অধ্যায় 76

76.1

বৃহদশ্ব উবাচ
অথ তাং ব্যুষিতো রাত্রিং নলো রাজা স্বলংকৃতঃ
বৈদর্ভ্যা সহিতঃ কাল্যং দদর্শ বসুধাধিপম্

ততোঽভিবাদয়ামাস প্রয়তঃ শ্বশুরং নলঃ
তস্যানু দময়ন্তী চ ববন্দে পিতরং শুভা

তং ভীমঃ প্রতিজগ্রাহ পুত্রবত্পরয়া মুদা
যথার্হং পূজয়িত্বা তু সমাশ্বাসয়ত প্রভুঃ
নলেন সহিতাং তত্র দময়ন্তীং পতিব্রতাম্

তামর্হণাং নলো রাজা প্রতিগৃহ্য যথাবিধি
পরিচর্যাং স্বকাং তস্মৈ যথাবত্প্রত্যবেদয়ৎ

ততো বভূব নগরে সুমহান্হর্ষনিস্বনঃ
জনস্য সংপ্রহৃষ্টস্য নলং দৃষ্ট্বা তথাগতম্

অশোভয়চ্চ নগরং পতাকাধ্বজমালিনম্
সিক্তসংমৃষ্টপুষ্পাঢ্যা রাজমার্গাঃ কৃতাস্তদা

দ্বারি দ্বারি চ পৌরাণাং পুষ্পভঙ্গঃ প্রকল্পিতঃ
অর্চিতানি চ সর্বাণি দেবতায়তনানি চ

ঋতুপর্ণোঽপি শুশ্রাব বাহুকচ্ছদ্মিনং নলম্
দময়ন্ত্যা সমায়ুক্তং জহৃষে চ নরাধিপঃ

তমানায্য নলো রাজা ক্ষময়ামাস পার্থিবম্
স চ তং ক্ষময়ামাস হেতুভির্বুদ্ধিসংমতঃ

স সত্কৃতো মহীপালো নৈষধং বিস্ময়ান্বিতঃ
দিষ্ট্যা সমেতো দারৈঃ স্বৈর্ভবানিত্যভ্যনন্দত

কচ্চিত্তু নাপরাধং তে কৃতবানস্মি নৈষধ
অজ্ঞাতবাসং বসতো মদ্গৃহে নিষধাধিপ

যদি বা বুদ্ধিপূর্বাণি যদ্যবুদ্ধানি কানিচিৎ
ময়া কৃতান্যকার্যাণি তানি মে ক্ষন্তুমর্হসি

নল উবাচ
ন মেঽপরাধং কৃতবাংস্ত্বং স্বল্পমপি পার্থিব
কৃতেঽপি চ ন মে কোপঃ ক্ষন্তব্যং হি ময়া তব

পূর্বং হ্যসি সখা মেঽসি সংবন্ধী চ নরাধিপ
অত ঊর্ধ্বং তু ভূয়স্ত্বং প্রীতিমাহর্তুমর্হসি

সর্বকামৈঃ সুবিহিতঃ সুখমস্ম্যুষিতস্ত্বয়ি
ন তথা স্বগৃহে রাজন্যথা তব গৃহে সদা

ইদং চৈব হয়জ্ঞানং ত্বদীয়ং ময়ি তিষ্ঠতি
তদুপাকর্তুমিচ্ছামি মন্যসে যদি পার্থিব

বৃহদশ্ব উবাচ
এবমুক্ত্বা দদৌ বিদ্যামৃতুপর্ণায় নৈষধঃ
স চ তাং প্রতিজগ্রাহ বিধিদৃষ্টেন কর্মণা

ততো গৃহ্যাশ্বহৃদয়ং তদা ভাঙ্গস্বরির্নৃপঃ
সূতমন্যমুপাদায় যয়ৌ স্বপুরমেব হি

ঋতুপর্ণে প্রতিগতে নলো রাজা বিশাং পতে
নগরে কুণ্ডিনে কালং নাতিদীর্ঘমিবাবসৎ