Utshovঅধ্যায় 68
68.1
বৃহদশ্ব উবাচ
অথ দীর্ঘস্য কালস্য পর্ণাদো নাম বৈ দ্বিজঃ
প্রত্যেত্য নগরং ভৈমীমিদং বচনমব্রবীৎ
68.2
নৈষধং মৃগয়ানেন দময়ন্তি দিবানিশম্
অয়োধ্যাং নগরীং গত্বা ভাঙ্গস্বরিরুপস্থিতঃ
68.3
শ্রাবিতশ্চ ময়া বাক্যং ত্বদীয়ং স মহাজনে
ঋতুপর্ণো মহাভাগো যথোক্তং বরবর্ণিনি
68.4
তচ্ছ্রুত্বা নাব্রবীত্কিংচিদৃতুপর্ণো নরাধিপঃ
ন চ পারিষদঃ কশ্চিদ্ভাষ্যমাণো ময়াসকৃৎ
68.5
অনুজ্ঞাতং তু মাং রাজ্ঞা বিজনে কশ্চিদব্রবীৎ
ঋতুপর্ণস্য পুরুষো বাহুকো নাম নামতঃ
68.6
সূতস্তস্য নরেন্দ্রস্য বিরূপো হ্রস্ববাহুকঃ
শীঘ্রয়ানে সুকুশলো মৃষ্টকর্তা চ ভোজনে
68.7
স বিনিঃশ্বস্য বহুশো রুদিত্বা চ মুহুর্মুহুঃ
কুশলং চৈব মাং পৃষ্ট্বা পশ্চাদিদমভাষত
68.8
বৈষম্যমপি সংপ্রাপ্তা গোপায়ন্তি কুলস্ত্রিয়ঃ
আত্মানমাত্মনা সত্যো জিতস্বর্গা ন সংশয়ঃ
রহিতা ভর্তৃভিশ্চৈব ন ক্রুধ্যন্তি কদাচন
68.9
বিষমস্থেন মূঢেন পরিভ্রষ্টসুখেন চ
যত্সা তেন পরিত্যক্তা তত্র ন ক্রোদ্ধুমর্হতি
68.10
প্রাণয়াত্রাং পরিপ্রেপ্সোঃ শকুনৈর্হৃতবাসসঃ
আধিভির্দহ্যমানস্য শ্যামা ন ক্রোদ্ধুমর্হতি
68.11
সত্কৃতাসত্কৃতা বাপি পতিং দৃষ্ট্বা তথাগতম্
ভ্রষ্টরাজ্যং শ্রিয়া হীনং শ্যামা ন ক্রোদ্ধুমর্হতি
68.12
তস্য তদ্বচনং শ্রুত্বা ত্বরিতোঽহমিহাগতঃ
শ্রুত্বা প্রমাণং ভবতী রাজ্ঞশ্চৈব নিবেদয়
68.13
এতচ্ছ্রুত্বাশ্রুপূর্ণাক্ষী পর্ণাদস্য বিশাং পতে
দময়ন্তী রহোঽভ্যেত্য মাতরং প্রত্যভাষত
68.14
অয়মর্থো ন সংবেদ্যো ভীমে মাতঃ কথংচন
ত্বত্সংনিধৌ সমাদেক্ষ্যে সুদেবং দ্বিজসত্তমম্
68.15
যথা ন নৃপতির্ভীমঃ প্রতিপদ্যেত মে মতম্
তথা ত্বয়া প্রয়ত্তব্যং মম চেত্প্রিয়মিচ্ছসি
68.16
যথা চাহং সমানীতা সুদেবেনাশু বান্ধবান্
তেনৈব মঙ্গলেনাশু সুদেবো যাতু মাচিরম্
সমানেতুং নলং মাতরয়োধ্যাং নগরীমিতঃ
68.17
বিশ্রান্তং চ ততঃ পশ্চাত্পর্ণাদং দ্বিজসত্তমম্
অর্চয়ামাস বৈদর্ভী ধনেনাতীব ভামিনী
68.18
নলে চেহাগতে বিপ্র ভূয়ো দাস্যামি তে বসু
ত্বয়া হি মে বহু কৃতং যথা নান্যঃ করিষ্যতি
যদ্ভর্ত্রাহং সমেষ্যামি শীঘ্রমেব দ্বিজোত্তম
68.19
এবমুক্তোঽর্চয়িত্বা তামাশীর্বাদৈঃ সুমঙ্গলৈঃ
গৃহানুপয়য়ৌ চাপি কৃতার্থঃ স মহামনাঃ
68.20
ততশ্চানায্য তং বিপ্রং দময়ন্তী যুধিষ্ঠির
অব্রবীত্সংনিধৌ মাতুর্দুঃখশোকসমন্বিতা
68.21
গত্বা সুদেব নগরীময়োধ্যাবাসিনং নৃপম্
ঋতুপর্ণং বচো ব্রূহি পতিমন্যং চিকীর্ষতী
আস্থাস্যতি পুনর্ভৈমী দময়ন্তী স্বয়ংবরম্
68.22
তত্র গচ্ছন্তি রাজানো রাজপুত্রাশ্চ সর্বশঃ
যথা চ গণিতঃ কালঃ শ্বোভূতে স ভবিষ্যতি
68.23
যদি সংভাবনীয়ং তে গচ্ছ শীঘ্রমরিংদম
সূর্যোদয়ে দ্বিতীয়ং সা ভর্তারং বরয়িষ্যতি
ন হি স জ্ঞায়তে বীরো নলো জীবন্মৃতোঽপি বা
68.24
এবং তয়া যথোক্তং বৈ গত্বা রাজানমব্রবীৎ
ঋতুপর্ণং মহারাজ সুদেবো ব্রাহ্মণস্তদা