UtshovChapter 64
64.1
बृहदश्व उवाच
तस्मिन्नन्तर्हिते नागे प्रययौ नैषधो नलः
ऋतुपर्णस्य नगरं प्राविशद्दशमेऽहनि
Brihadashva uvacha
Tasminnantarhite nage prayayau naishadho nalah
Rituparnasya nagaram pravishaddashamehani
64.2
स राजानमुपातिष्ठद्बाहुकोऽहमिति ब्रुवन्
अश्वानां वाहने युक्तः पृथिव्यां नास्ति मत्समः
Sa rajanamupatishthadbahukohamiti bruvan
Ashvanam vahane yuktah prithivyam nasti matsamah
64.3
अर्थकृच्छ्रेषु चैवाहं प्रष्टव्यो नैपुणेषु च
अन्नसंस्कारमपि च जानाम्यन्यैर्विशेषतः
Arthakrichchhreshu chaivaham prashtavyo naipuneshu cha
Annasanskaramapi cha janamyanyairvisheshatah
64.4
यानि शिल्पानि लोकेऽस्मिन्यच्चाप्यन्यत्सुदुष्करम्
सर्वं यतिष्ये तत्कर्तुमृतुपर्ण भरस्व माम्
Yani shilpani lokesminyachchapyanyatsudushkaram
Sarvam yatishye tatkartumrituparna bharasva mam
64.5
ऋतुपर्ण उवाच
वस बाहुक भद्रं ते सर्वमेतत्करिष्यसि
शीघ्रयाने सदा बुद्धिर्धीयते मे विशेषतः
Rituparna uvacha
Vasa bahuka bhadram te sarvametatkarishyasi
Shighrayane sada buddhirdhiyate me visheshatah
64.6
स त्वमातिष्ठ योगं तं येन शीघ्रा हया मम
भवेयुरश्वाध्यक्षोऽसि वेतनं ते शतं शताः
Sa tvamatishtha yogam tam yena shighra haya mama
Bhaveyurashvadhyakshosi vetanam te shatam shatah
64.7
त्वामुपस्थास्यतश्चेमौ नित्यं वार्ष्णेयजीवलौ
एताभ्यां रंस्यसे सार्धं वस वै मयि बाहुक
Tvamupasthasyatashchemau nityam varshneyajivalau
Etabhyam ransyase sardham vasa vai mayi bahuka
64.8
बृहदश्व उवाच
एवमुक्तो नलस्तेन न्यवसत्तत्र पूजितः
ऋतुपर्णस्य नगरे सहवार्ष्णेयजीवलः
Brihadashva uvacha
Evamukto nalastena nyavasattatra pujitah
Rituparnasya nagare sahavarshneyajivalah
64.9
स तत्र निवसन्राजा वैदर्भीमनुचिन्तयन्
सायं सायं सदा चेमं श्लोकमेकं जगाद ह
Sa tatra nivasanraja vaidarbhimanuchintayan
Sayam sayam sada chemam shlokamekam jagada ha
64.10
क्व नु सा क्षुत्पिपासार्ता श्रान्ता शेते तपस्विनी
स्मरन्ती तस्य मन्दस्य कं वा साद्योपतिष्ठति
Kva nu sa kshutpipasarta shranta shete tapasvini
Smaranti tasya mandasya kam va sadyopatishthati
64.11
एवं ब्रुवन्तं राजानं निशायां जीवलोऽब्रवीत्
कामेनां शोचसे नित्यं श्रोतुमिच्छामि बाहुक
Evam bruvantam rajanam nishayam jivalobravit
Kamenam shochase nityam shrotumichchhami bahuka
64.12
तमुवाच नलो राजा मन्दप्रज्ञस्य कस्यचित्
आसीद्बहुमता नारी तस्या दृढतरं च सः
Tamuvacha nalo raja mandapragyasya kasyachit
Asidbahumata nari tasya dridhataram cha sah
64.13
स वै केनचिदर्थेन तया मन्दो व्ययुज्यत
विप्रयुक्तश्च मन्दात्मा भ्रमत्यसुखपीडितः
Sa vai kenachidarthena taya mando vyayujyata
Viprayuktashcha mandatma bhramatyasukhapiditah
64.14
दह्यमानः स शोकेन दिवारात्रमतन्द्रितः
निशाकाले स्मरंस्तस्याः श्लोकमेकं स्म गायति
Dahyamanah sa shokena divaratramatandritah
Nishakale smaranstasyah shlokamekam sma gayati
64.15
स वै भ्रमन्महीं सर्वां क्वचिदासाद्य किंचन
वसत्यनर्हस्तद्दुःखं भूय एवानुसंस्मरन्
Sa vai bhramanmahim sarvam kvachidasadya kinchana
Vasatyanarhastadduhkham bhuya evanusansmaran
64.16
सा तु तं पुरुषं नारी कृच्छ्रेऽप्यनुगता वने
त्यक्ता तेनाल्पपुण्येन दुष्करं यदि जीवति
Sa tu tam purusham nari krichchhrepyanugata vane
Tyakta tenalpapunyena dushkaram yadi jivati
64.17
एका बालानभिज्ञा च मार्गाणामतथोचिता
क्षुत्पिपासापरीता च दुष्करं यदि जीवति
Eka balanabhigya cha marganamatathochita
Kshutpipasaparita cha dushkaram yadi jivati
64.18
श्वापदाचरिते नित्यं वने महति दारुणे
त्यक्ता तेनाल्पपुण्येन मन्दप्रज्ञेन मारिष
Shvapadacharite nityam vane mahati darune
Tyakta tenalpapunyena mandapragyena marisha
64.19
इत्येवं नैषधो राजा दमयन्तीमनुस्मरन्
अज्ञातवासमवसद्राज्ञस्तस्य निवेशने
Ityevam naishadho raja damayantimanusmaran
Agyatavasamavasadragyastasya niveshane