Utshovঅধ্যায় 80
80.1
বৈশংপায়ন উবাচ
ধনংজয়োত্সুকাস্তে তু বনে তস্মিন্মহারথাঃ
ন্যবসন্ত মহাভাগা দ্রৌপদ্যা সহ পাণ্ডবাঃ
80.2
অথাপশ্যন্মহাত্মানং দেবর্ষিং তত্র নারদম্
দীপ্যমানং শ্রিয়া ব্রাহ্ম্যা দীপ্তাগ্নিসমতেজসম্
80.3
স তৈঃ পরিবৃতঃ শ্রীমান্ভ্রাতৃভিঃ কুরুসত্তমঃ
বিবভাবতিদীপ্তৌজা দেবৈরিব শতক্রতুঃ
80.4
যথা চ বেদান্সাবিত্রী যাজ্ঞসেনী তথা সতী
ন জহৌ ধর্মতঃ পার্থান্মেরুমর্কপ্রভা যথা
80.5
প্রতিগৃহ্য তু তাং পূজাং নারদো ভগবানৃষিঃ
আশ্বাসয়দ্ধর্মসুতং যুক্তরূপমিবানঘ
80.6
উবাচ চ মহাত্মানং ধর্মরাজং যুধিষ্ঠিরম্
ব্রূহি ধর্মভৃতাং শ্রেষ্ঠ কেনার্থঃ কিং দদামি তে
80.7
অথ ধর্মসুতো রাজা প্রণম্য ভ্রাতৃভিঃ সহ
উবাচ প্রাঞ্জলির্বাক্যং নারদং দেবসংমিতম্
80.8
ত্বয়ি তুষ্টে মহাভাগ সর্বলোকাভিপূজিতে
কৃতমিত্যেব মন্যেঽহং প্রসাদাত্তব সুব্রত
80.9
যদি ত্বহমনুগ্রাহ্যো ভ্রাতৃভিঃ সহিতোঽনঘ
সংদেহং মে মুনিশ্রেষ্ঠ হৃদিস্থং ছেত্তুমর্হসি
80.10
প্রদক্ষিণং যঃ কুরুতে পৃথিবীং তীর্থতত্পরঃ
কিং ফলং তস্য কার্ত্স্ন্যেন তদ্ব্রহ্মন্বক্তুমর্হসি
80.11
নারদ উবাচ
শৃণু রাজন্নবহিতো যথা ভীষ্মেণ ভারত
পুলস্ত্যস্য সকাশাদ্বৈ সর্বমেতদুপশ্রুতম্
80.12
পুরা ভাগীরথীতীরে ভীষ্মো ধর্মভৃতাং বরঃ
পিত্র্যং ব্রতং সমাস্থায় ন্যবসন্মুনিবত্তদা
80.13
শুভে দেশে মহারাজ পুণ্যে দেবর্ষিসেবিতে
গঙ্গাদ্বারে মহাতেজা দেবগন্ধর্বসেবিতে
80.14
স পিতৄংস্তর্পয়ামাস দেবাংশ্চ পরমদ্যুতিঃ
ঋষীংশ্চ তোষয়ামাস বিধিদৃষ্টেন কর্মণা
80.15
কস্যচিত্ত্বথ কালস্য জপন্নেব মহাতপাঃ
দদর্শাদ্ভুতসংকাশং পুলস্ত্যমৃষিসত্তমম্
80.16
স তং দৃষ্ট্বোগ্রতপসং দীপ্যমানমিব শ্রিয়া
প্রহর্ষমতুলং লেভে বিস্ময়ং চ পরং যয়ৌ
80.17
উপস্থিতং মহারাজ পূজয়ামাস ভারত
ভীষ্মো ধর্মভৃতাং শ্রেষ্ঠো বিধিদৃষ্টেন কর্মণা
80.18
শিরসা চার্ঘ্যমাদায় শুচিঃ প্রয়তমানসঃ
নাম সংকীর্তয়ামাস তস্মিন্ব্রহ্মর্ষিসত্তমে
80.19
ভীষ্মোঽহমস্মি ভদ্রং তে দাসোঽস্মি তব সুব্রত
তব সংদর্শনাদেব মুক্তোঽহং সর্বকিল্বিষৈঃ
80.20
এবমুক্ত্বা মহারাজ ভীষ্মো ধর্মভৃতাং বরঃ
বাগ্যতঃ প্রাঞ্জলির্ভূত্বা তূষ্ণীমাসীদ্যুধিষ্ঠির
