Utshovঅধ্যায় 61
61.1
বৃহদশ্ব উবাচ
সা নিহত্য মৃগব্যাধং প্রতস্থে কমলেক্ষণা
বনং প্রতিভয়ং শূন্যং ঝিল্লিকাগণনাদিতম্
61.2
সিংহব্যাঘ্রবরাহর্ক্ষরুরুদ্বীপিনিষেবিতম্
নানাপক্ষিগণাকীর্ণং ম্লেচ্ছতস্করসেবিতম্
61.3
শালবেণুধবাশ্বত্থতিন্দুকেঙ্গুদকিংশুকৈঃ
অর্জুনারিষ্টসংছন্নং চন্দনৈশ্চ সশাল্মলৈঃ
61.4
জম্ব্বাম্রলোধ্রখদিরশাকবেত্রসমাকুলম্
কাশ্মর্যামলকপ্লক্ষকদম্বোদুম্বরাবৃতম্
61.5
বদরীবিল্বসংছন্নং ন্যগ্রোধৈশ্চ সমাকুলম্
প্রিয়ালতালখর্জূরহরীতকবিভীতকৈঃ
61.6
নানাধাতুশতৈর্নদ্ধান্বিবিধানপি চাচলান্
নিকুঞ্জান্পক্ষিসংঘুষ্টান্দরীশ্চাদ্ভুতদর্শনাঃ
নদীঃ সরাংসি বাপীশ্চ বিবিধাংশ্চ মৃগদ্বিজান্
61.7
সা বহূন্ভীমরূপাংশ্চ পিশাচোরগরাক্ষসান্
পল্বলানি তডাগানি গিরিকূটানি সর্বশঃ
সরিতঃ সাগরাংশ্চৈব দদর্শাদ্ভুতদর্শনান্
61.8
যূথশো দদৃশে চাত্র বিদর্ভাধিপনন্দিনী
মহিষান্বরাহান্গোমায়ূনৃক্ষবানরপন্নগান্
61.9
তেজসা যশসা স্থিত্যা শ্রিয়া চ পরয়া যুতা
বৈদর্ভী বিচরত্যেকা নলমন্বেষতী তদা
61.10
নাবিভ্যত্সা নৃপসুতা ভৈমী তত্রাথ কস্যচিৎ
দারুণামটবীং প্রাপ্য ভর্তৃব্যসনকর্শিতা
61.11
বিদর্ভতনয়া রাজন্বিললাপ সুদুঃখিতা
ভর্তৃশোকপরীতাঙ্গী শিলাতলসমাশ্রিতা
61.12
দময়ন্ত্যুবাচ
সিংহোরস্ক মহাবাহো নিষধানাং জনাধিপ
ক্ব নু রাজন্গতোঽসীহ ত্যক্ত্বা মাং নির্জনে বনে
61.13
অশ্বমেধাদিভির্বীর ক্রতুভিঃ স্বাপ্তদক্ষিণৈঃ
কথমিষ্ট্বা নরব্যাঘ্র ময়ি মিথ্যা প্রবর্তসে
61.14
যত্ত্বয়োক্তং নরব্যাঘ্র মত্সমক্ষং মহাদ্যুতে
কর্তুমর্হসি কল্যাণ তদৃতং পার্থিবর্ষভ
61.15
যথোক্তং বিহগৈর্হংসৈঃ সমীপে তব ভূমিপ
মত্সকাশে চ তৈরুক্তং তদবেক্ষিতুমর্হসি
61.16
চত্বার একতো বেদাঃ সাঙ্গোপাঙ্গাঃ সবিস্তরাঃ
স্বধীতা মানবশ্রেষ্ঠ সত্যমেকং কিলৈকতঃ
61.17
তস্মাদর্হসি শত্রুঘ্ন সত্যং কর্তুং নরেশ্বর
উক্তবানসি যদ্বীর মত্সকাশে পুরা বচঃ
61.18
হা বীর ননু নামাহমিষ্টা কিল তবানঘ
অস্যামটব্যাং ঘোরায়াং কিং মাং ন প্রতিভাষসে
