্নাত্বা ব্রাহ্মণ্যং লভতে নরঃ
ব্রাহ্মণশ্চ বিশুদ্ধাত্মা গচ্ছেত পরমাং গতিম্
81.96
ততো গচ্ছেন্নরশ্রেষ্ঠ সোমতীর্থমনুত্তমম্
তত্র স্নাত্বা নরো রাজন্সোমলোকমবাপ্নুয়াৎ
81.97
সপ্তসারস্বতং তীর্থং ততো গচ্ছেন্নরাধিপ
যত্র মঙ্কণকঃ সিদ্ধো মহর্ষির্লোকবিশ্রুতঃ
81.98
পুরা মঙ্কণকো রাজন্কুশাগ্রেণেতি নঃ শ্রুতম্
ক্ষতঃ কিল করে রাজংস্তস্য শাকরসোঽস্রবৎ
81.99
স বৈ শাকরসং দৃষ্ট্বা হর্ষাবিষ্টো মহাতপাঃ
প্রনৃত্তঃ কিল বিপ্রর্ষির্বিস্ময়োত্ফুল্ললোচনঃ
81.100
ততস্তস্মিন্প্রনৃত্তে বৈ স্থাবরং জঙ্গমং চ যৎ
প্রনৃত্তমুভয়ং বীর তেজসা তস্য মোহিতম্
81.101
ব্রহ্মাদিভিঃ সুরৈ রাজন্নৃষিভিশ্চ তপোধনৈঃ
বিজ্ঞপ্তো বৈ মহাদেব ঋষেরর্থে নরাধিপ
নায়ং নৃত্যেদ্যথা দেব তথা ত্বং কর্তুমর্হসি
81.102
ততঃ প্রনৃত্তমাসাদ্য হর্ষাবিষ্টেন চেতসা
সুরাণাং হিতকামার্থমৃষিং দেবোঽভ্যভাষত
81.103
অহো মহর্ষে ধর্মজ্ঞ কিমর্থং নৃত্যতে ভবান্
হর্ষস্থানং কিমর্থং বা তবাদ্য মুনিপুংগব
81.104
ঋষিরুবাচ
কিং ন পশ্যসি মে দেব করাচ্ছাকরসং স্রুতম্
যং দৃষ্ট্বাহং প্রনৃত্তো বৈ হর্ষেণ মহতান্বিতঃ
81.105
পুলস্ত্য উবাচ
তং প্রহস্যাব্রবীদ্দেবো মুনিং রাগেণ মোহিতম্
অহং বৈ বিস্ময়ং বিপ্র ন গচ্ছামীতি পশ্য মাম্
81.106
এবমুক্ত্বা নরশ্রেষ্ঠ মহাদেবেন ধীমতা
অঙ্গুল্যগ্রেণ রাজেন্দ্র স্বাঙ্গুষ্ঠস্তাডিতোঽনঘ
81.107
ততো ভস্ম ক্ষতাদ্রাজন্নির্গতং হিমসংনিভম্
তদ্দৃষ্ট্বা ব্রীডিতো রাজন্স মুনিঃ পাদয়োর্গতঃ
81.108
নান্যং দেবমহং মন্যে রুদ্রাত্পরতরং মহৎ
সুরাসুরস্য জগতো গতিস্ত্বমসি শূলধৃক্
81.109
ত্বয়া সৃষ্টমিদং বিশ্বং ত্রৈলোক্যং সচরাচরম্
ত্বামেব ভগবন্সর্বে প্রবিশন্তি যুগক্ষয়ে
81.110
দেবৈরপি ন শক্যস্ত্বং পরিজ্ঞাতুং কুতো ময়া
ত্বয়ি সর্বে চ দৃশ্যন্তে সুরা ব্রহ্মাদয়োঽনঘ
81.111
সর্বস্ত্বমসি লোকানাং কর্তা কারয়িতা চ হ
ত্বত্প্রসাদাত্সুরাঃ সর্বে মোদন্তীহাকুতোভয়াঃ
এবং স্তুত্বা মহাদেবং স ঋষিঃ প্রণতোঽভবৎ
81.112
ঋষিরুবাচ
