Utshovঅধ্যায় 71
71.1
বৃহদশ্ব উবাচ
ততো বিদর্ভান্সংপ্রাপ্তং সায়াহ্নে সত্যবিক্রমম্
ঋতুপর্ণং জনা রাজ্ঞে ভীমায় প্রত্যবেদয়ন্
71.2
স ভীমবচনাদ্রাজা কুণ্ডিনং প্রাবিশত্পুরম্
নাদয়ন্রথঘোষেণ সর্বাঃ সোপদিশো দশ
71.3
ততস্তং রথনির্ঘোষং নলাশ্বাস্তত্র শুশ্রুবুঃ
শ্রুত্বা চ সমহৃষ্যন্ত পুরেব নলসংনিধৌ
71.4
দময়ন্তী চ শুশ্রাব রথঘোষং নলস্য তম্
যথা মেঘস্য নদতো গম্ভীরং জলদাগমে
71.5
নলেন সংগৃহীতেষু পুরেব নলবাজিষু
সদৃশং রথনির্ঘোষং মেনে ভৈমী তথা হয়াঃ
71.6
প্রাসাদস্থাশ্চ শিখিনঃ শালাস্থাশ্চৈব বারণাঃ
হয়াশ্চ শুশ্রুবুস্তত্র রথঘোষং মহীপতেঃ
71.7
তে শ্রুত্বা রথনির্ঘোষং বারণাঃ শিখিনস্তথা
প্রণেদুরুন্মুখা রাজন্মেঘোদয়মিবেক্ষ্য হ
71.8
দময়ন্ত্যুবাচ
যথাসৌ রথনির্ঘোষঃ পূরয়ন্নিব মেদিনীম্
মম হ্লাদয়তে চেতো নল এষ মহীপতিঃ
71.9
অদ্য চন্দ্রাভবক্ত্রং তং ন পশ্যামি নলং যদি
অসংখ্যেয়গুণং বীরং বিনশিষ্যাম্যসংশয়ম্
71.10
যদি বৈ তস্য বীরস্য বাহ্বোর্নাদ্যাহমন্তরম্
প্রবিশামি সুখস্পর্শং বিনশিষ্যাম্যসংশয়ম্
71.11
যদি মাং মেঘনির্ঘোষো নোপগচ্ছতি নৈষধঃ
অদ্য চামীকরপ্রখ্যো বিনশিষ্যাম্যসংশয়ম্
71.12
যদি মাং সিংহবিক্রান্তো মত্তবারণবারণঃ
নাভিগচ্ছতি রাজেন্দ্রো বিনশিষ্যাম্যসংশয়ম্
71.13
ন স্মরাম্যনৃতং কিংচিন্ন স্মরাম্যনুপাকৃতম্
ন চ পর্যুষিতং বাক্যং স্বৈরেষ্বপি মহাত্মনঃ
71.14
প্রভুঃ ক্ষমাবান্বীরশ্চ মৃদুর্দান্তো জিতেন্দ্রিয়ঃ
রহোঽনীচানুবর্তী চ ক্লীববন্মম নৈষধঃ
71.15
গুণাংস্তস্য স্মরন্ত্যা মে তত্পরায়া দিবানিশম্
হৃদয়ং দীর্যত ইদং শোকাত্প্রিয়বিনাকৃতম্
71.16
বৃহদশ্ব উবাচ
এবং বিলপমানা সা নষ্টসংজ্ঞেব ভারত
আরুরোহ মহদ্বেশ্ম পুণ্যশ্লোকদিদৃক্ষয়া
71.17
ততো মধ্যমকক্ষায়াং দদর্শ রথমাস্থিতম্
ঋতুপর্ণং মহীপালং সহবার্ষ্ণেয়বাহুকম্
71.18
ততোঽবতীর্য বার্ষ্ণেয়ো বাহুকশ্চ রথোত্তমাৎ
হয়াংস্তানবমুচ্যাথ স্থাপয়ামাসতূ রথম্
71.19
সোঽবতীর্য রথোপস্থাদৃতুপর্ণো নরাধিপঃ
উপতস্থে মহারাজ ভীমং ভীমপরাক্রমম্
71.20
তং ভীমঃ প্রতিজগ্রাহ পূজয়া পরয়া ততঃ
অকস্মাত্সহসা প্রাপ্তং স্ত্রীমন্ত্রং ন স্ম বিন্দতি
71.21
কিং কার্যং স্বাগতং তেঽস্তু রাজ্ঞা পৃষ্টশ্চ ভারত
নাভিজজ্ঞে স নৃপতির্দুহিত্রর্থে সমাগতম্
71.22
ঋতুপর্ণোঽপি রাজা স ধীমান্সত্যপরাক্রমঃ
রাজানং রাজপুত্রং বা ন স্ম পশ্যতি কংচন
নৈব স্বয়ংবরকথাং ন চ বিপ্রসমাগমম্
71.23
ততো বিগণয়ন্রাজা মনসা কোসলাধিপঃ
আগতোঽস্মীত্যুবাচৈনং ভবন্তমভিবাদকঃ
71.24
রাজাপি চ স্ময়ন্ভীমো মনসাভিবিচিন্তয়ৎ
অধিকং যোজনশতং তস্যাগমনকারণম্
71.25
গ্রামান্বহূনতিক্রম্য নাধ্যগচ্ছদ্যথাতথম্
অল্পকার্যং বিনির্দিষ্টং তস্যাগমনকারণম্
71.26
নৈতদেবং স নৃপতিস্তং সত্কৃত্য ব্যসর্জয়ৎ
বিশ্রাম্যতামিতি বদন্ক্লান্তোঽসীতি পুনঃ পুনঃ
71.27
স সত্কৃতঃ প্রহৃষ্টাত্মা প্রীতঃ প্রীতেন পার্থিবঃ
রাজপ্রেষ্যৈরনুগতো দিষ্টং বেশ্ম সমাবিশৎ
71.28
ঋতুপর্ণে গতে রাজন্বার্ষ্ণেয়সহিতে নৃপে
বাহুকো রথমাস্থায় রথশালামুপাগমৎ
71.29
স মোচয়িত্বা তানশ্বান্পরিচার্য চ শাস্ত্রতঃ
স্বয়ং চৈতান্সমাশ্বাস্য রথোপস্থ উপাবিশৎ
71.30
দময়ন্তী তু শোকার্তা দৃষ্ট্বা ভাঙ্গস্বরিং নৃপম্
সূতপুত্রং চ বার্ষ্ণেয়ং বাহুকং চ তথাবিধম্
71.31
চিন্তয়ামাস বৈদর্ভী কস্যৈষ রথনিস্বনঃ
নলস্যেব মহানাসীন্ন চ পশ্যামি নৈষধম্
71.32
বার্ষ্ণেয়েন ভবেন্নূনং বিদ্যা সৈবোপশিক্ষিতা
তেনাস্য রথনির্ঘোষো নলস্যেব মহানভূৎ
71.33
আহোস্বিদৃতুপর্ণোঽপি যথা রাজা নলস্তথা
ততোঽয়ং রথনির্ঘোষো নৈষধস্যেব লক্ষ্যতে
71.34
এবং বিতর্কয়িত্বা তু দময়ন্তী বিশাং পতে
দূতীং প্রস্থাপয়ামাস নৈষধান্বেষণে নৃপ