UtshovChapter 81
81.1
पुलस्त्य उवाच
ततो गच्छेत राजेन्द्र कुरुक्षेत्रमभिष्टुतम्
पापेभ्यो विप्रमुच्यन्ते तद्गताः सर्वजन्तवः
Pulastya uvacha
Tato gachchheta rajendra kurukshetramabhishtutam
Papebhyo vipramuchyante tadgatah sarvajantavah
81.2
कुरुक्षेत्रं गमिष्यामि कुरुक्षेत्रे वसाम्यहम्
य एवं सततं ब्रूयात्सोऽपि पापैः प्रमुच्यते
Kurukshetram gamishyami kurukshetre vasamyaham
Ya evam satatam bruyatsopi papaih pramuchyate
81.3
तत्र मासं वसेद्वीर सरस्वत्यां युधिष्ठिर
यत्र ब्रह्मादयो देवा ऋषयः सिद्धचारणाः
Tatra masam vasedvira sarasvatyam yudhishthira
Yatra brahmadayo deva rishayah siddhacharanah
81.4
गन्धर्वाप्सरसो यक्षाः पन्नगाश्च महीपते
ब्रह्मक्षेत्रं महापुण्यमभिगच्छन्ति भारत
Gandharvapsaraso yakshah pannagashcha mahipate
Brahmakshetram mahapunyamabhigachchhanti bharata
81.5
मनसाप्यभिकामस्य कुरुक्षेत्रं युधिष्ठिर
पापानि विप्रणश्यन्ति ब्रह्मलोकं च गच्छति
Manasapyabhikamasya kurukshetram yudhishthira
Papani vipranashyanti brahmalokam cha gachchhati
81.6
गत्वा हि श्रद्धया युक्तः कुरुक्षेत्रं कुरूद्वह
राजसूयाश्वमेधाभ्यां फलं प्राप्नोति मानवः
Gatva hi shraddhaya yuktah kurukshetram kurudvaha
Rajasuyashvamedhabhyam phalam prapnoti manavah
81.7
ततो मचक्रुकं राजन्द्वारपालं महाबलम्
यक्षं समभिवाद्यैव गोसहस्रफलं लभेत्
Tato machakrukam rajandvarapalam mahabalam
Yaksham samabhivadyaiva gosahasraphalam labhet
81.8
ततो गच्छेत धर्मज्ञ विष्णोः स्थानमनुत्तमम्
सततं नाम राजेन्द्र यत्र संनिहितो हरिः
Tato gachchheta dharmagya vishnoh sthanamanuttamam
Satatam nama rajendra yatra sannihito harih
81.9
तत्र स्नात्वार्चयित्वा च त्रिलोकप्रभवं हरिम्
अश्वमेधमवाप्नोति विष्णुलोकं च गच्छति
Tatra snatvarchayitva cha trilokaprabhavam harim
Ashvamedhamavapnoti vishnulokam cha gachchhati
81.10
ततः पारिप्लवं गच्छेत्तीर्थं त्रैलोक्यविश्रुतम्
अग्निष्टोमातिरात्राभ्यां फलं प्राप्नोति मानवः
Tatah pariplavam gachchhettirtham trailokyavishrutam
Agnishtomatiratrabhyam phalam prapnoti manavah
81.11
पृथिव्यास्तीर्थमासाद्य गोसहस्रफलं लभेत्
ततः शालूकिनीं गत्वा तीर्थसेवी नराधिप
दशाश्वमेधिके स्नात्वा तदेव लभते फलम्
Prithivyastirthamasadya gosahasraphalam labhet
Tatah shalukinim gatva tirthasevi naradhipa
Dashashvamedhike snatva tadeva labhate phalam
81.12
सर्पदर्वीं समासाद्य नागानां तीर्थमुत्तमम्
अग्निष्टोममवाप्नोति नागलोकं च विन्दति
Sarpadarvim samasadya naganam tirthamuttamam
Agnishtomamavapnoti nagalokam cha vindati
81.13
ततो गच्छेत धर्मज्ञ द्वारपालं तरन्तुकम्
तत्रोष्य रजनीमेकां गोसहस्रफलं लभेत्
Tato gachchheta dharmagya dvarapalam tarantukam
Tatroshya rajanimekam gosahasraphalam labhet
81.14
ततः पञ्चनदं गत्वा नियतो नियताशनः
कोटितीर्थमुपस्पृश्य हयमेधफलं लभेत्
अश्विनोस्तीर्थमासाद्य रूपवानभिजायते
Tatah panchanadam gatva niyato niyatashanah
Kotitirthamupasprishya hayamedhaphalam labhet
Ashvinostirthamasadya rupavanabhijayate
81.15
ततो गच्छेत धर्मज्ञ वाराहं तीर्थमुत्तमम्
विष्णुर्वाराहरूपेण पूर्वं यत्र स्थितोऽभवत्
तत्र स्नात्वा नरव्याघ्र अग्निष्टोमफलं लभेत्
Tato gachchheta dharmagya varaham tirthamuttamam
Vishnurvaraharupena purvam yatra sthitobhavat
Tatra snatva naravyaghra agnishtomaphalam labhet
81.16
ततो जयन्त्या राजेन्द्र सोमतीर्थं समाविशेत्
स्नात्वा फलमवाप्नोति राजसूयस्य मानवः
Tato jayantya rajendra somatirtham samavishet
Snatva phalamavapnoti rajasuyasya manavah
81.17
एकहंसे नरः स्नात्वा गोसहस्रफलं लभेत्
कृतशौचं समासाद्य तीर्थसेवी कुरूद्वह
पुण्डरीकमवाप्नोति कृतशौचो भवेन्नरः
Ekahanse narah snatva gosahasraphalam labhet
Kritashaucham samasadya tirthasevi kurudvaha
Pundarikamavapnoti kritashaucho bhavennarah
81.18
ततो मुञ्जवटं नाम महादेवस्य धीमतः
तत्रोष्य रजनीमेकां गाणपत्यमवाप्नुयात्
Tato munjavatam nama mahadevasya dhimatah
Tatroshya rajanimekam ganapatyamavapnuyat
81.19
तत्रैव च महाराज यक्षी लोकपरिश्रुता
तां चाभिगम्य राजेन्द्र पुण्याँल्लोकानवाप्नुयात्
Tatraiva cha maharaja yakshi lokaparishruta
Tam chabhigamya rajendra punyanllokanavapnuyat
81.20
कुरुक्षेत्रस्य तद्द्वारं विश्रुतं भरतर्षभ
प्रदक्षिणमुपावृत्य तीर्थसेवी समाहितः
Kurukshetrasya taddvaram vishrutam bharatarshabha
Pradakshinamupavritya tirthasevi samahitah
81.21
संमिते पुष्कराणां च स्नात्वार्च्य पितृदेवताः
जामदग्न्येन रामेण आहृते वै महात्मना
कृतकृत्यो भवेद्राजन्नश्वमेधं च विन्दति
Sammite pushkaranam cha snatvarchya pitridevatah
Jamadagnyena ramena ahrite vai mahatmana
Kritakrityo bhavedrajannashvamedham cha vindati
81.22
ततो रामह्रदान्गच्छेत्तीर्थसेवी नराधिप
यत्र रामेण राजेन्द्र तरसा दीप्ततेजसा
क्षत्रमुत्साद्य वीर्येण ह्रदाः पञ्च निवेशिताः
Tato ramahradangachchhettirthasevi naradhipa
Yatra ramena rajendra tarasa diptatejasa
Kshatramutsadya viryena hradah pancha niveshitah
81.23
पूरयित्वा नरव्याघ्र रुधिरेणेति नः श्रुतम्