80.21
তং দৃষ্ট্বা নিয়মেনাথ স্বাধ্যায়াম্নায়কর্শিতম্
ভীষ্মং কুরুকুলশ্রেষ্ঠং মুনিঃ প্রীতমনাভবৎ
80.22
পুলস্ত্য উবাচ
অনেন তব ধর্মজ্ঞ প্রশ্রয়েণ দমেন চ
সত্যেন চ মহাভাগ তুষ্টোঽস্মি তব সর্বশঃ
80.23
যস্যেদৃশস্তে ধর্মোঽয়ং পিতৃভক্ত্যাশ্রিতোঽনঘ
তেন পশ্যসি মাং পুত্র প্রীতিশ্চাপি মম ত্বয়ি
80.24
অমোঘদর্শী ভীষ্মাহং ব্রূহি কিং করবাণি তে
যদ্বক্ষ্যসি কুরুশ্রেষ্ঠ তস্য দাতাস্মি তেঽনঘ
80.25
ভীষ্ম উবাচ
প্রীতে ত্বয়ি মহাভাগ সর্বলোকাভিপূজিতে
কৃতমিত্যেব মন্যেঽহং যদহং দৃষ্টবান্প্রভুম্
80.26
যদি ত্বহমনুগ্রাহ্যস্তব ধর্মভৃতাং বর
বক্ষ্যামি হৃত্স্থং সংদেহং তন্মে ত্বং বক্তুমর্হসি
80.27
অস্তি মে ভগবন্কশ্চিত্তীর্থেভ্যো ধর্মসংশয়ঃ
তমহং শ্রোতুমিচ্ছামি পৃথক্সংকীর্তিতং ত্বয়া
80.28
প্রদক্ষিণং যঃ পৃথিবীং করোত্যমিতবিক্রম
কিং ফলং তস্য বিপ্রর্ষে তন্মে ব্রূহি তপোধন
80.29
পুলস্ত্য উবাচ
হন্ত তেঽহং প্রবক্ষ্যামি যদৃষীণাং পরায়ণম্
তদেকাগ্রমনাস্তাত শৃণু তীর্থেষু যত্ফলম্
80.30
যস্য হস্তৌ চ পাদৌ চ মনশ্চৈব সুসংয়তম্
বিদ্যা তপশ্চ কীর্তিশ্চ স তীর্থফলমশ্নুতে
80.31
প্রতিগ্রহাদুপাবৃত্তঃ সংতুষ্টো নিয়তঃ শুচিঃ
অহংকারনিবৃত্তশ্চ স তীর্থফলমশ্নুতে
80.32
অকল্ককো নিরারম্ভো লঘ্বাহারো জিতেন্দ্রিয়ঃ
বিমুক্তঃ সর্বদোষৈর্যঃ স তীর্থফলমশ্নুতে
80.33
অক্রোধনশ্চ রাজেন্দ্র সত্যশীলো দৃঢব্রতঃ
আত্মোপমশ্চ ভূতেষু স তীর্থফলমশ্নুতে
80.34
ঋষিভিঃ ক্রতবঃ প্রোক্তা বেদেষ্বিহ যথাক্রমম্
ফলং চৈব যথাতত্ত্বং প্রেত্য চেহ চ সর্বশঃ
80.35
ন তে শক্যা দরিদ্রেণ যজ্ঞাঃ প্রাপ্তুং মহীপতে
বহূপকরণা যজ্ঞা নানাসংভারবিস্তরাঃ
80.36
প্রাপ্যন্তে পার্থিবৈরেতে সমৃদ্ধৈর্বা নরৈঃ ক্বচিৎ
নার্থন্যূনোপকরণৈরেকাত্মভিরসংহতৈঃ
80.37
যো দরিদ্রৈরপি বিধিঃ শক্যঃ প্রাপ্তুং নরেশ্বর
তুল্যো যজ্ঞফলৈঃ পুণ্যৈস্তং নিবোধ যুধাং বর
80.38
ঋষীণাং পরমং গুহ্যমিদং ভরতসত্তম
তীর্থাভিগমনং পুণ্যং যজ্ঞৈরপি বিশিষ্যতে
80.39
অনুপোষ্য ত্রিরাত্রাণি তীর্থান্যনভিগম্য চ
অদত্ত্বা কাঞ্চনং গাশ্চ দরিদ্রো নাম জায়তে
80.40
