Utshovঅধ্যায় 69
69.1
বৃহদশ্ব উবাচ
শ্রুত্বা বচঃ সুদেবস্য ঋতুপর্ণো নরাধিপঃ
সান্ত্বয়ঞ্শ্লক্ষ্ণয়া বাচা বাহুকং প্রত্যভাষত
69.2
বিদর্ভান্যাতুমিচ্ছামি দমদন্ত্যাঃ স্বয়ংবরম্
একাহ্না হয়তত্ত্বজ্ঞ মন্যসে যদি বাহুক
69.3
এবমুক্তস্য কৌন্তেয় তেন রাজ্ঞা নলস্য হ
ব্যদীর্যত মনো দুঃখাত্প্রদধ্যৌ চ মহামনাঃ
69.4
দময়ন্তী ভবেদেতত্কুর্যাদ্দুঃখেন মোহিতা
অস্মদর্থে ভবেদ্বায়মুপায়শ্চিন্তিতো মহান্
69.5
নৃশংসং বত বৈদর্ভী কর্তুকামা তপস্বিনী
ময়া ক্ষুদ্রেণ নিকৃতা পাপেনাকৃতবুদ্ধিনা
69.6
স্ত্রীস্বভাবশ্চলো লোকে মম দোষশ্চ দারুণঃ
স্যাদেবমপি কুর্যাত্সা বিবশা গতসৌহৃদা
মম শোকেন সংবিগ্না নৈরাশ্যাত্তনুমধ্যমা
69.7
ন চৈবং কর্হিচিত্কুর্যাত্সাপত্যা চ বিশেষতঃ
যদত্র তথ্যং পথ্যং চ গত্বা বেত্স্যামি নিশ্চয়ম্
ঋতুপর্ণস্য বৈ কামমাত্মার্থং চ করোম্যহম্
69.8
ইতি নিশ্চিত্য মনসা বাহুকো দীনমানসঃ
কৃতাঞ্জলিরুবাচেদমৃতুপর্ণং নরাধিপম্
69.9
প্রতিজানামি তে সত্যং গমিষ্যসি নরাধিপ
একাহ্না পুরুষব্যাঘ্র বিদর্ভনগরীং নৃপ
69.10
ততঃ পরীক্ষামশ্বানাং চক্রে রাজন্স বাহুকঃ
অশ্বশালামুপাগম্য ভাঙ্গস্বরিনৃপাজ্ঞয়া
69.11
স ত্বর্যমাণো বহুশ ঋতুপর্ণেন বাহুকঃ
অধ্যগচ্ছত্কৃশানশ্বান্সমর্থানধ্বনি ক্ষমান্
69.12
তেজোবলসমায়ুক্তান্কুলশীলসমন্বিতান্
বর্জিতাঁল্লক্ষণৈর্হীনৈঃ পৃথুপ্রোথান্মহাহনূন্
শুদ্ধান্দশভিরাবর্তৈঃ সিন্ধুজান্বাতরংহসঃ
69.13
দৃষ্ট্বা তানব্রবীদ্রাজা কিংচিত্কোপসমন্বিতঃ
কিমিদং প্রার্থিতং কর্তুং প্রলব্ধব্যা হি তে বয়ম্
69.14
কথমল্পবলপ্রাণা বক্ষ্যন্তীমে হয়া মম
মহানধ্বা চ তুরগৈর্গন্তব্যঃ কথমীদৃশৈঃ
69.15
বাহুক উবাচ
এতে হয়া গমিষ্যন্তি বিদর্ভান্নাত্র সংশয়ঃ
অথান্যান্মন্যসে রাজন্ব্রূহি কান্যোজয়ামি তে
69.16
ঋতুপর্ণ উবাচ
ত্বমেব হয়তত্ত্বজ্ঞঃ কুশলশ্চাসি বাহুক
যান্মন্যসে সমর্থাংস্ত্বং ক্ষিপ্রং তানেব যোজয়
