Utshovঅধ্যায় 79
79.1
জনমেজয় উবাচ
ভগবন্কাম্যকাত্পার্থে গতে মে প্রপিতামহে
পাণ্ডবাঃ কিমকুর্বন্ত তমৃতে সব্যসাচিনম্
79.2
স হি তেষাং মহেষ্বাসো গতিরাসীদনীকজিৎ
আদিত্যানাং যথা বিষ্ণুস্তথৈব প্রতিভাতি মে
79.3
তেনেন্দ্রসমবীর্যেণ সংগ্রামেষ্বনিবর্তিনা
বিনাভূতা বনে বীরাঃ কথমাসন্পিতামহাঃ
79.4
বৈশংপায়ন উবাচ
গতে তু কাম্যকাত্তাত পাণ্ডবে সব্যসাচিনি
বভূবুঃ কৌরবেয়াস্তে দুঃখশোকপরায়ণাঃ
79.5
আক্ষিপ্তসূত্রা মণয়শ্ছিন্নপক্ষা ইব দ্বিজাঃ
অপ্রীতমনসঃ সর্বে বভূবুরথ পাণ্ডবাঃ
79.6
বনং চ তদভূত্তেন হীনমক্লিষ্টকর্মণা
কুবেরেণ যথা হীনং বনং চৈত্ররথং তথা
79.7
তমৃতে পুরুষব্যাঘ্রং পাণ্ডবা জনমেজয়
মুদমপ্রাপ্নুবন্তো বৈ কাম্যকে ন্যবসংস্তদা
79.8
ব্রাহ্মণার্থে পরাক্রান্তাঃ শুদ্ধৈর্বাণৈর্মহারথাঃ
নিঘ্নন্তো ভরতশ্রেষ্ঠ মেধ্যান্বহুবিধান্মৃগান্
79.9
নিত্যং হি পুরুষব্যাঘ্রা বন্যাহারমরিংদমাঃ
বিপ্রসৃত্য সমাহৃত্য ব্রাহ্মণেভ্যো ন্যবেদয়ন্
79.10
এবং তে ন্যবসংস্তত্র সোত্কণ্ঠাঃ পুরুষর্ষভাঃ
অহৃষ্টমনসঃ সর্বে গতে রাজন্ধনংজয়ে
79.11
অথ বিপ্রোষিতং বীরং পাঞ্চালী মধ্যমং পতিম্
স্মরন্তী পাণ্ডবশ্রেষ্ঠমিদং বচনমব্রবীৎ
79.12
যোঽর্জুনেনার্জুনস্তুল্যো দ্বিবাহুর্বহুবাহুনা
তমৃতে পাণ্ডবশ্রেষ্ঠং বনং ন প্রতিভাতি মে
শূন্যামিব চ পশ্যামি তত্র তত্র মহীমিমাম্
79.13
বহ্বাশ্চর্যমিদং চাপি বনং কুসুমিতদ্রুমম্
ন তথা রমণীয়ং মে তমৃতে সব্যসাচিনম্
79.14
নীলাম্বুদসমপ্রখ্যং মত্তমাতঙ্গবিক্রমম্
তমৃতে পুণ্ডরীকাক্ষং কাম্যকং নাতিভাতি মে
79.15
যস্য স্ম ধনুষো ঘোষঃ শ্রূয়তেঽশনিনিস্বনঃ
ন লভে শর্ম তং রাজন্স্মরন্তী সব্যসাচিনম্
79.16
তথা লালপ্যমানাং তাং নিশম্য পরবীরহা
ভীমসেনো মহারাজ দ্রৌপদীমিদমব্রবীৎ
79.17
মনঃপ্রীতিকরং ভদ্রে যদ্ব্রবীষি সুমধ্যমে
তন্মে প্রীণাতি হৃদয়মমৃতপ্রাশনোপমম্
79.18
যস্য দীর্ঘৌ সমৌ পীনৌ ভুজৌ পরিঘসংনিভৌ
মৌর্বীকৃতকিণৌ বৃত্তৌ খড্গায়ুধগদাধরৌ
79.19
নিষ্কাঙ্গদকৃতাপীডৌ পঞ্চশীর্ষাবিবোরগৌ
তমৃতে পুরুষব্যাঘ্রং নষ্টসূর্যমিদং বনম্
79.20
যমাশ্রিত্য মহাবাহুং পাঞ্চালাঃ কুরবস্তথা
সুরাণামপি যত্তানাং পৃতনাসু ন বিভ্যতি
79.21
যস্য বাহূ সমাশ্রিত্য বয়ং সর্বে মহাত্মনঃ
মন্যামহে জিতানাজৌ পরান্প্রাপ্তাং চ মেদিনীম্
79.22
তমৃতে ফল্গুনং বীরং ন লভে কাম্যকে ধৃতিম্
শূন্যামিব চ পশ্যামি তত্র তত্র মহীমিমাম্
79.23
নকুল উবাচ
য উদীচীং দিশং গত্বা জিত্বা যুধি মহাবলান্
গন্ধর্বমুখ্যাঞ্শতশো হয়াঁল্লেভে স বাসবিঃ
79.24
রাজংস্তিত্তিরিকল্মাষাঞ্শ্রীমাননিলরংহসঃ
প্রাদাদ্ভ্রাত্রে প্রিয়ঃ প্রেম্ণা রাজসূয়ে মহাক্রতৌ
79.25
তমৃতে ভীমধন্বানং ভীমাদবরজং বনে
কাময়ে কাম্যকে বাসং নেদানীমমরোপমম্
79.26
সহদেব উবাচ
যো ধনানি চ কন্যাশ্চ যুধি জিত্বা মহারথান্
আজহার পুরা রাজ্ঞে রাজসূয়ে মহাক্রতৌ
79.27
যঃ সমেতান্মৃধে জিত্বা যাদবানমিতদ্যুতিঃ
সুভদ্রামাজহারৈকো বাসুদেবস্য সংমতে
79.28
তস্য জিষ্ণোর্বৃসীং দৃষ্ট্বা শূন্যামুপনিবেশনে
হৃদয়ং মে মহারাজ ন শাম্যতি কদাচন
79.29
বনাদস্মাদ্বিবাসং তু রোচয়েঽহমরিংদম
ন হি নস্তমৃতে বীরং রমণীয়মিদং বনম্