অগ্নিষ্টোমাদিভির্যজ্ঞৈরিষ্ট্বা বিপুলদক্ষিণৈঃ
ন তত্ফলমবাপ্নোতি তীর্থাভিগমনেন যৎ
80.41
নৃলোকে দেবদেবস্য তীর্থং ত্রৈলোক্যবিশ্রুতম্
পুষ্করং নাম বিখ্যাতং মহাভাগঃ সমাবিশেৎ
80.42
দশ কোটিসহস্রাণি তীর্থানাং বৈ মহীপতে
সাংনিধ্যং পুষ্করে যেষাং ত্রিসংধ্যং কুরুনন্দন
80.43
আদিত্যা বসবো রুদ্রাঃ সাধ্যাশ্চ সমরুদ্গণাঃ
গন্ধর্বাপ্সরসশ্চৈব নিত্যং সংনিহিতা বিভো
80.44
যত্র দেবাস্তপস্তপ্ত্বা দৈত্যা ব্রহ্মর্ষয়স্তথা
দিব্যয়োগা মহারাজ পুণ্যেন মহতান্বিতাঃ
80.45
মনসাপ্যভিকামস্য পুষ্করাণি মনস্বিনঃ
পূয়ন্তে সর্বপাপানি নাকপৃষ্ঠে চ পূজ্যতে
80.46
তস্মিংস্তীর্থে মহাভাগ নিত্যমেব পিতামহঃ
উবাস পরমপ্রীতো দেবদানবসংমতঃ
80.47
পুষ্করেষু মহাভাগ দেবাঃ সর্ষিপুরোগমাঃ
সিদ্ধিং সমভিসংপ্রাপ্তাঃ পুণ্যেন মহতান্বিতাঃ
80.48
তত্রাভিষেকং যঃ কুর্যাত্পিতৃদেবার্চনে রতঃ
অশ্বমেধং দশগুণং প্রবদন্তি মনীষিণঃ
80.49
অপ্যেকং ভোজয়েদ্বিপ্রং পুষ্করারণ্যমাশ্রিতঃ
তেনাসৌ কর্মণা ভীষ্ম প্রেত্য চেহ চ মোদতে
80.50
শাকমূলফলৈর্বাপি যেন বর্তয়তে স্বয়ম্
তদ্বৈ দদ্যাদ্ব্রাহ্মণায় শ্রদ্ধাবাননসূয়কঃ
তেনৈব প্রাপ্নুয়াত্প্রাজ্ঞো হয়মেধফলং নরঃ
80.51
ব্রাহ্মণঃ ক্ষত্রিয়ো বৈশ্যঃ শূদ্রো বা রাজসত্তম
ন বিয়োনিং ব্রজন্ত্যেতে স্নাতাস্তীর্থে মহাত্মনঃ
80.52
কার্ত্তিক্যাং তু বিশেষেণ যোঽভিগচ্ছেত পুষ্করম্
ফলং তত্রাক্ষয়ং তস্য বর্ধতে ভরতর্ষভ
80.53
সায়ং প্রাতঃ স্মরেদ্যস্তু পুষ্করাণি কৃতাঞ্জলিঃ
উপস্পৃষ্টং ভবেত্তেন সর্বতীর্থেষু ভারত
প্রাপ্নুয়াচ্চ নরো লোকান্ব্রহ্মণঃ সদনেঽক্ষয়ান্
80.54
জন্মপ্রভৃতি যত্পাপং স্ত্রিয়ো বা পুরুষস্য বা
পুষ্করে স্নাতমাত্রস্য সর্বমেব প্রণশ্যতি
80.55
যথা সুরাণাং সর্বেষামাদিস্তু মধুসূদনঃ
তথৈব পুষ্করং রাজংস্তীর্থানামাদিরুচ্যতে
80.56
উষ্য দ্বাদশ বর্ষাণি পুষ্করে নিয়তঃ শুচিঃ
ক্রতূন্সর্বানবাপ্নোতি ব্রহ্মলোকং চ গচ্ছতি
80.57
যস্তু বর্ষশতং পূর্ণমগ্নিহোত্রমুপাসতে
কার্ত্তিকীং বা বসেদেকাং পুষ্করে সমমেব তৎ
80.58
দুষ্করং পুষ্করং গন্তুং দুষ্করং পুষ্করে তপঃ
দুষ্করং পুষ্করে দানং বস্তুং চৈব সুদুষ্করম্
