Utshovঅধ্যায় 70
70.1
বৃহদশ্ব উবাচ
স নদীঃ পর্বতাংশ্চৈব বনানি চ সরাংসি চ
অচিরেণাতিচক্রাম খেচরঃ খে চরন্নিব
70.2
তথা প্রয়াতে তু রথে তদা ভাঙ্গস্বরির্নৃপঃ
উত্তরীয়মথাপশ্যদ্ভ্রষ্টং পরপুরংজয়ঃ
70.3
ততঃ স ত্বরমাণস্তু পটে নিপতিতে তদা
গ্রহীষ্যামীতি তং রাজা নলমাহ মহামনাঃ
70.4
নিগৃহ্ণীষ্ব মহাবুদ্ধে হয়ানেতান্মহাজবান্
বার্ষ্ণেয়ো যাবদেতং মে পটমানয়তামিতি
70.5
নলস্তং প্রত্যুবাচাথ দূরে ভ্রষ্টঃ পটস্তব
যোজনং সমতিক্রান্তো ন স শক্যস্ত্বয়া পুনঃ
70.6
এবমুক্তে নলেনাথ তদা ভাঙ্গস্বরির্নৃপঃ
আসসাদ বনে রাজন্ফলবন্তং বিভীতকম্
70.7
তং দৃষ্ট্বা বাহুকং রাজা ত্বরমাণোঽভ্যভাষত
মমাপি সূত পশ্য ত্বং সংখ্যানে পরমং বলম্
70.8
সর্বঃ সর্বং ন জানাতি সর্বজ্ঞো নাস্তি কশ্চন
নৈকত্র পরিনিষ্ঠাস্তি জ্ঞানস্য পুরুষে ক্বচিৎ
70.9
বৃক্ষেঽস্মিন্যানি পর্ণানি ফলান্যপি চ বাহুক
পতিতানি চ যান্যত্র তত্রৈকমধিকং শতম্
একপত্রাধিকং পত্রং ফলমেকং চ বাহুক
70.10
পঞ্চ কোট্যোঽথ পত্রাণাং দ্বয়োরপি চ শাখয়োঃ
প্রচিনুহ্যস্য শাখে দ্বে যাশ্চাপ্যন্যাঃ প্রশাখিকাঃ
আভ্যাং ফলসহস্রে দ্বে পঞ্চোনং শতমেব চ
70.11
ততো রথাদবপ্লুত্য রাজানং বাহুকোঽব্রবীৎ
পরোক্ষমিব মে রাজন্কত্থসে শত্রুকর্শন
70.12
অথ তে গণিতে রাজন্বিদ্যতে ন পরোক্ষতা
প্রত্যক্ষং তে মহারাজ গণয়িষ্যে বিভীতকম্
70.13
অহং হি নাভিজানামি ভবেদেবং ন বেতি চ
সংখ্যাস্যামি ফলান্যস্য পশ্যতস্তে জনাধিপ
মুহূর্তমিব বার্ষ্ণেয়ো রশ্মীন্যচ্ছতু বাজিনাম্
70.14
তমব্রবীন্নৃপঃ সূতং নায়ং কালো বিলম্বিতুম্
বাহুকস্ত্বব্রবীদেনং পরং যত্নং সমাস্থিতঃ
70.15
প্রতীক্ষস্ব মুহূর্তং ত্বমথ বা ত্বরতে ভবান্
এষ যাতি শিবঃ পন্থা যাহি বার্ষ্ণেয়সারথিঃ
70.16
অব্রবীদৃতুপর্ণস্তং সান্ত্বয়ন্কুরুনন্দন
ত্বমেব যন্তা নান্যোঽস্তি পৃথিব্যামপি বাহুক
70.17
ত্বত্কৃতে যাতুমিচ্ছামি বিদর্ভান্হয়কোবিদ
শরণং ত্বাং প্রপন্নোঽস্মি ন বিঘ্নং কর্তুমর্হসি
70.18
কামং চ তে করিষ্যামি যন্মাং বক্ষ্যসি বাহুক
বিদর্ভান্যদি যাত্বাদ্য সূর্যং দর্শয়িতাসি মে
70.19
অথাব্রবীদ্বাহুকস্তং সংখ্যায়েমং বিভীতকম্
ততো বিদর্ভান্যাস্যামি কুরুষ্বেদং বচো মম
70.20
