Utshovঅধ্যায় 75
75.1
দময়ন্ত্যুবাচ
ন মামর্হসি কল্যাণ পাপেন পরিশঙ্কিতুম্
ময়া হি দেবানুত্সৃজ্য বৃতস্ত্বং নিষধাধিপ
75.2
তবাভিগমনার্থং তু সর্বতো ব্রাহ্মণা গতাঃ
বাক্যানি মম গাথাভির্গায়মানা দিশো দশ
75.3
ততস্ত্বাং ব্রাহ্মণো বিদ্বান্পর্ণাদো নাম পার্থিব
অভ্যগচ্ছত্কোসলায়ামৃতুপর্ণনিবেশনে
75.4
তেন বাক্যে হৃতে সম্যক্প্রতিবাক্যে তথাহৃতে
উপায়োঽয়ং ময়া দৃষ্টো নৈষধানয়নে তব
75.5
ত্বামৃতে ন হি লোকেঽন্য একাহ্না পৃথিবীপতে
সমর্থো যোজনশতং গন্তুমশ্বৈর্নরাধিপ
75.6
তথা চেমৌ মহীপাল ভজেঽহং চরণৌ তব
যথা নাসত্কৃতং কিংচিন্মনসাপি চরাম্যহম্
75.7
অয়ং চরতি লোকেঽস্মিন্ভূতসাক্ষী সদাগতিঃ
এষ মুঞ্চতু মে প্রাণান্যদি পাপং চরাম্যহম্
75.8
তথা চরতি তিগ্মাংশুঃ পরেণ ভুবনং সদা
স বিমুঞ্চতু মে প্রাণান্যদি পাপং চরাম্যহম্
75.9
চন্দ্রমাঃ সর্বভূতানামন্তশ্চরতি সাক্ষিবৎ
স বিমুঞ্চতু মে প্রাণান্যদি পাপং চরাম্যহম্
75.10
এতে দেবাস্ত্রয়ঃ কৃত্স্নং ত্রৈলোক্যং ধারয়ন্তি বৈ
বিব্রুবন্তু যথাসত্যমেতে বাদ্য ত্যজন্তু মাম্
75.11
এবমুক্তে ততো বায়ুরন্তরিক্ষাদভাষত
নৈষা কৃতবতী পাপং নল সত্যং ব্রবীমি তে
75.12
রাজঞ্শীলনিধিঃ স্ফীতো দময়ন্ত্যা সুরক্ষিতঃ
সাক্ষিণো রক্ষিণশ্চাস্যা বয়ং ত্রীন্পরিবত্সরান্
75.13
উপায়ো বিহিতশ্চায়ং ত্বদর্থমতুলোঽনয়া
ন হ্যেকাহ্না শতং গন্তা ত্বদৃতেঽন্যঃ পুমানিহ
75.14
উপপন্না ত্বয়া ভৈমী ত্বং চ ভৈম্যা মহীপতে
নাত্র শঙ্কা ত্বয়া কার্যা সংগচ্ছ সহ ভার্যয়া
75.15
তথা ব্রুবতি বায়ৌ তু পুষ্পবৃষ্টিঃ পপাত হ
দেবদুন্দুভয়ো নেদুর্ববৌ চ পবনঃ শিবঃ
75.16
তদদ্ভুততমং দৃষ্ট্বা নলো রাজাথ ভারত
দময়ন্ত্যাং বিশঙ্কাং তাং ব্যপাকর্ষদরিংদমঃ
75.17
ততস্তদ্বস্ত্রমরজঃ প্রাবৃণোদ্বসুধাধিপঃ
সংস্মৃত্য নাগরাজানং ততো লেভে বপুঃ স্বকম্
75.18
স্বরূপিণং তু ভর্তারং দৃষ্ট্বা ভীমসুতা তদা
প্রাক্রোশদুচ্চৈরালিঙ্গ্য পুণ্যশ্লোকমনিন্দিতা
75.19
ভৈমীমপি নলো রাজা ভ্রাজমানো যথা পুরা
সস্বজে স্বসুতৌ চাপি যথাবত্প্রত্যনন্দত
75.20
ততঃ স্বোরসি বিন্যস্য বক্ত্রং তস্য শুভাননা
পরীতা তেন দুঃখেন নিশশ্বাসায়তেক্ষণা
75.21
তথৈব মলদিগ্ধাঙ্গী পরিষ্বজ্য শুচিস্মিতা
সুচিরং পুরুষব্যাঘ্রং তস্থৌ সাশ্রুপরিপ্লুতা
75.22
ততঃ সর্বং যথাবৃত্তং দময়ন্ত্যা নলস্য চ
ভীমায়াকথয়ত্প্রীত্যা বৈদর্ভ্যা জননী নৃপ
75.23
ততোঽব্রবীন্মহারাজঃ কৃতশৌচমহং নলম্
দময়ন্ত্যা সহোপেতং কাল্যং দ্রষ্টা সুখোষিতম্
75.24
ততস্তৌ সহিতৌ রাত্রিং কথয়ন্তৌ পুরাতনম্
বনে বিচরিতং সর্বমূষতুর্মুদিতৌ নৃপ
75.25
স চতুর্থে ততো বর্ষে সংগম্য সহ ভার্যয়া
সর্বকামৈঃ সুসিদ্ধার্থো লব্ধবান্পরমাং মুদম্
75.26
দময়ন্ত্যপি ভর্তারমবাপ্যাপ্যায়িতা ভৃশম্
অর্ধসংজাতসস্যেব তোয়ং প্রাপ্য বসুংধরা
75.27
সৈবং সমেত্য ব্যপনীততন্দ্রী; শান্তজ্বরা হর্ষবিবৃদ্ধসত্ত্বা
ররাজ ভৈমী সমবাপ্তকামা; শীতাংশুনা রাত্রিরিবোদিতেন