অধ্যায় 64

64.1

বৃহদশ্ব উবাচ
তস্মিন্নন্তর্হিতে নাগে প্রয়য়ৌ নৈষধো নলঃ
ঋতুপর্ণস্য নগরং প্রাবিশদ্দশমেঽহনি

স রাজানমুপাতিষ্ঠদ্বাহুকোঽহমিতি ব্রুবন্
অশ্বানাং বাহনে যুক্তঃ পৃথিব্যাং নাস্তি মত্সমঃ

অর্থকৃচ্ছ্রেষু চৈবাহং প্রষ্টব্যো নৈপুণেষু চ
অন্নসংস্কারমপি চ জানাম্যন্যৈর্বিশেষতঃ

যানি শিল্পানি লোকেঽস্মিন্যচ্চাপ্যন্যত্সুদুষ্করম্
সর্বং যতিষ্যে তত্কর্তুমৃতুপর্ণ ভরস্ব মাম্

ঋতুপর্ণ উবাচ
বস বাহুক ভদ্রং তে সর্বমেতত্করিষ্যসি
শীঘ্রয়ানে সদা বুদ্ধির্ধীয়তে মে বিশেষতঃ

স ত্বমাতিষ্ঠ যোগং তং যেন শীঘ্রা হয়া মম
ভবেয়ুরশ্বাধ্যক্ষোঽসি বেতনং তে শতং শতাঃ

ত্বামুপস্থাস্যতশ্চেমৌ নিত্যং বার্ষ্ণেয়জীবলৌ
এতাভ্যাং রংস্যসে সার্ধং বস বৈ ময়ি বাহুক

বৃহদশ্ব উবাচ
এবমুক্তো নলস্তেন ন্যবসত্তত্র পূজিতঃ
ঋতুপর্ণস্য নগরে সহবার্ষ্ণেয়জীবলঃ

স তত্র নিবসন্রাজা বৈদর্ভীমনুচিন্তয়ন্
সায়ং সায়ং সদা চেমং শ্লোকমেকং জগাদ হ

ক্ব নু সা ক্ষুত্পিপাসার্তা শ্রান্তা শেতে তপস্বিনী
স্মরন্তী তস্য মন্দস্য কং বা সাদ্যোপতিষ্ঠতি

এবং ব্রুবন্তং রাজানং নিশায়াং জীবলোঽব্রবীৎ
কামেনাং শোচসে নিত্যং শ্রোতুমিচ্ছামি বাহুক

তমুবাচ নলো রাজা মন্দপ্রজ্ঞস্য কস্যচিৎ
আসীদ্বহুমতা নারী তস্যা দৃঢতরং চ সঃ

স বৈ কেনচিদর্থেন তয়া মন্দো ব্যয়ুজ্যত
বিপ্রয়ুক্তশ্চ মন্দাত্মা ভ্রমত্যসুখপীডিতঃ

দহ্যমানঃ স শোকেন দিবারাত্রমতন্দ্রিতঃ
নিশাকালে স্মরংস্তস্যাঃ শ্লোকমেকং স্ম গায়তি

স বৈ ভ্রমন্মহীং সর্বাং ক্বচিদাসাদ্য কিংচন
বসত্যনর্হস্তদ্দুঃখং ভূয় এবানুসংস্মরন্

সা তু তং পুরুষং নারী কৃচ্ছ্রেঽপ্যনুগতা বনে
ত্যক্তা তেনাল্পপুণ্যেন দুষ্করং যদি জীবতি

একা বালানভিজ্ঞা চ মার্গাণামতথোচিতা
ক্ষুত্পিপাসাপরীতা চ দুষ্করং যদি জীবতি

শ্বাপদাচরিতে নিত্যং বনে মহতি দারুণে
ত্যক্তা তেনাল্পপুণ্যেন মন্দপ্রজ্ঞেন মারিষ

ইত্যেবং নৈষধো রাজা দময়ন্তীমনুস্মরন্
অজ্ঞাতবাসমবসদ্রাজ্ঞস্তস্য নিবেশনে