Utshovঅধ্যায় 60
60.1
বৃহদশ্ব উবাচ
অপক্রান্তে নলে রাজন্দময়ন্তী গতক্লমা
অবুধ্যত বরারোহা সংত্রস্তা বিজনে বনে
60.2
সাপশ্যমানা ভর্তারং দুঃখশোকসমন্বিতা
প্রাক্রোশদুচ্চৈঃ সংত্রস্তা মহারাজেতি নৈষধম্
60.3
হা নাথ হা মহারাজ হা স্বামিন্কিং জহাসি মাম্
হা হতাস্মি বিনষ্টাস্মি ভীতাস্মি বিজনে বনে
60.4
ননু নাম মহারাজ ধর্মজ্ঞঃ সত্যবাগসি
কথমুক্ত্বা তথাসত্যং সুপ্তামুত্সৃজ্য মাং গতঃ
60.5
কথমুত্সৃজ্য গন্তাসি বশ্যাং ভার্যামনুব্রতাম্
বিশেষতোঽনপকৃতে পরেণাপকৃতে সতি
60.6
শক্ষ্যসে তা গিরঃ সত্যাঃ কর্তুং ময়ি নরেশ্বর
যাস্ত্বয়া লোকপালানাং সংনিধৌ কথিতাঃ পুরা
60.7
পর্যাপ্তঃ পরিহাসোঽয়মেতাবান্পুরুষর্ষভ
ভীতাহমস্মি দুর্ধর্ষ দর্শয়াত্মানমীশ্বর
60.8
দৃশ্যসে দৃশ্যসে রাজন্নেষ তিষ্ঠসি নৈষধ
আবার্য গুল্মৈরাত্মানং কিং মাং ন প্রতিভাষসে
60.9
নৃশংসং বত রাজেন্দ্র যন্মামেবংগতামিহ
বিলপন্তীং সমালিঙ্গ্য নাশ্বাসয়সি পার্থিব
60.10
ন শোচাম্যহমাত্মানং ন চান্যদপি কিংচন
কথং নু ভবিতাস্যেক ইতি ত্বাং নৃপ শোচিমি
60.11
কথং নু রাজংস্তৃষিতঃ ক্ষুধিতঃ শ্রমকর্শিতঃ
সায়াহ্নে বৃক্ষমূলেষু মামপশ্যন্ভবিষ্যসি
60.12
ততঃ সা তীব্রশোকার্তা প্রদীপ্তেব চ মন্যুনা
ইতশ্চেতশ্চ রুদতী পর্যধাবত দুঃখিতা
60.13
মুহুরুত্পততে বালা মুহুঃ পততি বিহ্বলা
মুহুরালীয়তে ভীতা মুহুঃ ক্রোশতি রোদিতি
60.14
সা তীব্রশোকসংতপ্তা মুহুর্নিঃশ্বস্য বিহ্বলা
উবাচ ভৈমী নিষ্ক্রম্য রোদমানা পতিব্রতা
60.15
যস্যাভিশাপাদ্দুঃখার্তো দুঃখং বিন্দতি নৈষধঃ
তস্য ভূতস্য তদ্দুঃখাদ্দুঃখমভ্যধিকং ভবেৎ
60.16
অপাপচেতসং পাপো য এবং কৃতবান্নলম্
তস্মাদ্দুঃখতরং প্রাপ্য জীবত্বসুখজীবিকাম্
60.17
এবং তু বিলপন্তী সা রাজ্ঞো ভার্যা মহাত্মনঃ
অন্বেষতি স্ম ভর্তারং বনে শ্বাপদসেবিতে
60.18
উন্মত্তবদ্ভীমসুতা বিলপন্তী ততস্ততঃ
হা হা রাজন্নিতি মুহুরিতশ্চেতশ্চ ধাবতি
60.19
তাং শুষ্যমাণামত্যর্থং কুররীমিব বাশতীম্
