UtshovChapter 73
73.1
बृहदश्व उवाच
दमयन्ती तु तच्छ्रुत्वा भृशं शोकपरायणा
शङ्कमाना नलं तं वै केशिनीमिदमब्रवीत्
Brihadashva uvacha
Damayanti tu tachchhrutva bhrisham shokaparayana
Shankamana nalam tam vai keshinimidamabravit
73.2
गच्छ केशिनि भूयस्त्वं परीक्षां कुरु बाहुके
अब्रुवाणा समीपस्था चरितान्यस्य लक्षय
Gachchha keshini bhuyastvam pariksham kuru bahuke
Abruvana samipastha charitanyasya lakshaya
73.3
यदा च किंचित्कुर्यात्स कारणं तत्र भामिनि
तत्र संचेष्टमानस्य संलक्ष्यं ते विचेष्टितम्
Yada cha kinchitkuryatsa karanam tatra bhamini
Tatra sancheshtamanasya sanlakshyam te vicheshtitam
73.4
न चास्य प्रतिबन्धेन देयोऽग्निरपि भामिनि
याचते न जलं देयं सम्यगत्वरमाणया
Na chasya pratibandhena deyognirapi bhamini
Yachate na jalam deyam samyagatvaramanaya
73.5
एतत्सर्वं समीक्ष्य त्वं चरितं मे निवेदय
यच्चान्यदपि पश्येथास्तच्चाख्येयं त्वया मम
Etatsarvam samikshya tvam charitam me nivedaya
Yachchanyadapi pashyethastachchakhyeyam tvaya mama
73.6
दमयन्त्यैवमुक्ता सा जगामाथाशु केशिनी
निशाम्य च हयज्ञस्य लिङ्गानि पुनरागमत्
Damayantyaivamukta sa jagamathashu keshini
Nishamya cha hayagyasya lingani punaragamat
73.7
सा तत्सर्वं यथावृत्तं दमयन्त्यै न्यवेदयत्
निमित्तं यत्तदा दृष्टं बाहुके दिव्यमानुषम्
Sa tatsarvam yathavrittam damayantyai nyavedayat
Nimittam yattada drishtam bahuke divyamanusham
73.8
केशिन्युवाच
दृढं शुच्युपचारोऽसौ न मया मानुषः क्वचित्
दृष्टपूर्वः श्रुतो वापि दमयन्ति तथाविधः
Keshinyuvacha
Dridham shuchyupacharosau na maya manushah kvachit
Drishtapurvah shruto vapi damayanti tathavidhah
73.9
ह्रस्वमासाद्य संचारं नासौ विनमते क्वचित्
तं तु दृष्ट्वा यथासङ्गमुत्सर्पति यथासुखम्
संकटेऽप्यस्य सुमहद्विवरं जायतेऽधिकम्
Hrasvamasadya sancharam nasau vinamate kvachit
Tam tu drishtva yathasangamutsarpati yathasukham
Sankatepyasya sumahadvivaram jayatedhikam
73.10
ऋतुपर्णस्य चार्थाय भोजनीयमनेकशः
प्रेषितं तत्र राज्ञा च मांसं सुबहु पाशवम्
Rituparnasya charthaya bhojaniyamanekashah
Preshitam tatra ragya cha mansam subahu pashavam
73.11
तस्य प्रक्षालनार्थाय कुम्भस्तत्रोपकल्पितः
स तेनावेक्षितः कुम्भः पूर्ण एवाभवत्तदा
Tasya prakshalanarthaya kumbhastatropakalpitah
Sa tenavekshitah kumbhah purna evabhavattada
73.12
ततः प्रक्षालनं कृत्वा समधिश्रित्य बाहुकः
तृणमुष्टिं समादाय आविध्यैनं समादधत्
Tatah prakshalanam kritva samadhishritya bahukah
Trinamushtim samadaya avidhyainam samadadhat
73.13
अथ प्रज्वलितस्तत्र सहसा हव्यवाहनः
तदद्भुततमं दृष्ट्वा विस्मिताहमिहागता
Atha prajvalitastatra sahasa havyavahanah
Tadadbhutatamam drishtva vismitahamihagata
73.14
अन्यच्च तस्मिन्सुमहदाश्चर्यं लक्षितं मया
यदग्निमपि संस्पृश्य नैव दह्यत्यसौ शुभे
Anyachcha tasminsumahadashcharyam lakshitam maya
Yadagnimapi sansprishya naiva dahyatyasau shubhe