पितरस्तर्पिताः सर्वे तथैव च पितामहाः
ततस्ते पितरः प्रीता राममूचुर्महीपते
Purayitva naravyaghra rudhireneti nah shrutam
Pitarastarpitah sarve tathaiva cha pitamahah
Tataste pitarah prita ramamuchurmahipate
81.24
राम राम महाभाग प्रीताः स्म तव भार्गव
अनया पितृभक्त्या च विक्रमेण च ते विभो
वरं वृणीष्व भद्रं ते किमिच्छसि महाद्युते
Rama rama mahabhaga pritah sma tava bhargava
Anaya pitribhaktya cha vikramena cha te vibho
Varam vrinishva bhadram te kimichchhasi mahadyute
81.25
एवमुक्तः स राजेन्द्र रामः प्रहरतां वरः
अब्रवीत्प्राञ्जलिर्वाक्यं पितॄन्स गगने स्थितान्
Evamuktah sa rajendra ramah praharatam varah
Abravitpranjalirvakyam pitrinsa gagane sthitan
81.26
भवन्तो यदि मे प्रीता यद्यनुग्राह्यता मयि
पितृप्रसादादिच्छेयं तपसाप्यायनं पुनः
Bhavanto yadi me prita yadyanugrahyata mayi
Pitriprasadadichchheyam tapasapyayanam punah
81.27
यच्च रोषाभिभूतेन क्षत्रमुत्सादितं मया
ततश्च पापान्मुच्येयं युष्माकं तेजसा ह्यहम्
ह्रदाश्च तीर्थभूता मे भवेयुर्भुवि विश्रुताः
Yachcha roshabhibhutena kshatramutsaditam maya
Tatashcha papanmuchyeyam yushmakam tejasa hyaham
Hradashcha tirthabhuta me bhaveyurbhuvi vishrutah
81.28
एतच्छ्रुत्वा शुभं वाक्यं रामस्य पितरस्तदा
प्रत्यूचुः परमप्रीता रामं हर्षसमन्विताः
Etachchhrutva shubham vakyam ramasya pitarastada
Pratyuchuh paramaprita ramam harshasamanvitah
81.29
तपस्ते वर्धतां भूयः पितृभक्त्या विशेषतः
यच्च रोषाभिभूतेन क्षत्रमुत्सादितं त्वया
Tapaste vardhatam bhuyah pitribhaktya visheshatah
Yachcha roshabhibhutena kshatramutsaditam tvaya
81.30
ततश्च पापान्मुक्तस्त्वं कर्मभिस्ते च पातिताः
ह्रदाश्च तव तीर्थत्वं गमिष्यन्ति न संशयः
Tatashcha papanmuktastvam karmabhiste cha patitah
Hradashcha tava tirthatvam gamishyanti na sanshayah
81.31
ह्रदेष्वेतेषु यः स्नात्वा पितॄन्संतर्पयिष्यति
पितरस्तस्य वै प्रीता दास्यन्ति भुवि दुर्लभम्
ईप्सितं मनसः कामं स्वर्गलोकं च शाश्वतम्
Hradeshveteshu yah snatva pitrinsantarpayishyati
Pitarastasya vai prita dasyanti bhuvi durlabham
Ipsitam manasah kamam svargalokam cha shashvatam
81.32
एवं दत्त्वा वरान्राजन्रामस्य पितरस्तदा
आमन्त्र्य भार्गवं प्रीतास्तत्रैवान्तर्दधुस्तदा
Evam dattva varanrajanramasya pitarastada
Amantrya bhargavam pritastatraivantardadhustada
81.33
एवं रामह्रदाः पुण्या भार्गवस्य महात्मनः
स्नात्वा ह्रदेषु रामस्य ब्रह्मचारी शुभव्रतः
राममभ्यर्च्य राजेन्द्र लभेद्बहु सुवर्णकम्
Evam ramahradah punya bhargavasya mahatmanah
Snatva hradeshu ramasya brahmachari shubhavratah
Ramamabhyarchya rajendra labhedbahu suvarnakam
81.34
वंशमूलकमासाद्य तीर्थसेवी कुरूद्वह
स्ववंशमुद्धरेद्राजन्स्नात्वा वै वंशमूलके
Vanshamulakamasadya tirthasevi kurudvaha
Svavanshamuddharedrajansnatva vai vanshamulake
81.35
कायशोधनमासाद्य तीर्थं भरतसत्तम
शरीरशुद्धिः स्नातस्य तस्मिंस्तीर्थे न संशयः
शुद्धदेहश्च संयाति शुभाँल्लोकाननुत्तमान्
Kayashodhanamasadya tirtham bharatasattama
Sharirashuddhih snatasya tasminstirthe na sanshayah
Shuddhadehashcha sanyati shubhanllokananuttaman
81.36
ततो गच्छेत राजेन्द्र तीर्थं त्रैलोक्यविश्रुतम्
लोका यत्रोद्धृताः पूर्वं विष्णुना प्रभविष्णुना
Tato gachchheta rajendra tirtham trailokyavishrutam
Loka yatroddhritah purvam vishnuna prabhavishnuna
81.37
लोकोद्धारं समासाद्य तीर्थं त्रैलोक्यविश्रुतम्
स्नात्वा तीर्थवरे राजँल्लोकानुद्धरते स्वकान्
श्रीतीर्थं च समासाद्य विन्दते श्रियमुत्तमाम्
Lokoddharam samasadya tirtham trailokyavishrutam
Snatva tirthavare rajanllokanuddharate svakan
Shritirtham cha samasadya vindate shriyamuttamam
81.38
कपिलातीर्थमासाद्य ब्रह्मचारी समाहितः
तत्र स्नात्वार्चयित्वा च दैवतानि पितॄंस्तथा
कपिलानां सहस्रस्य फलं विन्दति मानवः
Kapilatirthamasadya brahmachari samahitah
Tatra snatvarchayitva cha daivatani pitrinstatha
Kapilanam sahasrasya phalam vindati manavah
81.39
सूर्यतीर्थं समासाद्य स्नात्वा नियतमानसः
अर्चयित्वा पितॄन्देवानुपवासपरायणः
अग्निष्टोममवाप्नोति सूर्यलोकं च गच्छति
Suryatirtham samasadya snatva niyatamanasah
Archayitva pitrindevanupavasaparayanah
Agnishtomamavapnoti suryalokam cha gachchhati
81.40
गवांभवनमासाद्य तीर्थसेवी यथाक्रमम्
तत्राभिषेकं कुर्वाणो गोसहस्रफलं लभेत्
Gavambhavanamasadya tirthasevi yathakramam
Tatrabhishekam kurvano gosahasraphalam labhet
81.41
शङ्खिनीं तत्र आसाद्य तीर्थसेवी कुरूद्वह
देव्यास्तीर्थे नरः स्नात्वा लभते रूपमुत्तमम्
Shankhinim tatra asadya tirthasevi kurudvaha
Devyastirthe narah snatva labhate rupamuttamam
81.42
ततो गच्छेत राजेन्द्र द्वारपालमरन्तुकम्
तस्य तीर्थं सरस्वत्यां यक्षेन्द्रस्य महात्मनः
तत्र स्नात्वा नरो राजन्नग्निष्टोमफलं लभेत्
Tato gachchheta rajendra dvarapalamarantukam
Tasya tirtham sarasvatyam yakshendrasya mahatmanah
Tatra snatva naro rajannagnishtomaphalam labhet
81.43
