Utshovঅধ্যায় 65
65.1
বৃহদশ্ব উবাচ
হৃতরাজ্যে নলে ভীমঃ সভার্যে প্রেষ্যতাং গতে
দ্বিজান্প্রস্থাপয়ামাস নলদর্শনকাঙ্ক্ষয়া
65.2
সংদিদেশ চ তান্ভীমো বসু দত্ত্বা চ পুষ্কলম্
মৃগয়ধ্বং নলং চৈব দময়ন্তীং চ মে সুতাম্
65.3
অস্মিন্কর্মণি নিষ্পন্নে বিজ্ঞাতে নিষধাধিপে
গবাং সহস্রং দাস্যামি যো বস্তাবানয়িষ্যতি
অগ্রহারং চ দাস্যামি গ্রামং নগরসংমিতম্
65.4
ন চেচ্ছক্যাবিহানেতুং দময়ন্তী নলোঽপি বা
জ্ঞাতমাত্রেঽপি দাস্যামি গবাং দশশতং ধনম্
65.5
ইত্যুক্তাস্তে যয়ুর্হৃষ্টা ব্রাহ্মণাঃ সর্বতোদিশম্
পুররাষ্ট্রাণি চিন্বন্তো নৈষধং সহ ভার্যয়া
65.6
ততশ্চেদিপুরীং রম্যাং সুদেবো নাম বৈ দ্বিজঃ
বিচিন্বানোঽথ বৈদর্ভীমপশ্যদ্রাজবেশ্মনি
পুণ্যাহবাচনে রাজ্ঞঃ সুনন্দাসহিতাং স্থিতাম্
65.7
মন্দপ্রখ্যায়মানেন রূপেণাপ্রতিমেন তাম্
পিনদ্ধাং ধূমজালেন প্রভামিব বিভাবসোঃ
65.8
তাং সমীক্ষ্য বিশালাক্ষীমধিকং মলিনাং কৃশাম্
তর্কয়ামাস ভৈমীতি কারণৈরুপপাদয়ন্
65.9
সুদেব উবাচ
যথেয়ং মে পুরা দৃষ্টা তথারূপেয়মঙ্গনা
কৃতার্থোঽস্ম্যদ্য দৃষ্ট্বেমাং লোককান্তামিব শ্রিয়ম্
65.10
পূর্ণচন্দ্রাননাং শ্যামাং চারুবৃত্তপয়োধরাম্
কুর্বন্তীং প্রভয়া দেবীং সর্বা বিতিমিরা দিশঃ
65.11
চারুপদ্মপলাশাক্ষীং মন্মথস্য রতীমিব
ইষ্টাং সর্বস্য জগতঃ পূর্ণচন্দ্রপ্রভামিব
65.12
বিদর্ভসরসস্তস্মাদ্দৈবদোষাদিবোদ্ধৃতাম্
মলপঙ্কানুলিপ্তাঙ্গীং মৃণালীমিব তাং ভৃশম্
65.13
পৌর্ণমাসীমিব নিশাং রাহুগ্রস্তনিশাকরাম্
পতিশোকাকুলাং দীনাং শুষ্কস্রোতাং নদীমিব
65.14
বিধ্বস্তপর্ণকমলাং বিত্রাসিতবিহংগমাম্
হস্তিহস্তপরিক্লিষ্টাং ব্যাকুলামিব পদ্মিনীম্
65.15
সুকুমারীং সুজাতাঙ্গীং রত্নগর্ভগৃহোচিতাম্
দহ্যমানামিবোষ্ণেন মৃণালীমচিরোদ্ধৃতাম্
65.16
রূপৌদার্যগুণোপেতাং মণ্ডনার্হামমণ্ডিতাম্
চন্দ্রলেখামিব নবাং ব্যোম্নি নীলাভ্রসংবৃতাম্
65.17
কামভোগৈঃ প্রিয়ৈর্হীনাং হীনাং বন্ধুজনেন চ
দেহং ধারয়তীং দীনাং ভর্তৃদর্শনকাঙ্ক্ষয়া
65.18
ভর্তা নাম পরং নার্যা ভূষণং ভূষণৈর্বিনা
এষা বিরহিতা তেন শোভনাপি ন শোভতে
65.19