73.15
छन्देन चोदकं तस्य वहत्यावर्जितं द्रुतम्
अतीव चान्यत्सुमहदाश्चर्यं दृष्टवत्यहम्
Chhandena chodakam tasya vahatyavarjitam drutam
Ativa chanyatsumahadashcharyam drishtavatyaham
73.16
यत्स पुष्पाण्युपादाय हस्ताभ्यां ममृदे शनैः
मृद्यमानानि पाणिभ्यां तेन पुष्पाणि तान्यथ
Yatsa pushpanyupadaya hastabhyam mamride shanaih
Mridyamanani panibhyam tena pushpani tanyatha
73.17
भूय एव सुगन्धीनि हृषितानि भवन्ति च
एतान्यद्भुतकल्पानि दृष्ट्वाहं द्रुतमागता
Bhuya eva sugandhini hrishitani bhavanti cha
Etanyadbhutakalpani drishtvaham drutamagata
73.18
बृहदश्व उवाच
दमयन्ती तु तच्छ्रुत्वा पुण्यश्लोकस्य चेष्टितम्
अमन्यत नलं प्राप्तं कर्मचेष्टाभिसूचितम्
Brihadashva uvacha
Damayanti tu tachchhrutva punyashlokasya cheshtitam
Amanyata nalam praptam karmacheshtabhisuchitam
73.19
सा शङ्कमाना भर्तारं नलं बाहुकरूपिणम्
केशिनीं श्लक्ष्णया वाचा रुदती पुनरब्रवीत्
Sa shankamana bhartaram nalam bahukarupinam
Keshinim shlakshnaya vacha rudati punarabravit
73.20
पुनर्गच्छ प्रमत्तस्य बाहुकस्योपसंस्कृतम्
महानसाच्छृतं मांसं समादायैहि भामिनि
Punargachchha pramattasya bahukasyopasanskritam
Mahanasachchhritam mansam samadayaihi bhamini
73.21
सा गत्वा बाहुके व्यग्रे तन्मांसमपकृष्य च
अत्युष्णमेव त्वरिता तत्क्षणं प्रियकारिणी
दमयन्त्यै ततः प्रादात्केशिनी कुरुनन्दन
Sa gatva bahuke vyagre tanmansamapakrishya cha
Atyushnameva tvarita tatkshanam priyakarini
Damayantyai tatah pradatkeshini kurunandana
73.22
सोचिता नलसिद्धस्य मांसस्य बहुशः पुरा
प्राश्य मत्वा नलं सूदं प्राक्रोशद्भृशदुःखिता
Sochita nalasiddhasya mansasya bahushah pura
Prashya matva nalam sudam prakroshadbhrishaduhkhita
73.23
वैक्लव्यं च परं गत्वा प्रक्षाल्य च मुखं ततः
मिथुनं प्रेषयामास केशिन्या सह भारत
Vaiklavyam cha param gatva prakshalya cha mukham tatah
Mithunam preshayamasa keshinya saha bharata
73.24
इन्द्रसेनां सह भ्रात्रा समभिज्ञाय बाहुकः
अभिद्रुत्य ततो राजा परिष्वज्याङ्कमानयत्
Indrasenam saha bhratra samabhigyaya bahukah
Abhidrutya tato raja parishvajyankamanayat
73.25
बाहुकस्तु समासाद्य सुतौ सुरसुतोपमौ
भृशं दुःखपरीतात्मा सस्वरं प्ररुरोद ह
Bahukastu samasadya sutau surasutopamau
Bhrisham duhkhaparitatma sasvaram praruroda ha
73.26
नैषधो दर्शयित्वा तु विकारमसकृत्तदा
उत्सृज्य सहसा पुत्रौ केशिनीमिदमब्रवीत्
Naishadho darshayitva tu vikaramasakrittada
Utsrijya sahasa putrau keshinimidamabravit
73.27
इदं सुसदृशं भद्रे मिथुनं मम पुत्रयोः
ततो दृष्ट्वैव सहसा बाष्पमुत्सृष्टवानहम्
Idam susadrisham bhadre mithunam mama putrayoh
Tato drishtvaiva sahasa bashpamutsrishtavanaham
73.28
बहुशः संपतन्तीं त्वां जनः शङ्केत दोषतः
वयं च देशातिथयो गच्छ भद्रे नमोऽस्तु ते
Bahushah sampatantim tvam janah shanketa doshatah
Vayam cha deshatithayo gachchha bhadre namostu te