ततो गच्छेत धर्मज्ञ ब्रह्मावर्तं नराधिप
ब्रह्मावर्ते नरः स्नात्वा ब्रह्मलोकमवाप्नुयात्
Tato gachchheta dharmagya brahmavartam naradhipa
Brahmavarte narah snatva brahmalokamavapnuyat
81.44
ततो गच्छेत धर्मज्ञ सुतीर्थकमनुत्तमम्
यत्र संनिहिता नित्यं पितरो दैवतैः सह
Tato gachchheta dharmagya sutirthakamanuttamam
Yatra sannihita nityam pitaro daivataih saha
81.45
तत्राभिषेकं कुर्वीत पितृदेवार्चने रतः
अश्वमेधमवाप्नोति पितृलोकं च गच्छति
Tatrabhishekam kurvita pitridevarchane ratah
Ashvamedhamavapnoti pitrilokam cha gachchhati
81.46
ततोऽम्बुवश्यं धर्मज्ञ समासाद्य यथाक्रमम्
कोशेश्वरस्य तीर्थेषु स्नात्वा भरतसत्तम
सर्वव्याधिविनिर्मुक्तो ब्रह्मलोके महीयते
Tatombuvashyam dharmagya samasadya yathakramam
Kosheshvarasya tirtheshu snatva bharatasattama
Sarvavyadhivinirmukto brahmaloke mahiyate
81.47
मातृतीर्थं च तत्रैव यत्र स्नातस्य भारत
प्रजा विवर्धते राजन्ननन्तां चाश्नुते श्रियम्
Matritirtham cha tatraiva yatra snatasya bharata
Praja vivardhate rajannanantam chashnute shriyam
81.48
ततः शीतवनं गच्छेन्नियतो नियताशनः
तीर्थं तत्र महाराज महदन्यत्र दुर्लभम्
Tatah shitavanam gachchhenniyato niyatashanah
Tirtham tatra maharaja mahadanyatra durlabham
81.49
पुनाति दर्शनादेव दण्डेनैकं नराधिप
केशानभ्युक्ष्य वै तस्मिन्पूतो भवति भारत
Punati darshanadeva dandenaikam naradhipa
Keshanabhyukshya vai tasminputo bhavati bharata
81.50
तीर्थं तत्र महाराज श्वानलोमापहं स्मृतम्
यत्र विप्रा नरव्याघ्र विद्वांसस्तीर्थतत्पराः
Tirtham tatra maharaja shvanalomapaham smritam
Yatra vipra naravyaghra vidvansastirthatatparah
81.51
श्वानलोमापनयने तीर्थे भरतसत्तम
प्राणायामैर्निर्हरन्ति श्वलोमानि द्विजोत्तमाः
Shvanalomapanayane tirthe bharatasattama
Pranayamairnirharanti shvalomani dvijottamah
81.52
पूतात्मानश्च राजेन्द्र प्रयान्ति परमां गतिम्
दशाश्वमेधिकं चैव तस्मिंस्तीर्थे महीपते
तत्र स्नात्वा नरव्याघ्र गच्छेत परमां गतिम्
Putatmanashcha rajendra prayanti paramam gatim
Dashashvamedhikam chaiva tasminstirthe mahipate
Tatra snatva naravyaghra gachchheta paramam gatim
81.53
ततो गच्छेत राजेन्द्र मानुषं लोकविश्रुतम्
यत्र कृष्णमृगा राजन्व्याधेन परिपीडिताः
अवगाह्य तस्मिन्सरसि मानुषत्वमुपागताः
Tato gachchheta rajendra manusham lokavishrutam
Yatra krishnamriga rajanvyadhena paripiditah
Avagahya tasminsarasi manushatvamupagatah
81.54
तस्मिंस्तीर्थे नरः स्नात्वा ब्रह्मचारी जितेन्द्रियः
सर्वपापविशुद्धात्मा स्वर्गलोके महीयते
Tasminstirthe narah snatva brahmachari jitendriyah
Sarvapapavishuddhatma svargaloke mahiyate
81.55
मानुषस्य तु पूर्वेण क्रोशमात्रे महीपते
आपगा नाम विख्याता नदी सिद्धनिषेविता
Manushasya tu purvena kroshamatre mahipate
Apaga nama vikhyata nadi siddhanishevita
81.56
श्यामाकभोजनं तत्र यः प्रयच्छति मानवः
देवान्पितॄंश्च उद्दिश्य तस्य धर्मफलं महत्
एकस्मिन्भोजिते विप्रे कोटिर्भवति भोजिता
Shyamakabhojanam tatra yah prayachchhati manavah
Devanpitrinshcha uddishya tasya dharmaphalam mahat
Ekasminbhojite vipre kotirbhavati bhojita
81.57
तत्र स्नात्वार्चयित्वा च दैवतानि पितॄंस्तथा
उषित्वा रजनीमेकामग्निष्टोमफलं लभेत्
Tatra snatvarchayitva cha daivatani pitrinstatha
Ushitva rajanimekamagnishtomaphalam labhet
81.58
ततो गच्छेत राजेन्द्र ब्रह्मणः स्थानमुत्तमम्
ब्रह्मोदुम्बरमित्येव प्रकाशं भुवि भारत
Tato gachchheta rajendra brahmanah sthanamuttamam
Brahmodumbaramityeva prakasham bhuvi bharata
81.59
तत्र सप्तर्षिकुण्डेषु स्नातस्य कुरुपुंगव
केदारे चैव राजेन्द्र कपिष्ठलमहात्मनः
Tatra saptarshikundeshu snatasya kurupungava
Kedare chaiva rajendra kapishthalamahatmanah
81.60
ब्रह्माणमभिगम्याथ शुचिः प्रयतमानसः
सर्वपापविशुद्धात्मा ब्रह्मलोकं प्रपद्यते
Brahmanamabhigamyatha shuchih prayatamanasah
Sarvapapavishuddhatma brahmalokam prapadyate
81.61
कपिष्ठलस्य केदारं समासाद्य सुदुर्लभम्
अन्तर्धानमवाप्नोति तपसा दग्धकिल्बिषः
Kapishthalasya kedaram samasadya sudurlabham
Antardhanamavapnoti tapasa dagdhakilbishah
81.62
ततो गच्छेत राजेन्द्र सरकं लोकविश्रुतम्
कृष्णपक्षे चतुर्दश्यामभिगम्य वृषध्वजम्
लभते सर्वकामान्हि स्वर्गलोकं च गच्छति
Tato gachchheta rajendra sarakam lokavishrutam
Krishnapakshe chaturdashyamabhigamya vrishadhvajam
Labhate sarvakamanhi svargalokam cha gachchhati
81.63
तिस्रः कोट्यस्तु तीर्थानां सरके कुरुनन्दन
रुद्रकोटिस्तथा कूपे ह्रदेषु च महीपते
इलास्पदं च तत्रैव तीर्थं भरतसत्तम
Tisrah kotyastu tirthanam sarake kurunandana
Rudrakotistatha kupe hradeshu cha mahipate
Ilaspadam cha tatraiva tirtham bharatasattama
81.64
तत्र स्नात्वार्चयित्वा च पितॄन्देवांश्च भारत
न दुर्गतिमवाप्नोति वाजपेयं च विन्दति
Tatra snatvarchayitva cha pitrindevanshcha bharata
Na durgatimavapnoti vajapeyam cha vindati
81.65
किंदाने च नरः स्नात्वा किंजप्ये च महीपते
अप्रमेयमवाप्नोति दानं जप्यं च भारत