80.59
উষ্য দ্বাদশরাত্রং তু নিয়তো নিয়তাশনঃ
প্রদক্ষিণমুপাবৃত্তো জম্বূমার্গং সমাবিশেৎ
80.60
জম্বূমার্গং সমাবিশ্য দেবর্ষিপিতৃসেবিতম্
অশ্বমেধমবাপ্নোতি বিষ্ণুলোকং চ গচ্ছতি
80.61
তত্রোষ্য রজনীঃ পঞ্চ ষষ্ঠকালক্ষমী নরঃ
ন দুর্গতিমবাপ্নোতি সিদ্ধিং প্রাপ্নোতি চোত্তমাম্
80.62
জম্বূমার্গাদুপাবৃত্তো গচ্ছেত্তণ্ডুলিকাশ্রমম্
ন দুর্গতিমবাপ্নোতি স্বর্গলোকে চ পূজ্যতে
80.63
অগস্ত্যসর আসাদ্য পিতৃদেবার্চনে রতঃ
ত্রিরাত্রোপোষিতো রাজন্নগ্নিষ্টোমফলং লভেৎ
80.64
শাকবৃত্তিঃ ফলৈর্বাপি কৌমারং বিন্দতে পদম্
কণ্বাশ্রমং সমাসাদ্য শ্রীজুষ্টং লোকপূজিতম্
80.65
ধর্মারণ্যং হি তত্পুণ্যমাদ্যং চ ভরতর্ষভ
যত্র প্রবিষ্টমাত্রো বৈ পাপেভ্যো বিপ্রমুচ্যতে
80.66
অর্চয়িত্বা পিতৄন্দেবান্নিয়তো নিয়তাশনঃ
সর্বকামসমৃদ্ধস্য যজ্ঞস্য ফলমশ্নুতে
80.67
প্রদক্ষিণং ততঃ কৃত্বা যয়াতিপতনং ব্রজেৎ
হয়মেধস্য যজ্ঞস্য ফলং প্রাপ্নোতি তত্র বৈ
80.68
মহাকালং ততো গচ্ছেন্নিয়তো নিয়তাশনঃ
কোটিতীর্থমুপস্পৃশ্য হয়মেধফলং লভেৎ
80.69
ততো গচ্ছেত ধর্মজ্ঞ পুণ্যস্থানমুমাপতেঃ
নাম্না ভদ্রবটং নাম ত্রিষু লোকেষু বিশ্রুতম্
80.70
তত্রাভিগম্য চেশানং গোসহস্রফলং লভেৎ
মহাদেবপ্রসাদাচ্চ গাণপত্যমবাপ্নুয়াৎ
80.71
নর্মদামথ চাসাদ্য নদীং ত্রৈলোক্যবিশ্রুতাম্
তর্পয়িত্বা পিতৄন্দেবানগ্নিষ্টোমফলং লভেৎ
80.72
দক্ষিণং সিন্ধুমাসাদ্য ব্রহ্মচারী জিতেন্দ্রিয়ঃ
অগ্নিষ্টোমমবাপ্নোতি বিমানং চাধিরোহতি
80.73
চর্মণ্বতীং সমাসাদ্য নিয়তো নিয়তাশনঃ
রন্তিদেবাভ্যনুজ্ঞাতো অগ্নিষ্টোমফলং লভেৎ
80.74
ততো গচ্ছেত ধর্মজ্ঞ হিমবত্সুতমর্বুদম্
পৃথিব্যাং যত্র বৈ ছিদ্রং পূর্বমাসীদ্যুধিষ্ঠির
80.75
তত্রাশ্রমো বসিষ্ঠস্য ত্রিষু লোকেষু বিশ্রুতঃ
তত্রোষ্য রজনীমেকাং গোসহস্রফলং লভেৎ
80.76
পিঙ্গাতীর্থমুপস্পৃশ্য ব্রহ্মচারী জিতেন্দ্রিয়ঃ
কপিলানাং নরব্যাঘ্র শতস্য ফলমশ্নুতে
80.77
ততো গচ্ছেত ধর্মজ্ঞ প্রভাসং লোকবিশ্রুতম্
যত্র সংনিহিতো নিত্যং স্বয়মেব হুতাশনঃ
দেবতানাং মুখং বীর অনলোঽনিলসারথিঃ
80.78
তস্মিংস্তীর্থবরে স্নাত্বা শুচিঃ প্রয়তমানসঃ