ত্বত্প্রসাদান্মহাদেব তপো মে ন ক্ষরেত বৈ
81.113
পুলস্ত্য উবাচ
ততো দেবঃ প্রহৃষ্টাত্মা ব্রহ্মর্ষিমিদমব্রবীৎ
তপস্তে বর্ধতাং বিপ্র মত্প্রসাদাত্সহস্রধা
81.114
আশ্রমে চেহ বত্স্যামি ত্বয়া সার্ধং মহামুনে
সপ্তসারস্বতে স্নাত্বা অর্চয়িষ্যন্তি যে তু মাম্
81.115
ন তেষাং দুর্লভং কিংচিদিহ লোকে পরত্র চ
সারস্বতং চ তে লোকং গমিষ্যন্তি ন সংশয়ঃ
81.116
ততস্ত্বৌশনসং গচ্ছেত্ত্রিষু লোকেষু বিশ্রুতম্
যত্র ব্রহ্মাদয়ো দেবা ঋষয়শ্চ তপোধনাঃ
81.117
কার্ত্তিকেয়শ্চ ভগবাংস্ত্রিসংধ্যং কিল ভারত
সাংনিধ্যমকরোত্তত্র ভার্গবপ্রিয়কাম্যয়া
81.118
কপালমোচনং তীর্থং সর্বপাপপ্রমোচনম্
তত্র স্নাত্বা নরব্যাঘ্র সর্বপাপৈঃ প্রমুচ্যতে
81.119
অগ্নিতীর্থং ততো গচ্ছেত্তত্র স্নাত্বা নরর্ষভ
অগ্নিলোকমবাপ্নোতি কুলং চৈব সমুদ্ধরেৎ
81.120
বিশ্বামিত্রস্য তত্রৈব তীর্থং ভরতসত্তম
তত্র স্নাত্বা মহারাজ ব্রাহ্মণ্যমভিজায়তে
81.121
ব্রহ্ময়োনিং সমাসাদ্য শুচিঃ প্রয়তমানসঃ
তত্র স্নাত্বা নরব্যাঘ্র ব্রহ্মলোকং প্রপদ্যতে
পুনাত্যাসপ্তমং চৈব কুলং নাস্ত্যত্র সংশয়ঃ
81.122
ততো গচ্ছেত রাজেন্দ্র তীর্থং ত্রৈলোক্যবিশ্রুতম্
পৃথূদকমিতি খ্যাতং কার্ত্তিকেয়স্য বৈ নৃপ
তত্রাভিষেকং কুর্বীত পিতৃদেবার্চনে রতঃ
81.123
অজ্ঞানাজ্জ্ঞানতো বাপি স্ত্রিয়া বা পুরুষেণ বা
যত্কিংচিদশুভং কর্ম কৃতং মানুষবুদ্ধিনা
81.124
তত্সর্বং নশ্যতে তস্য স্নাতমাত্রস্য ভারত
অশ্বমেধফলং চাপি স্বর্গলোকং চ গচ্ছতি
81.125
পুণ্যমাহুঃ কুরুক্ষেত্রং কুরুক্ষেত্রাত্সরস্বতীম্
সরস্বত্যাশ্চ তীর্থানি তীর্থেভ্যশ্চ পৃথূদকম্
81.126
উত্তমে সর্বতীর্থানাং যস্ত্যজেদাত্মনস্তনুম্
পৃথূদকে জপ্যপরো নৈনং শ্বোমরণং তপেৎ
81.127
গীতং সনত্কুমারেণ ব্যাসেন চ মহাত্মনা
বেদে চ নিয়তং রাজনভিগচ্ছেত্পৃথূদকম্
81.128
পৃথূদকাত্পুণ্যতমং নান্যত্তীর্থং নরোত্তম
এতন্মেধ্যং পবিত্রং চ পাবনং চ ন সংশয়ঃ
81.129
তত্র স্নাত্বা দিবং যান্তি অপি পাপকৃতো জনাঃ