Kindane cha narah snatva kinjapye cha mahipate
Aprameyamavapnoti danam japyam cha bharata
81.66
कलश्यां चाप्युपस्पृश्य श्रद्दधानो जितेन्द्रियः
अग्निष्टोमस्य यज्ञस्य फलं प्राप्नोति मानवः
Kalashyam chapyupasprishya shraddadhano jitendriyah
Agnishtomasya yagyasya phalam prapnoti manavah
81.67
सरकस्य तु पूर्वेण नारदस्य महात्मनः
तीर्थं कुरुवरश्रेष्ठ अनाजन्मेति विश्रुतम्
Sarakasya tu purvena naradasya mahatmanah
Tirtham kuruvarashreshtha anajanmeti vishrutam
81.68
तत्र तीर्थे नरः स्नात्वा प्राणांश्चोत्सृज्य भारत
नारदेनाभ्यनुज्ञातो लोकान्प्राप्नोति दुर्लभान्
Tatra tirthe narah snatva prananshchotsrijya bharata
Naradenabhyanugyato lokanprapnoti durlabhan
81.69
शुक्लपक्षे दशम्यां तु पुण्डरीकं समाविशेत्
तत्र स्नात्वा नरो राजन्पुण्डरीकफलं लभेत्
Shuklapakshe dashamyam tu pundarikam samavishet
Tatra snatva naro rajanpundarikaphalam labhet
81.70
ततस्त्रिविष्टपं गच्छेत्त्रिषु लोकेषु विश्रुतम्
तत्र वैतरणी पुण्या नदी पापप्रमोचनी
Tatastrivishtapam gachchhettrishu lokeshu vishrutam
Tatra vaitarani punya nadi papapramochani
81.71
तत्र स्नात्वार्चयित्वा च शूलपाणिं वृषध्वजम्
सर्वपापविशुद्धात्मा गच्छेत परमां गतिम्
Tatra snatvarchayitva cha shulapanim vrishadhvajam
Sarvapapavishuddhatma gachchheta paramam gatim
81.72
ततो गच्छेत राजेन्द्र फलकीवनमुत्तमम्
यत्र देवाः सदा राजन्फलकीवनमाश्रिताः
तपश्चरन्ति विपुलं बहुवर्षसहस्रकम्
Tato gachchheta rajendra phalakivanamuttamam
Yatra devah sada rajanphalakivanamashritah
Tapashcharanti vipulam bahuvarshasahasrakam
81.73
दृषद्वत्यां नरः स्नात्वा तर्पयित्वा च देवताः
अग्निष्टोमातिरात्राभ्यां फलं विन्दति भारत
Drishadvatyam narah snatva tarpayitva cha devatah
Agnishtomatiratrabhyam phalam vindati bharata
81.74
तीर्थे च सर्वदेवानां स्नात्वा भरतसत्तम
गोसहस्रस्य राजेन्द्र फलं प्राप्नोति मानवः
Tirthe cha sarvadevanam snatva bharatasattama
Gosahasrasya rajendra phalam prapnoti manavah
81.75
पाणिखाते नरः स्नात्वा तर्पयित्वा च देवताः
राजसूयमवाप्नोति ऋषिलोकं च गच्छति
Panikhate narah snatva tarpayitva cha devatah
Rajasuyamavapnoti rishilokam cha gachchhati
81.76
ततो गच्छेत राजेन्द्र मिश्रकं तीर्थमुत्तमम्
तत्र तीर्थानि राजेन्द्र मिश्रितानि महात्मना
Tato gachchheta rajendra mishrakam tirthamuttamam
Tatra tirthani rajendra mishritani mahatmana
81.77
व्यासेन नृपशार्दूल द्विजार्थमिति नः श्रुतम्
सर्वतीर्थेषु स स्नाति मिश्रके स्नाति यो नरः
Vyasena nripashardula dvijarthamiti nah shrutam
Sarvatirtheshu sa snati mishrake snati yo narah
81.78
ततो व्यासवनं गच्छेन्नियतो नियताशनः
मनोजवे नरः स्नात्वा गोसहस्रफलं लभेत्
Tato vyasavanam gachchhenniyato niyatashanah
Manojave narah snatva gosahasraphalam labhet
81.79
गत्वा मधुवटीं चापि देव्यास्तीर्थं नरः शुचिः
तत्र स्नात्वार्चयेद्देवान्पितॄंश्च प्रयतः शुचिः
स देव्या समनुज्ञातो गोसहस्रफलं लभेत्
Gatva madhuvatim chapi devyastirtham narah shuchih
Tatra snatvarchayeddevanpitrinshcha prayatah shuchih
Sa devya samanugyato gosahasraphalam labhet
81.80
कौशिक्याः संगमे यस्तु दृषद्वत्याश्च भारत
स्नाति वै नियताहारः सर्वपापैः प्रमुच्यते
Kaushikyah sangame yastu drishadvatyashcha bharata
Snati vai niyataharah sarvapapaih pramuchyate
81.81
ततो व्यासस्थली नाम यत्र व्यासेन धीमता
पुत्रशोकाभितप्तेन देहत्यागार्थनिश्चयः
Tato vyasasthali nama yatra vyasena dhimata
Putrashokabhitaptena dehatyagarthanishchayah
81.82
कृतो देवैश्च राजेन्द्र पुनरुत्थापितस्तदा
अभिगम्य स्थलीं तस्य गोसहस्रफलं लभेत्
Krito devaishcha rajendra punarutthapitastada
Abhigamya sthalim tasya gosahasraphalam labhet
81.83
किंदत्तं कूपमासाद्य तिलप्रस्थं प्रदाय च
गच्छेत परमां सिद्धिमृणैर्मुक्तः कुरूद्वह
Kindattam kupamasadya tilaprastham pradaya cha
Gachchheta paramam siddhimrinairmuktah kurudvaha
81.84
अहश्च सुदिनं चैव द्वे तीर्थे च सुदुर्लभे
तयोः स्नात्वा नरव्याघ्र सूर्यलोकमवाप्नुयात्
Ahashcha sudinam chaiva dve tirthe cha sudurlabhe
Tayoh snatva naravyaghra suryalokamavapnuyat
81.85
मृगधूमं ततो गच्छेत्त्रिषु लोकेषु विश्रुतम्
तत्र गङ्गाह्रदे स्नात्वा समभ्यर्च्य च मानवः
शूलपाणिं महादेवमश्वमेधफलं लभेत्
Mrigadhumam tato gachchhettrishu lokeshu vishrutam
Tatra gangahrade snatva samabhyarchya cha manavah
Shulapanim mahadevamashvamedhaphalam labhet
81.86
देवतीर्थे नरः स्नात्वा गोसहस्रफलं लभेत्
अथ वामनकं गच्छेत्त्रिषु लोकेषु विश्रुतम्
Devatirthe narah snatva gosahasraphalam labhet
Atha vamanakam gachchhettrishu lokeshu vishrutam
81.87
तत्र विष्णुपदे स्नात्वा अर्चयित्वा च वामनम्
सर्वपापविशुद्धात्मा विष्णुलोकमवाप्नुयात्
Tatra vishnupade snatva archayitva cha vamanam
Sarvapapavishuddhatma vishnulokamavapnuyat
81.88
कुलंपुने नरः स्नात्वा पुनाति स्वकुलं नरः
पवनस्य ह्रदं गत्वा मरुतां तीर्थमुत्तमम्
तत्र स्नात्वा नरव्याघ्र वायुलोके महीयते
Kulampune narah snatva punati svakulam narah
