Utshovঅধ্যায় 62
62.1
বৃহদশ্ব উবাচ
সা তচ্ছ্রুত্বানবদ্যাঙ্গী সার্থবাহবচস্তদা
অগচ্ছত্তেন বৈ সার্ধং ভর্তৃদর্শনলালসা
62.2
অথ কালে বহুতিথে বনে মহতি দারুণে
তডাগং সর্বতোভদ্রং পদ্মসৌগন্ধিকং মহৎ
62.3
দদৃশুর্বণিজো রম্যং প্রভূতয়বসেন্ধনম্
বহুমূলফলোপেতং নানাপক্ষিগণৈর্বৃতম্
62.4
তং দৃষ্ট্বা মৃষ্টসলিলং মনোহরসুখাবহম্
সুপরিশ্রান্তবাহাস্তে নিবেশায় মনো দধুঃ
62.5
সংমতে সার্থবাহস্য বিবিশুর্বনমুত্তমম্
উবাস সার্থঃ সুমহান্বেলামাসাদ্য পশ্চিমাম্
62.6
অথার্ধরাত্রসময়ে নিঃশব্দস্তিমিতে তদা
সুপ্তে সার্থে পরিশ্রান্তে হস্তিয়ূথমুপাগমৎ
পানীয়ার্থং গিরিনদীং মদপ্রস্রবণাবিলাম্
62.7
মার্গং সংরুধ্য সংসুপ্তং পদ্মিন্যাঃ সার্থমুত্তমম্
সুপ্তং মমর্দ সহসা চেষ্টমানং মহীতলে
62.8
হাহারবং প্রমুঞ্চন্তঃ সার্থিকাঃ শরণার্থিনঃ
বনগুল্মাংশ্চ ধাবন্তো নিদ্রান্ধা মহতো ভয়াৎ
কেচিদ্দন্তৈঃ করৈঃ কেচিত্কেচিত্পদ্ভ্যাং হতা নরাঃ
62.9
গোখরোষ্ট্রাশ্ববহুলং পদাতিজনসংকুলম্
ভয়ার্তং ধাবমানং তত্পরস্পরহতং তদা
62.10
ঘোরান্নাদান্বিমুঞ্চন্তো নিপেতুর্ধরণীতলে
বৃক্ষেষ্বাসজ্য সংভগ্নাঃ পতিতা বিষমেষু চ
তথা তন্নিহতং সর্বং সমৃদ্ধং সার্থমণ্ডলম্
62.11
অথাপরেদ্যুঃ সংপ্রাপ্তে হতশিষ্টা জনাস্তদা
বনগুল্মাদ্বিনিষ্ক্রম্য শোচন্তো বৈশসং কৃতম্
ভ্রাতরং পিতরং পুত্রং সখায়ং চ জনাধিপ
62.12
অশোচত্তত্র বৈদর্ভী কিং নু মে দুষ্কৃতং কৃতম্
যোঽপি মে নির্জনেঽরণ্যে সংপ্রাপ্তোঽয়ং জনার্ণবঃ
হতোঽয়ং হস্তিয়ূথেন মন্দভাগ্যান্মমৈব তু
62.13
প্রাপ্তব্যং সুচিরং দুঃখং ময়া নূনমসংশয়ম্
নাপ্রাপ্তকালো ম্রিয়তে শ্রুতং বৃদ্ধানুশাসনম্
62.14
যন্নাহমদ্য মৃদিতা হস্তিয়ূথেন দুঃখিতা
ন হ্যদৈবকৃতং কিংচিন্নরাণামিহ বিদ্যতে
62.15
ন চ মে বালভাবেঽপি কিংচিদ্ব্যপকৃতং কৃতম্
কর্মণা মনসা বাচা যদিদং দুঃখমাগতম্
62.16
মন্যে স্বয়ংবরকৃতে লোকপালাঃ সমাগতাঃ
প্রত্যাখ্যাতা ময়া তত্র নলস্যার্থায় দেবতাঃ
নূনং তেষাং প্রভাবেন বিয়োগং প্রাপ্তবত্যহম্
62.17
এবমাদীনি দুঃখানি সা বিলপ্য বরাঙ্গনা
হতশিষ্টৈঃ সহ তদা ব্রাহ্মণৈর্বেদপারগৈঃ
অগচ্ছদ্রাজশার্দূল দুঃখশোকপরায়ণা
62.18
গচ্ছন্তী সা চিরাত্কালাত্পুরমাসাদয়ন্মহৎ
সায়াহ্নে চেদিরাজস্য সুবাহোঃ সত্যবাদিনঃ
বস্ত্রার্ধকর্তসংবীতা প্রবিবেশ পুরোত্তমম্
62.19
তাং বিবর্ণাং কৃশাং দীনাং মুক্তকেশীমমার্জনাম্
উন্মত্তামিব গচ্ছন্তীং দদৃশুঃ পুরবাসিনঃ
62.20
প্রবিশন্তীং তু তাং দৃষ্ট্বা চেদিরাজপুরীং তদা