পৃথূদকে নরশ্রেষ্ঠ প্রাহুরেবং মনীষিণঃ
81.130
মধুস্রবং চ তত্রৈব তীর্থং ভরতসত্তম
তত্র স্নাত্বা নরো রাজন্গোসহস্রফলং লভেৎ
81.131
ততো গচ্ছেন্নরশ্রেষ্ঠ তীর্থং দেব্যা যথাক্রমম্
সরস্বত্যারুণায়াশ্চ সংগমং লোকবিশ্রুতম্
81.132
ত্রিরাত্রোপোষিতঃ স্নাত্বা মুচ্যতে ব্রহ্মহত্যয়া
অগ্নিষ্টোমাতিরাত্রাভ্যাং ফলং বিন্দতি মানবঃ
81.133
আসপ্তমং কুলং চৈব পুনাতি ভরতর্ষভ
অবতীর্ণং চ তত্রৈব তীর্থং কুরুকুলোদ্বহ
বিপ্রাণামনুকম্পার্থং দর্ভিণা নির্মিতং পুরা
81.134
ব্রতোপনয়নাভ্যাং বা উপবাসেন বা দ্বিজঃ
ক্রিয়ামন্ত্রৈশ্চ সংয়ুক্তো ব্রাহ্মণঃ স্যান্ন সংশয়ঃ
81.135
ক্রিয়ামন্ত্রবিহীনোঽপি তত্র স্নাত্বা নরর্ষভ
চীর্ণব্রতো ভবেদ্বিপ্রো দৃষ্টমেতত্পুরাতনে
81.136
সমুদ্রাশ্চাপি চত্বারঃ সমানীতাশ্চ দর্ভিণা
যেষু স্নাতো নরব্যাঘ্র ন দুর্গতিমবাপ্নুয়াৎ
ফলানি গোসহস্রাণাং চতুর্ণাং বিন্দতে চ সঃ
81.137
ততো গচ্ছেত রাজেন্দ্র তীর্থং শতসহস্রকম্
সাহস্রকং চ তত্রৈব দ্বে তীর্থে লোকবিশ্রুতে
81.138
উভয়োর্হি নরঃ স্নাত্বা গোসহস্রফলং লভেৎ
দানং বাপ্যুপবাসো বা সহস্রগুণিতং ভবেৎ
81.139
ততো গচ্ছেত রাজেন্দ্র রেণুকাতীর্থমুত্তমম্
তত্রাভিষেকং কুর্বীত পিতৃদেবার্চনে রতঃ
সর্বপাপবিশুদ্ধাত্মা অগ্নিষ্টোমফলং লভেৎ
81.140
বিমোচনমুপস্পৃশ্য জিতমন্যুর্জিতেন্দ্রিয়ঃ
প্রতিগ্রহকৃতৈর্দোষৈঃ সর্বৈঃ স পরিমুচ্যতে
81.141
ততঃ পঞ্চবটং গত্বা ব্রহ্মচারী জিতেন্দ্রিয়ঃ
পুণ্যেন মহতা যুক্তঃ সতাং লোকে মহীয়তে
81.142
যত্র যোগেশ্বরঃ স্থাণুঃ স্বয়মেব বৃষধ্বজঃ
তমর্চয়িত্বা দেবেশং গমনাদেব সিধ্যতি
81.143
ঔজসং বরুণং তীর্থং দীপ্যতে স্বেন তেজসা
যত্র ব্রহ্মাদিভির্দেবৈরৃষিভিশ্চ তপোধনৈঃ
সেনাপত্যেন দেবানামভিষিক্তো গুহস্তদা
81.144
ঔজসস্য তু পূর্বেণ কুরুতীর্থং কুরূদ্বহ
কুরুতীর্থে নরঃ স্নাত্বা ব্রহ্মচারী জিতেন্দ্রিয়ঃ
সর্বপাপবিশুদ্ধাত্মা কুরুলোকং প্রপদ্যতে
81.145
স্বর্গদ্বারং ততো গচ্ছেন্নিয়তো নিয়তাশনঃ