Pavanasya hradam gatva marutam tirthamuttamam
Tatra snatva naravyaghra vayuloke mahiyate
81.89
अमराणां ह्रदे स्नात्वा अमरेषु नराधिप
अमराणां प्रभावेन स्वर्गलोके महीयते
Amaranam hrade snatva amareshu naradhipa
Amaranam prabhavena svargaloke mahiyate
81.90
शालिहोत्रस्य राजेन्द्र शालिशूर्पे यथाविधि
स्नात्वा नरवरश्रेष्ठ गोसहस्रफलं लभेत्
Shalihotrasya rajendra shalishurpe yathavidhi
Snatva naravarashreshtha gosahasraphalam labhet
81.91
श्रीकुञ्जं च सरस्वत्यां तीर्थं भरतसत्तम
तत्र स्नात्वा नरो राजन्नग्निष्टोमफलं लभेत्
Shrikunjam cha sarasvatyam tirtham bharatasattama
Tatra snatva naro rajannagnishtomaphalam labhet
81.92
ततो नैमिषकुञ्जं च समासाद्य कुरूद्वह
ऋषयः किल राजेन्द्र नैमिषेयास्तपोधनाः
तीर्थयात्रां पुरस्कृत्य कुरुक्षेत्रं गताः पुरा
Tato naimishakunjam cha samasadya kurudvaha
Rishayah kila rajendra naimisheyastapodhanah
Tirthayatram puraskritya kurukshetram gatah pura
81.93
ततः कुञ्जः सरस्वत्यां कृतो भरतसत्तम
ऋषीणामवकाशः स्याद्यथा तुष्टिकरो महान्
Tatah kunjah sarasvatyam krito bharatasattama
Rishinamavakashah syadyatha tushtikaro mahan
81.94
तस्मिन्कुञ्जे नरः स्नात्वा गोसहस्रफलं लभेत्
कन्यातीर्थे नरः स्नात्वा अग्निष्टोमफलं लभेत्
Tasminkunje narah snatva gosahasraphalam labhet
Kanyatirthe narah snatva agnishtomaphalam labhet
81.95
ततो गच्छेन्नरव्याघ्र ब्रह्मणः स्थानमुत्तमम्
तत्र वर्णावरः स्नात्वा ब्राह्मण्यं लभते नरः
ब्राह्मणश्च विशुद्धात्मा गच्छेत परमां गतिम्
Tato gachchhennaravyaghra brahmanah sthanamuttamam
Tatra varnavarah snatva brahmanyam labhate narah
Brahmanashcha vishuddhatma gachchheta paramam gatim
81.96
ततो गच्छेन्नरश्रेष्ठ सोमतीर्थमनुत्तमम्
तत्र स्नात्वा नरो राजन्सोमलोकमवाप्नुयात्
Tato gachchhennarashreshtha somatirthamanuttamam
Tatra snatva naro rajansomalokamavapnuyat
81.97
सप्तसारस्वतं तीर्थं ततो गच्छेन्नराधिप
यत्र मङ्कणकः सिद्धो महर्षिर्लोकविश्रुतः
Saptasarasvatam tirtham tato gachchhennaradhipa
Yatra mankanakah siddho maharshirlokavishrutah
81.98
पुरा मङ्कणको राजन्कुशाग्रेणेति नः श्रुतम्
क्षतः किल करे राजंस्तस्य शाकरसोऽस्रवत्
Pura mankanako rajankushagreneti nah shrutam
Kshatah kila kare rajanstasya shakarasosravat
81.99
स वै शाकरसं दृष्ट्वा हर्षाविष्टो महातपाः
प्रनृत्तः किल विप्रर्षिर्विस्मयोत्फुल्ललोचनः
Sa vai shakarasam drishtva harshavishto mahatapah
Pranrittah kila viprarshirvismayotphullalochanah
81.100
ततस्तस्मिन्प्रनृत्ते वै स्थावरं जङ्गमं च यत्
प्रनृत्तमुभयं वीर तेजसा तस्य मोहितम्
Tatastasminpranritte vai sthavaram jangamam cha yat
Pranrittamubhayam vira tejasa tasya mohitam
81.101
ब्रह्मादिभिः सुरै राजन्नृषिभिश्च तपोधनैः
विज्ञप्तो वै महादेव ऋषेरर्थे नराधिप
नायं नृत्येद्यथा देव तथा त्वं कर्तुमर्हसि
Brahmadibhih surai rajannrishibhishcha tapodhanaih
Vigyapto vai mahadeva risherarthe naradhipa
Nayam nrityedyatha deva tatha tvam kartumarhasi
81.102
ततः प्रनृत्तमासाद्य हर्षाविष्टेन चेतसा
सुराणां हितकामार्थमृषिं देवोऽभ्यभाषत
Tatah pranrittamasadya harshavishtena chetasa
Suranam hitakamarthamrishim devobhyabhashata
81.103
अहो महर्षे धर्मज्ञ किमर्थं नृत्यते भवान्
हर्षस्थानं किमर्थं वा तवाद्य मुनिपुंगव
Aho maharshe dharmagya kimartham nrityate bhavan
Harshasthanam kimartham va tavadya munipungava
81.104
ऋषिरुवाच
किं न पश्यसि मे देव कराच्छाकरसं स्रुतम्
यं दृष्ट्वाहं प्रनृत्तो वै हर्षेण महतान्वितः
Rishiruvacha
Kim na pashyasi me deva karachchhakarasam srutam
Yam drishtvaham pranritto vai harshena mahatanvitah
81.105
पुलस्त्य उवाच
तं प्रहस्याब्रवीद्देवो मुनिं रागेण मोहितम्
अहं वै विस्मयं विप्र न गच्छामीति पश्य माम्
Pulastya uvacha
Tam prahasyabraviddevo munim ragena mohitam
Aham vai vismayam vipra na gachchhamiti pashya mam
81.106
एवमुक्त्वा नरश्रेष्ठ महादेवेन धीमता
अङ्गुल्यग्रेण राजेन्द्र स्वाङ्गुष्ठस्ताडितोऽनघ
Evamuktva narashreshtha mahadevena dhimata
Angulyagrena rajendra svangushthastaditonagha
81.107
ततो भस्म क्षताद्राजन्निर्गतं हिमसंनिभम्
तद्दृष्ट्वा व्रीडितो राजन्स मुनिः पादयोर्गतः
Tato bhasma kshatadrajannirgatam himasannibham
Taddrishtva vridito rajansa munih padayorgatah
81.108
नान्यं देवमहं मन्ये रुद्रात्परतरं महत्
सुरासुरस्य जगतो गतिस्त्वमसि शूलधृक्
Nanyam devamaham manye rudratparataram mahat
Surasurasya jagato gatistvamasi shuladhrik
81.109
त्वया सृष्टमिदं विश्वं त्रैलोक्यं सचराचरम्
त्वामेव भगवन्सर्वे प्रविशन्ति युगक्षये
Tvaya srishtamidam vishvam trailokyam sacharacharam
Tvameva bhagavansarve pravishanti yugakshaye
81.110
देवैरपि न शक्यस्त्वं परिज्ञातुं कुतो मया
त्वयि सर्वे च दृश्यन्ते सुरा ब्रह्मादयोऽनघ
Devairapi na shakyastvam parigyatum kuto maya
Tvayi sarve cha drishyante sura brahmadayonagha
81.111
सर्वस्त्वमसि लोकानां कर्ता कारयिता च ह
त्वत्प्रसादात्सुराः सर्वे मोदन्तीहाकुतोभयाः