অকাম ইব তং রাজা গণয়স্বেত্যুবাচ হ
সোঽবতীর্য রথাত্তূর্ণং শাতয়ামাস তং দ্রুমম্
70.21
ততঃ স বিস্ময়াবিষ্টো রাজানমিদমব্রবীৎ
গণয়িত্বা যথোক্তানি তাবন্ত্যেব ফলানি চ
70.22
অত্যদ্ভুতমিদং রাজন্দৃষ্টবানস্মি তে বলম্
শ্রোতুমিচ্ছামি তাং বিদ্যাং যথৈতজ্জ্ঞায়তে নৃপ
70.23
তমুবাচ ততো রাজা ত্বরিতো গমনে তদা
বিদ্ধ্যক্ষহৃদয়জ্ঞং মাং সংখ্যানে চ বিশারদম্
70.24
বাহুকস্তমুবাচাথ দেহি বিদ্যামিমাং মম
মত্তোঽপি চাশ্বহৃদয়ং গৃহাণ পুরুষর্ষভ
70.25
ঋতুপর্ণস্ততো রাজা বাহুকং কার্যগৌরবাৎ
হয়জ্ঞানস্য লোভাচ্চ তথেত্যেবাব্রবীদ্বচঃ
70.26
যথেষ্টং ত্বং গৃহাণেদমক্ষাণাং হৃদয়ং পরম্
নিক্ষেপো মেঽশ্বহৃদয়ং ত্বয়ি তিষ্ঠতু বাহুক
এবমুক্ত্বা দদৌ বিদ্যামৃতুপর্ণো নলায় বৈ
70.27
তস্যাক্ষহৃদয়জ্ঞস্য শরীরান্নিঃসৃতঃ কলিঃ
কর্কোটকবিষং তীক্ষ্ণং মুখাত্সততমুদ্বমন্
70.28
কলেস্তস্য তদার্তস্য শাপাগ্নিঃ স বিনিঃসৃতঃ
স তেন কর্শিতো রাজা দীর্ঘকালমনাত্মবান্
70.29
ততো বিষবিমুক্তাত্মা স্বরূপমকরোত্কলিঃ
তং শপ্তুমৈচ্ছত্কুপিতো নিষধাধিপতির্নলঃ
70.30
তমুবাচ কলির্ভীতো বেপমানঃ কৃতাঞ্জলিঃ
কোপং সংয়চ্ছ নৃপতে কীর্তিং দাস্যামি তে পরাম্
70.31
ইন্দ্রসেনস্য জননী কুপিতা মাশপত্পুরা
যদা ত্বয়া পরিত্যক্তা ততোঽহং ভৃশপীডিতঃ
70.32
অবসং ত্বয়ি রাজেন্দ্র সুদুঃখমপরাজিত
বিষেণ নাগরাজস্য দহ্যমানো দিবানিশম্
70.33
যে চ ত্বাং মনুজা লোকে কীর্তয়িষ্যন্ত্যতন্দ্রিতাঃ
মত্প্রসূতং ভয়ং তেষাং ন কদাচিদ্ভবিষ্যতি
70.34
এবমুক্তো নলো রাজা ন্যয়চ্ছত্কোপমাত্মনঃ
ততো ভীতঃ কলিঃ ক্ষিপ্রং প্রবিবেশ বিভীতকম্
কলিস্ত্বন্যেন নাদৃশ্যত্কথয়ন্নৈষধেন বৈ
70.35
ততো গতজ্বরো রাজা নৈষধঃ পরবীরহা
সংপ্রনষ্টে কলৌ রাজন্সংখ্যায়াথ ফলান্যুত
70.36
মুদা পরময়া যুক্তস্তেজসা চ পরেণ হ
রথমারুহ্য তেজস্বী প্রয়য়ৌ জবনৈর্হয়ৈঃ
বিভীতকশ্চাপ্রশস্তঃ সংবৃত্তঃ কলিসংশ্রয়াৎ
70.37
হয়োত্তমানুত্পততো দ্বিজানিব পুনঃ পুনঃ
নলঃ সংচোদয়ামাস প্রহৃষ্টেনান্তরাত্মনা
70.38
বিদর্ভাভিমুখো রাজা প্রয়য়ৌ স মহামনাঃ
নলে তু সমতিক্রান্তে কলিরপ্যগমদ্গৃহান্
70.39
ততো গতজ্বরো রাজা নলোঽভূত্পৃথিবীপতে
বিমুক্তঃ কলিনা রাজন্রূপমাত্রবিয়োজিতঃ