61.19
ভর্ত্সয়ত্যেষ মাং রৌদ্রো ব্যাত্তাস্যো দারুণাকৃতিঃ
অরণ্যরাট্ক্ষুধাবিষ্টঃ কিং মাং ন ত্রাতুমর্হসি
61.20
ন মে ত্বদন্যা সুভগে প্রিয়া ইত্যব্রবীস্তদা
তামৃতাং কুরু কল্যাণ পুরোক্তাং ভারতীং নৃপ
61.21
উন্মত্তাং বিলপন্তীং মাং ভার্যামিষ্টাং নরাধিপ
ঈপ্সিতামীপ্সিতো নাথ কিং মাং ন প্রতিভাষসে
61.22
কৃশাং দীনাং বিবর্ণাং চ মলিনাং বসুধাধিপ
বস্ত্রার্ধপ্রাবৃতামেকাং বিলপন্তীমনাথবৎ
61.23
যূথভ্রষ্টামিবৈকাং মাং হরিণীং পৃথুলোচন
ন মানয়সি মানার্হ রুদতীমরিকর্শন
61.24
মহারাজ মহারণ্যে মামিহৈকাকিনীং সতীম্
আভাষমাণাং স্বাং পত্নীং কিং মাং ন প্রতিভাষসে
61.25
কুলশীলোপসংপন্নং চারুসর্বাঙ্গশোভনম্
নাদ্য ত্বামনুপশ্যামি গিরাবস্মিন্নরোত্তম
বনে চাস্মিন্মহাঘোরে সিংহব্যাঘ্রনিষেবিতে
61.26
শয়ানমুপবিষ্টং বা স্থিতং বা নিষধাধিপ
প্রস্থিতং বা নরশ্রেষ্ঠ মম শোকবিবর্ধন
61.27
কং নু পৃচ্ছামি দুঃখার্তা ত্বদর্থে শোককর্শিতা
কচ্চিদ্দৃষ্টস্ত্বয়ারণ্যে সংগত্যেহ নলো নৃপঃ
61.28
কো নু মে কথয়েদদ্য বনেঽস্মিন্বিষ্ঠিতং নলম্
অভিরূপং মহাত্মানং পরব্যূহবিনাশনম্
61.29
যমন্বেষসি রাজানং নলং পদ্মনিভেক্ষণম্
অয়ং স ইতি কস্যাদ্য শ্রোষ্যামি মধুরাং গিরম্
61.30
অরণ্যরাডয়ং শ্রীমাংশ্চতুর্দংষ্ট্রো মহাহনুঃ
শার্দূলোঽভিমুখঃ প্রৈতি পৃচ্ছাম্যেনমশঙ্কিতা
61.31
ভবান্মৃগাণামধিপস্ত্বমস্মিন্কাননে প্রভুঃ
বিদর্ভরাজতনয়াং দময়ন্তীতি বিদ্ধি মাম্
61.32
নিষধাধিপতের্ভার্যাং নলস্যামিত্রঘাতিনঃ
পতিমন্বেষতীমেকাং কৃপণাং শোককর্শিতাম্
আশ্বাসয় মৃগেন্দ্রেহ যদি দৃষ্টস্ত্বয়া নলঃ
61.33
অথ বারণ্যনৃপতে নলং যদি ন শংসসি
মামদস্ব মৃগশ্রেষ্ঠ বিশোকাং কুরু দুঃখিতাম্
61.34
শ্রুত্বারণ্যে বিলপিতং মমৈষ মৃগরাট্স্বয়ম্
যাত্যেতাং মৃষ্টসলিলামাপগাং সাগরংগমাম্
61.35
ইমং শিলোচ্চয়ং পুণ্যং শৃঙ্গৈর্বহুভিরুচ্ছ্রিতৈঃ
বিরাজদ্ভির্দিবস্পৃগ্ভির্নৈকবর্ণৈর্মনোরমৈঃ
61.36
নানাধাতুসমাকীর্ণং বিবিধোপলভূষিতম্
