অধ্যায় 67

67.1

দময়ন্ত্যুবাচ
মাং চেদিচ্ছসি জীবন্তীং মাতঃ সত্যং ব্রবীমি তে
নরবীরস্য বৈ তস্য নলস্যানয়নে যত

বৃহদশ্ব উবাচ
দময়ন্ত্যা তথোক্তা তু সা দেবী ভৃশদুঃখিতা
বাষ্পেণ পিহিতা রাজন্নোত্তরং কিংচিদব্রবীৎ

তদবস্থাং তু তাং দৃষ্ট্বা সর্বমন্তঃপুরং তদা
হাহাভূতমতীবাসীদ্ভৃশং চ প্ররুরোদ হ

ততো ভীমং মহারাজ ভার্যা বচনমব্রবীৎ
দময়ন্তী তব সুতা ভর্তারমনুশোচতি

অপকৃষ্য চ লজ্জাং মাং স্বয়মুক্তবতী নৃপ
প্রয়তন্তু তব প্রেষ্যাঃ পুণ্যশ্লোকস্য দর্শনে

তয়া প্রচোদিতো রাজা ব্রাহ্মণান্বশবর্তিনঃ
প্রাস্থাপয়দ্দিশঃ সর্বা যতধ্বং নলদর্শনে

ততো বিদর্ভাধিপতের্নিয়োগাদ্ব্রাহ্মণর্ষভাঃ
দময়ন্তীমথো দৃষ্ট্বা প্রস্থিতাঃ স্মেত্যথাব্রুবন্

অথ তানব্রবীদ্ভৈমী সর্বরাষ্ট্রেষ্বিদং বচঃ
ব্রুবধ্বং জনসংসত্সু তত্র তত্র পুনঃ পুনঃ

ক্ব নু ত্বং কিতব ছিত্ত্বা বস্ত্রার্ধং প্রস্থিতো মম
উত্সৃজ্য বিপিনে সুপ্তামনুরক্তাং প্রিয়াং প্রিয়

সা বৈ যথা সমাদিষ্টা তত্রাস্তে ত্বত্প্রতীক্ষিণী
দহ্যমানা ভৃশং বালা বস্ত্রার্ধেনাভিসংবৃতা

তস্যা রুদন্ত্যাঃ সততং তেন শোকেন পার্থিব
প্রসাদং কুরু বৈ বীর প্রতিবাক্যং দদস্ব চ

এতদন্যচ্চ বক্তব্যং কৃপাং কুর্যাদ্যথা ময়ি
বায়ুনা ধূয়মানো হি বনং দহতি পাবকঃ

ভর্তব্যা রক্ষণীয়া চ পত্নী হি পতিনা সদা
তন্নষ্টমুভয়ং কস্মাদ্ধর্মজ্ঞস্য সতস্তব

খ্যাতঃ প্রাজ্ঞঃ কুলীনশ্চ সানুক্রোশশ্চ ত্বং সদা
সংবৃত্তো নিরনুক্রোশঃ শঙ্কে মদ্ভাগ্যসংক্ষয়াৎ

স কুরুষ্ব মহেষ্বাস দয়াং ময়ি নরর্ষভ
আনৃশংস্যং পরো ধর্মস্ত্বত্ত এব হি মে শ্রুতম্

এবং ব্রুবাণান্যদি বঃ প্রতিব্রূয়াদ্ধি কশ্চন
স নরঃ সর্বথা জ্ঞেয়ঃ কশ্চাসৌ ক্ব চ বর্ততে

যচ্চ বো বচনং শ্রুত্বা ব্রূয়াত্প্রতিবচো নরঃ
তদাদায় বচঃ ক্ষিপ্রং মমাবেদ্যং দ্বিজোত্তমাঃ

যথা চ বো ন জানীয়াচ্চরতো ভীমশাসনাৎ
পুনরাগমনং চৈব তথা কার্যমতন্দ্রিতৈঃ

যদি বাসৌ সমৃদ্ধঃ স্যাদ্যদি বাপ্যধনো ভবেৎ
যদি বাপ্যর্থকামঃ স্যাজ্জ্ঞেয়মস্য চিকীর্ষিতম্

এবমুক্তাস্ত্বগচ্ছংস্তে ব্রাহ্মণাঃ সর্বতোদিশম্
নলং মৃগয়িতুং রাজংস্তথা ব্যসনিনং তদা

তে পুরাণি সরাষ্ট্রাণি গ্রামান্ঘোষাংস্তথাশ্রমান্
অন্বেষন্তো নলং রাজন্নাধিজগ্মুর্দ্বিজাতয়ঃ

তচ্চ বাক্যং তথা সর্বে তত্র তত্র বিশাং পতে
শ্রাবয়াং চক্রিরে বিপ্রা দময়ন্ত্যা যথেরিতম্