एवं स्तुत्वा महादेवं स ऋषिः प्रणतोऽभवत्
Sarvastvamasi lokanam karta karayita cha ha
Tvatprasadatsurah sarve modantihakutobhayah
Evam stutva mahadevam sa rishih pranatobhavat
81.112
ऋषिरुवाच
त्वत्प्रसादान्महादेव तपो मे न क्षरेत वै
Rishiruvacha
Tvatprasadanmahadeva tapo me na kshareta vai
81.113
पुलस्त्य उवाच
ततो देवः प्रहृष्टात्मा ब्रह्मर्षिमिदमब्रवीत्
तपस्ते वर्धतां विप्र मत्प्रसादात्सहस्रधा
Pulastya uvacha
Tato devah prahrishtatma brahmarshimidamabravit
Tapaste vardhatam vipra matprasadatsahasradha
81.114
आश्रमे चेह वत्स्यामि त्वया सार्धं महामुने
सप्तसारस्वते स्नात्वा अर्चयिष्यन्ति ये तु माम्
Ashrame cheha vatsyami tvaya sardham mahamune
Saptasarasvate snatva archayishyanti ye tu mam
81.115
न तेषां दुर्लभं किंचिदिह लोके परत्र च
सारस्वतं च ते लोकं गमिष्यन्ति न संशयः
Na tesham durlabham kinchidiha loke paratra cha
Sarasvatam cha te lokam gamishyanti na sanshayah
81.116
ततस्त्वौशनसं गच्छेत्त्रिषु लोकेषु विश्रुतम्
यत्र ब्रह्मादयो देवा ऋषयश्च तपोधनाः
Tatastvaushanasam gachchhettrishu lokeshu vishrutam
Yatra brahmadayo deva rishayashcha tapodhanah
81.117
कार्त्तिकेयश्च भगवांस्त्रिसंध्यं किल भारत
सांनिध्यमकरोत्तत्र भार्गवप्रियकाम्यया
Karttikeyashcha bhagavanstrisandhyam kila bharata
Sannidhyamakarottatra bhargavapriyakamyaya
81.118
कपालमोचनं तीर्थं सर्वपापप्रमोचनम्
तत्र स्नात्वा नरव्याघ्र सर्वपापैः प्रमुच्यते
Kapalamochanam tirtham sarvapapapramochanam
Tatra snatva naravyaghra sarvapapaih pramuchyate
81.119
अग्नितीर्थं ततो गच्छेत्तत्र स्नात्वा नरर्षभ
अग्निलोकमवाप्नोति कुलं चैव समुद्धरेत्
Agnitirtham tato gachchhettatra snatva nararshabha
Agnilokamavapnoti kulam chaiva samuddharet
81.120
विश्वामित्रस्य तत्रैव तीर्थं भरतसत्तम
तत्र स्नात्वा महाराज ब्राह्मण्यमभिजायते
Vishvamitrasya tatraiva tirtham bharatasattama
Tatra snatva maharaja brahmanyamabhijayate
81.121
ब्रह्मयोनिं समासाद्य शुचिः प्रयतमानसः
तत्र स्नात्वा नरव्याघ्र ब्रह्मलोकं प्रपद्यते
पुनात्यासप्तमं चैव कुलं नास्त्यत्र संशयः
Brahmayonim samasadya shuchih prayatamanasah
Tatra snatva naravyaghra brahmalokam prapadyate
Punatyasaptamam chaiva kulam nastyatra sanshayah
81.122
ततो गच्छेत राजेन्द्र तीर्थं त्रैलोक्यविश्रुतम्
पृथूदकमिति ख्यातं कार्त्तिकेयस्य वै नृप
तत्राभिषेकं कुर्वीत पितृदेवार्चने रतः
Tato gachchheta rajendra tirtham trailokyavishrutam
Prithudakamiti khyatam karttikeyasya vai nripa
Tatrabhishekam kurvita pitridevarchane ratah
81.123
अज्ञानाज्ज्ञानतो वापि स्त्रिया वा पुरुषेण वा
यत्किंचिदशुभं कर्म कृतं मानुषबुद्धिना
Agyanajgyanato vapi striya va purushena va
Yatkinchidashubham karma kritam manushabuddhina
81.124
तत्सर्वं नश्यते तस्य स्नातमात्रस्य भारत
अश्वमेधफलं चापि स्वर्गलोकं च गच्छति
Tatsarvam nashyate tasya snatamatrasya bharata
Ashvamedhaphalam chapi svargalokam cha gachchhati
81.125
पुण्यमाहुः कुरुक्षेत्रं कुरुक्षेत्रात्सरस्वतीम्
सरस्वत्याश्च तीर्थानि तीर्थेभ्यश्च पृथूदकम्
Punyamahuh kurukshetram kurukshetratsarasvatim
Sarasvatyashcha tirthani tirthebhyashcha prithudakam
81.126
उत्तमे सर्वतीर्थानां यस्त्यजेदात्मनस्तनुम्
पृथूदके जप्यपरो नैनं श्वोमरणं तपेत्
Uttame sarvatirthanam yastyajedatmanastanum
Prithudake japyaparo nainam shvomaranam tapet
81.127
गीतं सनत्कुमारेण व्यासेन च महात्मना
वेदे च नियतं राजनभिगच्छेत्पृथूदकम्
Gitam sanatkumarena vyasena cha mahatmana
Vede cha niyatam rajanabhigachchhetprithudakam
81.128
पृथूदकात्पुण्यतमं नान्यत्तीर्थं नरोत्तम
एतन्मेध्यं पवित्रं च पावनं च न संशयः
Prithudakatpunyatamam nanyattirtham narottama
Etanmedhyam pavitram cha pavanam cha na sanshayah
81.129
तत्र स्नात्वा दिवं यान्ति अपि पापकृतो जनाः
पृथूदके नरश्रेष्ठ प्राहुरेवं मनीषिणः
Tatra snatva divam yanti api papakrito janah
Prithudake narashreshtha prahurevam manishinah
81.130
मधुस्रवं च तत्रैव तीर्थं भरतसत्तम
तत्र स्नात्वा नरो राजन्गोसहस्रफलं लभेत्
Madhusravam cha tatraiva tirtham bharatasattama
Tatra snatva naro rajangosahasraphalam labhet
81.131
ततो गच्छेन्नरश्रेष्ठ तीर्थं देव्या यथाक्रमम्
सरस्वत्यारुणायाश्च संगमं लोकविश्रुतम्
Tato gachchhennarashreshtha tirtham devya yathakramam
Sarasvatyarunayashcha sangamam lokavishrutam
81.132
त्रिरात्रोपोषितः स्नात्वा मुच्यते ब्रह्महत्यया
अग्निष्टोमातिरात्राभ्यां फलं विन्दति मानवः
Triratroposhitah snatva muchyate brahmahatyaya
Agnishtomatiratrabhyam phalam vindati manavah
81.133
आसप्तमं कुलं चैव पुनाति भरतर्षभ
अवतीर्णं च तत्रैव तीर्थं कुरुकुलोद्वह
विप्राणामनुकम्पार्थं दर्भिणा निर्मितं पुरा
Asaptamam kulam chaiva punati bharatarshabha
Avatirnam cha tatraiva tirtham kurukulodvaha
Vipranamanukampartham darbhina nirmitam pura
81.134
व्रतोपनयनाभ्यां वा उपवासेन वा द्विजः
क्रियामन्त्रैश्च संयुक्तो ब्राह्मणः स्यान्न संशयः