অস্যারণ্যস্য মহতঃ কেতুভূতমিবোচ্ছ্রিতম্
61.37
সিংহশার্দূলমাতঙ্গবরাহর্ক্ষমৃগায়ুতম্
পতত্রিভির্বহুবিধৈঃ সমন্তাদনুনাদিতম্
61.38
কিংশুকাশোকবকুলপুংনাগৈরুপশোভিতম্
সরিদ্ভিঃ সবিহংগাভিঃ শিখরৈশ্চোপশোভিতম্
গিরিরাজমিমং তাবত্পৃচ্ছামি নৃপতিং প্রতি
61.39
ভগবন্নচলশ্রেষ্ঠ দিব্যদর্শন বিশ্রুত
শরণ্য বহুকল্যাণ নমস্তেঽস্তু মহীধর
61.40
প্রণমে ত্বাভিগম্যাহং রাজপুত্রীং নিবোধ মাম্
রাজ্ঞঃ স্নুষাং রাজভার্যাং দময়ন্তীতি বিশ্রুতাম্
61.41
রাজা বিদর্ভাধিপতিঃ পিতা মম মহারথঃ
ভীমো নাম ক্ষিতিপতিশ্চাতুর্বর্ণ্যস্য রক্ষিতা
61.42
রাজসূয়াশ্বমেধানাং ক্রতূনাং দক্ষিণাবতাম্
আহর্তা পার্থিবশ্রেষ্ঠঃ পৃথুচার্বঞ্চিতেক্ষণঃ
61.43
ব্রহ্মণ্যঃ সাধুবৃত্তশ্চ সত্যবাগনসূয়কঃ
শীলবান্সুসমাচারঃ পৃথুশ্রীর্ধর্মবিচ্ছুচিঃ
61.44
সম্যগ্গোপ্তা বিদর্ভাণাং নির্জিতারিগণঃ প্রভুঃ
তস্য মাং বিদ্ধি তনয়াং ভগবংস্ত্বামুপস্থিতাম্
61.45
নিষধেষু মহাশৈল শ্বশুরো মে নৃপোত্তমঃ
সুগৃহীতনামা বিখ্যাতো বীরসেন ইতি স্ম হ
61.46
তস্য রাজ্ঞঃ সুতো বীরঃ শ্রীমান্সত্যপরাক্রমঃ
ক্রমপ্রাপ্তং পিতুঃ স্বং যো রাজ্যং সমনুশাস্তি হ
61.47
নলো নামারিদমনঃ পুণ্যশ্লোক ইতি শ্রুতঃ
ব্রহ্মণ্যো বেদবিদ্বাগ্মী পুণ্যকৃত্সোমপোঽগ্নিচিৎ
61.48
যষ্টা দাতা চ যোদ্ধা চ সম্যক্চৈব প্রশাসিতা
তস্য মামচলশ্রেষ্ঠ বিদ্ধি ভার্যামিহাগতাম্
61.49
ত্যক্তশ্রিয়ং ভর্তৃহীনামনাথাং ব্যসনান্বিতাম্
অন্বেষমাণাং ভর্তারং তং বৈ নরবরোত্তমম্
61.50
খমুল্লিখদ্ভিরেতৈর্হি ত্বয়া শৃঙ্গশতৈর্নৃপঃ
কচ্চিদ্দৃষ্টোঽচলশ্রেষ্ঠ বনেঽস্মিন্দারুণে নলঃ
61.51
গজেন্দ্রবিক্রমো ধীমান্দীর্ঘবাহুরমর্ষণঃ
বিক্রান্তঃ সত্যবাগ্ধীরো ভর্তা মম মহায়শাঃ
নিষধানামধিপতিঃ কচ্চিদ্দৃষ্টস্ত্বয়া নলঃ
61.52
কিং মাং বিলপতীমেকাং পর্বতশ্রেষ্ঠ দুঃখিতাম্
গিরা নাশ্বাসয়স্যদ্য স্বাং সুতামিব দুঃখিতাম্
61.53
বীর বিক্রান্ত ধর্মজ্ঞ সত্যসংধ মহীপতে
যদ্যস্যস্মিন্বনে রাজন্দর্শয়াত্মানমাত্মনা
