Utshovঅধ্যায় 77
77.1
বৃহদশ্ব উবাচ
স মাসমুষ্য কৌন্তেয় ভীমমামন্ত্র্য নৈষধঃ
পুরাদল্পপরীবারো জগাম নিষধান্প্রতি
77.2
রথেনৈকেন শুভ্রেণ দন্তিভিঃ পরিষোডশৈঃ
পঞ্চাশদ্ভির্হয়ৈশ্চৈব ষট্শতৈশ্চ পদাতিভিঃ
77.3
স কম্পয়ন্নিব মহীং ত্বরমাণো মহীপতিঃ
প্রবিবেশাতিসংরব্ধস্তরসৈব মহামনাঃ
77.4
ততঃ পুষ্করমাসাদ্য বীরসেনসুতো নলঃ
উবাচ দীব্যাব পুনর্বহু বিত্তং ময়ার্জিতম্
77.5
দময়ন্তী চ যচ্চান্যন্ময়া বসু সমর্জিতম্
এষ বৈ মম সংন্যাসস্তব রাজ্যং তু পুষ্কর
77.6
পুনঃ প্রবর্ততাং দ্যূতমিতি মে নিশ্চিতা মতিঃ
একপাণেন ভদ্রং তে প্রাণয়োশ্চ পণাবহে
77.7
জিত্বা পরস্বমাহৃত্য রাজ্যং বা যদি বা বসু
প্রতিপাণঃ প্রদাতব্যঃ পরং হি ধনমুচ্যতে
77.8
ন চেদ্বাঞ্ছসি তদ্দ্যূতং যুদ্ধদ্যূতং প্রবর্ততাম্
দ্বৈরথেনাস্তু বৈ শান্তিস্তব বা মম বা নৃপ
77.9
বংশভোজ্যমিদং রাজ্যং মার্গিতব্যং যথা তথা
যেন তেনাপ্যুপায়েন বৃদ্ধানামিতি শাসনম্
77.10
দ্বয়োরেকতরে বুদ্ধিঃ ক্রিয়তামদ্য পুষ্কর
কৈতবেনাক্ষবত্যাং বা যুদ্ধে বা নম্যতাং ধনুঃ
77.11
নৈষধেনৈবমুক্তস্তু পুষ্করঃ প্রহসন্নিব
ধ্রুবমাত্মজয়ং মত্বা প্রত্যাহ পৃথিবীপতিম্
77.12
দিষ্ট্যা ত্বয়ার্জিতং বিত্তং প্রতিপাণায় নৈষধ
দিষ্ট্যা চ দুষ্কৃতং কর্ম দময়ন্ত্যাঃ ক্ষয়ং গতম্
দিষ্ট্যা চ ধ্রিয়সে রাজন্সদারোঽরিনিবর্হণ
77.13
ধনেনানেন বৈদর্ভী জিতেন সমলংকৃতা
মামুপস্থাস্যতি ব্যক্তং দিবি শক্রমিবাপ্সরাঃ
77.14
নিত্যশো হি স্মরামি ত্বাং প্রতীক্ষামি চ নৈষধ
দেবনে চ মম প্রীতির্ন ভবত্যসুহৃদ্গণৈঃ
77.15
জিত্বা ত্বদ্য বরারোহাং দময়ন্তীমনিন্দিতাম্
কৃতকৃত্যো ভবিষ্যামি সা হি মে নিত্যশো হৃদি
77.16
শ্রুত্বা তু তস্য তা বাচো বহ্ববদ্ধপ্রলাপিনঃ
ইয়েষ স শিরশ্ছেত্তুং খড্গেন কুপিতো নলঃ
77.17
স্ময়ংস্তু রোষতাম্রাক্ষস্তমুবাচ ততো নৃপঃ
পণাবঃ কিং ব্যাহরসে জিত্বা বৈ ব্যাহরিষ্যসি
77.18
ততঃ প্রাবর্তত দ্যূতং পুষ্করস্য নলস্য চ
একপাণেন ভদ্রং তে নলেন স পরাজিতঃ
সরত্নকোশনিচয়ঃ প্রাণেন পণিতোঽপি চ
77.19
জিত্বা চ পুষ্করং রাজা প্রহসন্নিদমব্রবীৎ
মম সর্বমিদং রাজ্যমব্যগ্রং হতকণ্টকম্
77.20
বৈদর্ভী ন ত্বয়া শক্যা রাজাপসদ বীক্ষিতুম্
তস্যাস্ত্বং সপরীবারো মূঢ দাসত্বমাগতঃ
77.21
ন তত্ত্বয়া কৃতং কর্ম যেনাহং নির্জিতঃ পুরা
কলিনা তত্কৃতং কর্ম ত্বং তু মূঢ ন বুধ্যসে
নাহং পরকৃতং দোষং ত্বয্যাধাস্যে কথংচন
77.22
যথাসুখং ত্বং জীবস্ব প্রাণানভ্যুত্সৃজামি তে
তথৈব চ মম প্রীতিস্ত্বয়ি বীর ন সংশয়ঃ
77.23
সৌভ্রাত্রং চৈব মে ত্বত্তো ন কদাচিত্প্রহাস্যতি
পুষ্কর ত্বং হি মে ভ্রাতা সংজীবস্ব শতং সমাঃ
77.24
এবং নলঃ সান্ত্বয়িত্বা ভ্রাতরং সত্যবিক্রমঃ
স্বপুরং প্রেষয়ামাস পরিষ্বজ্য পুনঃ পুনঃ
77.25
সান্ত্বিতো নৈষধেনৈবং পুষ্করঃ প্রত্যুবাচ তম্
পুণ্যশ্লোকং তদা রাজন্নভিবাদ্য কৃতাঞ্জলিঃ
77.26
কীর্তিরস্তু তবাক্ষয্যা জীব বর্ষায়ুতং সুখী
যো মে বিতরসি প্রাণানধিষ্ঠানং চ পার্থিব
77.27
স তথা সত্কৃতো রাজ্ঞা মাসমুষ্য তদা নৃপঃ
প্রয়য়ৌ স্বপুরং হৃষ্টঃ পুষ্করঃ স্বজনাবৃতঃ
77.28
মহত্যা সেনয়া রাজন্বিনীতৈঃ পরিচারকৈঃ
ভ্রাজমান ইবাদিত্যো বপুষা পুরুষর্ষভ
77.29
প্রস্থাপ্য পুষ্করং রাজা বিত্তবন্তমনাময়ম্
প্রবিবেশ পুরং শ্রীমানত্যর্থমুপশোভিতম্
প্রবিশ্য সান্ত্বয়ামাস পৌরাংশ্চ নিষধাধিপঃ