Utshovঅধ্যায় 66
66.1
সুদেব উবাচ
বিদর্ভরাজো ধর্মাত্মা ভীমো ভীমপরাক্রমঃ
সুতেয়ং তস্য কল্যাণী দময়ন্তীতি বিশ্রুতা
66.2
রাজা তু নৈষধো নাম বীরসেনসুতো নলঃ
ভার্যেয়ং তস্য কল্যাণী পুণ্যশ্লোকস্য ধীমতঃ
66.3
স বৈ দ্যূতে জিতো ভ্রাত্রা হৃতরাজ্যো মহীপতিঃ
দময়ন্ত্যা গতঃ সার্ধং ন প্রজ্ঞায়ত কর্হিচিৎ
66.4
তে বয়ং দময়ন্ত্যর্থে চরামঃ পৃথিবীমিমাম্
সেয়মাসাদিতা বালা তব পুত্রনিবেশনে
66.5
অস্যা রূপেণ সদৃশী মানুষী নেহ বিদ্যতে
অস্যাশ্চৈব ভ্রুবোর্মধ্যে সহজঃ পিপ্লুরুত্তমঃ
শ্যামায়াঃ পদ্মসংকাশো লক্ষিতোঽন্তর্হিতো ময়া
66.6
মলেন সংবৃতো হ্যস্যাস্তন্বভ্রেণেব চন্দ্রমাঃ
চিহ্নভূতো বিভূত্যর্থময়ং ধাত্রা বিনির্মিতঃ
66.7
প্রতিপত্কলুষেবেন্দোর্লেখা নাতি বিরাজতে
ন চাস্যা নশ্যতে রূপং বপুর্মলসমাচিতম্
অসংস্কৃতমপি ব্যক্তং ভাতি কাঞ্চনসংনিভম্
66.8
অনেন বপুষা বালা পিপ্লুনানেন চৈব হ
লক্ষিতেয়ং ময়া দেবী পিহিতোঽগ্নিরিবোষ্মণা
66.9
বৃহদশ্ব উবাচ
তচ্ছ্রুত্বা বচনং তস্য সুদেবস্য বিশাং পতে
সুনন্দা শোধয়ামাস পিপ্লুপ্রচ্ছাদনং মলম্
66.10
স মলেনাপকৃষ্টেন পিপ্লুস্তস্যা ব্যরোচত
দময়ন্ত্যাস্তদা ব্যভ্রে নভসীব নিশাকরঃ
66.11
পিপ্লুং দৃষ্ট্বা সুনন্দা চ রাজমাতা চ ভারত
রুদন্ত্যৌ তাং পরিষ্বজ্য মুহূর্তমিব তস্থতুঃ
উত্সৃজ্য বাষ্পং শনকৈ রাজমাতেদমব্রবীৎ
66.12
ভগিন্যা দুহিতা মেঽসি পিপ্লুনানেন সূচিতা
অহং চ তব মাতা চ রাজন্যস্য মহাত্মনঃ
সুতে দশার্ণাধিপতেঃ সুদাম্নশ্চারুদর্শনে
66.13
ভীমস্য রাজ্ঞঃ সা দত্তা বীরবাহোরহং পুনঃ
ত্বং তু জাতা ময়া দৃষ্টা দশার্ণেষু পিতুর্গৃহে
66.14
যথৈব তে পিতুর্গেহং তথেদমপি ভামিনি
যথৈব হি মমৈশ্বর্যং দময়ন্তি তথা তব
66.15
তাং প্রহৃষ্টেন মনসা দময়ন্তী বিশাং পতে
অভিবাদ্য মাতুর্ভগিনীমিদং বচনমব্রবীৎ
66.16
অজ্ঞায়মানাপি সতী সুখমস্ম্যুষিতেহ বৈ
সর্বকামৈঃ সুবিহিতা রক্ষ্যমাণা সদা ত্বয়া
66.17
সুখাত্সুখতরো বাসো ভবিষ্যতি ন সংশয়ঃ
চিরবিপ্রোষিতাং মাতর্মামনুজ্ঞাতুমর্হসি
66.18
দারকৌ চ হি মে নীতৌ বসতস্তত্র বালকৌ
পিত্রা বিহীনৌ শোকার্তৌ ময়া চৈব কথং নু তৌ
66.19
যদি চাপি প্রিয়ং কিংচিন্ময়ি কর্তুমিহেচ্ছসি
বিদর্ভান্যাতুমিচ্ছামি শীঘ্রং মে যানমাদিশ
66.20
বাঢমিত্যেব তামুক্ত্বা হৃষ্টা মাতৃষ্বসা নৃপ
গুপ্তাং বলেন মহতা পুত্রস্যানুমতে ততঃ
66.21
প্রস্থাপয়দ্রাজমাতা শ্রীমতা নরবাহিনা
যানেন ভরতশ্রেষ্ঠ স্বন্নপানপরিচ্ছদাম্
66.22
ততঃ সা নচিরাদেব বিদর্ভানগমচ্ছুভা
তাং তু বন্ধুজনঃ সর্বঃ প্রহৃষ্টঃ প্রত্যপূজয়ৎ
66.23
সর্বান্কুশলিনো দৃষ্ট্বা বান্ধবান্দারকৌ চ তৌ
মাতরং পিতরং চৈব সর্বং চৈব সখীজনম্
66.24
দেবতাঃ পূজয়ামাস ব্রাহ্মণাংশ্চ যশস্বিনী
বিধিনা পরেণ কল্যাণী দময়ন্তী বিশাং পতে
66.25
অতর্পয়ত্সুদেবং চ গোসহস্রেণ পার্থিবঃ
প্রীতো দৃষ্ট্বৈব তনয়াং গ্রামেণ দ্রবিণেন চ
66.26
সা ব্যুষ্টা রজনীং তত্র পিতুর্বেশ্মনি ভামিনী
বিশ্রান্তা মাতরং রাজন্নিদং বচনমব্রবীৎ