61.54
কদা নু স্নিগ্ধগম্ভীরাং জীমূতস্বনসংনিভাম্
শ্রোষ্যামি নৈষধস্যাহং বাচং তামমৃতোপমাম্
61.55
বৈদর্ভীত্যেব কথিতাং শুভাং রাজ্ঞো মহাত্মনঃ
আম্নায়সারিণীমৃদ্ধাং মম শোকনিবর্হিণীম্
61.56
ইতি সা তং গিরিশ্রেষ্ঠমুক্ত্বা পার্থিবনন্দিনী
দময়ন্তী ততো ভূয়ো জগাম দিশমুত্তরাম্
61.57
সা গত্বা ত্রীনহোরাত্রান্দদর্শ পরমাঙ্গনা
তাপসারণ্যমতুলং দিব্যকাননদর্শনম্
61.58
বসিষ্ঠভৃগ্বত্রিসমৈস্তাপসৈরুপশোভিতম্
নিয়তৈঃ সংয়তাহারৈর্দমশৌচসমন্বিতৈঃ
61.59
অব্ভক্ষৈর্বায়ুভক্ষৈশ্চ পত্রাহারৈস্তথৈব চ
জিতেন্দ্রিয়ৈর্মহাভাগৈঃ স্বর্গমার্গদিদৃক্ষুভিঃ
61.60
বল্কলাজিনসংবীতৈর্মুনিভিঃ সংয়তেন্দ্রিয়ৈঃ
তাপসাধ্যুষিতং রম্যং দদর্শাশ্রমমণ্ডলম্
61.61
সা দৃষ্ট্বৈবাশ্রমপদং নানামৃগনিষেবিতম্
শাখামৃগগণৈশ্চৈব তাপসৈশ্চ সমন্বিতম্
61.62
সুভ্রূঃ সুকেশী সুশ্রোণী সুকুচা সুদ্বিজাননা
বর্চস্বিনী সুপ্রতিষ্ঠা স্বঞ্চিতোদ্যতগামিনী
61.63
সা বিবেশাশ্রমপদং বীরসেনসুতপ্রিয়া
যোষিদ্রত্নং মহাভাগা দময়ন্তী মনস্বিনী
61.64
সাভিবাদ্য তপোবৃদ্ধান্বিনয়াবনতা স্থিতা
স্বাগতং ত ইতি প্রোক্তা তৈঃ সর্বৈস্তাপসৈশ্চ সা
61.65
পূজাং চাস্যা যথান্যায়ং কৃত্বা তত্র তপোধনাঃ
আস্যতামিত্যথোচুস্তে ব্রূহি কিং করবামহে
61.66
তানুবাচ বরারোহা কচ্চিদ্ভগবতামিহ
তপস্যগ্নিষু ধর্মেষু মৃগপক্ষিষু চানঘাঃ
কুশলং বো মহাভাগাঃ স্বধর্মচরণেষু চ
61.67
তৈরুক্তা কুশলং ভদ্রে সর্বত্রেতি যশস্বিনী
ব্রূহি সর্বানবদ্যাঙ্গি কা ত্বং কিং চ চিকীর্ষসি
61.68
দৃষ্ট্বৈব তে পরং রূপং দ্যুতিং চ পরমামিহ
বিস্ময়ো নঃ সমুত্পন্নঃ সমাশ্বসিহি মা শুচঃ
61.69
অস্যারণ্যস্য মহতী দেবতা বা মহীভৃতঃ
অস্যা নু নদ্যাঃ কল্যাণি বদ সত্যমনিন্দিতে
61.70
সাব্রবীত্তানৃষীন্নাহমরণ্যস্যাস্য দেবতা
ন চাপ্যস্য গিরের্বিপ্রা ন নদ্যা দেবতাপ্যহম্
61.71
মানুষীং মাং বিজানীত যূয়ং সর্বে তপোধনাঃ
বিস্তরেণাভিধাস্যামি তন্মে শৃণুত সর্বশঃ
61.72