69.17
বৃহদশ্ব উবাচ
ততঃ সদশ্বাংশ্চতুরঃ কুলশীলসমন্বিতান্
যোজয়ামাস কুশলো জবয়ুক্তান্রথে নরঃ
69.18
ততো যুক্তং রথং রাজা সমারোহত্ত্বরান্বিতঃ
অথ পর্যপতন্ভূমৌ জানুভিস্তে হয়োত্তমাঃ
69.19
ততো নরবরঃ শ্রীমান্নলো রাজা বিশাং পতে
সান্ত্বয়ামাস তানশ্বাংস্তেজোবলসমন্বিতান্
69.20
রশ্মিভিশ্চ সমুদ্যম্য নলো যাতুমিয়েষ সঃ
সূতমারোপ্য বার্ষ্ণেয়ং জবমাস্থায় বৈ পরম্
69.21
তে চোদ্যমানা বিধিনা বাহুকেন হয়োত্তমাঃ
সমুত্পেতুরিবাকাশং রথিনং মোহয়ন্নিব
69.22
তথা তু দৃষ্ট্বা তানশ্বান্বহতো বাতরংহসঃ
অয়োধ্যাধিপতির্ধীমান্বিস্ময়ং পরমং যয়ৌ
69.23
রথঘোষং তু তং শ্রুত্বা হয়সংগ্রহণং চ তৎ
বার্ষ্ণেয়শ্চিন্তয়ামাস বাহুকস্য হয়জ্ঞতাম্
69.24
কিং নু স্যান্মাতলিরয়ং দেবরাজস্য সারথিঃ
তথা হি লক্ষণং বীরে বাহুকে দৃশ্যতে মহৎ
69.25
শালিহোত্রোঽথ কিং নু স্যাদ্ধয়ানাং কুলতত্ত্ববিৎ
মানুষং সমনুপ্রাপ্তো বপুঃ পরমশোভনম্
69.26
উতাহোস্বিদ্ভবেদ্রাজা নলঃ পরপুরংজয়ঃ
সোঽয়ং নৃপতিরায়াত ইত্যেবং সমচিন্তয়ৎ
69.27
অথ বা যাং নলো বেদ বিদ্যাং তামেব বাহুকঃ
তুল্যং হি লক্ষয়ে জ্ঞানং বাহুকস্য নলস্য চ
69.28
অপি চেদং বয়স্তুল্যমস্য মন্যে নলস্য চ
নায়ং নলো মহাবীর্যস্তদ্বিদ্যস্তু ভবিষ্যতি
69.29
প্রচ্ছন্না হি মহাত্মানশ্চরন্তি পৃথিবীমিমাম্
দৈবেন বিধিনা যুক্তাঃ শাস্ত্রোক্তৈশ্চ বিরূপণৈঃ
69.30
ভবেত্তু মতিভেদো মে গাত্রবৈরূপ্যতাং প্রতি
প্রমাণাত্পরিহীনস্তু ভবেদিতি হি মে মতিঃ
69.31
বয়ঃপ্রমাণং তত্তুল্যং রূপেণ তু বিপর্যয়ঃ
নলং সর্বগুণৈর্যুক্তং মন্যে বাহুকমন্ততঃ
69.32
এবং বিচার্য বহুশো বার্ষ্ণেয়ঃ পর্যচিন্তয়ৎ
হৃদয়েন মহারাজ পুণ্যশ্লোকস্য সারথিঃ
69.33
ঋতুপর্ণস্তু রাজেন্দ্র বাহুকস্য হয়জ্ঞতাম্
চিন্তয়ন্মুমুদে রাজা সহবার্ষ্ণেয়সারথিঃ
69.34
বলং বীর্যং তথোত্সাহং হয়সংগ্রহণং চ তৎ
পরং যত্নং চ সংপ্রেক্ষ্য পরাং মুদমবাপ হ