অগ্নিষ্টোমাতিরাত্রাভ্যাং ফলং প্রাপ্নোতি মানবঃ
80.79
ততো গত্বা সরস্বত্যাঃ সাগরস্য চ সংগমে
গোসহস্রফলং প্রাপ্য স্বর্গলোকে মহীয়তে
দীপ্যমানোঽগ্নিবন্নিত্যং প্রভয়া ভরতর্ষভ
80.80
ত্রিরাত্রমুষিতস্তত্র তর্পয়েত্পিতৃদেবতাঃ
প্রভাসতে যথা সোমো অশ্বমেধং চ বিন্দতি
80.81
বরদানং ততো গচ্ছেত্তীর্থং ভরতসত্তম
বিষ্ণোর্দুর্বাসসা যত্র বরো দত্তো যুধিষ্ঠির
80.82
বরদানে নরঃ স্নাত্বা গোসহস্রফলং লভেৎ
ততো দ্বারবতীং গচ্ছেন্নিয়তো নিয়তাশনঃ
পিণ্ডারকে নরঃ স্নাত্বা লভেদ্বহু সুবর্ণকম্
80.83
তস্মিংস্তীর্থে মহাভাগ পদ্মলক্ষণলক্ষিতাঃ
অদ্যাপি মুদ্রা দৃশ্যন্তে তদদ্ভুতমরিংদম
80.84
ত্রিশূলাঙ্কানি পদ্মানি দৃশ্যন্তে কুরুনন্দন
মহাদেবস্য সাংনিধ্যং তত্রৈব ভরতর্ষভ
80.85
সাগরস্য চ সিন্ধোশ্চ সংগমং প্রাপ্য ভারত
তীর্থে সলিলরাজস্য স্নাত্বা প্রয়তমানসঃ
80.86
তর্পয়িত্বা পিতৄন্দেবানৃষীংশ্চ ভরতর্ষভ
প্রাপ্নোতি বারুণং লোকং দীপ্যমানঃ স্বতেজসা
80.87
শঙ্কুকর্ণেশ্বরং দেবমর্চয়িত্বা যুধিষ্ঠির
অশ্বমেধং দশগুণং প্রবদন্তি মনীষিণঃ
80.88
প্রদক্ষিণমুপাবৃত্য গচ্ছেত ভরতর্ষভ
তীর্থং কুরুবরশ্রেষ্ঠ ত্রিষু লোকেষু বিশ্রুতম্
দৃমীতি নাম্না বিখ্যাতং সর্বপাপপ্রমোচনম্
80.89
যত্র ব্রহ্মাদয়ো দেবা উপাসন্তে মহেশ্বরম্
তত্র স্নাত্বার্চয়িত্বা চ রুদ্রং দেবগণৈর্বৃতম্
জন্মপ্রভৃতি পাপানি কৃতানি নুদতে নরঃ
80.90
দৃমী চাত্র নরশ্রেষ্ঠ সর্বদেবৈরভিষ্টুতা
তত্র স্নাত্বা নরব্যাঘ্র হয়মেধমবাপ্নুয়াৎ
80.91
জিত্বা যত্র মহাপ্রাজ্ঞ বিষ্ণুনা প্রভবিষ্ণুনা
পুরা শৌচং কৃতং রাজন্হত্বা দৈবতকণ্টকান্
80.92
ততো গচ্ছেত ধর্মজ্ঞ বসোর্ধারামভিষ্টুতাম্
গমনাদেব তস্যাং হি হয়মেধমবাপ্নুয়াৎ
80.93
স্নাত্বা কুরুবরশ্রেষ্ঠ প্রয়তাত্মা তু মানবঃ
তর্প্য দেবান্পিতৄংশ্চৈব বিষ্ণুলোকে মহীয়তে
80.94
তীর্থং চাত্র পরং পুণ্যং বসূনাং ভরতর্ষভ
তত্র স্নাত্বা চ পীত্বা চ বসূনাং সংমতো ভবেৎ
80.95
সিন্ধূত্তমমিতি খ্যাতং সর্বপাপপ্রণাশনম্
তত্র স্নাত্বা নরশ্রেষ্ঠ লভেদ্বহু সুবর্ণকম্
80.96
ব্রহ্মতুঙ্গং সমাসাদ্য শুচিঃ প্রয়তমানসঃ
ব্রহ্মলোকমবাপ্নোতি সুকৃতী বিরজা নরঃ