বিদর্ভেষু মহীপালো ভীমো নাম মহাদ্যুতিঃ
তস্য মাং তনয়াং সর্বে জানীত দ্বিজসত্তমাঃ
61.73
নিষধাধিপতির্ধীমান্নলো নাম মহায়শাঃ
বীরঃ সংগ্রামজিদ্বিদ্বান্মম ভর্তা বিশাং পতিঃ
61.74
দেবতাভ্যর্চনপরো দ্বিজাতিজনবত্সলঃ
গোপ্তা নিষধবংশস্য মহাভাগো মহাদ্যুতিঃ
61.75
সত্যবাগ্ধর্মবিত্প্রাজ্ঞঃ সত্যসংধোঽরিমর্দনঃ
ব্রহ্মণ্যো দৈবতপরঃ শ্রীমান্পরপুরংজয়ঃ
61.76
নলো নাম নৃপশ্রেষ্ঠো দেবরাজসমদ্যুতিঃ
মম ভর্তা বিশালাক্ষঃ পূর্ণেন্দুবদনোঽরিহা
61.77
আহর্তা ক্রতুমুখ্যানাং বেদবেদাঙ্গপারগঃ
সপত্নানাং মৃধে হন্তা রবিসোমসমপ্রভঃ
61.78
স কৈশ্চিন্নিকৃতিপ্রজ্ঞৈরকল্যাণৈর্নরাধমৈঃ
আহূয় পৃথিবীপালঃ সত্যধর্মপরায়ণঃ
দেবনে কুশলৈর্জিহ্মৈর্জিতো রাজ্যং বসূনি চ
61.79
তস্য মামবগচ্ছধ্বং ভার্যাং রাজর্ষভস্য বৈ
দময়ন্তীতি বিখ্যাতাং ভর্তৃদর্শনলালসাম্
61.80
সা বনানি গিরীংশ্চৈব সরাংসি সরিতস্তথা
পল্বলানি চ রম্যাণি তথারণ্যানি সর্বশঃ
61.81
অন্বেষমাণা ভর্তারং নলং রণবিশারদম্
মহাত্মানং কৃতাস্ত্রং চ বিচরামীহ দুঃখিতা
61.82
কচ্চিদ্ভগবতাং পুণ্যং তপোবনমিদং নৃপঃ
ভবেত্প্রাপ্তো নলো নাম নিষধানাং জনাধিপঃ
61.83
যত্কৃতেঽহমিদং বিপ্রাঃ প্রপন্না ভৃশদারুণম্
বনং প্রতিভয়ং ঘোরং শার্দূলমৃগসেবিতম্
61.84
যদি কৈশ্চিদহোরাত্রৈর্ন দ্রক্ষ্যামি নলং নৃপম্
আত্মানং শ্রেয়সা যোক্ষ্যে দেহস্যাস্য বিমোচনাৎ
61.85
কো নু মে জীবিতেনার্থস্তমৃতে পুরুষর্ষভম্
কথং ভবিষ্যাম্যদ্যাহং ভর্তৃশোকাভিপীডিতা
61.86
এবং বিলপতীমেকামরণ্যে ভীমনন্দিনীম্
দময়ন্তীমথোচুস্তে তাপসাঃ সত্যবাদিনঃ
61.87
উদর্কস্তব কল্যাণি কল্যাণো ভবিতা শুভে
বয়ং পশ্যাম তপসা ক্ষিপ্রং দ্রক্ষ্যসি নৈষধম্
61.88
নিষধানামধিপতিং নলং রিপুনিঘাতিনম্
ভৈমি ধর্মভৃতাং শ্রেষ্ঠং দ্রক্ষ্যসে বিগতজ্বরম্
61.89
বিমুক্তং সর্বপাপেভ্যঃ সর্বরত্নসমন্বিতম্
তদেব নগরশ্রেষ্ঠং প্রশাসন্তমরিংদমম্
61.90
দ্বিষতাং ভয়কর্তারং সুহৃদাং শোকনাশনম্
পতিং দ্রক্ষ্যসি কল্যাণি কল্যাণাভিজনং নৃপম্
