অধ্যায় 63

63.1

বৃহদশ্ব উবাচ
উত্সৃজ্য দময়ন্তীং তু নলো রাজা বিশাং পতে
দদর্শ দাবং দহ্যন্তং মহান্তং গহনে বনে

63.2

তত্র শুশ্রাব মধ্যেঽগ্নৌ শব্দং ভূতস্য কস্যচিৎ
অভিধাব নলেত্যুচ্চৈঃ পুণ্যশ্লোকেতি চাসকৃৎ

63.3

মা ভৈরিতি নলশ্চোক্ত্বা মধ্যমগ্নেঃ প্রবিশ্য তম্
দদর্শ নাগরাজানং শয়ানং কুণ্ডলীকৃতম্

63.4

স নাগঃ প্রাঞ্জলির্ভূত্বা বেপমানো নলং তদা
উবাচ বিদ্ধি মাং রাজন্নাগং কর্কোটকং নৃপ

63.5

ময়া প্রলব্ধো ব্রহ্মর্ষিরনাগাঃ সুমহাতপাঃ
তেন মন্যুপরীতেন শপ্তোঽস্মি মনুজাধিপ

63.6

তস্য শাপান্ন শক্নোমি পদাদ্বিচলিতুং পদম্
উপদেক্ষ্যামি তে শ্রেয়স্ত্রাতুমর্হতি মাং ভবান্

63.7

সখা চ তে ভবিষ্যামি মত্সমো নাস্তি পন্নগঃ
লঘুশ্চ তে ভবিষ্যামি শীঘ্রমাদায় গচ্ছ মাম্

63.8

এবমুক্ত্বা স নাগেন্দ্রো বভূবাঙ্গুষ্ঠমাত্রকঃ
তং গৃহীত্বা নলঃ প্রায়াদুদ্দেশং দাববর্জিতম্

63.9

আকাশদেশমাসাদ্য বিমুক্তং কৃষ্ণবর্ত্মনা
উত্স্রষ্টুকামং তং নাগঃ পুনঃ কর্কোটকোঽব্রবীৎ

63.10

পদানি গণয়ন্গচ্ছ স্বানি নৈষধ কানিচিৎ
তত্র তেঽহং মহারাজ শ্রেয়ো ধাস্যামি যত্পরম্

63.11

ততঃ সংখ্যাতুমারব্ধমদশদ্দশমে পদে
তস্য দষ্টস্য তদ্রূপং ক্ষিপ্রমন্তরধীয়ত

63.12

স দৃষ্ট্বা বিস্মিতস্তস্থাবাত্মানং বিকৃতং নলঃ
স্বরূপধারিণং নাগং দদর্শ চ মহীপতিঃ

63.13

ততঃ কর্কোটকো নাগঃ সান্ত্বয়ন্নলমব্রবীৎ
ময়া তেঽন্তর্হিতং রূপং ন ত্বা বিদ্যুর্জনা ইতি

63.14

যত্কৃতে চাসি বিকৃতো দুঃখেন মহতা নল
বিষেণ স মদীয়েন ত্বয়ি দুঃখং নিবত্স্যতি

63.15

বিষেণ সংবৃতৈর্গাত্রৈর্যাবত্ত্বাং ন বিমোক্ষ্যতি
তাবত্ত্বয়ি মহারাজ দুঃখং বৈ স নিবত্স্যতি

63.16

অনাগা যেন নিকৃতস্ত্বমনর্হো জনাধিপ
ক্রোধাদসূয়য়িত্বা তং রক্ষা মে ভবতঃ কৃতা

63.17

ন তে ভয়ং নরব্যাঘ্র দংষ্ট্রিভ্যঃ শত্রুতোঽপি বা
ব্রহ্মবিদ্ভ্যশ্চ ভবিতা মত্প্রসাদান্নরাধিপ

63.18

রাজন্বিষনিমিত্তা চ ন তে পীডা ভবিষ্যতি
সংগ্রামেষু চ রাজেন্দ্র শশ্বজ্জয়মবাপ্স্যসি

63.19

গচ্ছ রাজন্নিতঃ সূতো বাহুকোঽহমিতি ব্রুবন্
সমীপমৃতুপর্ণস্য স হি বেদাক্ষনৈপুণম্
অয়োধ্যাং নগরীং রম্যামদ্যৈব নিষধেশ্বর

63.20

স তেঽক্ষহৃদয়ং দাতা রাজাশ্বহৃদয়েন বৈ
ইক্ষ্বাকুকুলজঃ শ্রীমান্মিত্রং চৈব ভবিষ্যতি

63.21

ভবিষ্যসি যদাক্ষজ্ঞঃ শ্রেয়সা যোক্ষ্যসে তদা
সমেষ্যসি চ দারৈস্ত্বং মা স্ম শোকে মনঃ কৃথাঃ
রাজ্যেন তনয়াভ্যাং চ সত্যমেতদ্ব্রবীমি তে

63.22

স্বরূপং চ যদা দ্রষ্টুমিচ্ছেথাস্ত্বং নরাধিপ
সংস্মর্তব্যস্তদা তেঽহং বাসশ্চেদং নিবাসয়েঃ

63.23

অনেন বাসসাচ্ছন্নঃ স্বরূপং প্রতিপত্স্যসে
ইত্যুক্ত্বা প্রদদাবস্মৈ দিব্যং বাসোয়ুগং তদা

63.24

এবং নলং সমাদিশ্য বাসো দত্ত্বা চ কৌরব
নাগরাজস্ততো রাজংস্তত্রৈবান্তরধীয়ত

Contains text from DharmicData, made available under the Open Database License (ODbL). Simple meanings are written by AI and can contain mistakes.