স্বর্গলোকমবাপ্নোতি ব্রহ্মলোকং চ গচ্ছতি
81.146
ততো গচ্ছেদনরকং তীর্থসেবী নরাধিপ
তত্র স্নাত্বা নরো রাজন্ন দুর্গতিমবাপ্নুয়াৎ
81.147
তত্র ব্রহ্মা স্বয়ং নিত্যং দেবৈঃ সহ মহীপতে
অন্বাস্যতে নরশ্রেষ্ঠ নারায়ণপুরোগমৈঃ
81.148
সাংনিধ্যং চৈব রাজেন্দ্র রুদ্রপত্ন্যাঃ কুরূদ্বহ
অভিগম্য চ তাং দেবীং ন দুর্গতিমবাপ্নুয়াৎ
81.149
তত্রৈব চ মহারাজ বিশ্বেশ্বরমুমাপতিম্
অভিগম্য মহাদেবং মুচ্যতে সর্বকিল্বিষৈঃ
81.150
নারায়ণং চাভিগম্য পদ্মনাভমরিংদমম্
শোভমানো মহারাজ বিষ্ণুলোকং প্রপদ্যতে
81.151
তীর্থে তু সর্বদেবানাং স্নাতঃ স পুরুষর্ষভ
সর্বদুঃখৈঃ পরিত্যক্তো দ্যোততে শশিবত্সদা
81.152
ততঃ স্বস্তিপুরং গচ্ছেত্তীর্থসেবী নরাধিপ
পাবনং তীর্থমাসাদ্য তর্পয়েত্পিতৃদেবতাঃ
অগ্নিষ্টোমস্য যজ্ঞস্য ফলং প্রাপ্নোতি মানবঃ
81.153
গঙ্গাহ্রদশ্চ তত্রৈব কূপশ্চ ভরতর্ষভ
তিস্রঃ কোট্যস্তু তীর্থানাং তস্মিন্কূপে মহীপতে
তত্র স্নাত্বা নরো রাজন্স্বর্গলোকং প্রপদ্যতে
81.154
আপগায়াং নরঃ স্নাত্বা অর্চয়িত্বা মহেশ্বরম্
গাণপত্যমবাপ্নোতি কুলং চোদ্ধরতে স্বকম্
81.155
ততঃ স্থাণুবটং গচ্ছেত্ত্রিষু লোকেষু বিশ্রুতম্
তত্র স্নাত্বা স্থিতো রাত্রিং রুদ্রলোকমবাপ্নুয়াৎ
81.156
বদরীপাচনং গচ্ছেদ্বসিষ্ঠস্যাশ্রমং ততঃ
বদরং ভক্ষয়েত্তত্র ত্রিরাত্রোপোষিতো নরঃ
81.157
সম্যগ্দ্বাদশ বর্ষাণি বদরান্ভক্ষয়েত্তু যঃ
ত্রিরাত্রোপোষিতশ্চৈব ভবেত্তুল্যো নরাধিপ
81.158
ইন্দ্রমার্গং সমাসাদ্য তীর্থসেবী নরাধিপ
অহোরাত্রোপবাসেন শক্রলোকে মহীয়তে
81.159
একরাত্রং সমাসাদ্য একরাত্রোষিতো নরঃ
নিয়তঃ সত্যবাদী চ ব্রহ্মলোকে মহীয়তে
81.160
ততো গচ্ছেত ধর্মজ্ঞ তীর্থং ত্রৈলোক্যবিশ্রুতম্
আদিত্যস্যাশ্রমো যত্র তেজোরাশের্মহাত্মনঃ
81.161
তস্মিংস্তীর্থে নরঃ স্নাত্বা পূজয়িত্বা বিভাবসুম্
আদিত্যলোকং ব্রজতি কুলং চৈব সমুদ্ধরেৎ
81.162
সোমতীর্থে নরঃ স্নাত্বা তীর্থসেবী কুরূদ্বহ
সোমলোকমবাপ্নোতি নরো নাস্ত্যত্র সংশয়ঃ
81.163
ততো গচ্ছেত ধর্মজ্ঞ দধীচস্য মহাত্মনঃ