61.91
এবমুক্ত্বা নলস্যেষ্টাং মহিষীং পার্থিবাত্মজাম্
অন্তর্হিতাস্তাপসাস্তে সাগ্নিহোত্রাশ্রমাস্তদা
61.92
সা দৃষ্ট্বা মহদাশ্চর্যং বিস্মিতা অভবত্তদা
দময়ন্ত্যনবদ্যাঙ্গী বীরসেননৃপস্নুষা
61.93
কিং নু স্বপ্নো ময়া দৃষ্টঃ কোঽয়ং বিধিরিহাভবৎ
ক্ব নু তে তাপসাঃ সর্বে ক্ব তদাশ্রমমণ্ডলম্
61.94
ক্ব সা পুণ্যজলা রম্যা নানাদ্বিজনিষেবিতা
নদী তে চ নগা হৃদ্যাঃ ফলপুষ্পোপশোভিতাঃ
61.95
ধ্যাত্বা চিরং ভীমসুতা দময়ন্তী শুচিস্মিতা
ভর্তৃশোকপরা দীনা বিবর্ণবদনাভবৎ
61.96
সা গত্বাথাপরাং ভূমিং বাষ্পসংদিগ্ধয়া গিরা
বিললাপাশ্রুপূর্ণাক্ষী দৃষ্ট্বাশোকতরুং ততঃ
61.97
উপগম্য তরুশ্রেষ্ঠমশোকং পুষ্পিতং তদা
পল্লবাপীডিতং হৃদ্যং বিহংগৈরনুনাদিতম্
61.98
অহো বতায়মগমঃ শ্রীমানস্মিন্বনান্তরে
আপীডৈর্বহুভির্ভাতি শ্রীমান্দ্রমিডরাডিব
61.99
বিশোকাং কুরু মাং ক্ষিপ্রমশোক প্রিয়দর্শন
বীতশোকভয়াবাধং কচ্চিত্ত্বং দৃষ্টবান্নৃপম্
61.100
নলং নামারিদমনং দময়ন্ত্যাঃ প্রিয়ং পতিম্
নিষধানামধিপতিং দৃষ্টবানসি মে প্রিয়ম্
61.101
একবস্ত্রার্ধসংবীতং সুকুমারতনুত্বচম্
ব্যসনেনার্দিতং বীরমরণ্যমিদমাগতম্
61.102
যথা বিশোকা গচ্ছেয়মশোকনগ তত্কুরু
সত্যনামা ভবাশোক মম শোকবিনাশনাৎ
61.103
এবং সাশোকবৃক্ষং তমার্তা ত্রিঃ পরিগম্য হ
জগাম দারুণতরং দেশং ভৈমী বরাঙ্গনা
61.104
সা দদর্শ নগান্নৈকান্নৈকাশ্চ সরিতস্তথা
নৈকাংশ্চ পর্বতান্রম্যান্নৈকাংশ্চ মৃগপক্ষিণঃ
61.105
কন্দরাংশ্চ নিতম্বাংশ্চ নদাংশ্চাদ্ভুতদর্শনান্
দদর্শ সা ভীমসুতা পতিমন্বেষতী তদা
61.106
গত্বা প্রকৃষ্টমধ্বানং দময়ন্তী শুচিস্মিতা
দদর্শাথ মহাসার্থং হস্ত্যশ্বরথসংকুলম্
61.107
উত্তরন্তং নদীং রম্যাং প্রসন্নসলিলাং শুভাম্
সুশীততোয়াং বিস্তীর্ণাং হ্রদিনীং বেতসৈর্বৃতাম্
61.108
প্রোদ্ঘুষ্টাং ক্রৌঞ্চকুররৈশ্চক্রবাকোপকূজিতাম্
কূর্মগ্রাহঝষাকীর্ণাং পুলিনদ্বীপশোভিতাম্
61.109
সা দৃষ্ট্বৈব মহাসার্থং নলপত্নী যশস্বিনী