80.97
কুমারিকাণাং শক্রস্য তীর্থং সিদ্ধনিষেবিতম্
তত্র স্নাত্বা নরঃ ক্ষিপ্রং শক্রলোকমবাপ্নুয়াৎ
80.98
রেণুকায়াশ্চ তত্রৈব তীর্থং দেবনিষেবিতম্
তত্র স্নাত্বা ভবেদ্বিপ্রো বিমলশ্চন্দ্রমা যথা
80.99
অথ পঞ্চনদং গত্বা নিয়তো নিয়তাশনঃ
পঞ্চ যজ্ঞানবাপ্নোতি ক্রমশো যেঽনুকীর্তিতাঃ
80.100
ততো গচ্ছেত ধর্মজ্ঞ ভীমায়াঃ স্থানমুত্তমম্
তত্র স্নাত্বা তু যোন্যাং বৈ নরো ভরতসত্তম
80.101
দেব্যাঃ পুত্রো ভবেদ্রাজংস্তপ্তকুণ্ডলবিগ্রহঃ
গবাং শতসহস্রস্য ফলং চৈবাপ্নুয়ান্মহৎ
80.102
গিরিমুঞ্জং সমাসাদ্য ত্রিষু লোকেষু বিশ্রুতম্
পিতামহং নমস্কৃত্য গোসহস্রফলং লভেৎ
80.103
ততো গচ্ছেত ধর্মজ্ঞ বিমলং তীর্থমুত্তমম্
অদ্যাপি যত্র দৃশ্যন্তে মত্স্যাঃ সৌবর্ণরাজতাঃ
80.104
তত্র স্নাত্বা নরশ্রেষ্ঠ বাজপেয়মবাপ্নুয়াৎ
সর্বপাপবিশুদ্ধাত্মা গচ্ছেচ্চ পরমাং গতিম্
80.105
ততো গচ্ছেত মলদাং ত্রিষু লোকেষু বিশ্রুতাম্
পশ্চিমায়াং তু সংধ্যায়ামুপস্পৃশ্য যথাবিধি
80.106
চরুং নরেন্দ্র সপ্তার্চের্যথাশক্তি নিবেদয়েৎ
পিতৄণামক্ষয়ং দানং প্রবদন্তি মনীষিণঃ
80.107
গবাং শতসহস্রেণ রাজসূয়শতেন চ
অশ্বমেধসহস্রেণ শ্রেয়ান্সপ্তার্চিষশ্চরুঃ
80.108
ততো নিবৃত্তো রাজেন্দ্র বস্ত্রাপদমথাবিশেৎ
অভিগম্য মহাদেবমশ্বমেধফলং লভেৎ
80.109
মণিমন্তং সমাসাদ্য ব্রহ্মচারী সমাহিতঃ
একরাত্রোষিতো রাজন্নগ্নিষ্টোমফলং লভেৎ
80.110
অথ গচ্ছেত রাজেন্দ্র দেবিকাং লোকবিশ্রুতাম্
প্রসূতির্যত্র বিপ্রাণাং শ্রূয়তে ভরতর্ষভ
80.111
ত্রিশূলপাণেঃ স্থানং চ ত্রিষু লোকেষু বিশ্রুতম্
দেবিকায়াং নরঃ স্নাত্বা সমভ্যর্চ্য মহেশ্বরম্
80.112
যথাশক্তি চরুং তত্র নিবেদ্য ভরতর্ষভ
সর্বকামসমৃদ্ধস্য যজ্ঞস্য লভতে ফলম্
80.113
কামাখ্যং তত্র রুদ্রস্য তীর্থং দেবর্ষিসেবিতম্
তত্র স্নাত্বা নরঃ ক্ষিপ্রং সিদ্ধিমাপ্নোতি ভারত
80.114
যজনং যাজনং গত্বা তথৈব ব্রহ্মবালুকাম্
পুষ্পন্যাস উপস্পৃশ্য ন শোচেন্মরণং ততঃ
80.115
অর্ধয়োজনবিস্তারাং পঞ্চয়োজনমায়তাম্
এতাবদ্দেবিকামাহুঃ পুণ্যাং দেবর্ষিসেবিতাম্
80.116
ততো গচ্ছেত ধর্মজ্ঞ দীর্ঘসত্রং যথাক্রমম্
