Utshovঅধ্যায় 73
73.1
বৃহদশ্ব উবাচ
দময়ন্তী তু তচ্ছ্রুত্বা ভৃশং শোকপরায়ণা
শঙ্কমানা নলং তং বৈ কেশিনীমিদমব্রবীৎ
73.2
গচ্ছ কেশিনি ভূয়স্ত্বং পরীক্ষাং কুরু বাহুকে
অব্রুবাণা সমীপস্থা চরিতান্যস্য লক্ষয়
73.3
যদা চ কিংচিত্কুর্যাত্স কারণং তত্র ভামিনি
তত্র সংচেষ্টমানস্য সংলক্ষ্যং তে বিচেষ্টিতম্
73.4
ন চাস্য প্রতিবন্ধেন দেয়োঽগ্নিরপি ভামিনি
যাচতে ন জলং দেয়ং সম্যগত্বরমাণয়া
73.5
এতত্সর্বং সমীক্ষ্য ত্বং চরিতং মে নিবেদয়
যচ্চান্যদপি পশ্যেথাস্তচ্চাখ্যেয়ং ত্বয়া মম
73.6
দময়ন্ত্যৈবমুক্তা সা জগামাথাশু কেশিনী
নিশাম্য চ হয়জ্ঞস্য লিঙ্গানি পুনরাগমৎ
73.7
সা তত্সর্বং যথাবৃত্তং দময়ন্ত্যৈ ন্যবেদয়ৎ
নিমিত্তং যত্তদা দৃষ্টং বাহুকে দিব্যমানুষম্
73.8
কেশিন্যুবাচ
দৃঢং শুচ্যুপচারোঽসৌ ন ময়া মানুষঃ ক্বচিৎ
দৃষ্টপূর্বঃ শ্রুতো বাপি দময়ন্তি তথাবিধঃ
73.9
হ্রস্বমাসাদ্য সংচারং নাসৌ বিনমতে ক্বচিৎ
তং তু দৃষ্ট্বা যথাসঙ্গমুত্সর্পতি যথাসুখম্
সংকটেঽপ্যস্য সুমহদ্বিবরং জায়তেঽধিকম্
73.10
ঋতুপর্ণস্য চার্থায় ভোজনীয়মনেকশঃ
প্রেষিতং তত্র রাজ্ঞা চ মাংসং সুবহু পাশবম্
73.11
তস্য প্রক্ষালনার্থায় কুম্ভস্তত্রোপকল্পিতঃ
স তেনাবেক্ষিতঃ কুম্ভঃ পূর্ণ এবাভবত্তদা
73.12
ততঃ প্রক্ষালনং কৃত্বা সমধিশ্রিত্য বাহুকঃ
তৃণমুষ্টিং সমাদায় আবিধ্যৈনং সমাদধৎ
73.13
অথ প্রজ্বলিতস্তত্র সহসা হব্যবাহনঃ
তদদ্ভুততমং দৃষ্ট্বা বিস্মিতাহমিহাগতা
73.14
অন্যচ্চ তস্মিন্সুমহদাশ্চর্যং লক্ষিতং ময়া
যদগ্নিমপি সংস্পৃশ্য নৈব দহ্যত্যসৌ শুভে
73.15
ছন্দেন চোদকং তস্য বহত্যাবর্জিতং দ্রুতম্
অতীব চান্যত্সুমহদাশ্চর্যং দৃষ্টবত্যহম্
73.16
যত্স পুষ্পাণ্যুপাদায় হস্তাভ্যাং মমৃদে শনৈঃ
মৃদ্যমানানি পাণিভ্যাং তেন পুষ্পাণি তান্যথ
73.17
ভূয় এব সুগন্ধীনি হৃষিতানি ভবন্তি চ
এতান্যদ্ভুতকল্পানি দৃষ্ট্বাহং দ্রুতমাগতা
73.18
বৃহদশ্ব উবাচ
দময়ন্তী তু তচ্ছ্রুত্বা পুণ্যশ্লোকস্য চেষ্টিতম্
অমন্যত নলং প্রাপ্তং কর্মচেষ্টাভিসূচিতম্
73.19
সা শঙ্কমানা ভর্তারং নলং বাহুকরূপিণম্
কেশিনীং শ্লক্ষ্ণয়া বাচা রুদতী পুনরব্রবীৎ
73.20
পুনর্গচ্ছ প্রমত্তস্য বাহুকস্যোপসংস্কৃতম্
মহানসাচ্ছৃতং মাংসং সমাদায়ৈহি ভামিনি
73.21
সা গত্বা বাহুকে ব্যগ্রে তন্মাংসমপকৃষ্য চ
অত্যুষ্ণমেব ত্বরিতা তত্ক্ষণং প্রিয়কারিণী
দময়ন্ত্যৈ ততঃ প্রাদাত্কেশিনী কুরুনন্দন
73.22
সোচিতা নলসিদ্ধস্য মাংসস্য বহুশঃ পুরা
প্রাশ্য মত্বা নলং সূদং প্রাক্রোশদ্ভৃশদুঃখিতা
73.23
বৈক্লব্যং চ পরং গত্বা প্রক্ষাল্য চ মুখং ততঃ
মিথুনং প্রেষয়ামাস কেশিন্যা সহ ভারত
73.24
ইন্দ্রসেনাং সহ ভ্রাত্রা সমভিজ্ঞায় বাহুকঃ
অভিদ্রুত্য ততো রাজা পরিষ্বজ্যাঙ্কমানয়ৎ
73.25
বাহুকস্তু সমাসাদ্য সুতৌ সুরসুতোপমৌ
ভৃশং দুঃখপরীতাত্মা সস্বরং প্ররুরোদ হ
73.26
নৈষধো দর্শয়িত্বা তু বিকারমসকৃত্তদা
উত্সৃজ্য সহসা পুত্রৌ কেশিনীমিদমব্রবীৎ
73.27
ইদং সুসদৃশং ভদ্রে মিথুনং মম পুত্রয়োঃ
ততো দৃষ্ট্বৈব সহসা বাষ্পমুত্সৃষ্টবানহম্
73.28
বহুশঃ সংপতন্তীং ত্বাং জনঃ শঙ্কেত দোষতঃ
বয়ং চ দেশাতিথয়ো গচ্ছ ভদ্রে নমোঽস্তু তে