Vratopanayanabhyam va upavasena va dvijah
Kriyamantraishcha sanyukto brahmanah syanna sanshayah
81.135
क्रियामन्त्रविहीनोऽपि तत्र स्नात्वा नरर्षभ
चीर्णव्रतो भवेद्विप्रो दृष्टमेतत्पुरातने
Kriyamantravihinopi tatra snatva nararshabha
Chirnavrato bhavedvipro drishtametatpuratane
81.136
समुद्राश्चापि चत्वारः समानीताश्च दर्भिणा
येषु स्नातो नरव्याघ्र न दुर्गतिमवाप्नुयात्
फलानि गोसहस्राणां चतुर्णां विन्दते च सः
Samudrashchapi chatvarah samanitashcha darbhina
Yeshu snato naravyaghra na durgatimavapnuyat
Phalani gosahasranam chaturnam vindate cha sah
81.137
ततो गच्छेत राजेन्द्र तीर्थं शतसहस्रकम्
साहस्रकं च तत्रैव द्वे तीर्थे लोकविश्रुते
Tato gachchheta rajendra tirtham shatasahasrakam
Sahasrakam cha tatraiva dve tirthe lokavishrute
81.138
उभयोर्हि नरः स्नात्वा गोसहस्रफलं लभेत्
दानं वाप्युपवासो वा सहस्रगुणितं भवेत्
Ubhayorhi narah snatva gosahasraphalam labhet
Danam vapyupavaso va sahasragunitam bhavet
81.139
ततो गच्छेत राजेन्द्र रेणुकातीर्थमुत्तमम्
तत्राभिषेकं कुर्वीत पितृदेवार्चने रतः
सर्वपापविशुद्धात्मा अग्निष्टोमफलं लभेत्
Tato gachchheta rajendra renukatirthamuttamam
Tatrabhishekam kurvita pitridevarchane ratah
Sarvapapavishuddhatma agnishtomaphalam labhet
81.140
विमोचनमुपस्पृश्य जितमन्युर्जितेन्द्रियः
प्रतिग्रहकृतैर्दोषैः सर्वैः स परिमुच्यते
Vimochanamupasprishya jitamanyurjitendriyah
Pratigrahakritairdoshaih sarvaih sa parimuchyate
81.141
ततः पञ्चवटं गत्वा ब्रह्मचारी जितेन्द्रियः
पुण्येन महता युक्तः सतां लोके महीयते
Tatah panchavatam gatva brahmachari jitendriyah
Punyena mahata yuktah satam loke mahiyate
81.142
यत्र योगेश्वरः स्थाणुः स्वयमेव वृषध्वजः
तमर्चयित्वा देवेशं गमनादेव सिध्यति
Yatra yogeshvarah sthanuh svayameva vrishadhvajah
Tamarchayitva devesham gamanadeva sidhyati
81.143
औजसं वरुणं तीर्थं दीप्यते स्वेन तेजसा
यत्र ब्रह्मादिभिर्देवैरृषिभिश्च तपोधनैः
सेनापत्येन देवानामभिषिक्तो गुहस्तदा
Aujasam varunam tirtham dipyate svena tejasa
Yatra brahmadibhirdevairrishibhishcha tapodhanaih
Senapatyena devanamabhishikto guhastada
81.144
औजसस्य तु पूर्वेण कुरुतीर्थं कुरूद्वह
कुरुतीर्थे नरः स्नात्वा ब्रह्मचारी जितेन्द्रियः
सर्वपापविशुद्धात्मा कुरुलोकं प्रपद्यते
Aujasasya tu purvena kurutirtham kurudvaha
Kurutirthe narah snatva brahmachari jitendriyah
Sarvapapavishuddhatma kurulokam prapadyate
81.145
स्वर्गद्वारं ततो गच्छेन्नियतो नियताशनः
स्वर्गलोकमवाप्नोति ब्रह्मलोकं च गच्छति
Svargadvaram tato gachchhenniyato niyatashanah
Svargalokamavapnoti brahmalokam cha gachchhati
81.146
ततो गच्छेदनरकं तीर्थसेवी नराधिप
तत्र स्नात्वा नरो राजन्न दुर्गतिमवाप्नुयात्
Tato gachchhedanarakam tirthasevi naradhipa
Tatra snatva naro rajanna durgatimavapnuyat
81.147
तत्र ब्रह्मा स्वयं नित्यं देवैः सह महीपते
अन्वास्यते नरश्रेष्ठ नारायणपुरोगमैः
Tatra brahma svayam nityam devaih saha mahipate
Anvasyate narashreshtha narayanapurogamaih
81.148
सांनिध्यं चैव राजेन्द्र रुद्रपत्न्याः कुरूद्वह
अभिगम्य च तां देवीं न दुर्गतिमवाप्नुयात्
Sannidhyam chaiva rajendra rudrapatnyah kurudvaha
Abhigamya cha tam devim na durgatimavapnuyat
81.149
तत्रैव च महाराज विश्वेश्वरमुमापतिम्
अभिगम्य महादेवं मुच्यते सर्वकिल्बिषैः
Tatraiva cha maharaja vishveshvaramumapatim
Abhigamya mahadevam muchyate sarvakilbishaih
81.150
नारायणं चाभिगम्य पद्मनाभमरिंदमम्
शोभमानो महाराज विष्णुलोकं प्रपद्यते
Narayanam chabhigamya padmanabhamarindamam
Shobhamano maharaja vishnulokam prapadyate
81.151
तीर्थे तु सर्वदेवानां स्नातः स पुरुषर्षभ
सर्वदुःखैः परित्यक्तो द्योतते शशिवत्सदा
Tirthe tu sarvadevanam snatah sa purusharshabha
Sarvaduhkhaih parityakto dyotate shashivatsada
81.152
ततः स्वस्तिपुरं गच्छेत्तीर्थसेवी नराधिप
पावनं तीर्थमासाद्य तर्पयेत्पितृदेवताः
अग्निष्टोमस्य यज्ञस्य फलं प्राप्नोति मानवः
Tatah svastipuram gachchhettirthasevi naradhipa
Pavanam tirthamasadya tarpayetpitridevatah
Agnishtomasya yagyasya phalam prapnoti manavah
81.153
गङ्गाह्रदश्च तत्रैव कूपश्च भरतर्षभ
तिस्रः कोट्यस्तु तीर्थानां तस्मिन्कूपे महीपते
तत्र स्नात्वा नरो राजन्स्वर्गलोकं प्रपद्यते
Gangahradashcha tatraiva kupashcha bharatarshabha
Tisrah kotyastu tirthanam tasminkupe mahipate
Tatra snatva naro rajansvargalokam prapadyate
81.154
आपगायां नरः स्नात्वा अर्चयित्वा महेश्वरम्
गाणपत्यमवाप्नोति कुलं चोद्धरते स्वकम्
Apagayam narah snatva archayitva maheshvaram
Ganapatyamavapnoti kulam choddharate svakam
81.155
ततः स्थाणुवटं गच्छेत्त्रिषु लोकेषु विश्रुतम्
तत्र स्नात्वा स्थितो रात्रिं रुद्रलोकमवाप्नुयात्
Tatah sthanuvatam gachchhettrishu lokeshu vishrutam
Tatra snatva sthito ratrim rudralokamavapnuyat
81.156
बदरीपाचनं गच्छेद्वसिष्ठस्याश्रमं ततः
बदरं भक्षयेत्तत्र त्रिरात्रोपोषितो नरः