তীর্থং পুণ্যতমং রাজন্পাবনং লোকবিশ্রুতম্
81.164
যত্র সারস্বতো রাজন্সোঽঙ্গিরাস্তপসো নিধিঃ
তস্মিংস্তীর্থে নরঃ স্নাত্বা বাজপেয়ফলং লভেৎ
সারস্বতীং গতিং চৈব লভতে নাত্র সংশয়ঃ
81.165
ততঃ কন্যাশ্রমং গচ্ছেন্নিয়তো ব্রহ্মচর্যবান্
ত্রিরাত্রোপোষিতো রাজন্নুপবাসপরায়ণঃ
লভেত্কন্যাশতং দিব্যং ব্রহ্মলোকং চ গচ্ছতি
81.166
ততো গচ্ছেত ধর্মজ্ঞ তীর্থং সংনিহিতীমপি
যত্র ব্রহ্মাদয়ো দেবা ঋষয়শ্চ তপোধনাঃ
মাসি মাসি সমায়ান্তি পুণ্যেন মহতান্বিতাঃ
81.167
সংনিহিত্যামুপস্পৃশ্য রাহুগ্রস্তে দিবাকরে
অশ্বমেধশতং তেন ইষ্টং ভবতি শাশ্বতম্
81.168
পৃথিব্যাং যানি তীর্থানি অন্তরিক্ষচরাণি চ
নদ্যো নদাস্তডাগাশ্চ সর্বপ্রস্রবণানি চ
81.169
উদপানাশ্চ বপ্রাশ্চ পুণ্যান্যায়তনানি চ
মাসি মাসি সমায়ান্তি সংনিহিত্যাং ন সংশয়ঃ
81.170
যত্কিংচিদ্দুষ্কৃতং কর্ম স্ত্রিয়া বা পুরুষস্য বা
স্নাতমাত্রস্য তত্সর্বং নশ্যতে নাত্র সংশয়ঃ
পদ্মবর্ণেন যানেন ব্রহ্মলোকং স গচ্ছতি
81.171
অভিবাদ্য ততো যক্ষং দ্বারপালমরন্তুকম্
কোটিরূপমুপস্পৃশ্য লভেদ্বহু সুবর্ণকম্
81.172
গঙ্গাহ্রদশ্চ তত্রৈব তীর্থং ভরতসত্তম
তত্র স্নাতস্তু ধর্মজ্ঞ ব্রহ্মচারী সমাহিতঃ
রাজসূয়াশ্বমেধাভ্যাং ফলং বিন্দতি শাশ্বতম্
81.173
পৃথিব্যাং নৈমিষং পুণ্যমন্তরিক্ষে চ পুষ্করম্
ত্রয়াণামপি লোকানাং কুরুক্ষেত্রং বিশিষ্যতে
81.174
পাংসবোঽপি কুরুক্ষেত্রে বায়ুনা সমুদীরিতাঃ
অপি দুষ্কৃতকর্মাণং নয়ন্তি পরমাং গতিম্
81.175
দক্ষিণেন সরস্বত্যা উত্তরেণ দৃষদ্বতীম্
যে বসন্তি কুরুক্ষেত্রে তে বসন্তি ত্রিবিষ্টপে
81.176
কুরুক্ষেত্রং গমিষ্যামি কুরুক্ষেত্রে বসাম্যহম্
অপ্যেকাং বাচমুত্সৃজ্য সর্বপাপৈঃ প্রমুচ্যতে
81.177
ব্রহ্মবেদী কুরুক্ষেত্রং পুণ্যং ব্রহ্মর্ষিসেবিতম্
তদাবসন্তি যে রাজন্ন তে শোচ্যাঃ কথংচন
81.178
তরন্তুকারন্তুকয়োর্যদন্তরং; রামহ্রদানাং চ মচক্রুকস্য
এতত্কুরুক্ষেত্রসমন্তপঞ্চকং; পিতামহস্যোত্তরবেদিরুচ্যতে