করুণং বহু শোচন্তীং বিলপন্তীং মুহুর্মুহুঃ
60.20
সহসাভ্যাগতাং ভৈমীমভ্যাশপরিবর্তিনীম্
জগ্রাহাজগরো গ্রাহো মহাকায়ঃ ক্ষুধান্বিতঃ
60.21
সা গ্রস্যমানা গ্রাহেণ শোকেন চ পরাজিতা
নাত্মানং শোচতি তথা যথা শোচতি নৈষধম্
60.22
হা নাথ মামিহ বনে গ্রস্যমানামনাথবৎ
গ্রাহেণানেন বিপিনে কিমর্থং নাভিধাবসি
60.23
কথং ভবিষ্যসি পুনর্মামনুস্মৃত্য নৈষধ
পাপান্মুক্তঃ পুনর্লব্ধ্বা বুদ্ধিং চেতো ধনানি চ
60.24
শ্রান্তস্য তে ক্ষুধার্তস্য পরিগ্লানস্য নৈষধ
কঃ শ্রমং রাজশার্দূল নাশয়িষ্যতি মানদ
60.25
তামকস্মান্মৃগব্যাধো বিচরন্গহনে বনে
আক্রন্দতীমুপশ্রুত্য জবেনাভিসসার হ
60.26
তাং স দৃষ্ট্বা তথা গ্রস্তামুরগেণায়তেক্ষণাম্
ত্বরমাণো মৃগব্যাধঃ সমভিক্রম্য বেগিতঃ
60.27
মুখতঃ পাতয়ামাস শস্ত্রেণ নিশিতেন হ
নির্বিচেষ্টং ভুজংগং তং বিশস্য মৃগজীবনঃ
60.28
মোক্ষয়িত্বা চ তাং ব্যাধঃ প্রক্ষাল্য সলিলেন চ
সমাশ্বাস্য কৃতাহারামথ পপ্রচ্ছ ভারত
60.29
কস্য ত্বং মৃগশাবাক্ষি কথং চাভ্যাগতা বনম্
কথং চেদং মহত্কৃচ্ছ্রং প্রাপ্তবত্যসি ভামিনি
60.30
দময়ন্তী তথা তেন পৃচ্ছ্যমানা বিশাং পতে
সর্বমেতদ্যথাবৃত্তমাচচক্ষেঽস্য ভারত
60.31
তামর্ধবস্ত্রসংবীতাং পীনশ্রোণিপয়োধরাম্
সুকুমারানবদ্যাঙ্গীং পূর্ণচন্দ্রনিভাননাম্
60.32
অরালপক্ষ্মনয়নাং তথা মধুরভাষিণীম্
লক্ষয়িত্বা মৃগব্যাধঃ কামস্য বশমেয়িবান্
60.33
তামথ শ্লক্ষ্ণয়া বাচা লুব্ধকো মৃদুপূর্বয়া
সান্ত্বয়ামাস কামার্তস্তদবুধ্যত ভামিনী
60.34
দময়ন্তী তু তং দুষ্টমুপলভ্য পতিব্রতা
তীব্ররোষসমাবিষ্টা প্রজজ্বালেব মন্যুনা
60.35
স তু পাপমতিঃ ক্ষুদ্রঃ প্রধর্ষয়িতুমাতুরঃ
দুর্ধর্ষাং তর্কয়ামাস দীপ্তামগ্নিশিখামিব
60.36
দময়ন্তী তু দুঃখার্তা পতিরাজ্যবিনাকৃতা
অতীতবাক্পথে কালে শশাপৈনং রুষা কিল
60.37
যথাহং নৈষধাদন্যং মনসাপি ন চিন্তয়ে
তথায়ং পততাং ক্ষুদ্রঃ পরাসুর্মৃগজীবনঃ
60.38
উক্তমাত্রে তু বচনে তয়া স মৃগজীবনঃ
ব্যসুঃ পপাত মেদিন্যামগ্নিদগ্ধ ইব দ্রুমঃ