দুষ্করং কুরুতেঽত্যর্থং হীনো যদনয়া নলঃ
ধারয়ত্যাত্মনো দেহং ন শোকেনাবসীদতি
65.20
ইমামসিতকেশান্তাং শতপত্রায়তেক্ষণাম্
সুখার্হাং দুঃখিতাং দৃষ্ট্বা মমাপি ব্যথতে মনঃ
65.21
কদা নু খলু দুঃখস্য পারং যাস্যতি বৈ শুভা
ভর্তুঃ সমাগমাত্সাধ্বী রোহিণী শশিনো যথা
65.22
অস্যা নূনং পুনর্লাভান্নৈষধঃ প্রীতিমেষ্যতি
রাজা রাজ্যপরিভ্রষ্টঃ পুনর্লব্ধ্বেব মেদিনীম্
65.23
তুল্যশীলবয়োয়ুক্তাং তুল্যাভিজনসংয়ুতাম্
নৈষধোঽর্হতি বৈদর্ভীং তং চেয়মসিতেক্ষণা
65.24
যুক্তং তস্যাপ্রমেয়স্য বীর্যসত্ত্ববতো ময়া
সমাশ্বাসয়িতুং ভার্যাং পতিদর্শনলালসাম্
65.25
অয়মাশ্বাসয়াম্যেনাং পূর্ণচন্দ্রনিভাননাম্
অদৃষ্টপূর্বাং দুঃখস্য দুঃখার্তাং ধ্যানতত্পরাম্
65.26
বৃহদশ্ব উবাচ
এবং বিমৃশ্য বিবিধৈঃ কারণৈর্লক্ষণৈশ্চ তাম্
উপগম্য ততো ভৈমীং সুদেবো ব্রাহ্মণোঽব্রবীৎ
65.27
অহং সুদেবো বৈদর্ভি ভ্রাতুস্তে দয়িতঃ সখা
ভীমস্য বচনাদ্রাজ্ঞস্ত্বামন্বেষ্টুমিহাগতঃ
65.28
কুশলী তে পিতা রাজ্ঞি জনিত্রী ভ্রাতরশ্চ তে
আয়ুষ্মন্তৌ কুশলিনৌ তত্রস্থৌ দারকৌ চ তে
ত্বত্কৃতে বন্ধুবর্গাশ্চ গতসত্ত্বা ইবাসতে
65.29
অভিজ্ঞায় সুদেবং তু দময়ন্তী যুধিষ্ঠির
পর্যপৃচ্ছত্ততঃ সর্বান্ক্রমেণ সুহৃদঃ স্বকান্
65.30
রুরোদ চ ভৃশং রাজন্বৈদর্ভী শোককর্শিতা
দৃষ্ট্বা সুদেবং সহসা ভ্রাতুরিষ্টং দ্বিজোত্তমম্
65.31
ততো রুদন্তীং তাং দৃষ্ট্বা সুনন্দা শোককর্শিতাম্
সুদেবেন সহৈকান্তে কথয়ন্তীং চ ভারত
65.32
জনিত্র্যৈ প্রেষয়ামাস সৈরন্ধ্রী রুদতে ভৃশম্
ব্রাহ্মণেন সমাগম্য তাং বেদ যদি মন্যসে
65.33
অথ চেদিপতের্মাতা রাজ্ঞশ্চান্তঃপুরাত্তদা
জগাম যত্র সা বালা ব্রাহ্মণেন সহাভবৎ
65.34
ততঃ সুদেবমানায্য রাজমাতা বিশাং পতে
পপ্রচ্ছ ভার্যা কস্যেয়ং সুতা বা কস্য ভামিনী
65.35
কথং চ নষ্টা জ্ঞাতিভ্যো ভর্তুর্বা বামলোচনা
ত্বয়া চ বিদিতা বিপ্র কথমেবংগতা সতী
65.36
এতদিচ্ছাম্যহং ত্বত্তো জ্ঞাতুং সর্বমশেষতঃ
তত্ত্বেন হি মমাচক্ষ্ব পৃচ্ছন্ত্যা দেবরূপিণীম্
65.37
এবমুক্তস্তয়া রাজন্সুদেবো দ্বিজসত্তমঃ
সুখোপবিষ্ট আচষ্ট দময়ন্ত্যা যথাতথম্