অনুজগ্মুস্ততো বালা গ্রামিপুত্রাঃ কুতূহলাৎ
62.21
সা তৈঃ পরিবৃতাগচ্ছত্সমীপং রাজবেশ্মনঃ
তাং প্রাসাদগতাপশ্যদ্রাজমাতা জনৈর্বৃতাম্
62.22
সা জনং বারয়িত্বা তং প্রাসাদতলমুত্তমম্
আরোপ্য বিস্মিতা রাজন্দময়ন্তীমপৃচ্ছত
62.23
এবমপ্যসুখাবিষ্টা বিভর্ষি পরমং বপুঃ
ভাসি বিদ্যুদিবাভ্রেষু শংস মে কাসি কস্য বা
62.24
ন হি তে মানুষং রূপং ভূষণৈরপি বর্জিতম্
অসহায়া নরেভ্যশ্চ নোদ্বিজস্যমরপ্রভে
62.25
তচ্ছ্রুত্বা বচনং তস্যা ভৈমী বচনমব্রবীৎ
মানুষীং মাং বিজানীহি ভর্তারং সমনুব্রতাম্
62.26
সৈরন্ধ্রীং জাতিসংপন্নাং ভুজিষ্যাং কামবাসিনীম্
ফলমূলাশনামেকাং যত্রসায়ংপ্রতিশ্রয়াম্
62.27
অসংখ্যেয়গুণো ভর্তা মাং চ নিত্যমনুব্রতঃ
ভর্তারমপি তং বীরং ছায়েবানপগা সদা
62.28
তস্য দৈবাত্প্রসঙ্গোঽভূদতিমাত্রং স্ম দেবনে
দ্যূতে স নির্জিতশ্চৈব বনমেকোঽভ্যুপেয়িবান্
62.29
তমেকবসনং বীরমুন্মত্তমিব বিহ্বলম্
আশ্বাসয়ন্তী ভর্তারমহমন্বগমং বনম্
62.30
স কদাচিদ্বনে বীরঃ কস্মিংশ্চিত্কারণান্তরে
ক্ষুত্পরীতঃ সুবিমনাস্তদপ্যেকং ব্যসর্জয়ৎ
62.31
তমেকবসনং নগ্নমুন্মত্তং গতচেতসম্
অনুব্রজন্তী বহুলা ন স্বপামি নিশাঃ সদা
62.32
ততো বহুতিথে কালে সুপ্তামুত্সৃজ্য মাং ক্বচিৎ
বাসসোঽর্ধং পরিচ্ছিদ্য ত্যক্তবান্মামনাগসম্
62.33
তং মার্গমাণা ভর্তারং দহ্যমানা দিনক্ষপাঃ
ন বিন্দাম্যমরপ্রখ্যং প্রিয়ং প্রাণধনেশ্বরম্
62.34
তামশ্রুপরিপূর্ণাক্ষীং বিলপন্তীং তথা বহু
রাজমাতাব্রবীদার্তাং ভৈমীমার্ততরা স্বয়ম্
62.35
বসস্ব ময়ি কল্যাণি প্রীতির্মে ত্বয়ি বর্ততে
মৃগয়িষ্যন্তি তে ভদ্রে ভর্তারং পুরুষা মম
62.36
অথ বা স্বয়মাগচ্ছেত্পরিধাবন্নিতস্ততঃ
ইহৈব বসতী ভদ্রে ভর্তারমুপলপ্স্যসে
62.37
রাজমাতুর্বচঃ শ্রুত্বা দময়ন্তী বচোঽব্রবীৎ
সময়েনোত্সহে বস্তুং ত্বয়ি বীরপ্রজায়িনি
62.38
উচ্ছিষ্টং নৈব ভুঞ্জীয়াং ন কুর্যাং পাদধাবনম্
ন চাহং পুরুষানন্যান্সংভাষেয়ং কথংচন
62.39
প্রার্থয়েদ্যদি মাং কশ্চিদ্দণ্ড্যস্তে স পুমান্ভবেৎ
ভর্তুরন্বেষণার্থং তু পশ্যেয়ং ব্রাহ্মণানহম্
62.40
যদ্যেবমিহ কর্তব্যং বসাম্যহমসংশয়ম্
অতোঽন্যথা ন মে বাসো বর্ততে হৃদয়ে ক্বচিৎ
62.41
তাং প্রহৃষ্টেন মনসা রাজমাতেদমব্রবীৎ
সর্বমেতত্করিষ্যামি দিষ্ট্যা তে ব্রতমীদৃশম্
62.42
এবমুক্ত্বা ততো ভৈমীং রাজমাতা বিশাং পতে
উবাচেদং দুহিতরং সুনন্দাং নাম ভারত
62.43
সৈরন্ধ্রীমভিজানীষ্ব সুনন্দে দেবরূপিণীম্
এতয়া সহ মোদস্ব নিরুদ্বিগ্নমনাঃ স্বয়ম্