উপসর্প্য বরারোহা জনমধ্যং বিবেশ হ
61.110
উন্মত্তরূপা শোকার্তা তথা বস্ত্রার্ধসংবৃতা
কৃশা বিবর্ণা মলিনা পাংসুধ্বস্তশিরোরুহা
61.111
তাং দৃষ্ট্বা তত্র মনুজাঃ কেচিদ্ভীতাঃ প্রদুদ্রুবুঃ
কেচিচ্চিন্তাপরাস্তস্থুঃ কেচিত্তত্র বিচুক্রুশুঃ
61.112
প্রহসন্তি স্ম তাং কেচিদভ্যসূয়ন্ত চাপরে
চক্রুস্তস্যাং দয়াং কেচিত্পপ্রচ্ছুশ্চাপি ভারত
61.113
কাসি কস্যাসি কল্যাণি কিং বা মৃগয়সে বনে
ত্বাং দৃষ্ট্বা ব্যথিতাঃ স্মেহ কচ্চিত্ত্বমসি মানুষী
61.114
বদ সত্যং বনস্যাস্য পর্বতস্যাথ বা দিশঃ
দেবতা ত্বং হি কল্যাণি ত্বাং বয়ং শরণং গতাঃ
61.115
যক্ষী বা রাক্ষসী বা ত্বমুতাহোঽসি বরাঙ্গনা
সর্বথা কুরু নঃ স্বস্তি রক্ষস্বাস্মাননিন্দিতে
61.116
যথায়ং সর্বথা সার্থঃ ক্ষেমী শীঘ্রমিতো ব্রজেৎ
তথা বিধত্স্ব কল্যাণি ত্বাং বয়ং শরণং গতাঃ
61.117
তথোক্তা তেন সার্থেন দময়ন্তী নৃপাত্মজা
প্রত্যুবাচ ততঃ সাধ্বী ভর্তৃব্যসনদুঃখিতা
সার্থবাহং চ সার্থং চ জনা যে চাত্র কেচন
61.118
যূনঃ স্থবিরবালাশ্চ সার্থস্য চ পুরোগমাঃ
মানুষীং মাং বিজানীত মনুজাধিপতেঃ সুতাম্
নৃপস্নুষাং রাজভার্যাং ভর্তৃদর্শনলালসাম্
61.119
বিদর্ভরাণ্মম পিতা ভর্তা রাজা চ নৈষধঃ
নলো নাম মহাভাগস্তং মার্গাম্যপরাজিতম্
61.120
যদি জানীত নৃপতিং ক্ষিপ্রং শংসত মে প্রিয়ম্
নলং পার্থিবশার্দূলমমিত্রগণসূদনম্
61.121
তামুবাচানবদ্যাঙ্গীং সার্থস্য মহতঃ প্রভুঃ
সার্থবাহঃ শুচির্নাম শৃণু কল্যাণি মদ্বচঃ
61.122
অহং সার্থস্য নেতা বৈ সার্থবাহঃ শুচিস্মিতে
মনুষ্যং নলনামানং ন পশ্যামি যশস্বিনি
61.123
কুঞ্জরদ্বীপিমহিষশার্দূলর্ক্ষমৃগানপি
পশ্যাম্যস্মিন্বনে কষ্টে অমনুষ্যনিষেবিতে
তথা নো যক্ষরাডদ্য মণিভদ্রঃ প্রসীদতু
61.124
সাব্রবীদ্বণিজঃ সর্বান্সার্থবাহং চ তং ততঃ
ক্ব নু যাস্যসি সার্থোঽয়মেতদাখ্যাতুমর্হথ
61.125
সার্থবাহ উবাচ
সার্থোঽয়ং চেদিরাজস্য সুবাহোঃ সত্যবাদিনঃ
ক্ষিপ্রং জনপদং গন্তা লাভায় মনুজাত্মজে