Utshovঅধ্যায় 72
72.1
দময়ন্ত্যুবাচ
গচ্ছ কেশিনি জানীহি ক এষ রথবাহকঃ
উপবিষ্টো রথোপস্থে বিকৃতো হ্রস্ববাহুকঃ
72.2
অভ্যেত্য কুশলং ভদ্রে মৃদুপূর্বং সমাহিতা
পৃচ্ছেথাঃ পুরুষং হ্যেনং যথাতত্ত্বমনিন্দিতে
72.3
অত্র মে মহতী শঙ্কা ভবেদেষ নলো নৃপঃ
তথা চ মে মনস্তুষ্টির্হৃদয়স্য চ নির্বৃতিঃ
72.4
ব্রূয়াশ্চৈনং কথান্তে ত্বং পর্ণাদবচনং যথা
প্রতিবাক্যং চ সুশ্রোণি বুধ্যেথাস্ত্বমনিন্দিতে
72.5
বৃহদশ্ব উবাচ
এবং সমাহিতা গত্বা দূতী বাহুকমব্রবীৎ
দময়ন্ত্যপি কল্যাণী প্রাসাদস্থান্ববৈক্ষত
72.6
কেশিন্যুবাচ
স্বাগতং তে মনুষ্যেন্দ্র কুশলং তে ব্রবীম্যহম্
দময়ন্ত্যা বচঃ সাধু নিবোধ পুরুষর্ষভ
72.7
কদা বৈ প্রস্থিতা যূয়ং কিমর্থমিহ চাগতাঃ
তত্ত্বং ব্রূহি যথান্যায়ং বৈদর্ভী শ্রোতুমিচ্ছতি
72.8
বাহুক উবাচ
শ্রুতঃ স্বয়ংবরো রাজ্ঞা কৌসল্যেন যশস্বিনা
দ্বিতীয়ো দময়ন্ত্যা বৈ শ্বোভূত ইতি ভামিনি
72.9
শ্রুত্বা তং প্রস্থিতো রাজা শতয়োজনয়ায়িভিঃ
হয়ৈর্বাতজবৈর্মুখ্যৈরহমস্য চ সারথিঃ
72.10
কেশিন্যুবাচ
অথ যোঽসৌ তৃতীয়ো বঃ স কুতঃ কস্য বা পুনঃ
ত্বং চ কস্য কথং চেদং ত্বয়ি কর্ম সমাহিতম্
72.11
বাহুক উবাচ
পুণ্যশ্লোকস্য বৈ সূতো বার্ষ্ণেয় ইতি বিশ্রুতঃ
স নলে বিদ্রুতে ভদ্রে ভাঙ্গস্বরিমুপস্থিতঃ
72.12
অহমপ্যশ্বকুশলঃ সূদত্বে চ সুনিষ্ঠিতঃ
ঋতুপর্ণেন সারথ্যে ভোজনে চ বৃতঃ স্বয়ম্
72.13
কেশিন্যুবাচ
অথ জানাতি বার্ষ্ণেয়ঃ ক্ব নু রাজা নলো গতঃ
কথংচিত্ত্বয়ি বৈতেন কথিতং স্যাত্তু বাহুক
72.14
বাহুক উবাচ
ইহৈব পুত্রৌ নিক্ষিপ্য নলস্যাশুভকর্মণঃ
গতস্ততো যথাকামং নৈষ জানাতি নৈষধম্
72.15
ন চান্যঃ পুরুষঃ কশ্চিন্নলং বেত্তি যশস্বিনি
গূঢশ্চরতি লোকেঽস্মিন্নষ্টরূপো মহীপতিঃ
72.16
আত্মৈব হি নলং বেত্তি যা চাস্য তদনন্তরা
ন হি বৈ তানি লিঙ্গানি নলং শংসন্তি কর্হিচিৎ
72.17
কেশিন্যুবাচ
যোঽসাবয়োধ্যাং প্রথমং গতবান্ব্রাহ্মণস্তদা
ইমানি নারীবাক্যানি কথয়ানঃ পুনঃ পুনঃ
72.18
ক্ব নু ত্বং কিতব ছিত্ত্বা বস্ত্রার্ধং প্রস্থিতো মম
উত্সৃজ্য বিপিনে সুপ্তামনুরক্তাং প্রিয়াং প্রিয়
72.19
সা বৈ যথা সমাদিষ্টা তত্রাস্তে ত্বত্প্রতীক্ষিণী
দহ্যমানা দিবারাত্রং বস্ত্রার্ধেনাভিসংবৃতা
72.20
তস্যা রুদন্ত্যাঃ সততং তেন দুঃখেন পার্থিব
প্রসাদং কুরু বৈ বীর প্রতিবাক্যং প্রয়চ্ছ চ
72.21
তস্যাস্তত্প্রিয়মাখ্যানং প্রব্রবীহি মহামতে
তদেব বাক্যং বৈদর্ভী শ্রোতুমিচ্ছত্যনিন্দিতা
72.22
এতচ্ছ্রুত্বা প্রতিবচস্তস্য দত্তং ত্বয়া কিল
যত্পুরা তত্পুনস্ত্বত্তো বৈদর্ভী শ্রোতুমিচ্ছতি
72.23
বৃহদশ্ব উবাচ
এবমুক্তস্য কেশিন্যা নলস্য কুরুনন্দন
হৃদয়ং ব্যথিতং চাসীদশ্রুপূর্ণে চ লোচনে
72.24
স নিগৃহ্যাত্মনো দুঃখং দহ্যমানো মহীপতিঃ
বাষ্পসংদিগ্ধয়া বাচা পুনরেবেদমব্রবীৎ
72.25
বৈষম্যমপি সংপ্রাপ্তা গোপায়ন্তি কুলস্ত্রিয়ঃ
আত্মানমাত্মনা সত্যো জিতস্বর্গা ন সংশয়ঃ
72.26
রহিতা ভর্তৃভিশ্চৈব ন ক্রুধ্যন্তি কদাচন
প্রাণাংশ্চারিত্রকবচা ধারয়ন্তীহ সত্স্ত্রিয়ঃ
72.27
প্রাণয়াত্রাং পরিপ্রেপ্সোঃ শকুনৈর্হৃতবাসসঃ
আধিভির্দহ্যমানস্য শ্যামা ন ক্রোদ্ধুমর্হতি
72.28
সত্কৃতাসত্কৃতা বাপি পতিং দৃষ্ট্বা তথাগতম্
ভ্রষ্টরাজ্যং শ্রিয়া হীনং ক্ষুধিতং ব্যসনাপ্লুতম্
72.29
এবং ব্রুবাণস্তদ্বাক্যং নলঃ পরমদুঃখিতঃ
ন বাষ্পমশকত্সোঢুং প্ররুরোদ চ ভারত
72.30
ততঃ সা কেশিনী গত্বা দময়ন্ত্যৈ ন্যবেদয়ৎ
তত্সর্বং কথিতং চৈব বিকারং চৈব তস্য তম্