Badaripachanam gachchhedvasishthasyashramam tatah
Badaram bhakshayettatra triratroposhito narah
81.157
सम्यग्द्वादश वर्षाणि बदरान्भक्षयेत्तु यः
त्रिरात्रोपोषितश्चैव भवेत्तुल्यो नराधिप
Samyagdvadasha varshani badaranbhakshayettu yah
Triratroposhitashchaiva bhavettulyo naradhipa
81.158
इन्द्रमार्गं समासाद्य तीर्थसेवी नराधिप
अहोरात्रोपवासेन शक्रलोके महीयते
Indramargam samasadya tirthasevi naradhipa
Ahoratropavasena shakraloke mahiyate
81.159
एकरात्रं समासाद्य एकरात्रोषितो नरः
नियतः सत्यवादी च ब्रह्मलोके महीयते
Ekaratram samasadya ekaratroshito narah
Niyatah satyavadi cha brahmaloke mahiyate
81.160
ततो गच्छेत धर्मज्ञ तीर्थं त्रैलोक्यविश्रुतम्
आदित्यस्याश्रमो यत्र तेजोराशेर्महात्मनः
Tato gachchheta dharmagya tirtham trailokyavishrutam
Adityasyashramo yatra tejorashermahatmanah
81.161
तस्मिंस्तीर्थे नरः स्नात्वा पूजयित्वा विभावसुम्
आदित्यलोकं व्रजति कुलं चैव समुद्धरेत्
Tasminstirthe narah snatva pujayitva vibhavasum
Adityalokam vrajati kulam chaiva samuddharet
81.162
सोमतीर्थे नरः स्नात्वा तीर्थसेवी कुरूद्वह
सोमलोकमवाप्नोति नरो नास्त्यत्र संशयः
Somatirthe narah snatva tirthasevi kurudvaha
Somalokamavapnoti naro nastyatra sanshayah
81.163
ततो गच्छेत धर्मज्ञ दधीचस्य महात्मनः
तीर्थं पुण्यतमं राजन्पावनं लोकविश्रुतम्
Tato gachchheta dharmagya dadhichasya mahatmanah
Tirtham punyatamam rajanpavanam lokavishrutam
81.164
यत्र सारस्वतो राजन्सोऽङ्गिरास्तपसो निधिः
तस्मिंस्तीर्थे नरः स्नात्वा वाजपेयफलं लभेत्
सारस्वतीं गतिं चैव लभते नात्र संशयः
Yatra sarasvato rajansongirastapaso nidhih
Tasminstirthe narah snatva vajapeyaphalam labhet
Sarasvatim gatim chaiva labhate natra sanshayah
81.165
ततः कन्याश्रमं गच्छेन्नियतो ब्रह्मचर्यवान्
त्रिरात्रोपोषितो राजन्नुपवासपरायणः
लभेत्कन्याशतं दिव्यं ब्रह्मलोकं च गच्छति
Tatah kanyashramam gachchhenniyato brahmacharyavan
Triratroposhito rajannupavasaparayanah
Labhetkanyashatam divyam brahmalokam cha gachchhati
81.166
ततो गच्छेत धर्मज्ञ तीर्थं संनिहितीमपि
यत्र ब्रह्मादयो देवा ऋषयश्च तपोधनाः
मासि मासि समायान्ति पुण्येन महतान्विताः
Tato gachchheta dharmagya tirtham sannihitimapi
Yatra brahmadayo deva rishayashcha tapodhanah
Masi masi samayanti punyena mahatanvitah
81.167
संनिहित्यामुपस्पृश्य राहुग्रस्ते दिवाकरे
अश्वमेधशतं तेन इष्टं भवति शाश्वतम्
Sannihityamupasprishya rahugraste divakare
Ashvamedhashatam tena ishtam bhavati shashvatam
81.168
पृथिव्यां यानि तीर्थानि अन्तरिक्षचराणि च
नद्यो नदास्तडागाश्च सर्वप्रस्रवणानि च
Prithivyam yani tirthani antarikshacharani cha
Nadyo nadastadagashcha sarvaprasravanani cha
81.169
उदपानाश्च वप्राश्च पुण्यान्यायतनानि च
मासि मासि समायान्ति संनिहित्यां न संशयः
Udapanashcha vaprashcha punyanyayatanani cha
Masi masi samayanti sannihityam na sanshayah
81.170
यत्किंचिद्दुष्कृतं कर्म स्त्रिया वा पुरुषस्य वा
स्नातमात्रस्य तत्सर्वं नश्यते नात्र संशयः
पद्मवर्णेन यानेन ब्रह्मलोकं स गच्छति
Yatkinchiddushkritam karma striya va purushasya va
Snatamatrasya tatsarvam nashyate natra sanshayah
Padmavarnena yanena brahmalokam sa gachchhati
81.171
अभिवाद्य ततो यक्षं द्वारपालमरन्तुकम्
कोटिरूपमुपस्पृश्य लभेद्बहु सुवर्णकम्
Abhivadya tato yaksham dvarapalamarantukam
Kotirupamupasprishya labhedbahu suvarnakam
81.172
गङ्गाह्रदश्च तत्रैव तीर्थं भरतसत्तम
तत्र स्नातस्तु धर्मज्ञ ब्रह्मचारी समाहितः
राजसूयाश्वमेधाभ्यां फलं विन्दति शाश्वतम्
Gangahradashcha tatraiva tirtham bharatasattama
Tatra snatastu dharmagya brahmachari samahitah
Rajasuyashvamedhabhyam phalam vindati shashvatam
81.173
पृथिव्यां नैमिषं पुण्यमन्तरिक्षे च पुष्करम्
त्रयाणामपि लोकानां कुरुक्षेत्रं विशिष्यते
Prithivyam naimisham punyamantarikshe cha pushkaram
Trayanamapi lokanam kurukshetram vishishyate
81.174
पांसवोऽपि कुरुक्षेत्रे वायुना समुदीरिताः
अपि दुष्कृतकर्माणं नयन्ति परमां गतिम्
Pansavopi kurukshetre vayuna samudiritah
Api dushkritakarmanam nayanti paramam gatim
81.175
दक्षिणेन सरस्वत्या उत्तरेण दृषद्वतीम्
ये वसन्ति कुरुक्षेत्रे ते वसन्ति त्रिविष्टपे
Dakshinena sarasvatya uttarena drishadvatim
Ye vasanti kurukshetre te vasanti trivishtape
81.176
कुरुक्षेत्रं गमिष्यामि कुरुक्षेत्रे वसाम्यहम्
अप्येकां वाचमुत्सृज्य सर्वपापैः प्रमुच्यते
Kurukshetram gamishyami kurukshetre vasamyaham
Apyekam vachamutsrijya sarvapapaih pramuchyate
81.177
ब्रह्मवेदी कुरुक्षेत्रं पुण्यं ब्रह्मर्षिसेवितम्
तदावसन्ति ये राजन्न ते शोच्याः कथंचन
Brahmavedi kurukshetram punyam brahmarshisevitam
Tadavasanti ye rajanna te shochyah kathanchana
81.178
तरन्तुकारन्तुकयोर्यदन्तरं; रामह्रदानां च मचक्रुकस्य
एतत्कुरुक्षेत्रसमन्तपञ्चकं; पितामहस्योत्तरवेदिरुच्यते
Tarantukarantukayoryadantaram; ramahradanam cha machakrukasya
Etatkurukshetrasamantapanchakam; pitamahasyottaravediruchyate