Utshovঅধ্যায় 74
74.1
বৃহদশ্ব উবাচ
সর্বং বিকারং দৃষ্ট্বা তু পুণ্যশ্লোকস্য ধীমতঃ
আগত্য কেশিনী ক্ষিপ্রং দময়ন্ত্যৈ ন্যবেদয়ৎ
74.2
দময়ন্তী ততো ভূয়ঃ প্রেষয়ামাস কেশিনীম্
মাতুঃ সকাশং দুঃখার্তা নলশঙ্কাসমুত্সুকা
74.3
পরীক্ষিতো মে বহুশো বাহুকো নলশঙ্কয়া
রূপে মে সংশয়স্ত্বেকঃ স্বয়মিচ্ছামি বেদিতুম্
74.4
স বা প্রবেশ্যতাং মাতর্মাং বানুজ্ঞাতুমর্হসি
বিদিতং বাথ বাজ্ঞাতং পিতুর্মে সংবিধীয়তাম্
74.5
এবমুক্তা তু বৈদর্ভ্যা সা দেবী ভীমমব্রবীৎ
দুহিতুস্তমভিপ্রায়মন্বজানাচ্চ পার্থিবঃ
74.6
সা বৈ পিত্রাভ্যনুজ্ঞাতা মাত্রা চ ভরতর্ষভ
নলং প্রবেশয়ামাস যত্র তস্যাঃ প্রতিশ্রয়ঃ
74.7
তং তু দৃষ্ট্বা তথায়ুক্তং দময়ন্তী নলং তদা
তীব্রশোকসমাবিষ্টা বভূব বরবর্ণিনী
74.8
ততঃ কাষায়বসনা জটিলা মলপঙ্কিনী
দময়ন্তী মহারাজ বাহুকং বাক্যমব্রবীৎ
74.9
দৃষ্টপূর্বস্ত্বয়া কশ্চিদ্ধর্মজ্ঞো নাম বাহুক
সুপ্তামুত্সৃজ্য বিপিনে গতো যঃ পুরুষঃ স্ত্রিয়ম্
74.10
অনাগসং প্রিয়াং ভার্যাং বিজনে শ্রমমোহিতাম্
অপহায় তু কো গচ্ছেত্পুণ্যশ্লোকমৃতে নলম্
74.11
কিং নু তস্য ময়া কার্যমপরাদ্ধং মহীপতেঃ
যো মামুত্সৃজ্য বিপিনে গতবান্নিদ্রয়া হৃতাম্
74.12
সাক্ষাদ্দেবানপাহায় বৃতো যঃ স ময়া পুরা
অনুব্রতাং সাভিকামাং পুত্রিণীং ত্যক্তবান্কথম্
74.13
অগ্নৌ পাণিগৃহীতাং চ হংসানাং বচনে স্থিতাম্
ভরিষ্যামীতি সত্যং চ প্রতিশ্রুত্য ক্ব তদ্গতম্
74.14
দময়ন্ত্যা ব্রুবন্ত্যাস্তু সর্বমেতদরিংদম
শোকজং বারি নেত্রাভ্যামসুখং প্রাস্রবদ্বহু
74.15
অতীব কৃষ্ণতারাভ্যাং রক্তান্তাভ্যাং জলং তু তৎ
পরিস্রবন্নলো দৃষ্ট্বা শোকার্ত ইদমব্রবীৎ
74.16
মম রাজ্যং প্রনষ্টং যন্নাহং তত্কৃতবান্স্বয়ম্
কলিনা তত্কৃতং ভীরু যচ্চ ত্বামহমত্যজম্
74.17
ত্বয়া তু ধর্মভৃচ্ছ্রেষ্ঠে শাপেনাভিহতঃ পুরা
বনস্থয়া দুঃখিতয়া শোচন্ত্যা মাং বিবাসসম্
74.18
স মচ্ছরীরে ত্বচ্ছাপাদ্দহ্যমানোঽবসত্কলিঃ
ত্বচ্ছাপদগ্ধঃ সততং সোঽগ্নাবিব সমাহিতঃ
74.19
মম চ ব্যবসায়েন তপসা চৈব নির্জিতঃ
দুঃখস্যান্তেন চানেন ভবিতব্যং হি নৌ শুভে
74.20
বিমুচ্য মাং গতঃ পাপঃ স ততোঽহমিহাগতঃ
ত্বদর্থং বিপুলশ্রোণি ন হি মেঽন্যত্প্রয়োজনম্
74.21
কথং নু নারী ভর্তারমনুরক্তমনুব্রতম্
উত্সৃজ্য বরয়েদন্যং যথা ত্বং ভীরু কর্হিচিৎ
74.22
দূতাশ্চরন্তি পৃথিবীং কৃত্স্নাং নৃপতিশাসনাৎ
ভৈমী কিল স্ম ভর্তারং দ্বিতীয়ং বরয়িষ্যতি
74.23
স্বৈরবৃত্তা যথাকামমনুরূপমিবাত্মনঃ
শ্রুত্বৈব চৈবং ত্বরিতো ভাঙ্গস্বরিরুপস্থিতঃ
74.24
দময়ন্তী তু তচ্ছ্রুত্বা নলস্য পরিদেবিতম্
প্রাঞ্জলির্বেপমানা চ ভীতা বচনমব্রবীৎ