অধ্যায় 78

78.1

বৃহদশ্ব উবাচ
প্রশান্তে তু পুরে হৃষ্টে সংপ্রবৃত্তে মহোত্সবে
মহত্যা সেনয়া রাজা দময়ন্তীমুপানয়ৎ

দময়ন্তীমপি পিতা সত্কৃত্য পরবীরহা
প্রস্থাপয়দমেয়াত্মা ভীমো ভীমপরাক্রমঃ

আগতায়াং তু বৈদর্ভ্যাং সপুত্রায়াং নলো নৃপঃ
বর্তয়ামাস মুদিতো দেবরাডিব নন্দনে

তথা প্রকাশতাং যাতো জম্বূদ্বীপেঽথ রাজসু
পুনঃ স্বে চাবসদ্রাজ্যে প্রত্যাহৃত্য মহায়শাঃ

ঈজে চ বিবিধৈর্যজ্ঞৈর্বিধিবত্স্বাপ্তদক্ষিণৈঃ
তথা ত্বমপি রাজেন্দ্র সসুহৃদ্বক্ষ্যসেঽচিরাৎ

দুঃখমেতাদৃশং প্রাপ্তো নলঃ পরপুরংজয়ঃ
দেবনেন নরশ্রেষ্ঠ সভার্যো ভরতর্ষভ

একাকিনৈব সুমহন্নলেন পৃথিবীপতে
দুঃখমাসাদিতং ঘোরং প্রাপ্তশ্চাভ্যুদয়ঃ পুনঃ

ত্বং পুনর্ভ্রাতৃসহিতঃ কৃষ্ণয়া চৈব পাণ্ডব
রমসেঽস্মিন্মহারণ্যে ধর্মমেবানুচিন্তয়ন্

ব্রাহ্মণৈশ্চ মহাভাগৈর্বেদবেদাঙ্গপারগৈঃ
নিত্যমন্বাস্যসে রাজংস্তত্র কা পরিদেবনা

ইতিহাসমিমং চাপি কলিনাশনমুচ্যতে
শক্যমাশ্বাসিতুং শ্রুত্বা ত্বদ্বিধেন বিশাং পতে

অস্থিরত্বং চ সংচিন্ত্য পুরুষার্থস্য নিত্যদা
তস্যায়ে চ ব্যয়ে চৈব সমাশ্বসিহি মা শুচঃ

যে চেদং কথয়িষ্যন্তি নলস্য চরিতং মহৎ
শ্রোষ্যন্তি চাপ্যভীক্ষ্ণং বৈ নালক্ষ্মীস্তান্ভজিষ্যতি
অর্থাস্তস্যোপপত্স্যন্তে ধন্যতাং চ গমিষ্যতি

ইতিহাসমিমং শ্রুত্বা পুরাণং শশ্বদুত্তমম্
পুত্রান্পৌত্রান্পশূংশ্চৈব বেত্স্যতে নৃষু চাগ্র্যতাম্
অরোগঃ প্রীতিমাংশ্চৈব ভবিষ্যতি ন সংশয়ঃ

ভয়ং পশ্যসি যচ্চ ত্বমাহ্বয়িষ্যতি মাং পুনঃ
অক্ষজ্ঞ ইতি তত্তেঽহং নাশয়িষ্যামি পার্থিব

বেদাক্ষহৃদয়ং কৃত্স্নমহং সত্যপরাক্রম
উপপদ্যস্ব কৌন্তেয় প্রসন্নোঽহং ব্রবীমি তে

বৈশংপায়ন উবাচ
ততো হৃষ্টমনা রাজা বৃহদশ্বমুবাচ হ
ভগবন্নক্ষহৃদয়ং জ্ঞাতুমিচ্ছামি তত্ত্বতঃ

ততোঽক্ষহৃদয়ং প্রাদাত্পাণ্ডবায় মহাত্মনে
দত্ত্বা চাশ্বশিরোঽগচ্ছদুপস্প্রষ্টুং মহাতপাঃ

বৃহদশ্বে গতে পার্থমশ্রৌষীত্সব্যসাচিনম্
বর্তমানং তপস্যুগ্রে বায়ুভক্ষং মনীষিণম্

ব্রাহ্মণেভ্যস্তপস্বিভ্যঃ সংপতদ্ভ্যস্ততস্ততঃ
তীর্থশৈলবরেভ্যশ্চ সমেতেভ্যো দৃঢব্রতঃ

ইতি পার্থো মহাবাহুর্দুরাপং তপ আস্থিতঃ
ন তথা দৃষ্টপূর্বোঽন্যঃ কশ্চিদুগ্রতপা ইতি

যথা ধনংজয়ঃ পার্থস্তপস্বী নিয়তব্রতঃ
মুনিরেকচরঃ শ্রীমান্ধর্মো বিগ্রহবানিব

তং শ্রুত্বা পাণ্ডবো রাজংস্তপ্যমানং মহাবনে
অন্বশোচত কৌন্তেয়ঃ প্রিয়ং বৈ ভ্রাতরং জয়ম্

দহ্যমানেন তু হৃদা শরণার্থী মহাবনে
ব্রাহ্মণান্বিবিধজ্ঞানান্পর্যপৃচ্ছদ্যুধিষ্ঠিরঃ