যত্র ব্রহ্মাদয়ো দেবাঃ সিদ্ধাশ্চ পরমর্ষয়ঃ
দীর্ঘসত্রমুপাসন্তে দক্ষিণাভির্যতব্রতাঃ
80.117
গমনাদেব রাজেন্দ্র দীর্ঘসত্রমরিংদম
রাজসূয়াশ্বমেধাভ্যাং ফলং প্রাপ্নোতি মানবঃ
80.118
ততো বিনশনং গচ্ছেন্নিয়তো নিয়তাশনঃ
গচ্ছত্যন্তর্হিতা যত্র মরুপৃষ্ঠে সরস্বতী
চমসে চ শিবোদ্ভেদে নাগোদ্ভেদে চ দৃশ্যতে
80.119
স্নাত্বা চ চমসোদ্ভেদে অগ্নিষ্টোমফলং লভেৎ
শিবোদ্ভেদে নরঃ স্নাত্বা গোসহস্রফলং লভেৎ
80.120
নাগোদ্ভেদে নরঃ স্নাত্বা নাগলোকমবাপ্নুয়াৎ
শশয়ানং চ রাজেন্দ্র তীর্থমাসাদ্য দুর্লভম্
শশরূপপ্রতিচ্ছন্নাঃ পুষ্করা যত্র ভারত
80.121
সরস্বত্যাং মহারাজ অনু সংবত্সরং হি তে
স্নায়ন্তে ভরতশ্রেষ্ঠ বৃত্তাং বৈ কার্ত্তিকীং সদা
80.122
তত্র স্নাত্বা নরব্যাঘ্র দ্যোততে শশিবত্সদা
গোসহস্রফলং চৈব প্রাপ্নুয়াদ্ভরতর্ষভ
80.123
কুমারকোটিমাসাদ্য নিয়তঃ কুরুনন্দন
তত্রাভিষেকং কুর্বীত পিতৃদেবার্চনে রতঃ
গবাময়মবাপ্নোতি কুলং চৈব সমুদ্ধরেৎ
80.124
ততো গচ্ছেত ধর্মজ্ঞ রুদ্রকোটিং সমাহিতঃ
পুরা যত্র মহারাজ ঋষিকোটিঃ সমাহিতা
প্রহর্ষেণ চ সংবিষ্টা দেবদর্শনকাঙ্ক্ষয়া
80.125
অহং পূর্বমহং পূর্বং দ্রক্ষ্যামি বৃষভধ্বজম্
এবং সংপ্রস্থিতা রাজন্নৃষয়ঃ কিল ভারত
80.126
ততো যোগেশ্বরেণাপি যোগমাস্থায় ভূপতে
তেষাং মন্যুপ্রণাশার্থমৃষীণাং ভাবিতাত্মনাম্
80.127
সৃষ্টা কোটিস্তু রুদ্রাণামৃষীণামগ্রতঃ স্থিতা
ময়া পূর্বতরং দৃষ্ট ইতি তে মেনিরে পৃথক্
80.128
তেষাং তুষ্টো মহাদেব ঋষীণামুগ্রতেজসাম্
ভক্ত্যা পরময়া রাজন্বরং তেষাং প্রদিষ্টবান্
অদ্য প্রভৃতি যুষ্মাকং ধর্মবৃদ্ধির্ভবিষ্যতি
80.129
তত্র স্নাত্বা নরব্যাঘ্র রুদ্রকোট্যাং নরঃ শুচিঃ
অশ্বমেধমবাপ্নোতি কুলং চৈব সমুদ্ধরেৎ
80.130
ততো গচ্ছেত রাজেন্দ্র সংগমং লোকবিশ্রুতম্
সরস্বত্যা মহাপুণ্যমুপাসন্তে জনার্দনম্
80.131
যত্র ব্রহ্মাদয়ো দেবা ঋষয়ঃ সিদ্ধচারণাঃ
অভিগচ্ছন্তি রাজেন্দ্র চৈত্রশুক্লচতুর্দশীম্
80.132
তত্র স্নাত্বা নরব্যাঘ্র বিন্দেদ্বহু সুবর্ণকম্
সর্বপাপবিশুদ্ধাত্মা ব্রহ্মলোকং চ গচ্ছতি
80.133
ঋষীণাং যত্র সত্রাণি সমাপ্তানি নরাধিপ
সত্রাবসানমাসাদ্য গোসহস্রফলং লভেৎ